Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Mai 2017

Ti duti na aye mingi ape aga na ngia

Ti duti na aye mingi ape aga na ngia

DANIEL NA MIRIAM asara mariage na septembre ti ngu 2000, na ala sara kodro lani na gbata ti Barcelone, na Espagne. Daniel atene: “Gigi ti e ayeke lani pendere. Kua ti nginza ti e amû lege na e ti te ye na yâ ti anzoni restaurant, ti voyagé na akodro-wande nga ti yü abongo ti nginza. Nga, e fa tënë lakue.” Me na pekoni, mbeni ye asi.

Na ngoi ti mbeni kota bungbi so a sara na ngu 2006, Daniel amä mbeni diskur so na yâ ni a hunda tënë so: “E yeke sara kue ti mû maboko na azo so ‘atambela tongana azo so ngangu ti ala ahunzi kue, so a yeke gue na ala ti fâ ala’ ti komanse ti tambela na ndö ti lege so ayeke gue na fini ti lakue lakue? (aProv. 24:11). Diskur so afa so a yeke ngbanga ti e ti fa na ala tënë ti Bible ndali ti so a yeke mû lege na ala ti sö fini ti ala (Kus. 20:26, 27). Daniel adabe ti lo, lo tene: “Mbi pensé lani so Jéhovah ayeke sara tënë na mbi la.” Na yâ ti diskur ni, a tene nga so ti sara kua ti Jéhovah mingi ayeke mû na e ngia mingi. Daniel ahinga so tënë so ayeke tâ tënë. Miriam akomanse lani ti sara kua ti pionnier awe, na lo wara anzoni ye mingi dä.

Diskur ni andu bê ti Daniel mingi asara si lo tene so a yeke ngoi ti tene lo sara mbeni kota changement na yâ ti gigi ti lo. Lo kiri na angbonga so lo yeke sara na kua na gbe ni, lo ga pionnier nga lo pensé na ndö ti ngia so lo na Miriam alingbi ti wara tongana ala gue ti fa tënë na mbeni ndo so a bezoin awafango tënë ti Royaume mingi dä.

KOZONI AKPALE, NA PEKONI PENDERE SANGO

Na mai ti ngu 2007, Daniel na Miriam ake kua ti nginza ti ala na ala gue na Panama, mbeni kodro so ala si dä kozo awe. Fini territoire ti ala ayeke azoa ti Bocas del Toro Archipelago, so ayeke na yâ ti Ngu-ingo ti Caraïbe, so mingi ni azo so a iri ala Ngäbé ayeke dä. Daniel na Miriam apensé so nginza so ala bata ni alingbi ti mû lege na ala ti ngbâ na Panama nze miombe tongaso.

Ti gue na azoa so, ala yeke hon na bateau wala na vélo, na ala dabe ti ala na kozo voyage so ala sara na vélo. Ala sara kilomètre 32. Ala monté akete hoto na gbe ti lâ so asu mingi. Daniel afatigué mingi na a ngbâ kete lo évanouir. Ye oko, na lege, asewa so ayeke ti mara ti Ngäbé ayamba ala nzoni, mbilimbili na peko ti so Daniel na Miriam amanda ambeni tënë na yanga ti kodro ti ala. A ninga ape, ala yeke na a-étude 23.

Ye oko, tongana nginza ti ala ahunzi, ngia ti ala aga vundu. Daniel atene: “Na ngu ti lê na lê ti e, e to nda ti pensé na ndö ti kiringo na Espagne. Vundu asara e mingi ti zia a-étude ti e.” Me nze oko na pekoni, ala wara mbeni pendere sango. Miriam atene: “A tisa e ti sara kua ti pionnier spécial. A nzere na e mingi ti ngbâ ti sara kua ti e.”

KOTA NGIA SO ALA WARA

Ndali ti achangement so a sara na yâ ti bungbi ti Jéhovah, a hunda na Daniel na Miriam ti zia kua ti pionnier spécial na ngu 2015. Ala yeke sara fadeso nyen? Ala zia bê ti ala na zendo so ayeke na Psaume 37:5 so atene: “Zia si Jéhovah afa lege na mo; zia bê ti mo na ndö ti lo, na lo yeke sara ye ndali ti mo.” Ala wara mbeni kua so amû maboko na ala ti sara kua ti pionnier, na laso ala yeke na yâ ti mbeni congrégation na Veraguas, so ayeke na Panama.

Daniel atene: “Kozo ti tene e zia Espagne, e hinga lani biani ape wala e lingbi ti duti na aye mingi pëpe. Me laso e yeke sara ni, na mbeni kota ye amanke e ape.” Kota ngia wa la ala wara? Ala tene: “Ti mû maboko na azo so asara terê ti ala kete ti hinga Jéhovah amû na e mbeni ngia so mara ni ayeke dä ape!”