Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) MAI 2016

Wara ye ti nzoni mingi na lege ti aye so Jéhovah amû na e

Wara ye ti nzoni mingi na lege ti aye so Jéhovah amû na e

“Mbi yeke [Jéhovah] Nzapa ti mo, Lo so awa mo si mo ga nzoni.”—ÉS. 48:17.

ABIA: 117114

1, 2. (a) A-Témoin ti Jéhovah abâ Bible tongana nyen? (b) Ti mo, mbage ti Bible wa la mo ye ni mingi?

A-TÉMOIN TI JÉHOVAH aye Bible mingi. E yeke wara na yâ ni anzoni wango so adë bê ti e nga amû na e beku (aRom. 15:4). E bâ Bible pëpe tongana mbeni mbeti so azo la asara ni na ndara ti ala, me e bâ ni “tongana tënë ti Nzapa, na a yeke tënë ti lo biani”.—1 aThes. 2:13.

2 Kite ayeke dä ape so zo oko oko ayeke na ambage ti Bible so lo ye ni mingi. Ambeni aye ti ala aÉvangile ndali ti so afa apendere sarango ye ti Jéhovah tongana ti so asigigi lani na yâ ti asarango ye ti Molenge ti lo (Jean 14:9). Ambeni aye ti ala mingi ambage ti Bible so andu aprophétie, tongana Apocalypse so afa “aye so a ga nduru ti si awe.” (Apoc. 1:1). Zo wa la na popo ti e awara dengo pëpe tongana lo diko Psaume? Zo wa la awara anzoni ye pëpe na lege ti anzoni wango so ayeke na yâ ti mbeti ti aProverbe? Bible ayeke biani mbeti so a sara ni ndali ti azo kue.

3, 4. (a) E bâ ambeti ti e tongana nyen? (b) Ambeti wa la e yeke na ni so a sigigi na ni gi ndali ti ambeni zo?

3 So e ye Bible mingi, a sara si e ye nga mingi ambeti ti e so azi nda ti Bible ni. Na tapande, e ye mingi akobe ti yingo so e yeke wara na lege ti abuku, abrochure, apériodique nga na ambeni  mbeti ti e. E hinga so aye so Jéhovah amû na e so amû maboko na e ti ngbâ nduru na lo nga ti “duti nzoni na yâ ti mabe”.—Tite 2:2.

4 Na ndo ti ambeti so a sigigi na ni ndali ti aTémoin ti Jéhovah kue, e yeke na ambeti so asara tënë na ndo ti Bible so a sigigi na ni gi ndali ti ambeni zo. A sigigi na ambeni ti mû maboko na amaseka; ambeni ayeke ti mû maboko na ababâ na amama. A sigigi na mingi ti ambeti so a-imprimé ni wala so a zia na ndo ti site ti e ndali ti azo so ayeke aTémoin ape. Gbâ ti aye so kue adabe ti e so Jéhovah asara ye alingbi na zendo so lo mû ti ‘sara pumba teti azo kue, pumba ti ye ti mafuta’.—És. 25:6.

5. Nyen la e hinga na bê ti e kue so Jéhovah abâ ni na nene ni?

5 Biani, mingi ti e aye ti wara ngoi mingi ti diko Bible nga na ambeti so asara tënë na ndo ti Bible. E hinga na bê ti e kue so Jéhovah ayeke bâ na nene ni angangu so e yeke sara ti ‘sara kusala nzoni na ngoi’ ti e ti diko Bible lakue nga ti manda ye e wani (aÉph. 5:15, 16). Ti tâ tënë ni, angoi so e yeke mû ti diko na ambeti kue so e yeke na ni alingbi ti duti nde nde. Me a lingbi e sara hange na mbeni kpale. Kpale wa?

6. Nyen la alingbi ti sara si e wara pëpe aye ti nzoni na lege ti aye so Jéhovah amû na e na lege ti yingo?

6 Tongana e sara hange ape, e peut ti pensé so ambeni ye so Jéhovah amû na e na lege ti yingo abâ ti lo e ape. Na tapande, nyen la ayeke si tongana e bâ so mbeni mbage ti Bible abâ ti lo e ape? Ka tongana e yeke pëpe na popo ti azo so a sigigi na mbeni mbeti ndali ti ala? E yeke diko atënë ti yâ ni gi na loro loro? E yeke diko ni ape? Tongana e sara tongaso, andâ e wani e ke mbeni ye so alingbi ti mû maboko na e mingi. Tongana nyen la e lingbi ti tï pëpe na yâ ti kpale so? A lingbi zo oko oko agirisa pëpe so akobe ti yingo so e yeke wara alondo na Nzapa. Na lege ti prophète Ésaïe, lo tene: “Mbi yeke [Jéhovah] Nzapa ti mo, Lo so awa mo si mo ga nzoni.” (És. 48:17). Na yâ ti article so, e yeke bâ awango ota so ayeke mû maboko na e ti wara ye ti nzoni na lege ti ambage ti Bible kue nga na ambeti nde nde so a yeke sigigi na ni.

AWANGO SO AYEKE MÛ MABOKO NA E TI WARA AYE TI NZONI NA DIKONGO BIBLE

7. Ngbanga ti nyen a lingbi e diko Bible na nzoni bibe?

7 Diko Bible na nzoni bibe. Bible atene polele so “atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa, na a yeke nzoni”. (2 Tim. 3:16). Tâ tënë, a sara ambeni mbage ti Bible lani gi ndali ti zo oko wala ndali mbeni groupe ti azo. Ndani la a lingbi e diko ni na nzoni bibe. Mbeni ita-koli atene: “Na ngoi so mbi yeke diko Bible, mbi yeke dabe ti mbi so a lingbi ti wara gbâ ti aye ti manda na yâ ti mbeni mbaï oko. So mbi hinga tongaso apusu mbi ti gi ambeni ye ti manda so ayeke polele ape.” Kozo si e diko Bible, a yeke nzoni e sambela Jéhovah ti leke bibe ti e nga ti mû na e ndara si e hinga aye so lo ye ti tene e manda.—Esdras 7:10; Diko Jacques 1:5.

Mo yeke wara aye ti nzoni mingi na ngoi so mo yeke diko Bible? (Bâ paragraphe 7)

8, 9. (a) Na ngoi so e yeke diko Bible, atënë wa la e lingbi ti hunda tere ti e na ni? (b) Aye so a hunda na a-ancien afa na e nyen na ndo ti Jéhovah?

8 Hunda atënë. Na ngoi so mo diko mbeni versê ti Bible, luti kete nga hunda tere ti mo na atënë so: ‘Ye so afa na mbi nyen na ndo ti Jéhovah? Tongana nyen la mbi lingbi ti sara ye alingbi na tënë so na yâ ti gigi ti mbi? Tongana nyen la mbi lingbi ti sara kua na ni ti mû maboko na ambeni zo?’ Tongana e gbu li ti e na ndo ti ahundango ndo tongaso, e yeke wara biani aye ti nzoni mingi na ngoi ti dikongo Bible ti e. Na tapande,  gbu li na ndo ti versê so afa aye so a hunda na a-ancien ti sara. (Diko 1 Timothée 3:2-7.) So mingi ti e ayeke a-ancien ape, e lingbi kozo ti pensé so atënë ni abâ e ape. Me tongana e gbu li na ndo ti akiringo tënë na ahundango ndo so, e yeke bâ so e kue e lingbi biani ti wara ye ti nzoni na alege mingi tongana e sara ye alingbi na atënë ti yâ ti versê ni.

9 “Ye so afa na mbi nyen na ndo ti Jéhovah?” So Jéhovah amû na e molongo ti aye so a hunda na a-ancien so, lo fa so kua ti ancien ayeke kota kua mingi. Lo ye ti tene ala zia nzoni tapande. Nga, ala yeke kiri tënë na lo alingbi na lege so ala yeke sara na ye na mbage ti congrégation “so lo vo na mênë ti Molenge ti lo wani.” (Kus. 20:28). Jéhovah aye ti tene a-ancien so lo zia na ndo ti e abata e si e duti nzoni (És. 32:1, 2). Na lege ti atënë so, aye so Bible ahunda na a-ancien so afa na e tongana nyen la Jéhovah ayeke bâ lege ti e.

10, 11. (a) Tongana e diko aye so a hunda na a-ancien, tongana nyen la e wani e lingbi ti sara ye alingbi na ni na yâ ti gigi ti e? (b) Tongana nyen la e lingbi ti sara kua na aye so a hunda na ala so ti mû maboko na ambeni zo?

10 “Tongana nyen la mbi lingbi ti sara ye alingbi na tënë so na yâ ti gigi ti mbi?” A lingbi mbeni ita so ayeke ancien agbu li ti lo ngoi na ngoi na ndo ti aye so a hunda na a-ancien, ti bâ ambeni ye wa la lo lingbi ti sara achangement dä ahon ti kozo. A lingbi mbeni ita-koli so ayeke gi “kusala ti zo ti bango ndo na ndo ti congrégation” asara ngangu ti sara ye alingbi na aye so a hunda so kue (1 Tim. 3:1). Me ti tâ tënë ni, Chrétien oko oko alingbi ti sara ye alingbi na aye so afa na yâ ti aversê so, ndali ti so mingi ti aye ni so a yeke aye so Jéhovah ahunda na e kue ti sara ni. Na tapande, Jéhovah aye ti tene aChrétien kue asara ye na lege ni nga ala bata bibe ti ala nzoni (aPhil. 4:5; 1 Pi. 4:7). Tongana a-ancien afa so ala yeke “atapande ndali ti angasangbaga ni,” e lingbi ti manda ye na lege ti ala nga ti “mû tapande ti mabe ti ala.”—1 Pi. 5:3; aHéb. 13:7.

11 “Tongana nyen la mbi lingbi ti sara kua na ni ti mû maboko na ambeni zo?” E lingbi ti fa na azo so aye tâ tënë nga na ala so e yeke manda Bible na ala aye so Bible ahunda na a-ancien ti sara ti mû maboko na ala ti bâ kangbi so ayeke na popo ti a-ancien ti congrégation nga na akota zo ti a-eglize so atene ala yeke aChrétien. Nga, tongana e diko aye ni so, e lingbi ti dabe ti e na ngangu  kua so a-ancien ti congrégation ti e wani ayeke sara ndali ti e. Tongana e gbu li ti e ti bâ tongana nyen la ala yeke sara akua mingi, e yeke “ne azo so ayeke sara kua ngangu” na popo ti e (1 aThes. 5:12). Tongana e ngbâ ti ne azo so ayeke bâ ndo na ndo ti e so na bê ti kue, e yeke sara si ala wara ngia mingi.—aHéb. 13:17.

12, 13. (a) Tongana e sara kua na aye so e yeke na ni, mara ti recherche wa la e lingbi ti sara? (b) Tapande wa la afa so ti hinga ye na ndo ti aye so asi ândö alingbi ti fa na e ambeni ye so e hinga ni polele hio ape?

12 Sara recherche. Tongana e sara kua na aye so e yeke na ni, e lingbi ti wara akiringo tënë na ahunda so:

  • Zo wa la asû mbage ti Bible so?

  • Lo sû ni na ndo wa nga lawa?

  • Akota ye wa la apassé na ngoi so a sû mbage ti Bible so?

Tongana e wara akiringo tënë na ahunda tongaso, a yeke mû maboko na e ti bâ ambeni ye so e hinga ni polele hio ape.

13 Na tapande, Ézéchiel 14:13, 14 atene: “Tongana mbeni sese asara siokpari ti ke Mbi na lege ti kengo-ndia, na Mbi ye tïtî Mbi na ndo ni, Mbi gbanzi kobe na sese ni so, Mbi to boma na ndo ni, na Mbi lungula zo na nyama na yâ sese ni so, même tongana azo ota so, Noé, Daniel, na Job, ayeke na yâ ni, ala lingbi bata gi fini ti ala mveni na lege ti mbilimbili ti ala, Seigneur L’Éternel atene.” Tongana e sara mbeni recherche, e yeke bâ so a sû mbage ti versê ti Ézéchiel so na ngu 612 tongaso kozo na Christ. Na ngoi ni so, Noé na Job akui asara angu ngbangbo mingi awe, me Jéhovah angbâ ti dabe na dutingo be-ta-zo ti ala. Me Daniel angbâ ti lo na fini lani. Peut-être lo ga nduru ti wara ngu bale-use awe wala lo hon ni kete na ngoi so Jéhovah atene so lo yeke zo ti mbilimbili tongana Noé nga na Job. Nyen la e manda ge? Jéhovah ayeke bâ awakua ti lo so ayeke be-ta-zo nga lo bâ ala na nene ni même ala so ayeke amaseka.—Ps. 148:12-14.

WARA YE TI NZONI NA LEGE TI AMBETI TI E KUE

14. Tongana nyen la ambeti so a sigigi na ni ndali ti amaseka amû maboko na ala? Tongana nyen la ambeni zo nga alingbi ti wara aye ti nzoni dä? (Bâ foto so ayeke na tongo nda ti article ni.)

14 Tongana ti so mandango ambage ti Bible kue ayeke ga na e aye ti nzoni, e lingbi nga ti wara aye ti nzoni na lege ti ambeti nde nde so e yeke na ni. Bâ ambeni tapande. Ambeti so a sigigi na ni ndali ti amaseka. Na yâ ti angu so ahon ade ti ninga ape, a sigigi na mingi ti ambeti ti e ndali ti amaseka. [1] Ambeni ayeke ti mû maboko na ala ti hon ndo ti akpale so ala yeke wara na ekole wala akpale so ala yeke wara tongana ala komanse ti ga koli wala wali. Tongana nyen la e kue e lingbi ti wara aye ti nzoni na dikongo ambeti so? Tongana e diko ni, a yeke dabe ti e na akpale so amaseka ti e so ayeke be-ta-zo ayeke wara ka ni. Na nda ni, e yeke hinga tongana nyen ti mû maboko na ala nga ti kpengba ala.

15. Ngbanga ti nyen a lingbi aChrétien so aga koli wala wali awe adiko ambeti so asigigi na ni ndali ti amaseka?

15 Mingi ti akpale so amaseka ayeke wara, so a sara tënë ni na yâ ti ambeti so, abâ gi ala oko ape. E kue e yeke na bezoin ti fa tënë ti mabe ti e na azo, ti hon ndo ti asioni bibe ti e, ti zia pëpe si amba ti e apusu e ti sara sioni ye, ti kpe asioni kamarade nga na asioni ngia. A sara tënë na ndo ti aye so nga na ambeni nde na yâ ti ambeti so asigigi na ni ndali ti amaseka. Achrétien so aga koli wala wali awe alingbi ti bâ so ala yeke kiri na tere ti ala na peko tongana ala diko ambeti so a sigigi na ni ndali ti amaseka? Oko ape. Atâa so a sara mbeti ni ndali ti amaseka, atënë so ayeke na yâ ni alondo na Bible nga e kue e lingbi  ti wara aye ti nzoni na lege ti aye so Jéhovah amû na e so.

16. Ambeti ti e ayeke mû nga maboko na amaseka ti sara nyen?

16 Na ndo ti so ambeti ti e ayeke mû maboko na amaseka ti hon ndo ti akpale ti ala, a yeke mû nga maboko na ala ti gue na li ni nga ti ga nduru na Jéhovah. (Diko Zo-ti-fa-tene 12:3, 15.) Ge nga kue, aChrétien so aga koli wala wali awe alingbi ti wara aye ti nzoni dä. Na tapande, na yâ ti Réveillez-vous ! ti avril, ngu 2009, a yeke wara article “Les jeunes s’interrogent . . . Comment trouver du plaisir à lire la Bible?” Na yâ ti article ni, a yeke wara gbâ ti awango nga na mbeni encadré so a lingbi ti fâ ni ti bata ni na yâ ti Bible. Azo so aga koli wala wali awe nga kue awara aye ti nzoni dä? Mbeni wali so ayeke na ngu 24 nga so ayeke na molenge, atene: “A yeke ngangu na mbi lakue ti diko Bible lani. Mbi sara ye alingbi na awango ti article so, mbi sara nga kua nzoni na encadré so a zia dä ti tene e fâ ni so. A nzere na mbi fadeso mingi ti diko Bible. Mbi bâ tongana nyen la ambeti ti yâ ni amä tere nzoni nga ayeke tongana apendere kamba so a kpo na tere ti tere ti sara na mbeni pendere ye. Kozo tere ti mbi anzere na dikongo Bible tongaso ape.”

17, 18. Tongana nyen la e lingbi ti wara aye ti nzoni na lege ti ambeti so a sigigi na ni ndali ti azo so ayeke aTémoin ti Jéhovah ape? Mû mbeni tapande.

17 Ambeti so a sigigi na ni ndali ti azo so ayeke aTémoin ape. Ngbene ye na ngu 2008, a nzere na e mingi ti manda Tour ti Ba Ndo ti mandango ni, so a sigigi na ni kozo ni kue ndali aTémoin ti Jéhovah. Ka ti ambeti so a sigigi na ni gi ndali ti azo so ayeke aTémoin ti Jéhovah ape? Tongana e diko ni, e nga kue e lingbi ti wara ye ti nzoni dä? Zia e bâ mbeni ye. Tara ti bâ so mbeni lâ, na mbeni bungbi ti dimanche, kozo ti tene a mû diskur, mo bâ so mbeni zo so mo tisa lo aga na Da ti Royaume. Kite ayeke dä ape so tere ti mo ayeke nzere mingi. Na ngoi so diskur ni ayeke hon, mo yeke pensé na ndo ti zo ni. Mo wani mo yeke mä diskur ni mo bâ mo tene mê ti lo la mo yeke mä na ni. Na nda ni, aye so mo mä ni andu bê ti mo nga mo kiri singila mingi ndali ni.

18 Mara ti ye tongaso alingbi nga ti si na e tongana e yeke diko ambeti so a sigigi na ni ndali ti azo so ayeke aTémoin ti Jéhovah ape. Na tapande, Tour ti Ba Ndo ti fango na tënë ayeke zi nda ti Bible na sarango kua na atënë so azo so ayeke aTémoin ti Jéhovah ape alingbi ti mä yâ ni. Ti mingi ti a-article so a yeke sigigi na ni na ndo ti jw.org kue ayeke tongaso. A yeke a-article tongana ti so ayeke na yâ ti mbage so atene “Questions Bibliques” nga na “Questions fréquentes”. Tongana e diko atënë so ayeke na yâ ti ambage so, e yeke kiri singila mingi ndali ti atâ tënë so e hinga ni awe. Na ndo ni, e lingbi ti hinga afini lege ti fa nda ti mabe ti e tongana e yeke fa tënë. Legeoko nga, Réveillez-vous ! ayeke kpengba mabe ti e lakue so tâ Nzapa ayeke dä, nga a yeke mû maboko na e ti hinga tongana nyen ti gbu koko ti mabe ti e.—Diko 1 Pierre 3:15.

19. Tongana nyen la e lingbi fa so e kiri singila na Jéhovah ndali ti aye so lo mû na e?

19 A yeke polele so, Jéhovah amû na e gbâ ti aye ti kaï na “bezoin ti aye ti yingo” so e yeke na ni (Mat. 5:3). Zia e ngbâ lakue ti sara kua nzoni na aye so lo yeke mû na e so. Na sarango tongaso, e yeke fa so e kiri singila na Lo so ayeke fa ye na e ndali ti nzoni ti e.—És. 48:17.

^ [1] (paragraphe 14)Na popo ti ambeti so e yeke na Les jeunes s’interrogent — Réponses pratiques, volume 1 et 2, nga na a-article ti “Les jeunes s’interrogent” so a yeke sigigi na ni gi na ndo ti site ti e.