Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juin 2017

Mo dabe ti mo na ni?

Mo dabe ti mo na ni?

Mo diko a-article ti Tour ti Ba Ndo so asigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

Bango ndo wa la a lingbi aita-koli, na tapande asurveillant ti circonscription nga na a-ancien, aduti na ni na ngoi so ala wara afango lege so alondo na bungbi ti Jéhovah?

A lingbi ala duti nduru ti mä yanga. Ala lingbi ti hunda terê ti ala: ‘Mbi yeke wa aita ti ngbâ be-ta-zo na Jéhovah? Mbi yeke nduru ti sara ye alingbi na fango lege so bungbi ti Jéhovah afa?’—w16.11, l. 11.

Lawa la Babylone amû atâ Chrétien lani na ngbâa?

A yeke kete na peko ti kuâ ti abazengele. Na ngoi ni so, mbeni bungbi ti akota zo ti nzapa akomanse lani ti bâ gigi. Eglize na gouvernement ayeda na aChrétien so ayeke a-apostat ti ga mbeni bungbi ti vorongo nga ala gi ti sara si zo oko amä pëpe ye so aChrétien so ayeke tongana blé ayeke tene lani. Me na yâ ti angu so ahon kozo na ngu 1914, aChrétien so a soro ala ti gue na yayu akomanse ti sigi lani na gbe ti Babylone.—w16.11, l. 23-25.

Ngbanga ti nyen la kua so Lefèvre d’Étaples asara ayeke lani kota kua?

Na yâ ti angu 1520, Lefèvre atraduire Bible na yanga ti Français ti tene asenge zo amä yâ ni. Kode so Lefèvre akiri na peko ti aversê ti Bible asara ye mingi na ndö ti Martin Luther, William Tyndale nga na John Calvin.—wp16.6, l. 10-12.

Kangbi wa la ayeke na popo ti “bingo bê na ndö ti mitele” nga na “bingo bê na ndö ti yingo”? (aRom. 8:6).

Zo so abi bê ti lo na ndö ti mitele azia li ti lo gï na ndö ti anzara ti terê ti lo, lo yeke sara tënë lakue na ndö ti aye so ayeke ti mitele nga lo yeke gonda ni. Zo so abi bê ti lo na ndö ti yingo azia si yingo vulu afa lege na apensé ti lo nga akomande ni, nga lo zia si apensé ti lo ague oko na ti Nzapa. Bingo bê na ndö ti mitele ague na kuâ me bingo bê na ndö ti yingo ague na fini nga na siriri.—w16.12, l. 15-17.

Ambeni ye so mo lingbi ti sara ti gi bê ti mo mingi pëpe ayeke so wa?

Zia akota ye na kozo ndo, sara ye ahon ndö ni pëpe, leke kapa ti wu terê ti mo lâ oko oko, mû ngoi ti bâ aye so Jéhovah acréé, sara atënë ti ngia, sara sport lakue nga mû ngoi ti lango nzoni.—w16.12, l. 22-23.

Tongana nyen la “a mû Hénok a gue na lo na mbeni ndo nde si lo bâ kuâ pëpe”? (aHéb. 11:5).

Peut-être Nzapa ague na Hénok yeke si lo kui sân ti tene lo hinga so lo ga nduru ti kui.—wp17.1, l. 12-13.

Ngbanga ti nyen sarango terê kete ayeke lakue kota ye?

Sarango terê kete aye ti sara tënë ti dutingo na nzoni bango ndo na ndö ti e wani nga ti hinga aye so e yeke pëpe na ngangu ti sara ni. A lingbi e hinga ngangu so asarango ye ti e alingbi ti sara na ndö ti asarango ye ti amba ti e na e bâ terê ti e kota pëpe.—w17.01, l. 18.

Nyen la afa so Nzapa ayeke fa lege lani na bebungbi na ngoi ti akozo Chrétien gï tongana ti so lo yeke fa lege laso na aita so ayeke na yâ ti Bebungbi?

Yingo vulu amû maboko lani na aita ti bebungbi ti mä yâ ti atâ tënë ti Bible. Ala bâ ndo lani na ndö ti kua ti fango tënë na lege ti mungo maboko ti a-ange nga Mbeti ti Nzapa afa lege na ala na ngoi so ala yeke mû awango. A-oko ye so amû maboko na Bebungbi laso.—w17.02, l. 26-28.

Aye wa la apusu e ti bâ ye so a futa ti zi azo tongana matabisi so ngere ni ayeke ngangu mingi?

Aye osio so: Zo so amû ni, a mû ni ngbanga ti nyen, nyen la zo agbanzi na terê ti lo ti mû matabisi ni nga matabisi ni alingbi ti mû tâ ye so zo ayeke na bezoin ni. A lingbi e gbu li ti e na ndö ti aye so oko na oko.—wp17.2, l. 4-5.

Tongana mbeni Chrétien amû mbeni desizion, lo lingbi ti changé ni?

A lingbi e sara ye alingbi na tënë ti yanga ti e. Ye oko, na ambeni ngoi a yeke nzoni e kiri e gbu li na ndö ti mbeni desizion so e mû. Na peko ti so azo ti Ninive achangé bê ti ala, Nzapa achangé desizion so lo mû lani. Na ambeni ngoi, tongana aye achangé wala e wara afini sango, a lingbi ti sara si e sara nga tongaso.—w17.03, l. 16-17.

Ngbanga ti nyen sioni kperekpere ayeke sioni mingi?

A lingbi ti sara si mbeni kpale amû ndo na a sara si kpale ni akiri aga ngangu. Atâa e yeke na raison wala pëpe, dikongo asioni tënë alingbi ti leke kpale ni lâ oko ape.—w17.04, l. 21.