Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juin 2017

Mû mbage ti komandema ti Jéhovah

Mû mbage ti komandema ti Jéhovah

“Jéhovah, mo so mo yeke Nzapa ti e, mo lingbi biani ti wara gloire, nengo nga na ngangu ngbanga ti so mo la mo sara aye kue.”—APOC. 4:11.

ABIA: 112, 133

1, 2. Nyen la a lingbi e oko oko kue e hinga? (Bâ foto so ayeke na tongo nda ti article so.)

TONGANA ti so e bâ na yâ ti article so ahon, Zabolo atene so Jéhovah ayeke komande na lege ni ape nga so azo ayeke duti nzoni mingi tongana ala komande terê ti ala wani. Tâ tënë la lo tene so? Tara ti bâ so azo so asoro ti komande terê ti ala wani alingbi fade ti duti na fini ti lakue lakue. Eskê ala yeke duti nzoni mingi sân komandema ti Nzapa? Mo yeke duti na ngia mingi tongana zo oko akomande na ndö ti mo ape nga mo yeke na fini ti lakue lakue?

2 Zo oko alingbi ti kiri tënë na ahundango ndo so na place ti mo ape. A lingbi zo oko oko kue agbu li ti lo nzoni na ndö ti ahundango ndo so. Tongana e sara tongaso, e yeke bâ polele so Nzapa la ayeke na droit ti komande dunia kue. Komandema ti lo ayeke nzoni ahon atanga ni kue. Lo lingbi ti tene e mû mbage ti komandema ti lo na bê ti e kue. Bible afa na e aye so amû lege na e ti tene tongaso. Na tapande, gbu li ti mo na ndö ti tënë so Bible atene na ndö ti droit ti Jéhovah ti komande dunia kue.

JÉHOVAH AYEKE NA DROIT TI KOMANDE DUNIA KUE

3. Ngbanga ti nyen la gï Jéhovah oko la ayeke na droit ti duti Gbia ti dunia kue?

3 Jéhovah ayeke na droit ti duti Gbia ti dunia kue ndali ti so lo  yeke Nzapa so ngangu ti lo ahon angangu kue nga lo la lo créé aye kue (1 Chron. 29:11; Kus. 4:24). Na Apocalypse 4:11, na yâ ti mbeni vision a fa agbia 144000 so ayeke komande legeoko na Christ na yayu so ayeke tene: “Jéhovah, mo so mo yeke Nzapa ti e, mo lingbi biani ti wara gloire, nengo nga na ngangu ngbanga ti so mo la mo sara aye kue, nga a yeke ndali ti ye so bê ti mo aye si aye ni ayeke dä na a sara ala.” Biani, Jéhovah la acréé aye kue, tongaso lo yeke biani na droit ti komande azo nga na acréature ti yingo.

4. Ngbanga ti nyen la ti sara kpengbango li na droit ti Nzapa ti komande dunia kue ayeke sarango kua na liberté na lege ni ape?

4 Satan acréé ye oko ape. Tongaso, lo yeke na droit oko ape ti komande dunia. Satan na kozo koli na kozo wali asara ye na baba ti sara kpengbango li na droit ti Jéhovah ti komande dunia kue (Jér. 10:23). Tâ tënë, so a sara ala na liberté ti soro ye so ala ye, ala lingbi ti soro ti zi terê ti ala na gbe ti Nzapa. Me eskê ala yeke lani na droit ti sara tongaso? Ên-ën. Liberté ti soro ye amû lege na azo ti mû anzoni desizion lâ na lâ. Ye oko, liberté ni amû lege na ala pëpe ti sara kpengbango li na Zo so asara ala nga so amû na ala fini. A yeke polele, ti sara kpengbango li na Jéhovah ayeke sarango kua na lege ni pëpe na liberté. Place ti e azo ayeke na gbe ti komandema ti Jéhovah so ayeke na lege ni.

5. Ngbanga ti nyen la e lingbi ti duti na confiance so adesizion ti Nzapa ayeke lakue na lege ni?

5 Mbeni raison nde ayeke dä so ndali ni Jéhovah ayeke na droit ti duti Gbia ti dunia kue. Lo yeke sara kua na komandema ti lo na mbeni lege so ayeke mbilimbili-kue. Lo tene: “Mbi yeke Jéhovah, lo so ayeke sara ye na tâ ndoye, lo so afâ ngbanga na lege ni nga lo so asara ye na lege ti mbilimbili na ndö ti sese, ndali ti so a yeke aye so la anzere na bê ti mbi.” (Jér. 9:24). Jéhovah ayeke pëpe na bezoin ti andia so azo asigi na ni ti mû maboko na lo ti mû desizion na ndö ti ye so ayeke na lege ni. Lo wani lo lu ndia na ndö ti ye so ayeke na lege ni. Nga so Jéhovah ayeke fâ ngbanga lakue na lege ni, lo mû andia na azo. Mbeni zo ti sungo psaume atene: “Mbilimbili nga na fango ngbanga ti mbilimbili ayeke fondation ti trône ti [lo].” Tongaso, e lingbi ti duti na confiance so andia, amama-ndia nga na adesizion kue so lo mû ayeke na lege ni (Ps. 89:14; 119:128). Me atâa so Satan atene so komandema ti Jéhovah ayeke na lege ni ape, lo yeke na ngangu pëpe ti sara si lakue a fâ ngbanga ti mbilimbili na yâ ti dunia so.

6. Mbeni raison so ndali ni Jéhovah ayeke na droit ti komande dunia ayeke so wa?

6 Na ndö ni, Jéhovah ayeke na droit ti duti Gbia ti dunia kue ndali ti so lo yeke na hingango ye nga na ndara so a bezoin ni ti bâ lege ti dunia. Na tapande, gbu li ti mo na ndö ti so Nzapa amû lege na Molenge ti lo ti kaï akobela so adocteur alingbi ti kaï ni ape (Mat. 4:23, 24; Marc 5:25-29). Na lê ti Jéhovah, a yeke lani mbeni miracle ape. Lo hinga aye so a lingbi a sara ni ti kaï na kobela nga lo yeke na ngangu ti leke akpale kue so kobela aga na ni. Lo yeke nga na ngangu ti kiri na fini azo so akui nga ti kanga lege na aye tongana ngu so asuku amû ndo wala sese so ayengi.

7. Tongana nyen la ndara ti Jéhovah ahon ndara ti azo ti dunia ti Satan mingi?

7 Dunia so ayeke na gbe ti Satan angbâ ti gi lege ti leke atënë so ayeke na yâ ti kodro wala na popo ti akodro; Jéhovah oko la ayeke na ndara ti ga na siriri na yâ ti dunia (És. 2:3, 4; 54:13). Aye so e hinga na ndö ti hingango ye nga na ndara ti Jéhovah apusu e ti tene tënë so yingo ti Nzapa apusu lani bazengele Paul ti tene ni: “Bâ, tongana nyen mosoro ti Nzapa, ndara ti lo na hingango ye ti lo ayeke kota ma! Zo alingbi ti gi nda ti afango ngbanga ti lo pëpe, zo alingbi nga ti hinga alege ti lo kue pëpe.”—aRom. 11:33.

 KOMANDEMA TI JÉHOVAH AYEKE NZONI AHON ATANGA NI KUE

8. Nyen la andu bê ti mo na ndö ti lege so Jéhovah ayeke komande na ni?

8 Bible afa polele so Jéhovah la ayeke na droit ti komande dunia kue, me a ngbâ gï ge ape. A fa nga ngbanga ti nyen la komandema ti Nzapa ayeke kota ahon atanga ni kue. Mbeni raison ni ayeke so lo komande na ndoye. Biani, lege so Jéhovah asoro ti sara kua na komandema ti lo andu bê ti e mingi. Lo yeke ‘sara nzoni bê na zo nga lo bâ mawa ti zo, lo sara ngonzo hio hio pëpe, lo si singo na tâ ndoye nga na tâ tënë’. (Ex. 34:6). Nzapa asara ye na e awakua ti lo na nengo zo. Lo bâ lege ti e nzoni mingi ahon ti so e lingbi ti sara. Satan atene so Jéhovah agbanzi aye ti nzoni na awakua ti lo so ayeke be-ta-zo, me tënë so ayeke mvene. Lo mû même Molenge ti lo so lo ye lo mingi ti zi lege na e ti wara fini ti lakue lakue.—Diko Psaume 84:11; aRomain 8:32.

9. E hinga tongana nyen so Nzapa abi bê ti lo na e oko oko kue?

9 Jéhovah aye azo ti lo kue. Me lo bi nga bê ti lo mingi na ala oko oko kue. Na tapande, gbu li na ndö ti angu ngbangbo mingi so na yâ ni Jéhovah amû ngangu na ajuge ti zi azo ti Israël na gbe ti azo so asara ye ti ngangu na ala. Na ngoi ti ngangu so, lo bâ mbeni zo so ayeke zo ti Israël ape so iri ti lo ayeke Ruth. Lo sara sacrifice mingi ti ga na yâ ti tâ vorongo. Jéhovah airi tënë nzoni na ndö ti lo na lege so lo mû na lo koli nga na molenge ti koli. Me ye ni kue la ape. Tongana Ruth azingo ande na kuâ, lo yeke hinga ande so molenge ti lo ayeke mbeni kotara ti Messie. Tara ti bâ nzerengo terê ti Ruth na ngoi so lo yeke hinga ande so a bata mbaï ti gigi ti lo na yâ ti mbeni mbeti ti Bible so iri ti lo ayeke na ndö ni.—Ruth 4:13; Mat. 1:5, 16.

10. Ngbanga ti nyen la e lingbi ti tene so Jéhovah akomande na ngangu ape?

10 Jéhovah ayeke komande na ngangu pëpe. Komandema ti lo amû lege na azo ti duti na liberté nga na ngia (2 aCor. 3:17). Na ndö ti Jéhovah, David atene: “A yeke bâ kota ye so apika bê nga na gloire na ndo so lo [Nzapa a]yeke dä; a yeke bâ ngangu nga na ngia na ndo so lo duti dä.” (1 Chron. 16:7, 27). Legeoko nga, Éthan, mbeni wasungo psaume atene: “Ngia ayeke na azo so ahinga dekongo ti ngia. Jéhovah, ala yeke tambela na yâ ti lumière ti lê ti mo. Na yâ ti lango ni kue, bê ti ala ayeke na ngia ndali ti iri ti mo; grâce na mbilimbili ti mo, a yâa ala na nduzu.”—Ps. 89:15, 16.

11. Tongana nyen la e lingbi ti duti na confiance mingi so komandema ti Jéhovah ayeke nzoni mingi?

11 Tongana e gbu li ti e lakue na ndö ti anzoni ye so Jéhovah asara, a lingbi ti sara si e hinga na bê ti e kue so komandema ti Nzapa ayeke nzoni mingi. Tënë ti bê ti e ayeke gue oko na ti mbeni zo ti sungo psaume so atene: “Lango oko na lê ti alacour ti da ti mo ayeke nzoni ahon lango saki oko na mbeni ndo nde!” (Ps. 84:10). So Jéhovah la asara e, lo hinga ye so e yeke na bezoin ni ti duti biani na ngia, nga lo mû ni na e gbani. Ye kue so Jéhovah ahunda na e ti sara ayeke ndali ti nzoni ti e. Même tongana a lingbi e sara asacrifice, e yeke duti lakue na ngia tongana e mä yanga ti Jéhovah.—Diko Ésaïe 48:17.

12. Kozo ye so apusu e ti mû mbage ti komandema ti Jéhovah ayeke nyen?

12 Bible afa so na peko ti Komandema ti Ngu Saki Oko ti Christ, ambeni zo ayeke soro ande ti sara kpengbango li na komandema ti Jéhovah (Apoc. 20:7, 8). Nyen la alingbi ti pusu ala ti sara mara ti ye tongaso? Na ngoi ni so a yeke zi Zabolo na kanga nga lo yeke pensé ti handa azo, kite ayeke dä ape so lo yeke gi ti pusu azo ti pensé gï na ndö ti ala wani. A yeke ye so lo yeke sara lakue la. Peut-être lo yeke gi ti sara si azo abâ so lege ayeke dä ti ngbâ na fini lakue lakue sân ti mä yanga ti Jéhovah. Biani, so ayeke mvene. Me a yeke  nzoni e hunda terê ti e: ‘Mbi yeke yeda ande na mara ti tënë ti mvene tongaso?’ Tongana e ye Jéhovah na e ye ti sara na lo ndali ti so lo yeke nzoni nga ndali ti so lo yeke na droit ti duti Gbia ti dunia kue, mara ti tënë so Zabolo atene so ayeke nzere na e oko ape. E yeke ye ti duti na fini gï na gbe ti Jéhovah so akomande na ndoye.

NGBÂ TI MÛ MBAGE TI KOMANDEMA TI NZAPA

13. Tongana nyen la e lingbi ti fa so e mû mbage ti komandema ti Jéhovah?

13 Biani, komandema ti Jéhovah alingbi ti tene e mû mbage ni na bê ti e kue. Tongana ti so e bâ, lo yeke na droit ti komande nga lege so lo yeke komande na ni ayeke nzoni mingi. E lingbi ti mû mbage ti komandema ti Jéhovah na lege so e ngbâ ti sara ye lakue mbilimbili nga e sara na Nzapa be-ta-zo. Mbeni lege nde so e lingbi ti fa so e mû mbage ti komandema ti lo ayeke so wa? E lingbi ti sara ni tongana e sara ye tongana Jéhovah. Tongana e sara ngangu ti sara ye tongana Jéhovah, e yeke fa so e ye komandema ti lo nga e mû mbage ni.—Diko aÉphésien 5:1, 2.

14. A-ancien nga na amokonzi ti sewa alingbi ti mû tapande ti Jéhovah tongana nyen?

14 E manda na yâ ti Bible so Jéhovah asara kua na komandema ti lo na ndoye. Legeoko nga, amokonzi ti sewa nga na a-ancien so aye komandema ti lo ayeke mû tapande ti lo na ala yeke sara ye na ngangu pëpe wala ala yeke mû pëpe adesizion kue na place ti azo so ala yeke na komandema na ndö ti ala. Paul amû lani tapande ti Nzapa na Molenge ti lo (1 aCor. 11:1). Paul azia lani kamene na lê ti amba ti lo pëpe wala lo gbu ala na ngangu pëpe ti sara ye so ayeke na lege ni. Me na nzoni bê lo pusu ala ti sara ni (aRom. 12:1; aÉph. 4:1; Phm. 8-10). So Paul asara tongaso, lo mû tapande ti Jéhovah. Tongana e sara ye na amba ti e na ndoye, andâ e mû mbage ti komandema ti Jéhovah la.

15. Tongana nyen la e yeke fa so e ye komandema ti Jéhovah?

15 E yeke sara ye tongana nyen na mbage ti azo so Nzapa amû na ala komandema? Tongana  e sara kua maboko na maboko na ala nga e ne ala, e fa so e mû mbage ti komandema ti Jéhovah. Atâa tongana e mä yâ ti mbeni desizion kue ape wala a nzere na e ape, e yeke ngbâ ti sara ye ague oko na ye so Jéhovah ahunda. Sarango tongaso ayeke tâ nde na sarango ye ti azo ti dunia, me tongana e yeda na komandema ti Jéhovah e yeke sara ni (aÉph. 5:22, 23; 6:1-3; aHéb. 13:17). Ti sara tongaso aga na e aye ti nzoni, ndali ti so tënë ti nzoni ti e agbu bê ti Nzapa mingi.

16. Tongana nyen la adesizion so e mû alingbi ti fa so e mû mbage ti komandema ti Nzapa?

16 E lingbi nga ti fa so e mû mbage ti komandema ti Nzapa na lege ti adesizion ti e wani. Jéhovah amû pëpe mbilimbili komandema na ndö ti aye kue. Me lo fa na e apensé ti lo. Na tapande, lo fa na e pëpe anzene nzene tënë na ndö ti fason ti yungo bongo ti aChrétien. Me lo fa so lo ye ti tene na ngoi so e yeke soro mbeni fason ti yungo bongo wala ti lekengo kuä ti li ti e, e sara ye ahon ndö ni ape nga e sara ye na mbeni lege so alingbi na aChrétien (1 Tim. 2:9, 10). Lo ye nga pëpe ti tene e sara si amba ti e apika gere ti ala wala ala gi bê ti ala na ndö ti adesizion ti e (1 aCor. 10:31-33). Tongana e mû adesizion ague oko na apensé ti Jéhovah, e fa so e ye komandema ti lo nga e mû mbage ni.

Mû mbage ti komandema ti Nzapa na ngoi so e yeke mû desizion nga na yâ ti sewa (Bâ paragraphe 16-18)

17, 18. Tongana nyen la aChrétien so asara mariage awe alingbi ti fa so ala mû mbage ti komandema ti Jéhovah?

17 Bâ mbeni ye so na yâ ni aChrétien so asara mariage alingbi ti mû mbage ti komandema ti Jéhovah. Mariage ti ala alingbi ti duti pëpe tongana ti so ala ku terê ti ala na ni. Na tapande mariage ni aga même na ala vundu. Tongana a yeke tongaso, ala lingbi ti gbu li ti ala na ndö ti sarango ye ti Jéhovah na azo ti Israël. Jéhovah atene lani so ni yeke tongana koli ti azo ti mara ti Israël ti giriri so (És. 54:5; 62:4). Mara ni azia vundu na bê ti Jéhovah fani mingi. Songo ti ala na Jéhovah ayeke lani tongana mbeni mariage so ayeke na kpale. Jéhovah afâ lani yâ ti songo ti lo na azo ti Israël hio tongaso ape. Me lo pardonné ala fani mingi nga lo sara ye alingbi na azendo so lo mû na ala. (Diko Psaume 106:43-45.) Mara ti tâ ndoye so apusu e nduru na Jéhovah ape?

18 Legeoko nga, aChrétien so asara mariage awe na so aye Jéhovah ayeke mû tapande ti lo. Ala yeke gi pëpe ti zia terê ndali ti mbeni raison so ayeke pëpe na yâ ti Bible. Ala hinga so Jéhovah abungbi ala na gbe ti joug oko na lo ye ti tene ala ‘ngbâ na terê’ ti mba. Oko ye so ndali ni zo alingbi ti sara divorce nga lo yeke na liberté ti kiri ti sara mariage ayeke lango-sioni (Mat. 19:5, 6, 9). Tongana ala sara kue ti tene dutingo ti ala aga nzoni, ala yeke mû mbage ti droit ti Jéhovah ti komande dunia kue.

19. Nyen la a lingbi e sara tongana e sara afaute?

19 So e yeke mbilimbili-kue ape, na ambeni ngoi e yeke sara ambeni ye so azia vundu na bê ti Jéhovah. Lo hinga ni ndani la lo mû Christ tongana ye so a futa ti zi azo. Tongaso, tongana e sara mbeni faute, a lingbi e hunda Jéhovah ti pardonné e (1 Jean 2:1, 2). Ahon ti ngbâ ti sara vundu ndali ti afaute ti e, a lingbi e gi ti manda ye na lege ni. Tongana e ngbâ nduru na Jéhovah, lo yeke pardonné e na lo yeke mû maboko na e ti hon ndö ti amara kpale ni so tongana e kiri e tingbi na ni mbeni lâ.—Ps. 103:3.

20. Ngbanga ti nyen la a lingbi e mû mbage ti komandema ti Nzapa laso?

20 Na yâ ti fini dunia, Jéhovah ayeke komande ande azo kue nga ala yeke manda ande ti sara ye alingbi na alege ti lo so ayeke mbilimbili (És. 11:9). Ye oko, laso e wara afango lege ti lo so mingi. Na yâ ti ngoi kete, zo oko ayeke dë ande kite pëpe na droit ti Nzapa ti komande dunia kue. Tongaso, zia e sara kue ti mû mbage ti komandema ti Jéhovah laso na lege so e mä yanga ti lo, e sara na lo be-ta-zo nga e sara ngangu ti mû tapande ti lo na yâ ti aye kue so e yeke sara.