Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juin 2017

Mo lingbi ti bâ ye ahon ti so lê ti mo abâ?

Mo lingbi ti bâ ye ahon ti so lê ti mo abâ?

DON, mbeni Témoin ti Jéhovah na Canada, ayeke sara ngangu mingi ti sara lisoro na azo so ayeke na da ape so alango na bê ti lege. Don atene tënë so na ndö ti mbeni oko ti ala, lo tene: “Peter, mbeni koli so alango na mbeni kete lege so ayeke na popo ti agbagba, ayeke saleté mingi. Sarango ye ti lo ayeke sioni mingi, nga lo hinga ye ti sara ti tene azo aga nduru na lo pëpe. Lakue tongana zo agi ti sara nzoni bê na lo, lo yeke ke.” Ye oko, ahon ngu 14, Don akanga bê lo gi ti sara nzoni bê na koli so.

Mbeni lâ, Peter ahunda Don, atene: “Ngbanga ti nyen la mo ngbâ ti ga ti bâ mbi? Tanga ti azo kue azia mbi kpô. Mo ngbâ ti bi bê na mbi ngbanga ti nyen?” Na nzoni bê, Don asara kua na aversê ota ti gi ti ndu bê ti Peter. Kozoni, lo hunda Peter wala lo hinga so Nzapa ayeke na iri, na lo hunda lo ti diko ni na yâ ti Bible na Psaume 83:18. Na pekoni, ti tene Don afa na Peter raison so lo bi bê na lo, lo hunda na Peter ti diko aRomain 10:13, 14. Versê so atene so “a yeke sö ande zo kue so adi iri ti Jéhovah.” Na nda ni, Don adiko Matthieu 9:36 na lo hunda na Peter ti diko ni lo wani. Versê so atene: “Tongana [Jésus a]bâ gbâ ti azo so, mawa ti ala asara lo ngbanga ti so a sara pasi na ala nga yâ ti ala akangbi kirikiri tongana ataba so ayeke na berger pëpe.” Na ngu ti lê na lê, Peter ahunda lo, atene: “Mbi yeke oko ti ataba so?”

Peter akomanse ti changé. Lo sukula ngu, lo leke kuä ti yanga ti lo nga lo yü anzoni bongo so Don amû na lo. Peter angbâ lani ti leke terê ti lo nzoni.

Peter ayeke na mbeni mbeti so lo yeke sû atënë ti aye so lo sara na yâ ni. Akozo tënë so lo sû ni ayeke atënë ti vundu, me ambeni ngoi na pekoni, atënë so lo sû ni ayeke nde. Lo sû atënë so: “A fa na mbi laso iri ti Nzapa. Fadeso, tongana mbi sambela, mbi lingbi ti sambela Jéhovah. A nzere na mbi mingi ti hinga iri ti lo. Don atene so Jéhovah alingbi ti duti Kamarade ti mbi, mbeni zo so ayeke mä mbi lakue, na ngoi kue nga atâa nyen la asi na mbi.”

 Tanga ti atënë so Peter asû na yâ ti mbeti ti lo, lo sû ni na aita ti lo. Lo tene:

“Laso, terê ti mbi ason. Mbi pensé so a yeke gbâ ti angu so mbi sara la. Me même tongana laso ayeke ndangba lango ti fini ti mbi, mbi hinga so mbi yeke bâ ande kamarade ti mbi [Don] na yâ ti Paradis. Tongana ala yeke diko mbeti so, a ye ti tene so mbi yeke dä encore ape. Me tongana, na ngoi ti lungo kuâ ti mbi, ala bâ mbeni zo so akpa zo so adoit ti duti dä ape, ala sara lisoro na lo, nga pardon, ala diko kete mbeti ti couleur bleu so [so ti tene, buku “Ta Tene so aga na Zo Fini ti La Koue La Koue”, so a yeke manda na Bible na azo, so a mû ni na lo aninga angu mingi awe]. * Mbeti so atene so mbi yeke kiri ti bâ kamarade ti mbi na yâ ti Paradis. Mbi mä na bê na tënë so na bê ti mbi kue. Ita ti ala so aye ala mingi, Peter.”

Na peko ti so a lu kuâ ni awe, Ummi, ita ti Peter ti wali, atene na Don, atene: “A sara ngu use awe, mbi na Peter e wara terê. Ti fani oko na yâ ti angu mingi, mo bâ mo tene lo yeke lani na ngia. Lo he même ngia kete.” Lo tene na Don, lo tene: “Mbi yeke diko ande mbeti ni ndali ti so mbeni ye so alingbi ti ndu bê ti ita ti mbi adoit ti duti mbeni ye so ayeke nde.” Ummi ayeda nga ti tene lo na aTémoin ti Jéhovah asara lisoro mingi na yâ ti buku Bible afa nyen biani? so a sigi na ni ade ti ninga mingi ape.

E nga kue e lingbi ti bâ ye ahon ti so lê ti e abâ, ti fa tâ ndoye nga ti kanga bê na mara ti azo nde nde kue (1 Tim. 2:3, 4). Tongana e sara tongaso, e lingbi ti pusu mara ti azo so ayeke tongana Peter, so peut-être ala nzere na lê ti azo ape me so ayeke na nzoni bê, ti changé. E lingbi ti duti na confiance so Nzapa so “abâ ye so ayeke na yâ ti bê ti zo” ayeke sara si tâ tënë amaï na yâ ti bê ti azo so ayeke nduru ti yeda na tënë ni.—1 Sam. 16:7; Jean 6:44.

^ par. 7 So aTémoin ti Jéhovah asigi na ni me so a pete ni encore ape.