Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juin 2017

Mo hinga?

Mo hinga?

A lingbi ti iri azo so akä anyama na yâ ti temple ti Jérusalem “azo ti gbungo aye ti azo na ngangu”?

NA YÂ ti Évangile ti Matthieu, lo tene so “Jésus alï na yâ ti temple na lo tomba azo so ayeke kä ye nga na azo kue so ayeke vo ye na yâ ni. Nga, lo kinda atable ti azo so ayeke changé nginza nga na aye ti duti ti azo so ayeke kä akolokoto. Lo tene na ala: ‘Mbeti ti Nzapa atene: “A yeke iri da ti mbi da ti sambela.” Me ala sara si da ni aga kota dû ti azo ti gbungo aye ti azo na ngangu.’”—Mat. 21:12, 13.

Ambeti ti mbaï ti aJuif afa so azo so ayeke kä ye na yâ ti temple ayeke nzi lani aclient ti ala na lege so ala zia ngere ti aye ni ahon ndö ni. Na tapande, mbeti ti mbaï ti aJuif atene so na mbeni ngoi ngere ti apigeon use so ayeke mû na sacrifice ague na li ni alingbi na ngere ti dénar ti lor oko na ngoi ti akozo Chrétien. Ngere so alingbi na nginza ti mbeni senge zo ti kua ti lango 25. A yeda ti tene awayere amû apigeon wala akolokoto na sacrifice; ye oko, ngere ti andeke so akanga lege na ala ti vo ni (Lév. 1:14; 5:7; 12:6-8). Sarango ye so ason bê ti Rabbi Siméon ben Gamaliel mingi, na lo kiri na wungo ti asacrifice so a doit ti mû ni na gbe ni, na a sara si hio ngere ti apigeon use atï na gbe ni mingi.

Tënë so e londo ti bâ afa so Jésus ayeke lani na raison ti iri azo ti kango ye na yâ ti temple “azo ti gbungo aye ti azo na ngangu”, ndali ti so ala nzi azo nga ala sara bê ti ye.