Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUIN 2016

Mbeni sarango ye so anzere na Nzapa so ayeke pendere mingi ahon adiamant

Mbeni sarango ye so anzere na Nzapa so ayeke pendere mingi ahon adiamant

Azo abâ adiamant tongana atênë so ayeke pendere mingi. Ngere ti ambeni asi dollar million mingi. Me, na lê ti Nzapa, eskê ambeni ye ayeke dä so ayeke pendere mingi ahon adiamant wala ambeni pendere tênë?

 Haykanush, so ayeke mbeni wafango tënë so ade awara batême ape, na Arménie, awara mbeni passeport nduru na yanga-da ti lo. Na yâ ni, a yeke wara ambeni carte bancaire so kota wungo ti nginza ayeke dä. Lo sara tënë ni na koli ti lo so ayeke nga wafango tënë so ade awara batême ape.

Koli ni na wali ti lo ayeke lani na kota kpale ti nginza nga ala yeke na bon na li ti ala, atâa so kue, ala soro ti kiri na nginza ni na wani na adresse so ayeke na yâ ti passeport ni. Li ti koli so agirisa ye ti lo so nga na ti fami ti lo kue akpe. Haykanush na koli ti lo atene so aye so ala manda na yâ ti Bible la apusu ala ti sara ye na lege ni. Na pekoni, ala mû ngoi ni so ti sara tënë na ndo ti aTémoin ti Jéhovah na fami ti wa ti nginza ni nga ala mû na ala ambeni mbeti.

Fami ni aye lani ti mû mbeni nginza na Haykanush na cadeau, me lo ke. Na ndade ni, wali ni ague na peko ti ala na yanga-da, nga ti fa singila ti bê ti lo, lo gue na ala juska Haykanush amû mbeni bague ti diamant so lo mû na lo.

Legeoko na fami so, li ti gbâ ti azo akpe lani ndali ti so Haykanush na koli ti lo asara ye na lege ni. Me eskê li ti Jéhovah akpe? So ala sara ye na lege ni so lo bâ ni tongana nyen? So ala sara ye lani na lege ni so aga na ye ti nzoni wa?

ASARANGO YE SO AYEKE PENDERE MINGI AHON AYE TI SESE

Akiringo tënë ni ayeke ngangu ape. Ndani ayeke so awakua ti Nzapa ahinga so ti sara ye tongana ti Jéhovah ayeke pendere mingi na lê ti lo ahon adiamant, lor nga na ambeni ye ti sese. Biani, bango ndo ti Jéhovah na ti mingi ti azo ayeke nde nde na ndo ti ye so ayeke pendere nga na ye so ayeke pendere ape (És. 55:8, 9). Nga, ti awakua ti Jéhovah, ti sara ye tongana lo na yâ ti aye kue ayeke pendere mingi.

A yeke ye so e lingbi ti bâ na lege ti ye so Bible atene na ndo ti bango yâ ti ye nzoni nga na ndara. A-Proverbe 3:13-15 atene: “Ngia ayeke na zo so awara ndara, na zo so agi lege ti hinga nda ti ye. A yeke nzoni ti wara ndara, ahon ti wara argent, na faïda ni ahon lor ti nzoni; Na ngere ni ahon ngere ti tênë so ngere ni ayeke ngangu, na popo ti ye kue so bê ti mo aye, ye oko ti lingbi na lo ayeke pepe.” A yeke polele so Jéhovah abâ asarango ye tongaso na nene ni mingi ahon aye ti sese kue.

Ka ti sarango ye na lege ni ayeke tongana nyen?

Jéhovah wani ayeke zo so ayeke sara ye na lege ni. Lo ‘lingbi ti tene mvene pëpe’. (Tite 1:2). Lo pusu nga bazengele Paul ti sara mbeti na aChrétien Hébreu, lo tene: “Ala sambela ndali ti e, teti e hinga e tene e yeke na nzoni yingo-ti-hinga, ngbanga ti so e ye ti sara ye mbilimbili na yâ ti aye kue.”—aHéb. 13:18.

Jésus Christ azia mbeni nzoni tapande na ndo ti sarango ye na lege ni. Na tapande, dabe ti mo na ngoi so Kota Prêtre Caïphe atene: “mbi zia mo na gbe ti bä ti tene mo tene na e wala mo yeke Christ, Molenge ti Nzapa!” Jésus asara ye na lege ni lo tene lo yeke Messie. Lo tene tâ tënë atâa so lo hinga lani so Sanhédrin alingbi ti bi tënë na li ti lo a tene lo zonga Nzapa nga so alingbi ti fâ lo ndali ni.—Mat. 26:63-67.

Ka ti e? Eskê e yeke ngbâ ti sara ye na lege ni na yâ ti mbeni ye so a hunda na e ti tene tâ tënë kue ape wala ti ba yâ ti tënë ni kete tongaso si peut-être e wara mbeni ye ti sese na pekoni?

KPALE TI SARANGO YE NA LEGE NI

Biani, a yeke ngangu ti sara ye na lege ni na alango ti nda ni so, so azo mingi ayeke azo so “andoye gi tere ti ala wani, azo so andoye  nginza”. (2 Tim. 3:2). Na ngoi so a yeke ngangu na azo ti wara nginza wala ti wara kua, ala mingi apensé so a yeke na lege ni ti nzi, ti triché wala ti sara ambeni ye so ayeke na lege ni ape. Mara ti pensé so amû ndo asara si azo mingi apensé so oko lege ti wara na aye ti sese ayeke ti sara ye na lege ni ape. Même ambeni Chrétien amû asioni desizion nga ndali ti so ala ye ti ‘wara ye na lege ti likisi’ ala buba nzoni iri ti ala na yâ ti congrégation.—1 Tim. 3:8; Tite 1:7.

Ye oko, mingi ti aChrétien asara ye tongana ti Jésus. Ala bâ so ti duti na asarango ye so anzere na Nzapa ayeke kota ye mingi ahon amosoro wala anzoni ye kue. Ndani la, aChrétien so ayeke amaseka ayeke triché na ekole pëpe ti wara anzoni note (aProv. 20:23). Tâ tënë, a yeke lakue ape la e yeke wara cadeau na peko ti so e sara ye na lege ni, tongana ti so asi lani na Haykanush. Me sarango ye na lege ni ayeke ye so ayeke nzoni na lê ti Nzapa, na a yeke mû lege na e ti duti na nzoni conscience, mbeni ye so a yeke biani kota ye mingi.

Tapande ti Gagik afa ni. Lo tene: “Kozo si mbi ga Chrétien, mbi sara kua lani na yâ ti mbeni kota ndokua so kota zo ti ndokua ni akpe ti payé impôt na lege so lo fa gi kete mbage ti nzoni ye so ndokua ni awara. So mbi yeke wayinda, a hunda ti tene mbi mä tere na zo ti impôt ni ti pete goro na lo tongaso si lo zi yanga pëpe na ndo ni. Ye so asara si a hinga mbi tongana zo so ayeke sara ye na lege ni ape. Na ngoi so mbi hinga tâ tënë, mbi ke kua ni, atâa so a yeke payé mbi dä nzoni. Na pekoni, mbi sigigi na ndokua ti mbi wani. Gi na kozo lango ni, mbi sara ambeti ni tongana ti so ndia ahunda nga mbi payé a-impôt ti mbi kue.”—2 aCor. 8:21.

Gagik atene: “Nginza so mbi yeke wara fadeso ayeke ndambo ti nginza so mbi yeke wara kozo, tongaso a yeke lani ngangu na mbi ti bâ lege ti sewa ti mbi. Me mbi yeke fadeso na ngia mingi. Mbi yeke na nzoni conscience na gbele Jéhovah. Mbi zia nzoni tapande na amolenge ti mbi ti koli use, nga mbi gi ti sara akua na yâ ti congrégation. Azo ti impôt nga na ambeni zo so mbi na ala e sara kua oko, abâ mbi fadeso tongana zo so ayeke sara ye na lege ni.”

JÉHOVAH AYEKE MÛ MABOKO NA E

Jéhovah aye mingi azo so ayeke mû gonda na lo na lege so ala yeke mû tapande ti apendere sarango ye ti lo, so na popo ni a yeke wara nga sarango ye na lege ni (Tite 2:10). Jéhovah apusu Gbia David ti tene tënë ti dengo bê so: “Mbi yeke pendere giriri, na fadeso mbi yeke mbakoro; me mbi bâ Nzapa azia zo ti mbilimbili lâ oko pëpe, wala ahale ti lo ahunda kobe pëpe na lege ti [iringo] ye.”—Ps. 37:25.

A yeke ye so tapande ti Ruth so ayeke be-ta-zo afa ni. Lo zia pëpe kogara ti lo Naomi so aga mbakoro awe, me lo ngbâ na tere ti lo. Ruth aquitté lo gue na Israël, si lo voro tâ Nzapa kâ (Ruth 1:16, 17). Na Israël, Ruth asara ye lani na lege ni nga lo sara kua ngangu ti ro alê ti kobe tongana ti so Ndia ahunda na awayere. Jéhovah azia lani Ruth na Naomi lâ oko ape tongana ti so lo sara na David kozo (Ruth 2:2-18). Lo sara nga gbâ ti aye na Ruth na ndo ti aye so lo mû na lo na lege ti mitele. Lo sara si lo ga kotara ti Gbia David na même ti Messie so a mû zendo ti lo.—Ruth 4:13-17; Mat. 1:5, 16.

A lingbi ti duti ngangu na ambeni wakua ti Jéhovah ti wara nginza so alingbi na aye so ala yeke tâ na bezoin ni. Me ala yeke sara kua ngangu nga na bê ti ala kue ti wara ye so ala bezoin ni ahon ti wara ye hio me na mbeni lege so ayeke nzoni ape. So ala sara tongaso,  a fa so ala bâ na nene ni mingi apendere sarango ye ti Nzapa, so na popo ni a yeke wara nga sarango ye na lege ni, ahon aye ti sese kue.—aProv. 12:24; aÉph. 4:28.

Tongana ti Ruth ândö, aChrétien na yâ ti dunia kue afa so ala yeke na mabe na ngangu so Jéhovah ayeke na ni ti mû maboko na zo. Ala zia bê ti ala kue na Lo so amû zendo atene: “Fade mbi yeke zia mo lâ oko pëpe nga mbi yeke girisa mo lâ oko pëpe.” (aHéb. 13:5). Jéhovah afa fani mingi so lo lingbi ti mû maboko na azo so asara ye na lege ni na ngoi kue nga lo yeke ngbâ ti sara ni. Ti lingbi na zendo ti lo, lo yeke mû na awakua ti lo lakue aye so ala yeke na bezoin ni na yâ ti fini ti ala.—Mat. 6:33.

Biani, azo alingbi ti bâ adiamant na ambeni ye na nene ni. Me e hinga biani so, Babâ ti e ti yayu abâ na nene ni sarango ye ti e na lege ni nga na ambeni nzoni sarango ye nde. Lo bâ ni na nene ni mingi ahon apendere tênë kue.

Ti sara ye na lege ni ayeke mû maboko na e ti duti na nzoni conscience nga ti sara tënë polele na fango tënë