Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUIN 2016

Jéhovah ayeke ‘bi bê ti lo na ndo ti mo’

Jéhovah ayeke ‘bi bê ti lo na ndo ti mo’

NGBANGA TI NYEN mo lingbi ti yeda so tënë so ayeke tâ tënë nga so Jéhovah ayeke bi bê biani na ndo ti mo? Mbeni raison ni ayeke so Bible la atene ni polele. Kozo Pierre 5:7 atene: “Ala bi agingo bê ti ala kue na ndo ti lo, ngbanga ti so lo yeke bi bê ti lo na ndo ti ala.” Nyen la afa na mo biani so Jéhovah ayeke bi bê ti lo na ndo ti mo?

NZAPA AYEKE MÛ YE NA AZO NA LEGE TI MITELE

Jéhovah ayeke . . . zo so asara ye na nzoni bê nga lo mû ye na zo

Kozoni kue, Nzapa ayeke na asarango ye so mo ye biani ti tene akota kamarade ti mo aduti na ni. Mingi ni, azo so ayeke sara ye na mba na nzoni bê nga so ayeke mû ye na mba, ayeke ga akota kamarade. Tongana ti so mo lingbi ti bâ ni polele, Jéhovah ayeke sara nzoni bê nga lo yeke mû ye na azo lâ na lâ. Bâ gi mbeni tapande oko: “Lo sara si lâ ti lo asu na ndo ti azo ti sioni nga na azo ti nzoni. Na lo sara si ngu-nzapa apika na ndo ti azo ti mbilimbili nga na azo ti mbilimbili pëpe.” (Mat. 5:45). Nyen la sungo ti lâ na ngu-nzapa ayeke sara? Na popo ti gbâ ti aye so ayeke sara, a yeke na lege ni la Nzapa ayeke mû na e “akobe mingi mingi na lo sara si ngia asi bê ti [e].” (Kus. 14:17). Biani, Jéhovah asara si sese alë gbâ ti kobe, nga akete ye amû ngia na e mingi ahon mbeni pendere kobe.

Ka ngbanga ti nyen la nzara ayeke sara azo mingi? Ngbanga ti so azo ti komande aye ti wara gi ngangu ti komandema nga ti wara nginza na pekoni me ala ye ti changé aye na yâ ti gigi ti azo ape. Jéhovah aga nduru awe ti leke kpale ti bê ti warango ye so na lege so lo yeke sara si Royaume ti yayu, so Molenge ti lo ayeke Gbia ni, ayeke mû place ti azo so ayeke  komande laso. Ande na ngoi ni so, nzara ayeke sara zo oko ape. Me ti laso, Nzapa ayeke mû maboko na awakua be-ta-zo ti lo (Ps. 37:25). So a yeke mbeni ye so Nzapa asara ti fa so lo bi bê na ndo ti mo la ape?

JÉHOVAH AYEKE SARA KION TI NGOI TI LO APE

Jéhovah ayeke . . . sara kion ti ngoi ti lo ape

Mbeni nzoni kamarade ayeke zo so mo na lo ayeke mû ngoi ti duti ndo oko. Lo lingbi ti sara lisoro na mo l’heure mingi na ndo ti aye so anzere na ala use kue. Nga, lo yeke mä mo nzoni na ngoi so mo yeke fa na lo akpale na agingo bê ti mo. Jéhovah kue ayeke mä zo tongaso? En. Lo yeke mä asambela ti e. Ndani la Bible awa e ti “ngbâ lakue ti sambela,” même ti “ngbâ ti sambela lakue.”—aRom. 12:12; 1 aThes. 5:17.

Ngoi oke la Jéhovah aye ti mû ti mä na asambela ti mo? Mbeni tapande ti Bible amû na e kiringo tënë ni. Kozo ti tene Jésus asoro abazengele ti lo, ‘lo sambela Nzapa na mbeni bï oko kue.’ (Luc 6:12). Na yâ ti sambela ni, kite ayeke dä ape so Jésus agbu li nzoni na ndo ti mingi ti adisciple ti lo na airi ti ala, lo bâ asarango ye ti ala, awokongo ti ala nga lo hunda babâ ti lo ti mû maboko na lo ti soro ala. Na ngoi so lâ aga ti sigigi, Jésus ahinga so lo soro awe azo so ayeke na anzoni sarango ye ti sara kua ti abazengele. So Jéhovah ayeke “mä sambela,” anzere na lo ti mä asambela so a sara na lo na bê kue (Ps. 65:3). Même tongana mbeni zo asambela l’heure mingi ndali ti mbeni tënë so agbu bê ti lo mingi, Jéhovah ayeke bâ pëpe yongo ti ngoi.

NZAPA AYEKE NDURU TI PARDONNÉ ZO

Jéhovah ayeke . . .  nduru ti pardonné

Tongana andu tënë ti pardon, même anzoni kamarade kue ayeke ngangu na ala na ambeni ngoi ti pardonné mba. A si ka na mbeni ngoi, azo ayeke fâ yâ ti songo ti ala so aninga ndali ti so ala bâ so ayeke ngangu na ala ti pardonné mba. Jéhovah ayeke tongaso ape. Bible ahunda na azo so asara tere ti ala kete ti hunda lo ti pardonné ala “na fade Lo pardonné [ala] kue.” (És. 55:6, 7). Nyen la apusu Nzapa ti pardonné zo na bê ti lo kue tongaso?

Raison ni ayeke so a lingbi ti haka ndoye ti Nzapa na ti zo ape. Lo ndoye tâ azo ti dunia so  mingi si lo mû gi oko Molenge ti lo, Jésus, ti zi azo na gbe ti siokpari nga na asioni ye ti pekoni (Jean 3:16). Biani, ngere so a futa ti zi e asara aye mingi ahon so. Na lege ti sandaga ti Christ, Nzapa apardonné azo so lo ye ala mingi na bê ti lo kue. Bazengele Jean atene: “Tongana e fa asiokpari ti e na gigi, lo yeke be-ta-zo nga mbilimbili ti [pardonné] siokpari ti e.” (1 Jean 1:9). Ndali ti so Jéhovah ayeke pardonné zo, azo alingbi ti ngbâ ti sara songo na lo. So e hinga ni tongaso andu bê ti e mingi.

LO YEKE MÛ MABOKO NA MO NA NGOI SO MO BEZOIN LO

Jéhovah ayeke . . .  mû maboko na e tongana e yeke na bezoin ni

Mbeni nzoni kamarade ayeke mû maboko na amba ti lo tongana ala bezoin ni. Jéhovah kue asara tongaso? Bible atene: “Même tongana [mbeni wakua ti Jéhovah atï], lo tï biani pëpe; teti L’Éternel agbu maboko ti lo.” (Ps. 37:24). Jéhovah ayeke mû ‘maboko na awakua ti lo’ na alege nde nde. Bâ tapande ti mbeni ye so apassé na zoa ti Sainte-Croix na Caraïbes.

Akamarade ti klase ti mbeni maseka-wali asara ngangu na ndo ti lo ndali ti so lo ke ti bara drapeau ndali ti mabe ti lo. Na peko ti so lo sambela Jéhovah ti mû maboko na lo, lo leke na bê ti lo ti gbu ngangu na yâ ti kpale ni. Lo sara exposé ti lo ti peko na ndo ti barango drapeau. Lo sara kua na Mbeti ti ambaï ti yâ ti Bible, lo fa tongana nyen la mbaï ti Shadrak, Méshak, na Abed-Négo amû maboko na lo ti ke ti bara drapeau. Lo tene: “Jéhovah abata lani aHébreu ota so ndali ti so ala ke ti voro mbeni yanda.” Na pekoni lo zia buku ni na amba ti lo ni. Ala bale-oko na oko amû oko oko. So lo bâ Jéhovah amû na lo ngangu nga na ndara ti fa tënë na ndo ti mbeni ngangu tënë tongaso so, tere ti lo anzere mingi.

Tongana mo ngbâ lakue ti duti na kite so Jéhovah ayeke bi bê ti lo na ndo ti mo, gbu li na ndo ti aversê ti Bible tongana Psaume 34:18-20; 55:23 nga na Psaume 145:18, 19. Hunda na aTémoin so aninga na yâ ti tâ tënë tongana nyen la Jéhovah abi bê ti lo na ndo ti ala. Nga, tongana mo ye ti tene Nzapa amû maboko na mo, sambela lo na ndo ti ye so mo ye. Mo yeke bâ ande hio tongana nyen la Jéhovah ayeke ‘bi bê ti lo na ndo ti mo.’