Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUILLET 2016

“Zia mbeto; fade Mbi sara na mo”

“Zia mbeto; fade Mbi sara na mo”

TARA ti bâ so mo yeke tambela na ndo ti lege na bï l’heure ahon. Hio tongaso mo bâ so mbeni zo ayeke mû peko ti mo. Tongana mo luti, zo ni nga kue aluti. Tongana mo tambela hio hio, lo kue lo tambela hio hio na peko ti mo. Mo komanse ti kpe loro, mo gue hio na da ti mbeni kamarade ti mo so ayeke nduru na yanga ti lege ni. Na ngoi so kamarade ti mo ni azi yanga-da na lo yamba mo na yâ ti da ti lo ni, bê ti mo ayeke dë.

Peut-être ye so e londo ti sara tënë ni so ade asi na mo ape, me ambeni gingo bê alingbi ti sara si mo wara vundu mingi. Na tapande, mo yeke tiri na mbeni wokongo so mo ye ti hon ndo ni me lakue mo ngbâ ti sara gi oko ye ni so? Aninga awe la mo wara kua ti nginza ape, atâa so mo sara effort ti wara mbeni? Mo yeke gi bê ti mo na ndo ti gango mbakoro nga na ndo ti akpale ti seni so mo yeke wara ande? Wala mo yeke gi bê ti mo na ndo ti mbeni ye nde?

Atâa kpale ni ayeke nyen, a yeke nzere na mo pëpe ti wara mbeni zo so mo lingbi ti fa agingo bê ti mo na lo nga so lo lingbi ti mû maboko na mo na ngoi so mo yeke na bezoin ni? Mo yeke na mbeni kota kamarade tongaso? En. Jéhovah ayeke kota kamarade ti mo, gi tongana ti so lo yeke lani kota kamarade ti Abraham, tongana ti so a fa ni na Ésaïe 41:8-13. Na versê 10 nga 13 ni, Jéhovah amû zendo na awakua ti lo: “Zia mbeto asara mo pëpe teti Mbi yeke na mo; na zia ye ayengi mo pëpe, teti Mbi yeke Nzapa ti mo; fade Mbi sara si mo kpengba; biani, fade Mbi sara na mo; biani, fade Mbi bata mo na tïtî Mbi ti koti ti mbilimbili. Teti Mbi, L’Éternel Nzapa ti mo, Mbi gbu maboko ti mo ti koti. Mbi tene na mo, Zia mbeto; fade Mbi sara na mo.”

“FADE MBI BATA MO”

Atënë so adë bê ti mo ape? Tara ti bâ na yâ ti li ti mo ye so Jéhovah amû zendo biani ti sara na e. Ge, versê ni atene pëpe so mo ayeke tambela na tere ti Jéhovah na mo gbu maboko ti lo. Tongana fade mo yeke tambela na tere ti Jéhovah, maboko ti lo ti mbage ti koli ayeke gbu maboko ti mo ti mbage ti wali. Ye oko, Jéhovah ayôro “tïtî [lo] ti koti ti mbilimbili” na lo gbu ‘maboko ti mo ti koti’, mo bâ mo tene lo gboto mo na yâ ti mbeni ye ti ngangu ti sigigi na mo. Na ngoi so Jéhovah agbu maboko ti mo ti mbage ti koli, lo mû ngangu na mo na lege ti tënë ti dengo bê so: “Zia mbeto; fade Mbi sara na mo.”

Mo yeke bâ Jéhovah tongana mbeni Babâ ti ndoye nga Kamarade so ayeke mû maboko na mo na ngoi so mo yeke na yâ ti kpale? Lo yeke bi bê ti lo na mo, tënë ti nzoni duti ti mo agbu bê ti lo nga lo ye biani ti mû maboko na mo. Tongana mo yeke na yâ ti kpale, Jéhovah aye si sioni asi na mo pëpe ndali ti so lo ye mo mingi. Biani, lo “yeke nduru na e ti sara na e na yâ ye ti ngangu kue.”—Ps. 46:2.

TONGANA E BÂ SO TËNË AYEKE NA LI TI E NDALI TI AFAUTE SO E SARA ÂNDÖ

Ambeni zo ayeke gi bê ti ala mingi na ndo ti aye so ala sara ândö nga ala yeke hunda tere ti ala wala  Nzapa apardonné ala wala pëpe. Tongana mo kue a si na mo tongaso, gbu li ti mo na ndo ti Job, koli be-ta-zo so ayeda na ‘sioye ti lâ ti pendere ti lo’. (Job 13:26). David zo ti sungo psaume nga kue awara oko bibe so nga lo voro yanga na Jéhovah: “Mo dabe Mo na siokpari ti lâ ti pendere ti mbi pëpe, wala na kengo-ndia ti mbi pëpe.” (Ps. 25:7). So a dü e na yâ ti siokpari, e kue e ‘sara siokpari awe na e si nduru na gloire ti Nzapa pëpe.’—aRom. 3:23.

A tene tënë so ayeke na Ésaïe chapitre 41 so kozoni kue na awakua ti Nzapa ti giriri. Ala sara lani asioni ye mingi na asara si Jéhovah amû desizion ti fâ ngbanga na ndo ti ala na lege so lo sara si a gue na ala na ngbâa na Babylone (És. 39:6, 7). Na oko ngoi ni, Nzapa amû lani zendo so lo yeke zi azo so achangé bê ti ala si akiri na lo (És. 41:8, 9; 49:8). Jéhovah afa nga oko bibe ni so laso na mbage ti azo so aye biani ti tene Nzapa asara be-nzoni na ala.—Ps. 51:3.

Bâ ye so asi na Takuya, * so ayeke gi lani ti hon ndo ti asioni sarango ye ti lo tongana bango porno nga na sarango ngia na tere ti lo ti koli. Fani mingi, lo yeke tï gi na yâ ti asioni ye ni so. Tënë ti bê ti lo ayeke so wa? Lo tene: “Mbi bâ so mbi yeke ye oko ape, me na ngoi so mbi ga nduru na Jéhovah na yâ ti sambela ti voro yanga na lo ti pardonné mbi, lo yô mbi na nduzu.” Tongana nyen la Jéhovah asara ni? A-ancien ti congrégation ti Takuya atene na lo ti iri ala lakue tongana lo kiri lo tï na yâ ti asioni sarango ye ni. Lo tene: “A yeke lani kete ye ape ti iri ala, me lakue tongana mbi iri ala, mbi wara ngangu.” Na pekoni, a-ancien ni aleke ti tene surveillant ti circonscription ague abâ Takuya ti kpengba lo na lege ti yingo. Surveillant ti circonscription ni atene na lo: “Mbi ga ge gi gbagburu tongaso ape. Mbi ga ge ndali ti so a-ancien la atene na mbi ti ga. Ala ye ti tene mbi ga mbi kpengba mo na lege ti yingo.” Takuya atene: “Mbi sara siokpari lani, me Jéhovah amû maboko na mbi na lege ti a-ancien.” Takuya ague na li ni, lo ga pionnier permanent nga fadeso lo yeke sara kua na yâ ti mbeni filiale. Legeoko tongana ti so Nzapa amû maboko na ita so, lo yeke mû maboko na mo na ngoi so mo sara afaute.

TONGANA E YEKE GI BÊ TI E NA NDO TI WARANGO KUA TI NGINZA

Azo mingi ayeke gi bê ti ala ndali ti so ala yeke na kua ti nginza ape. A zi ambeni zo na kua ti nginza ti ala nga ayeke ngangu na ala ti wara mbeni kua so alingbi ti sara si ala wara nginza. Tara ti bâ vundu so ayeke sara mo tongana akota zo ti andokua ake ti mû mo na kua. Na yâ ti mara ti kpale tongaso, ambeni zo abâ so ala yeke ye oko ape. Tongana nyen la Jéhovah alingbi ti mû maboko na mo? Lo lingbi pëpe ti mû na mo mbeni kua ti nginza gi na lê ni lê ni, me lo lingbi ti mû maboko na mo na lege so lo yeke dabe ti mo na tënë ti Gbia David so lo tene: “Mbi yeke pendere giriri, na fadeso mbi yeke mbakoro; me mbi bâ Nzapa azia zo ti mbilimbili lâ oko pëpe, wala ahale ti lo ahunda kobe pëpe na lege ti yongo ye.” (Ps. 37:25). Biani, Jéhovah abâ mo na nene ni, nga na “tïtî [lo] ti koti ti mbilimbili”, lo lingbi ti mû maboko na mo ti wara aye so mo yeke na bezoin ni ti ngbâ ti voro lo.

Tongana nyen la Jéhovah alingbi ti mû maboko na mo tongana a zi mo na kua ti nginza?

Sara, so alango na Colombie, abâ tongana nyen la Jéhovah ayeke na ngangu ti bata azo. Lo yeke sara  kua lani na yâ ti mbeni ndokua so azo ahinga ni mingi. A yeke futa lo nzoni me kua ni amû ngoi ti lo mingi. Ye oko, lo ye ti sara na Jéhovah mingi, tongaso lo ke kua ni na lo komanse ti sara kua ti pionnier. Me, a yeke ngangu na lo ti wara mbeni kua so amû ngoi ti lo mingi ape tongana ti so lo ye. Lo zi mbeni magasin so lo kä crème glacée na yâ ni me yeke yeke nginza ahunzi na lo na lo kanga magasin ni. Sara atene: “Ngu ota ahon, me grâce na Jéhovah, mbi wara lege ti gbu ngangu na yâ ni.” Lo manda ti sara kangbi na popo ti aye so a hunda nginza mingi nga na aye so lo yeke bezoin ni nga lo gi bê pëpe na ndo ti aye ti kekereke (Mat. 6:33, 34). Na nda ni, ngbene patron ti lo airi lo nga lo hunda na lo ti kiri na kozo kua so lo sara lani. Lo tene so lo yeke sara gi kua so ayeke mû ngoi ti lo mingi ape nga lo yeke sara ni gi tongana a mû na lo ngoi ndali ti kua ti Nzapa ti lo. Atâa so Sara awara gbâ ti nginza tongana ti kozo ape, lo ngbâ ti sara kua ti pionnier ti lo. Na yâ ti aye so kue, lo tene: “Mbi bâ so Jéhovah amû maboko na mbi na ndoye.”

TONGANA E GI BÊ NA NDO TI GANGO MBAKORO

Mbeni ye so asara si azo ayeke gi bê ti ala mingi ayeke tënë ti gango mbakoro. Azo mingi so ague na retraite ayeke hunda tere ti ala wala ala lingbi ti wara nginza ti bata na tere ti ala nzoni. Ala yeke gi nga bê ti ala na ndo ti kpale ti seni so ala lingbi ti wara ni tongana ala ga mbakoro mingi. Kite ayeke dä ape so, a yeke David la avoro lani yanga na Jéhovah, a tene: “Mo ke mbi pëpe tongana mbi ga mbakoro; zia mbi pëpe tongana ngangu ti mbi awe.”—Ps. 71:9, 18.

Me, tongana nyen la a lingbi awakua ti Jéhovah abâ so lo yeke bata ala na ngoi ti mbakoro ti ala? Ala yeke na bezoin ti ngbâ ti duti na kpengba mabe na Nzapa nga ti duti na confiance so lo yeke mû na ala aye so ala yeke na bezoin ni. Biani, tongana ândö ala yeke na aye ti nginza mingi, ala yeke peut-être na bezoin ti changé aye na yâ ti fini ti ala nga ti duti na aye ti sese mingi ape. Ala lingbi ti bâ so ti te “kugbe ti kasa” alingbi ti duti peut-être nzoni ndali ti seni ti ala ahon ti te “bagara ti mafuta”. (aProv. 15:17). Tongana mo zia lê ti mo gi na ndo ti vorongo Jéhovah, lo yeke mû na mo aye so mo yeke na bezoin ni na ngoi ti mbakoro ti mo.

José na Rose nga Tony na Wendy

Bâ tapande ti José na Rose, so asara na Jéhovah na yâ ti kua ti ngoi kue ahon angu 65 tongaso. Tongana angu ayeke hon, ala yeke bâ lege ti babâ ti Rose so abezoin ti tene a mû maboko na lo na ngoi kue. Nga, José ayeke bâ pasi lani ndali ti so a opéré lo ndali ti cancer nga a yeke mû na lo angangu yorö. Eskê Jéhovah ayôro maboko ti lo ti mbage ti koli na koli na wali be-ta-zo so? En, me tongana nyen? Na lege so lo sara kua na ita Tony na wali ti lo Wendy, so azia na ala mbeni ndo ti lango. Tony na Wendy aye ti zia ndo ti ala so na apionnier ni senge senge. Angu mingi kozo, na lê ti mbeni fenêtre ti ekole ti Tony, lo yeke bâ José na Rose lakue na fango tënë. Lo ye ala mingi ndali ti so ala yapu na kua ti fango tënë nga kua ni so asara ngangu mingi na ndo ti lo. Na bango koli na wali so aga mbakoro awe me so ala mû fini ti ala kue ti sara na Jéhovah, apusu Tony na Wendy ti zia na ala ndo ti lango. Teti angu 15 so ahon, ala mû maboko na José na Rose, so ayeke fadeso na ngu 85 tongaso. Ambakoro so abâ mungo maboko ti koli na wali so angbâ maseka so tongana mbeni matabisi so alondo na Jéhovah.

Nzapa ayôro “tïtî [lo] ti koti ti mbilimbili” na mo nga kue. Mo yeke yôro maboko ti mo na Zo so amû zendo na mo, lo tene: “Zia mbeto; fade Mbi sara na mo”?

^ par. 11 A changé ambeni iri ni.