Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JUILLET 2016

Kiri singila na Nzapa ndali ti kota nzobe ti lo

Kiri singila na Nzapa ndali ti kota nzobe ti lo

“E kue e wara . . . kota nzobe ti Nzapa na ndo ti tere.”JEAN 1:16.

ABIA: 95, 13

1, 2. (a) Fa peko ti toli ti Jésus na ndo ti wa ti yaka ti vigne. (b) Tongana nyen la mbaï ni agboto lê na ndo ti asarango ye tongana mungo ye na zo nga na kota nzobe?

MBENI KOLI so ayeke na yaka ti vigne ague na kota ndapre na yâ ti gara ti gi azo ti mû ala ti sara kua na yâ ti yaka ti lo. Akoli so lo wara ala so ayeda na wungo ti nginza so lo tene lo yeke futa na ala na yâ ti lango ni na ala gue na kua ni. Me, wa ti yaka ni abezoin gbâ ti azo ti kua, na lo kiri lo gue na gara ni fani mingi ti mû azo mingi mingi ti sara kua ti lo ni, lo mä tere même na azo so lo mû ala nduru na lakui ti futa ala na ye so alingbi na ala. A ga ti si na lakui, lo bungbi azo ti kua ni kue ti mû na ala nginza ti ala ti lango ni, na lo mû na ala kue gi oko wungo ti nginza, atâa ala so asara kua ni l’heure mingi wala gi l’heure oko. Na ngoi so akozo zo ti kua ni ahinga tënë ni, ala komanse ti diko tënë na gbe ti go. Wa ti yaka ti vigne ni atene: ‘Ala yeda fade na nginza so mbi tene mbi yeke mû na ala so ape? Mbi lingbi ti mû na azo ti kua ti mbi kue ye so mbi ye ape? Bê ti ala ason ndali ti so maboko ti mbi awoko ti mû ye na zo so?’—Mat. 20:1-15.

2 Toli ti Jésus so adabe ti e na “kota nzobe” ti Jéhovah so ayeke mbeni sarango ye ti lo so a sara tënë ni fani mingi na yâ ti  Bible. (Diko 2 aCorinthien 6:1.) Na bango ni, azo ti kua so asara gi l’heure oko alingbi pëpe ti wara nginza ni so, me wa ti yaka ti vigne ni afa kota nzobe na mbage ti ala. Na ndo ti tënë “kota nzobe” so a kiri pekoni na “grâce” na yâ ti aBible mingi, mbeni wandara atene: “Kota pensé so ayeke na peko ti tënë so aye ti sara tënë ti mbeni matabisi so a mû na mbeni zo senge senge na nzobe, mbeni ye so a mû na mbeni zo pëpe ndali ti so lo sara ngangu ti wara ni wala ndali ti so lo lingbi na ni.”

MATABISI SO JÉHOVAH AMÛ NA NZOBE

3, 4. Ngbanga ti nyen nga tongana nyen la Jéhovah afa kota nzobe ti lo na mbage ti azo kue?

3 Bible asara tënë ti “kota nzobe ti Nzapa” tongana mbeni ‘matabisi so lo mû na zo senge senge’. (aÉph. 3:7). Ngbanga ti nyen nga tongana nyen la Jéhovah amû “matabisi so senge senge” na azo? Tongana fade e sara aye kue so Jéhovah ahunda na e tâ na lege ni, andâ e lingbi na nzobe ti lo. Mawa ni ayeke so, a yeke ngangu na e ti sara ni. Ndani la, Gbia ti ndara Salomon atene: “Zo oko ti mbilimbili, so asara nzoni na lo sara siokpari pëpe, ayeke na sese so pëpe.” (Zo-ti. 7:20). Bazengele Paul nga kue atene: “Azo kue asara siokpari awe na ala si nduru na gloire ti Nzapa pëpe,” nga “futa ti peko ti siokpari ayeke kuâ.” (aRom. 3:23; 6:23a). Ye so e lingbi na ni la.

4 Ye oko, Jéhovah afa ndoye ti lo na mbage ti azo so siokpari ayeke na tere ti ala, na lege ti kota nzobe ti lo so mara ni ayeke dä ape. Lo tokua kota matabisi ti lo so ahon atanga ni kue, so ayeke “gi oko Molenge ti lo” na sese ge ti kui ndali ti e (Jean 3:16). Ni la, Paul atene na ndo ti Jésus lo tene, a “zia couronne ti gloire na ti gonda na li ti lo ngbanga ti so lo kui, si na lege ti kota nzobe ti Nzapa lo bâ pasi juska ti kui teti zo oko oko kue.” (aHéb. 2:9). Biani, “matabisi so Nzapa amû ayeke fini ti lakue lakue na lege ti Christ Jésus Seigneur ti e.”—aRom. 6:23b.

5, 6. Ye ti pekoni ayeke so wa (a) tongana e yeke na gbe ti komandema ti siokpari? (b) tongana e yeke na gbe ti komandema ti kota nzobe ti Nzapa?

5 Ngbanga ti nyen la e yeke na siokpari na tere ti e nga e yeke kui? Bible atene: “Na lege ti faute ti zo oko [Adam] kuâ akomande tongana gbia” na ndo ti ahale ti Adam (aRom. 5:12, 14, 17). Atâa so kue, e lingbi ti soro ti duti na gbe ti komandema ti siokpari pëpe wala ti zia si ahon ndo ti e pëpe. Tongana e mä na bê na ngere so Christ afuta ti zi na e, e yeke duti na gbe ti komandema ti kota nzobe ti Jéhovah. Tongana nyen? Bible atene: “Na ndo so siokpari awu dä, kota nzobe ti Nzapa akiri awu mingi mingi. Ndali ti nyen? Ti tene tongana ti so siokpari akomande tongana gbia legeoko na kuâ, tongaso nga kota nzobe ti Nzapa alingbi ti komande tongana gbia na lege ti mbilimbili ti gue na fini ti lakue lakue so ayeke ga na lege ti Jésus Christ.”—aRom. 5:20, 21.

6 Atâa so siokpari angbâ na tere ti e, a lingbi e zia pëpe si a hon ndo ti e. Na ngoi so e sara siokpari, e yeke hunda Jéhovah ti pardonné e. Paul awa aChrétien, lo tene: “A lingbi siokpari aduti na ngangu na ndo ti ala pëpe, teti ala yeke na gbe ti ndia pëpe, me na gbe ti kota nzobe ti Nzapa.” (aRom. 6:14). Tongaso, e yeke na gbe ti komandema ti kota nzobe ti Nzapa. Ye ti pekoni ayeke nyen? Paul atene: “Kota nzobe ti Nzapa . . . a fa na e ti ke asarango ye so ayeke nde na ye so Nzapa aye, ti ke anzara ti dunia so; a fa na e ti tene na lege ti dutingo ti e, e bata bibe ti e nzoni, e sara ye ti mbilimbili nga e gbu tënë ti Nzapa ngangu na yâ ti aye ti ngoi ti laso.”—Tite 2:11, 12.

 JÉHOVAH AFA KOTA NZOBE TI LO “NA ALEGE NDE NDE”

7, 8. So a tene Jéhovah ayeke fa kota nzobe ti lo “na alege nde nde” so aye ti tene nyen? (Bâ foto so ayeke na tongo nda ti article ni.)

7 Bazengele Pierre atene: “So zo oko oko awara mbeni matabisi, ala mû ni ala sara na kua na amba ti ala tongana anzoni wabatango ye ti kota nzobe ti Nzapa so lo yeke sara ni na alege nde nde.” (1 Pi. 4:10). So aye ti tene nyen? A ye ti tene so atâa atara so e tingbi na ni na yâ ti fini ti e ayeke tongana nyen, Jéhovah alingbi ti mû maboko na e ti hon ndo ni (1 Pi. 1:6). Nzapa ayeke fa lakue kota nzobe ti lo na mbage ti e alingbi na atara oko oko so e yeke tingbi na ni.

8 Me, Jéhovah ayeke fa kota nzobe ti lo na alege nde nde. Bazengele Jean atene: “E kue e wara ye na lege ti ye so lo yeke na ni mingi mingi, so ti tene kota nzobe ti Nzapa na ndo ti tere.” (Jean 1:16). So Jéhovah ayeke fa kota nzobe ti lo na mbage ti e na alege nde nde, a sara si e wara gbâ ti aye ti nzoni na pekoni. Ambeni ye ni ayeke so wa?

9. Tongana nyen la e wara aye ti nzoni na lege ti kota nzobe ti Jéhovah? Tongana nyen la e lingbi ti fa singila ti e ndali ni?

9 Jéhovah apardonné asiokpari ti e. Ndali ti kota nzobe ti Jéhovah, e wara pardon ti asiokpari ti e, gi tongana e changé bê ti e nga e ngbâ ti tiri na anzara ti sarango sioni ye so ayeke na bê ti e. (Diko 1 Jean 1:8, 9.) Be-nzoni so Nzapa asara na e ayeke pusu e ti fa singila ti e na lo nga ti gonda lo. Paul asû mbeti na ambeni mba ti lo aChrétien so a soro ala nga ti gue na yayu, lo tene: “[Jéhovah azi] e na gbe ti komandema ti bingo na lo gue na e na yâ ti royaume ti Molenge ti lo so lo ndoye lo mingi. Na lege ti Molenge so, a zi e na lege ti ngere so a futa ti zi azo, so ti tene a pardone asiokpari ti e.” (aCol. 1:13, 14). So a pardonné asiokpari ti e so azi lege na e ti wara gbâ ti ambeni pendere ye ti nzoni.

10. Ndali ti kota nzobe ti Nzapa, songo ti e na lo ayeke tongana nyen?

10 E lingbi ti duti na siriri na Nzapa. Teti so a dü e na siokpari na tere ti e, e ga awato ti Nzapa. Paul atene: “Na ngoi so e yeke lani awato, e ga azo so akiri asara songo na Nzapa na lege ti kuâ ti Molenge ti lo.” (aRom. 5:10). So e kiri e sara songo na Jéhovah so amû lege na e ti duti na siriri na lo. Paul atingbi pasa ni so na kota nzobe ti Jéhovah, lo tene: “So a diko e [aita ti Christ so a soro ala ti gue na yayu] fadeso awe tongana azo ti mbilimbili ndali ti mabe, zia e duti na siriri na Nzapa na lege ti Seigneur ti e Jésus Christ, lo so na lege ti lo nga e lingbi ti ga nduru na Nzapa na lege ti mabe ti lï na yâ ti kota nzobe ti Nzapa ni so e luti dä fadeso.” (aRom. 5:1, 2). So tâ pendere tufa!

Aye so Nzapa asara ti fa kota nzobe ti lo na mbage ti e: Lo mû na e pasa ti mä nzoni tënë (Bâ paragraphe 11)

11. Tongana nyen la aChrétien so a soro ala ti gue na yayu asara si “ambeni ngasangbaga” aga mbilimbili?

11 E lingbi ti ga mbilimbili na gbele Nzapa. E kue e yeke mbilimbili pëpe ndali ti so siokpari ayeke na tere ti e. Me prophète Daniel afa so na ngoi ti nda ni, “ala so ayeke na ndara,” wala tanga ti aChrétien so a soro ala ti gue na yayu, ayeke ‘sara si azo mingi aga mbilimbili’. (Diko Daniel 12:3.) Na lege ti kua ti ala ti fango tënë nga na ti fango ye, ala sara si “ambeni ngasangbaga” kutu mingi alë kpengba songo na Jéhovah (Jean 10:16). Me, a yeke gi na lege ti kota nzobe ti Jéhovah la azo kutu mingi so alë kpengba songo na lo. Paul atene: “A yeke tongana mbeni matabisi so a mû ni senge senge si a diko ala tongana azo ti mbilimbili na lege ti kota nzobe ti lo so aga na lege ti zingo ala so aga na lege ti ngere so Christ Jésus afuta ni ti zi azo.”—aRom. 3:23, 24.

Lo mû na e pasa ti sambela lo (Bâ paragraphe 12)

12. Tongana nyen la sambela afa kota nzobe ti Nzapa na mbage ti e?

12 E lingbi ti ga nduru na trône ti Nzapa  na lege ti sambela. Kota nzobe ti Jéhovah asara si e wara pasa ti ga nduru na trône ti lo so ayeke na yayu na lege ti sambela. Ni la, Paul airi trône ti Jéhovah lo tene, “trône ti kota nzobe ti Nzapa” nga lo tisa e ti ga nduru na ni na “sarango tënë na kamene pëpe”. (aHéb. 4:16a). Jéhovah amû na e pasa so na lege ti Molenge ti lo, “so ndali ti lo e wara lege ti sara tënë na kamene pëpe nga e yeke gi bê ti e pëpe tongana e yeke ga nduru na Nzapa na lege ti mabe ti e na Christ.” (aÉph. 3:12). So e yeke gi bê ti e pëpe tongana e sara tënë na Jéhovah na yâ ti sambela ayeke mbeni pendere ye so afa kota nzobe ti lo na mbage ti e.

Lo mû maboko na e na ngoi so e yeke na bezoin ni (Bâ paragraphe 13)

13. Tongana nyen la kota nzobe ti Nzapa alingbi ti mû maboko na e “na ngoi so e yeke na bezoin” ni?

13 E lingbi ti wara mungo maboko na ngoi so e yeke na bezoin ni. Paul awa e ti ga nduru na Jéhovah senge senge na yâ ti sambela, “si a lingbi ti sara nzoni bê na e na a sara kota nzobe na e na ngoi so e yeke na bezoin ti tene a mû maboko na e.” (aHéb. 4:16b). Na ngoi kue so e wara atara wala akpale na yâ ti gigi ti e, e lingbi ti toto na Jéhovah ti mû maboko na e na nzoni bê. Atâa so e lingbi na ni ape, lo yeke kiri tënë na e, mingi ni na lege ti aita ti e Chrétien, ‘tongaso si e duti na mbeto oko pëpe na e tene: “Jéhovah ayeke zo ti mungo maboko na mbi; fade mbeto ayeke sara mbi pëpe. Nyen la zo alingbi ti sara na mbi nyen?”’—aHéb. 13:6.

14. Mbeni kota pasa so e wara na lege ti kota nzobe ti Jéhovah ayeke nyen?

14 E wara dengo bê ndali ti avundu ti e. Mbeni kota pasa so e wara na lege ti kota nzobe ti Jéhovah ayeke dengo bê ndali ti avundu ti e (Ps. 51:19). Paul atene na aChrétien ti Thessalonique, so asara ngangu na ala lani, lo tene: “Zia Seigneur ti e Jésus Christ na Nzapa Babâ ti e so andoye e nga so amû na e dengo bê ti lakue lakue nga na nzoni beku na lege ti kota nzobe ti lo adë bê ti ala na asara si ala luti ngangu.” (2 aThes. 2:16, 17). A yeke biani ye ti dengo bê ti hinga so Jéhovah andoye e nga lo yeke bi bê ti lo na e na lege ti kota nzobe ti lo.

15. Kota nzobe ti Nzapa asara si e wara beku wa?

 15 E wara beku ti fini ti lakue lakue. So e yeke na siokpari na tere ti e, e wani e yeke na beku ape. (Diko Psaume 49:8, 9.) Me Jéhovah amû na e mbeni pendere beku. Jésus amû zendo na adisciple ti lo, lo tene: “Ye so bê ti Babâ ti mbi aye ayeke so: A lingbi zo kue so abâ Molenge ni na amä na bê na lo awara fini ti lakue lakue.” (Jean 6:40). Biani, beku ti fini ti lakue lakue ayeke mbeni matabisi, mbeni pendere ye so afa kota nzobe ti Nzapa. Paul, so abâ beku so na nene ni, atene: “Kota nzobe ti Nzapa so aga na salut na mara ti azo nde nde kue asigigi polele awe.”—Tite 2:11.

KOTA NZOBE TI NZAPA AMÛ LEGE NA E PËPE TI SARA SIOKPARI NA MBANA

16. Tongana nyen la ambeni kozo Chrétien amû kota nzobe ti Nzapa ti sara na siokpari na mbana?

16 Atâa so kota nzobe ti Jéhovah asara si e wara aye ti nzoni mingi, a yeke nzoni e pensé pëpe so lo yeke kanga lê na ndo ti asioni sarango ye ti e kue. Na popo ti akozo Chrétien, ambeni atara lani ti “mû kota nzobe ti Nzapa . . . tongana mbeni raison ti sara sioni ye na kamene pëpe.” (Jude 4). Na bango ni, aChrétien so ayeke lani be-ta-zo ape so apensé so ala lingbi ti sara siokpari, na pekoni ti zia bê na ndo ti Jéhovah ti pardonné ala. Ye so ayeke sioni mingi encore ayeke so, ala sara kue ti pusu aita ti ala ti bungbi legeoko na ala na yâ ti asioni sarango ye ti ala ni. Même laso kue, azo kue so ayeke sara ye tongaso ayeke “zonga yingo ti kota nzobe ti Nzapa”.—aHéb. 10:29.

17. Kpengba wango wa la Pierre amû lani?

17 Laso, Satan ahanda ambeni Chrétien ti pensé so ala lingbi ti sara siokpari sân ti tene Nzapa apunir ala ndali ti so lo yeke Nzapa ti be-nzoni. Me atâa so Jéhovah ayeke nduru ti pardonné wasiokpari so achangé bê ti lo, lo ye ti tene e tiri ngangu ti hon ndo ti asioni bibe so e yeke na ni. Lo pusu Pierre ti sû tënë so na mbeti: “Tongaso, aita so mbi ndoye ala mingi, so ala hinga ye so kozo awe, ala sara hange si girisango lege ti azo ni so akpe ndia pëpe ague na ala yongoro pëpe si ala tï, atâa so ala wani ala luti fade ngangu. Me ala ngbâ ti maï na yâ ti kota nzobe nga na yâ ti hingango ye na ndo ti Seigneur na Sauveur ti e Jésus Christ.”—2 Pi. 3:17, 18.

KOTA NZOBE TI NZAPA APUSU E TI SARA AKUA

18. Kota nzobe ti Jéhovah apusu e ti sara akua wa?

18 So e kiri singila na Jéhovah ndali ti kota nzobe ti lo, a lingbi e sara kua na amatabisi so e yeke na ni ti mû gonda na Nzapa nga ti mû maboko na amba ti e. E yeke sara ni na alege wa? Paul atene: “Tongaso, teti so e yeke na amatabisi nde nde na lege ti kota nzobe ti Nzapa so a mû na e, . . . wala a yeke mbeni kusala, zia e ngbâ ti sara kusala so; wala zo so ayeke fa ye, zia lo ngbâ ti fa ye; wala zo so ayeke wa zo, zia lo ngbâ ti wa zo; . . . zo so ayeke sara nzoni bê na zo, zia lo sara ni na ngia na bê.” (aRom. 12:6-8). Kota nzobe so Jéhovah afa na mbage ti e apusu e ti gue ti fa tënë mingi, ti manda Bible na azo, ti wa amba ti e aChrétien nga ti pardonné azo so peut-être ason bê ti e.

19. Kua wa la e yeke sara tënë na ndo ni na yâ ti article ti peko?

19 So Nzapa afa kota nzobe ti lo na mbage ti e, a lingbi a pusu e ti “fa nda ti tënë ni kue na ndo ti nzoni tënë ti kota nzobe ti Nzapa.” (Kus. 20:24). E yeke sara nzene nzene tënë na ndo ti kua ti fango tënë so na yâ ti article ti peko.