Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juillet 2016

Fa nzoni tënë ti kota nzobe ti Nzapa

Fa nzoni tënë ti kota nzobe ti Nzapa

“Fa nda ti tënë ni kue na ndo ti nzoni tënë ti kota nzobe ti Nzapa.”—KUS. 20:24.

ABIA: 101, 84

1, 2. Tongana nyen la Bazengele Paul afa lani so lo kiri singila ndali ti kota nzobe ti Nzapa?

BAZENGELE Paul atene lani na bê ti lo kue, lo tene: “Kota nzobe ti Nzapa na mbage ti mbi angbâ senge senge pëpe.” (Diko 1 aCorinthien 15:9, 10.) Paul ahinga lani nzoni mingi so lo yeke fade na droit pëpe ti tene Nzapa asara be-nzoni na lo, ndali ti so kozo lo sara ngangu mingi na aChrétien.

2 Na ngoi so Paul aga nduru ti kui, lo sû mbeti na Timothée so ayeke mba ti lo wakua, lo tene: “Mbi kiri singila na Christ Jésus, Seigneur ti e, lo so amû na mbi ngangu, ngbanga ti so lo bâ mbi tongana zo so ayeke be-ta-zo na lege so lo soro mbi ndali ti mbeni kusala.” (1 Tim. 1:12-14). Kusala ni so ayeke lani nyen? Paul afa na a-ancien ti congrégation ti Éphèse ye so kusala ni andu ni, lo tene: “Mbi bi bê ti mbi na ndo ti âme ti mbi ahon ndo ni pëpe, mo bâ mo tene a yeke kota ye mingi na lê ti mbi. Kota ye ni ayeke gi ti tene mbi hunzi kpengo loro ti mbi nga na kusala so Seigneur Jésus amû na mbi, so ayeke ti fa nda ti tënë ni kue na  ndo ti nzoni tënë ti kota nzobe ti Nzapa.”Kus. 20:24.

3. Kusala wa la ayeke nde so a mû na Paul? (Bâ foto so ayeke na tongo nda ti article ni.)

3 “Nzoni tënë” wa la Paul afa so agboto lê na ndo ti kota nzobe ti Jéhovah? Lo tene na aChrétien ti Éphèse: “Ala mä tënë ti kusala so a mû na mbi, so ayeke ti bâ lege ti kota nzobe ti Nzapa ndali ti nzoni ti ala.” (aÉph. 3:1, 2). A mû na Paul lani kua ti fa nzoni tënë na azo so ayeke aJuif ape si ala nga kue alingbi ti ga na popo ti azo so a iri ala ti bungbi legeoko na Christ na yâ ti Royaume so Christ ayeke Gbia ni. (Diko aÉphésien 3:5-8.) So Paul ayapu lani na fango tënë, lo zia nzoni tapande na aChrétien ti laso nga lo fa so kota nzobe ti Nzapa na mbage ti lo angbâ “senge senge pëpe.”

KOTA NZOBE TI NZAPA APUSU MO TI SARA YE?

4, 5. Ngbanga ti nyen e tene so “nzoni tënë ti Royaume” ayeke oko na nzoni tënë ti “kota nzobe ti Nzapa”?

4 Na ngoi ti nda ni so, a mû na awakua ti Jéhovah kua ti fango “nzoni tënë ti Royaume so na ndo ti sese kue so azo ayeke dä tongana mbeni tënë ti témoin ndali ti amara kue.” (Mat. 24:14). Tënë so e yeke fa so ayeke nga “nzoni tënë ti kota nzobe ti Nzapa” ndali ti so a yeke na lege ti kota nzobe ti Jéhovah la e yeke wara ande na gbe ti komandema ti Royaume aye ti nzoni kue so a mû zendo ni na e (aÉph. 1:3). Eskê e oko oko kue e yeke mû tapande ti Paul ti fa singila ti e ndali ti kota nzobe ti Jéhovah na lege so e yapu ti fa tënë na azo?—Diko aRomain 1:14-16.

5 Na yâ ti article so ahon, e manda tongana nyen la, atâa so e yeke na siokpari na tere ti e, e lingbi ti wara ye ti nzoni na lege ti kota nzobe ti Jéhovah so lo fa ni na alege mingi. Tongaso, a lingbi e sara kue ti fa na azo ti tene ala hinga tongana nyen la Jéhovah afa ndoye ti lo nga tongana nyen la ala wani alingbi ti wara ye ti nzoni dä. Ambeni mbage ti kota nzobe ti Nzapa wa la a lingbi e mû maboko na ambeni zo ti hinga ni?

FA NZONI TËNË TI NGERE SO CHRIST AFUTA TI ZI E

6, 7. Na ngoi so e yeke fa na azo nda ti ngere so Christ afuta ti zi na e, tongana nyen la e yeke fa nzoni tënë ti kota nzobe ti Nzapa?

6 Na yâ ti dunia so azo mingi ayeke sara gi ye ti bê ti ala, ala pensé so tënë ayeke na li ti ala ape tongana ala sara siokpari. Tongaso, ala pensé pëpe so ala yeke na bezoin ti tene a kiri a zi ala na gbe ti siokpari. Na oko ngoi ni, azo mingi abâ so ti tene zo asara gi ye ti bê ti lo ayeke ga nga na tâ ngia na zo pëpe. A yeke gi na peko ti so azo mingi asara lisoro na aTémoin ti Jéhovah la ala ga ti hinga ye so a iri ni siokpari, tongana nyen la a si na e nga ye so e lingbi ti sara ti tene a zi e na gbe ti ngbâa ti siokpari ni. Ti azo so ayeke na nzoni bê, bê ti ala adë ti hinga so Jéhovah, na lege ti kota ndoye nga na kota nzobe ti lo, atokua Molenge ti lo na sese ti mû fini lo ti kui si a zi e na gbe ti siokpari nga na kuâ so aga na peko ni.—1 Jean 4:9, 10.

7 Paul asara tënë ti Molenge ti Jéhovah so lo ye lo mingi, lo tene: “Na lege ti ngere so [Jésus] afuta ti zi azo, a zi e na lege ti mênë ti lo, biani a pardone afaute ti e alingbi na mosoro ti kota nzobe ti [Jéhovah].” (aÉph. 1:7). Sandaga ti Christ so ayeke kota fä ti ndoye ti Nzapa na mbage ti e nga a fa na e mosoro ti kota nzobe ti Lo. Bê ti e adë biani ti hinga so tongana e mä na bê na mênë ti Jésus so atuku, a yeke pardonné asiokpari ti e nga a yeke sara si e duti na nzoni conscience (aHéb. 9:14). So tâ nzoni tënë ti fa na azo!

 MÛ MABOKO NA AZO TI LË SONGO NA NZAPA

8. Ngbanga ti nyen azo so siokpari ayeke na tere ti ala abezoin ti kiri ti lë songo na Nzapa?

8 A mû na e kua ti fa na azo so ala lingbi ti ga ti lë songo na Nzapa so asara ala. Kozo si azo amä na bê na sandaga ti Jésus, Nzapa abâ ala tongana awato ti lo. Bazengele Jean atene: “Zo so amä na bê na Molenge ni, lo yeke na fini ti lakue lakue. Me zo so ake yanga ti Molenge ni ayeke wara ande fini pëpe, me ngonzo ti Nzapa angbâ na ndo ti lo.” (Jean 3:36). Ye ti nzoni ni ayeke so, sandaga ti Christ asara si e lingbi ti kiri ti sara songo na Nzapa. Paul atene: “Ala so ândö ala yeke yongoro na Nzapa na ala yeke awato ti lo ngbanga ti so ala yeke bi bê ti ala lani gi na ndo ti asioni kusala, fadeso Nzapa asara si songo akiri na popo ti lo na ala na lege ti tere ti lo so lo kä na kuâ.”—aCol. 1:21, 22.

9, 10. (a) Kua wa la Christ amû na aita ti lo so a soro ala ti gue na yayu? (b) Tongana nyen la “ambeni ngasangbaga” ayeke mû maboko na aita ti ala so a soro ala ti gue na yayu?

9 Jésus amû na aita ti lo so a soro ala ti gue na yayu so angbâ na sese, ye so Paul a iri ni “kusala ti kiringo na songo”. Ti fa nda ti kusala ni so, Paul asû mbeti na akozo Chrétien so a soro ala ti gue na yayu, lo tene: “Aye kue alondo na Nzapa, lo so asara si songo akiri na popo ti e na lo na lege ti Christ, nga lo mû na e kusala ti kiringo na songo, so ti tene so, na lege ti Christ, Nzapa ayeke kiri na songo na popo ti lo na azo ti dunia; lo yeke diko afaute ti ala pëpe, na lo zia na tïtî e tokua ti kiringo na songo ni. Tongaso e yeke alembe na place ti Christ, mo bâ mo tene na lege ti e Nzapa ayeke voro yanga na azo. Tongana azo so ayeke na place ti Christ, e voro azo, e tene: ‘Ala kiri ala sara songo na Nzapa.’”—2 aCor. 5:18-20.

10 “Ambeni ngasangbaga” abâ so a yeke mbeni pasa ti mû maboko na aita ti ala so a soro ala ti gue na yayu na yâ ti kua ti fango tënë so (Jean 10:16). Ala sara kua tongana awatokua ti Christ, na ala la ayeke sara kota mbage ti kusala ni so ayeke ti fa tënë na azo nga ti mû maboko na ala ti lë songo na Jéhovah. So ayeke mbeni kota mbage ti kua ti fango nda ti tënë ni kue na ndo ti nzoni tënë ti kota nzobe ti Nzapa.

FA NA AZO SO NZAPA AYEKE MÄ ASAMBELA

11, 12. Ngbanga nyen tongana azo ahinga so ala lingbi ti sambela Jéhovah, a yeke nzoni tënë ndali ti ala?

11 Azo mingi ayeke sambela ndali ti so a sara si ala duti nzoni, me ala hinga biani pëpe so Nzapa ayeke mä asambela ti ala. Ala yeke na bezoin ti hinga so Jéhovah ayeke “mä sambela”. Na yâ ti mbeni psaume so David asû ni, lo tene: “O Mo so Mo mä sambela, fade mi kue aga na Mo. Sioni ye ahon ndo ti mbi awe; fade Mo pardonné kengo-ndia ti e.”—Ps. 65:3, 4.

12 Jésus atene na adisciple ti lo, lo tene: “Tongana ala hunda mbeni ye na iri ti mbi, mbi yeke sara ni.” (Jean 14:14). A yeke polele so tënë “mbeni ye” aye ti sara tënë ti ye so ague oko na ye so bê ti Jéhovah aye. Jean atene: “Bê so e zia na ndo ti lo ayeke so: Atâa ye wa e hunda, tongana a gue oko na ye so bê ti lo aye, lo yeke mä e.” (1 Jean 5:14). A yeke nzoni mingi ti mû maboko na azo ti hinga so sambela ayeke pëpe gi mbeni ye so ayeke sara si zo aduti nzoni me a yeke mbeni pendere ye so amû lege na zo ti ga “nduru na trône ti kota nzobe ti [Jéhovah]”. (aHéb. 4:16). Tongana e fa na ala ti sambela na lege ni, tâ Zo so a lingbi ala sambela lo nga na aye so a lingbi ala sambela  ndali ni, e lingbi ti mû maboko na ala ti ga nduru mingi na Jéhovah nga ti wara dengo bê na ngoi ti vundu.—Ps. 4:2; 145:18.

KOTA NZOBE SO JÉHOVAH AYEKE FA ANDE NA YÂ TI FINI DUNIA

13, 14. (a) Apendere pasa wa la aChrétien so a soro ala ti gue na yayu ayeke wara ni ande? (b) Pendere kua wa la ala yeke sara ni ande ndali ti azo?

13 Jéhovah ayeke ngbâ ti fa kota nzobe ti lo même na yâ ti fini dunia. Na ngoi so Paul ayeke sara tënë ti kota pasa so Nzapa amû na azo 144 000, so a iri ala ti komande legeoko na Christ na yâ ti Royaume ti lo na yayu, lo tene: “Ndali ti kota ndoye so lo ndoye na e, Nzapa, so ayeke sara nzoni bê mingi na zo, asara si e kiri na fini legeoko na Christ, atâa so e kui lani awe na yâ ti afaute ti e. A yeke ndali ti kota nzobe ti Nzapa si a sö ala so. Nzapa azingo e legeoko na Christ na lo zia e ti duti legeoko na Christ ni na yayu, teti e yeke azo so asara beoko na Christ Jésus, si na yâ ti aye ti ngoi so ayeke ga, a lingbi ti fa na gigi mosoro ti kota nzobe ti lo so ayeke mingi ndali ti so lo sara nzoni bê na mbage ti e so e yeke azo so asara beoko na Christ Jésus.”—aÉph. 2:4-7.

14 A yeke ngangu ti bâ na yâ ti li ti e apendere ye so Jéhovah abata ndali ti aChrétien so a soro ala ti gue na yayu na ngoi so ala yeke duti na ndo ti atrône ti komande legeoko na Christ na yayu (Luc 22:28-30; aPhil. 3:20, 21; 1 Jean 3:2). Jéhovah ayeke “fa na gigi mosoro ti kota nzobe ti lo so ayeke mingi”, mbilimbili na mbage ti ala. Ala yeke ga “fini Jérusalem” so ayeke wali ti Christ (Apoc. 3:12; 17:14; 21:2, 9, 10). Ala yeke sara kua legeoko na Jésus ti ‘sava kobela ti amara.’ Ala yeke mû maboko na azo ti sigigi na gbe ti ngbâa ti siokpari na kuâ nga ala yeke mû maboko na ala ti ga nzoni-kue.—Diko Apocalypse 22:1, 2, 17.

15, 16. Tongana nyen la Jéhovah ayeke fa kota nzobe ti lo na mbage ti “ambeni ngasangbaga” ande?

15 Na aÉphésien 2:7, a tene so Nzapa ayeke fa kota nzobe ti lo na yâ ti “aye ti ngoi so ayeke ga”. Kite ayeke dä ape so, na yâ ti fini dunia, azo kue so ayeke na ndo ti sese ayeke bâ “mosoro ti kota nzobe ti lo so ayeke mingi”. (Luc 18:29, 30). Mbeni kota ye so Jéhovah ayeke sara ande na ndo ti sese ti fa kota nzobe ti lo ayeke so lo yeke zingo ande azo so ayeke na yâ ti dû ti kua (Job 14:13-15; Jean 5:28, 29). Akoli na awali so ayeke be-ta-zo giriri, so akui lani kozo ti tene Christ amû fini ti lo na sandaga nga na “ambeni ngasangbaga” so akui be-ta-zo na ngoi ti alango ti nda ni so, a yeke zingo ala ande ti ngbâ ti voro Jéhovah.

16 A yeke zingo nga azo kutu mingi, so akui sân ti tene ala hinga Nzapa. A yeke mû na ala pasa ti woko tere na gbe ti komandema ti Jéhovah. Jean atene: “Mbi bâ nga akuâ, akota zo na akete zo, ala yeke luti na gbele trône ni, na a zi yâ ti ambeni mbeti so a rulê ni rulengo. Me a zi nga yâ ti mbeni mbeti ni nde so a rulê ni rulengo: a yeke mbeti ti fini. A fâ ngbanga ti akuâ ni alingbi na aye so a sû ni na yâ ti ambeti so, a lingbi na aye so ala sara. Ngu-ingo akiri na azo so ayeke na yâ ti lo, kuâ na Hadès akiri na azo so akui si ayeke na yâ ti ala, nga a fâ ngbanga ti azo ni oko oko alingbi na aye so ala sara.” (Apoc. 20:12, 13). Biani, a yeke hunda ande na azo so a zingo ala na kuâ ti manda tongana nyen ti sara ye alingbi na afango ye ti Nzapa so ayeke na yâ ti Bible. Na ndo ni, a lingbi ala sara ye ague oko na afini ndia so ayeke na yâ ti ‘ambeti so a rulê ni rulengo’ so afa aye so Jéhovah ahunda na azo so ayeke na yâ ti fini dunia ti  sara. Aye so a fa na yâ ti ambeti so a rulê ni rulengo so ayeke duti ande mbeni ye so afa kota nzobe ti Jéhovah.

NGBÂ TI FA NZONI TËNË

17. Nyen la a lingbi e bata na li na ngoi so e yeke fa tënë?

17 A yeke kota ye ti fa nzoni tënë ti Royaume mingi ahon ti kozo, ndali ti so nda ni aga nduru awe (Marc 13:10). Biani, nzoni tënë so e yeke fa agboto lê na ndo ti kota nzobe ti Jéhovah. A lingbi e bata ye so na li na ngoi so e yeke fa tënë. Ye so e zia na gbele e na ngoi so e yeke fa tënë ayeke ti mû gonda na Jéhovah. E lingbi ti sara ni na lege so e fa na azo so a yeke na lege ti kota nzobe ti Jéhovah la e yeke wara ande na yâ ti fini dunia anzoni ye kue so a mû zendo ni na e.

Yapu na fango nzoni tënë tongana ‘nzoni wabatango ye ti kota nzobe ti Nzapa’.1 Pi. 4:10 (Bâ paragraphe 17-19)

18, 19. Tongana nyen la e yeke mû gonda na kota nzobe ti Jéhovah?

18 Tongana e yeke fa tënë na azo, e lingbi ti fa na ala so a yeke na gbe ti komandema ti Royaume ti Christ la, azo ayeke wara ande aye ti nzoni kue so aga na lege ti sandaga ti Christ nga yeke yeke ala yeke ga nzoni-kue. Bible atene: “Fade a yeke zi création nga na gbe ti ngbâa ti ye so abuba, na lo yeke wara liberté ti gloire ti amolenge ti Nzapa.” (aRom. 8:21). A yeke gi na lege ti kota nzobe ti Jéhovah la ye so ayeke si ande.

19 E yeke na pasa ti fa na azo kue pendere zendo so ayeke na Apocalypse 21:4, 5, so atene: “[Nzapa ayeke] mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.” Nga, Jéhovah, lo so aduti na ndo ti trône ni, atene: “Bâ, mbi yeke sara si aye kue aga fini.” Nga lo tene: “Mo sû atënë so na mbeti, ngbanga ti so atënë so ayeke atënë so a lingbi ti zia bê dä nga ayeke tâ tënë.” Na ngoi so e yapu na fango nzoni tënë na azo, e yeke mû gonda biani na kota nzobe ti Jéhovah.