Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Janvier 2017

Ndani so sarango terê kete a yeke lakue kota ye

Ndani so sarango terê kete a yeke lakue kota ye

“Azo so abâ terê ti ala kete, ala yeke na ndara.”APROV. 11:2.

ABIA: 38, 69

1, 2. Ngbanga ti nyen la Nzapa ake Saül? (Bâ foto so ayeke na tongo nda ti article so.)

NA NGOI so Saül, gbia ti Israël ti giriri, akomanse ti komande, lo sara terê ti lo kete nga azo ane lo mingi (1 Sam. 9:1, 2, 21; 10:20-24). Me kete na peko ti so lo ga gbia, lo sara aye na fandara na peko ti terê. Tongana Samuel, prophète ti Nzapa, asi na Guilgal pëpe na ngoi so lo doit fade ti si na ni, Saül akanga bê gbä. A-Philistin ayeke leke terê ti ala ti sara bira na Israël, na azo ti Israël akomanse ti zia Saül ti hon. Kite ayeke dä pëpe so lo gbu li ti lo, lo tene: ‘A lingbi mbi sara mbeni ye hio.’ Tongaso, lo mû sandaga na Nzapa, atâa so a yeke na lo ti sara ni pëpe. Ye so lo sara so anzere na Jéhovah pëpe.1 Sam. 13:5-9.

2 Na ngoi so Samuel asi na Guilgal, lo suku na Saül. Ahon ti tene Saül ayeda na atënë so a tene ti kiri na lo na nzoni lege, lo gi araison, lo gi ti bï tënë ni na li ti ambeni zo nde nga lo tene so ye so lo sara fade ayeke sioni pëpe (1 Sam. 13:10-14). Na peko ti ye so, Saül asara gbâ ti aye na fandara, na a sara si lo ngbâ lani gbia pëpe, me ye so ayeke sioni mingi ayeke so Jéhovah ake lo  (1 Sam. 15:22, 23). Atâa so na tongo nda ni gigi ti Saül ayeke nzoni, na nda ni gigi ti lo abuba kue.1 Sam. 31:1-6.

3. (a) Nyen la azo mingi apensé na ndö ti sarango terê kete? (b) Ahundango ndo wa la e yeke kiri tënë na ni?

3 Laso na yâ ti dunia so tënë ti mandako ahon ndö ni, azo mingi abâ so a lingbi ala sara ye nzoni ahon tanga ti azo kue tongaso si ala duti na li ni. Na sarango tongaso, ala sara terê ti ala kete oko pëpe. Na tapande, mbeni zo ti sarango film, so azo ahinga lo mingi, so na pekoni lo ga mbeni zo ti poroso, atene: “A lingbi ti sara kua na tënë sarango terê kete na ndö ti mbi na yâ ti mbeni ye oko pëpe, mbi pensé so lâ oko a yeke sara ni pëpe.” Me ngbanga ti nyen a yeke lakue kota ye ti sara terê ti e kete? Sarango terê kete aye ti tene nyen? A ye ti tene nyen ape? Tongana nyen la e lingbi ti ngbâ ti sara terê ti e kete na yâ ti akpale wala tongana amba ti e apusu e ti sara ye ti sioni? Article so ayeke kiri tënë na akozo use hundango tënë ni. Na article ti peko ayeke kiri tënë na ota hundango tënë ni.

NGBANGA TI NYEN A YEKE KOTA YE TI SARA TERÊ TI E KETE?

4. Sarango ye na fandara aye ti tene nyen?

4 Bible azia kangbi na popo ti sarango terê kete na fandara. (Diko aProverbe 11:2.) Na ndara, David ahunda lani na Jéhovah ti “kanga lege na [lo] ti sara ye na fandara”. (Ps. 19:13). Ti “sara ye na fandara” aye ti tene nyen? Tongana mbeni zo asara ye sân ti gbu li ti lo wala lo sara mbeni ye na ngangu atâa so lo yeke na droit ti sara ni pëpe, andâ lo yeke sara ye na fandara la. Ndali ti so a dü e na siokpari, e kue na ambeni ngoi e yeke sara ye na fandara. Me tongana ti so tapande ti Gbia Saül afa, tongana e ye gï ti duti na li ni, lawa lawa a yeke buba songo ti e na Nzapa. Psaume 119:21 atene so Jéhovah ayeke “suku na azo ti fandara.” Ngbanga ti nyen?

5. Ngbanga ti nyen la sarango ye na fandara ayeke kota faute mingi?

5 Sarango ye na fandara ayeke kota faute mingi ahon afaute so zo asara na mbana pëpe. Kozoni, tongana e sara terê ti e kete pëpe, e yeke ne pëpe Jéhovah so ayeke na droit ti duti Gbia ti dunia. Use ni, tongana e sara ye so a mû yanga pëpe na e ti sara ni, e yeke wara tënë na amba ti e (aProv. 13:10). Nga ota ni, tongana e sara mbeni ye si na pekoni azo ahinga polele so e sara ye na fandara, kamene ayeke sara e nga azo ayeke ne e pëpe (Luc 14:8, 9). Sarango ye na fandara ayeke ga na ye ti nzoni pëpe. Tongana ti so Bible afa, sarango terê kete ayeke lakue nzoni ye so a lingbi zo asara ni.

SARANGO TERÊ KETE ANDU AYE WA?

6, 7. Sarango terê kete andu nyen?

6 Na yâ ti Bible, sarango terê kete aye ti tene ti sara ye pëpe na baba wala na fandara. A ye ti sara tënë ti sarango ye na “tâ be-ti-molenge”. (aPhil. 2:3, kete tënë na gbe ni.) Zo so asara terê ti lo kete ahinga ambilimbili kode ti lo wani nga aye so lo sara ni nzoni awe, lo yeda na afaute ti lo nga lo yeda na awango so a mû na lo nga na afini ye so a fa na lo. Sarango terê kete anzere na Jéhovah mingi.

7 Na yâ ti Bible, sarango terê kete aye nga ti sara tënë ti dutingo na nzoni bango ndo na ndö ti e wani nga ti hinga aye so e yeke pëpe na ngangu ti sara ni. Na Grec, peut-être a luti mingi na ndö ti ye so hingango aye so e yeke pëpe na ngangu ti sara ni ayeke sara na ndö ti sarango ye ti e na amba ti e.

8. Ambeni ye wa la ayeke fa so e sara terê ti e kete ape?

8 Tongana nyen la e lingbi ti komanse ti gbu li ti e wala ti sara ye na fandara? Zia e bâ ambeni ye so alingbi ti fa ni. Peut-être e lingbi  ti bâ terê ti e kota wala e bâ apasa so e yeke na ni na nene ni mingi (aRom. 12:16). E lingbi ti gboto lê mingi na ndö ti e na mbeni fason so ayeke na lege ni pëpe (1 Tim. 2:9, 10). Peut-être e yeke luti nganganga na ndö ti bango ndo ti e gï ndali ti kamba ti kua ti e, ndali ti azo so e hinga ala wala ndali ti apensé ti e wani ti fa na azo ye so ala doit ti sara na ye so ala doit ti sara pëpe (1 aCor. 4:6). Mingi ni, tongana e sara tongaso, e yeke hinga même pëpe so e komanse ti sara ye na fandara.

9. Nyen la asara si ambeni zo asara ye na fandara? Fa mbeni tapande ti Bible.

9 Zo kue alingbi ti sara terê ti lo kete pëpe tongana lo zia si anzara ti mitele ahon ndö ti lo teti mbeni ngoi. Gingo ye gï ndali ti zo wani, kota bê nga na kota ngonzo asara si azo mingi asara ye na fandara. Azo so Bible asara tënë ti ala tongana Absalom, Ozias nga na Nébucadnezzar atï lani na yâ ti “akusala ti mitele” so na Jéhovah akiri na ala na gbe ni ndali ti so ala sara ye na fandara.2 Sam. 15:1-6; 18:9-17; 2 Chron. 26:16-21; Dan. 5:18-21.

10. Ngbanga ti nyen a lingbi e fâ ngbanga na li ti azo pëpe? Fa mbeni tapande ti Bible.

10 Ye oko, ambeni raison nde ayeke dä so ndali ni mbeni zo alingbi ti sara ye na fandara. Bâ atapande so Bible asara tënë ni, so ayeke na Genèse 20:2-7 nga na Matthieu 26:31-35. Aye so Abimélek nga na Pierre asara so akpa sarango ye na fandara, eskê sioni nzara ti bê la apusu lani ala ti sara ni? Wala ala hinga lani pëpe ye so ala sara? Teti so e lingbi pëpe ti hinga ye so ayeke na yâ ti bê ti zo, tongana e fâ ngbanga na li ti azo pëpe andâ e yeke sara ye na ndara nga na ndoye la.Diko Jacques 4:12.

ZIA E HINGA PLACE TI E

11. Ti hinga place ti e na yâ ti ye so Nzapa aleke ague oko na sarango terê kete tongana nyen?

11 Sarango terê kete akomanse na hingango place ti e na yâ ti ye so Nzapa aleke. Jéhovah so ayeke Nzapa ti wusuwusu pëpe amû na e oko oko kue mbeni kua ti sara na yâ ti congrégation. Na yâ ti congrégation, zo oko oko ayeke na kua ti lo me a yeke na bezoin ti e kue. Jéhovah, na lege ti kota nzobe ti lo, amû na e oko oko kue amatabisi nga na akode nde nde. E lingbi ti sara kua na aye so ti mû gloire na lo nga ti mû maboko na amba ti e (aRom. 12:4-8). Jéhovah afa so lo ne e nga lo yeke na confiance na e ni la lo mû na e mbeni kua ti wabatango ye.Diko 1 Pierre 4:10.

Nyen la e lingbi ti manda na lege ti tapande ti Jésus na ngoi so a mû na e mbeni fini kua? (Bâ paragraphe 12-14)

12, 13. Ngbanga ti nyen a lingbi li ti e aga kirikiri pëpe tongana aye so e yeke sara na yâ ti ye so Nzapa aleke achangé na ambeni ngoi?

12 Ye oko, place ti e na yâ ti ye so Nzapa aleke ti sara alingbi ti changé tongana ngoi ayeke hon. Bâ tapande ti Jésus. Na tongo nda ni, lo oko la lo yeke lani na terê ti Jéhovah (aProv. 8:22). Na pekoni, lo mû maboko na yâ ti lekengo a-ange, aye so ayeke na yâ ti dunia nga na nda ni azo (aCol. 1:16). Na mbeni ngoi na pekoni, a mû na Jésus mbeni fini kua na ndö ti sese; kozoni lo ga tongana mbeni bébé so a lingbi a mû maboko na lo na pekoni lo ga kota (aPhil. 2:7). Na peko ti so lo mû fini ti lo na sacrifice, lo kiri na yayu tongana mbeni yingo ti ga Gbia ti Royaume ti Nzapa na ngu 1914 (aHéb. 2:9). So ayeke ndangba kua so a mû na lo la pëpe. Na peko ti Komandema ti Jésus ti Ngu Saki Oko, lo yeke kiri na Royaume ti lo na Jéhovah tongaso si “Nzapa aga aye kue ndali ti zo oko oko kue.”1 aCor. 15:28.

13 Legeoko nga, e lingbi ti ku ti tene na ambeni ngoi akua so e yeke sara achangé, mingi ni ndali ti adesizion so e mû. Na tapande, mo yeke lani kumbamba me na pekoni mo sara mariage? Mo yeke na amolenge so mo yeke bata ala? Na pekoni, mo changé aye na yâ ti gigi ti mo ti mû kua ti ngoi kue? Adesizion so oko oko kue asara si mo yeke na  pasa ti sara ambeni kua. Aye so achangé na yâ ti gigi ti e alingbi ti sara si e yeke na akua mingi ti sara wala ti kanga lege na e ti sara ambeni kua. Mo yeke maseka wala mo yeke mbakoro? Mo yeke na nzoni seni wala mo yeke na kpale ti seni? Jéhovah ayeke bi bê ti lo lakue na ndö ti anzoni kua so e lingbi ti sara na lo. Lo ye ti tene e sara na lo alingbi na ngangu ti e, nga lo bâ na nene ni mingi ye kue so e yeke sara.aHéb. 6:10.

14. Tongana nyen la sarango terê kete ayeke mû maboko na e ti duti na ngia atâa kua wa la e yeke sara ni?

14 Jésus ayeke lani na ngia na yâ ti akua ti lo oko oko kue, na e nga kue e lingbi ti sara tongaso (aProv. 8:30, 31). Zo so asara terê ti lo kete ayeke bâ pëpe so akua ti lo na yâ ti congrégation akanga lege na lo ti sara ambeni ye. Lo gi bê ti lo pëpe ti wara ambeni pasa nde wala lo yeke gi bê ti lo pëpe na ndö ti ye so amba ti lo ayeke sara. Me lo sara ngangu ti hinga ndani so a mû na lo kua so lo yeke sara fadeso nga ti sara ni na ngia, ndali ti so lo bâ so Jéhovah la amû ni na lo. Na bê ti lo kue, lo yeke ne kua wala place so Jéhovah amû na amba ti lo. Sarango terê kete ayeke mû maboko na e ti tene na ngia e ne amba ti e nga e mû maboko na ala.aRom. 12:10.

NZONI BANGO NDO NA NDÖ TI SARANGO TERÊ KETE

15. Nyen la e lingbi ti manda na lege ti Gédéon so asara terê ti lo kete?

15 Gédéon ayeke pendere tapande mingi ti zo so asara terê ti lo kete. Na ngoi so Jéhovah ahunda na lo ti sö Israël na maboko ti azo ti Madian, lo tene: “Na yâ ti mara ti Manassé, mara ti mbi la ayeke kete mingi,  nga na yâ ti da ti babâ ti mbi, mbi la mbi yeke kete mingi.” (aJu. 6:15). Na peko ti so Gédéon ayeda na kua so Jéhovah amû na lo, lo sara kue ti hinga ye so a hunda na lo ti sara, nga lo bâ ndo na mbage ti Jéhovah ti fa lege na lo (aJu. 6:36-40). Gédéon asara ye lani na mbeto pëpe. Ye oko, lo sara ye lani na hange nga na ndara (aJu. 6:11, 27). Lo bâ pëpe kua so a mû na lo tongana mbeni lege ti ga kota zo. Na peko ti so lo sara ye so Jéhovah ahunda na lo ti sara awe, lo kiri na ndo ti lo na ngia.aJu. 8:22, 23, 29.

16, 17. Nyen la mbeni zo so asara terê ti lo kete ayeke gi ti bâ ni na ngoi so lo ye ti maï?

16 Ti sara terê kete aye ti tene pëpe so a lingbi e gi lâ oko pëpe ti sara ambeni kua na yâ ti congrégation wala ti yeda na ambeni kua so a mû na e na ndö ni. Bible awa e kue ti maï (1 Tim. 4:13-15). Ye oko, a hunda ti tene a mû na e mbeni fini kua si e maï? Ên-ën. Tongana Jéhovah asara tufa na ndö ti e, e lingbi ti maï atâa kua wa la e yeke sara ni fadeso. E lingbi ti ngbâ ti maï akode so Nzapa amû na e nga ti sara anzoni kua mingi.

17 Zo so asara terê ti lo kete ayeke gi ti hinga ye so a hunda na lo ti sara na yâ ti fini kua so a ye ti mû na lo kozo ti tene lo yeda na ni. Lo lingbi ti gi ti bâ dutingo ti lo nzoni. Na tapande, lo yeke sara ande ambeni kua so a kiri a mû na lo sân ti dö ambeni ye so ayeke kota ye ti zia? Lo lingbi ti mû ambeni kua so lo yeke sara fadeso na ambeni zo tongaso si lo sara fini kua so a ye ti mû na lo? Tongana lo lingbi ti sara tongaso pëpe, peut-être a yeke nzoni a mû kua ni so na mbeni zo so alingbi ti sara ni fadeso. Tongana e sambela nga e bâ dutingo ti e nzoni, a yeke mû maboko na e ti sara pëpe ambeni ye so e yeke na kode wala ngangu ti sara ni pëpe. Sarango terê kete alingbi ti sara si e tene ên-ën.

18. (a) Sarango terê kete ayeke pusu e ti sara nyen tongana a mû na e mbeni fini kua? (b) Tongana nyen la aRomain 12:3 amû maboko na e ti sara terê ti e kete?

18 Tongana e yeda ti sara mbeni fini kua, tapande ti Gédéon adabe ti e so e lingbi pëpe ti sara ni nzoni tongana Jéhovah afa lege na e pëpe nga lo sara tufa dä pëpe. Ni la Bible atisa e “ti tambela na Nzapa ti [e] na sarango terê ti [e] kete”. (Mi. 6:8). Tongaso, lakue tongana e yeke sara afini kua, a lingbi e sambela na e gbu li ti e na ndö ti ye kue so Jéhovah ayeke tene na e na lege ti Bible nga na bungbi ti lo. Zia e girisa pëpe so ye kue so e lingbi ti sara na yâ ti kua ti Jéhovah, e yeke sara ni pëpe na ngangu ti e wani, me e yeke sara ni ndali ti so Jéhovah ayeke sara terê ti lo kete nga lo ye ti mû maboko na e (Ps. 18:35). Tongaso, ti soro ti sara terê ti e kete ti tambela na Nzapa ayeke mû maboko na e ti bâ terê ti e kota pëpe wala kete mingi pëpe.—Diko aRomain 12:3.

19. Ngbanga ti nyen a lingbi e sara terê ti e kete?

19 Teti so Jéhovah la asara aye kue nga lo yeke Gbia ti dunia kue, zo so asara terê ti lo kete ayeke ne lo ndali ti so lo lingbi na ni (Apoc. 4:11). Sarango terê kete ayeke mû maboko na e ti duti na ngia nga ti maï na yâ ti kua so e yeke sara na yâ ti ye so Nzapa aleke. Sarango terê kete ayeke sara si e ne azo nga ayeke maï siriri na popo ti azo ti Jéhovah. Sarango terê kete ayeke pusu e ti zia aye so agbu bê ti amba ti e kozo na ti e nga ayeke pusu e ti sara ye na hange tongaso si e sara pëpe akota faute. Araison so asara si sarango terê kete ayeke kota ye mingi na lê ti azo ti Nzapa kue, nga Jéhovah abâ na nene ni mingi azo so asara terê ti ala kete. Me ka tongana azo apusu e ti sara ye ti sioni? Na yâ ti article ti peko, e yeke bâ tongana nyen la e lingbi ti ngbâ ti sara terê ti e kete na yâ ti akpale.