Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Janvier 2017

Mû kua na akoli so ayeke be-ta-zo

Mû kua na akoli so ayeke be-ta-zo

“Aye so mo mä ni . . . , mo zia ni na maboko ti azo so ayeke be-ta-zo, so ala nga na pekoni alingbi ande ti fa ni na ambeni zo.”2 TIM. 2:2.

ABIA: 123, 53

1, 2. Azo mingi abâ kua ti ala tongana nyen?

MINGI ni, azo ayeke fa terê ti ala na amba ti ala na lege ti kua so ala yeke sara. Ti azo mingi, kua so ala yeke sara afa so ala yeke kota zo wala pëpe. Na ambeni kodro, tongana mo ye ti hinga mbeni zo, mbeni kozo hundango ndo so mo yeke hunda na lo ayeke: “Kua ti nyen lo mo yeke sara?”

2 Na ambeni ngoi, Bible ayeke fa azo na lege ti kua ti ala. A sara tënë ti “Matthieu, zo ti rongo nginza ti impôt;” “Simon, mbeni zo ti sarango kua ti poro ti anyama” nga na “Luc, docteur so e ndoye lo mingi”. (Mat. 10:3; Kus. 10:6; aCol. 4:14). A yeke hinga nga azo na lege ti akua so ala sara na Jéhovah. Pensé na Gbia David, prophète Élisée nga na bazengele Paul. Akoli so abâ lani na nene ni mingi kua so Nzapa amû na ala. Tongana e yeke na pasa ti sara mbeni kua so Jéhovah amû na e, e nga kue a lingbi e bâ ni na nene ni.

3. Ngbanga ti nyen a lingbi aita-koli so ayeke ambakoro afa akua na aita-koli so angbâ ngangu? (Bâ foto so ayeke na tongo nda ti article so.)

3 E ye mingi kua so e yeke sara na Jéhovah nga e ye ti ngbâ ti sara ni lakue lakue. Mawa ni ayeke so ngbene ye na ngoi ti Adam ti ga na ni, azo ti ngoi oko oko so a dü ala ayeke ga mbakoro na ambeni ayeke mû place ti ala (Zo-ti. 1:4). Na yâ ti angoi so ahon  ade ti ninga ape, ye so aga na ambeni changement so mara ni ade asi lâ oko pëpe na atâ Chrétien. Laso, kua ti fango tënë ague na li ni mingi, nga bungbi ti Jéhovah asara kua na aye so awandara asigi na ni ti fa nzoni tënë na azo mingi. Me na ambeni ngoi, a lingbi ti duti ngangu na ambeni mbakoro ti manda afini kode ti sarango kua (Luc 5:39). Même tongana a yeke ni ape, azo so ade ti ga mbakoro pëpe ayeke na ngangu ahon ambakoro (aProv. 20:29). Ni la, a yeke sarango ye na ndoye nga a yeke ga na anzoni ye na ambakoro tongana ala leke aita-koli so angbâ ngangu ti sara akua mingi.Diko Psaume 71:18.

4. Ngbanga ti nyen a yeke ngangu na ambeni ita ti mû kua ti ala na ambeni ita? (Bâ encadré: “ Ndani so ambeni ita amû kua ti ala na aita pëpe.”)

4 A lingbi ti duti ngangu na mbeni ita so a yeke mû li ni ti mû kua so lo yeke sara na aita-koli so angbâ ngangu. Ambeni asara mbeto ti tene mbeni zo amû place ti ala so ala ye ni mingi. Ambeni agi bê ti ala ti tene ala la ayeke bâ ndo encore ape na ndö ti kua ni, na aita-koli so amû place ti ala alingbi ti sara kua ni nzoni pëpe. Ambeni alingbi ti tene so ala yeke na ngoi pëpe ti fa kua na mbeni zo. Na mbage, a lingbi bê ti aita so angbâ ngangu ason hio pëpe tongana a mû na ala pëpe akua mingi ti sara ni.

5. Article so ayeke kiri tënë na ahundango ndo wa?

5 Zia e bâ tënë ti fango kua so na alege use. Kozoni, ambakoro alingbi ti mû maboko tongana nyen na aita so angbâ ngangu ti sara akua? (2 Tim. 2:2). Use ni, ngbanga ti nyen la a yeke kota ye ti tene aita so angbâ ngangu aduti na nzoni bango ndo na ngoi so ala yeke mû maboko na aita so ahinga kua nzoni nga ti manda ye na mbage ti ala? Ti komanse, zia e bâ tongana nyen la David aleke molenge ti lo ti koli ti sara mbeni kpengba kua.

DAVID ALEKE SALOMON NGA LO MÛ MABOKO NA LO

6. Nyen la David aye lani ti sara? Jéhovah atene ti lo lani nyen?

6 Na peko ti so David akpe alango na ando nde nde teti angu mingi, lo ga gbia na lo lango na yâ ti mbeni nzoni da. Vundu asara lo  so a leke mbeni “da”, wala temple ti voro Jéhovah dä ape, na lo ye ti leke ni. Tongaso, lo tene na prophète Nathan, lo tene: “Mbi yeke lango na yâ ti da so a leke na keke ti cèdre, me sanduku ti mbele ti Jéhovah ayeke na yâ ti tente.” Nathan atene na lo: “Mo sara ye kue so mo leke na bê ti mo ti sara, ndali ti so tâ Nzapa ayeke na mo.” Ye oko, Jéhovah afa ti lo mbeni ye nde. Lo tene na Nathan ti tene na David: “Mo la mo yeke sara da na mbi ti tene mbi lango dä pëpe.” Atâa so na ndoye Jéhovah adë bê ti David so lo yeke ngbâ ti sara tufa na ndö ti lo, Nzapa afa so Salomon, molenge ti David ti koli, la ayeke leke temple ni. David asara lani ye tongana nyen?1 Chron. 17:1-4, 8, 11, 12; 29:1.

7. David asara ye tongana nyen na ngoi so Jéhovah afa ye so a doit ti sara?

7 David aye lani ti tene gi lo la lo leke temple ti Jéhovah, tongaso vundu alingbi fade ti sara lo ngangu. Me lo ngbâ ti mû maboko na kua ti lekengo temple ni so molenge ti lo Salomon ayeke bâ lege ni. A leke lani temple ni, na a hinga ni na temple ti Salomon me ti David pëpe. Atâa so vundu asara peut-être David ndali ti so lo sara pëpe ye so bê ti lo aye ti sara, lo mû maboko na kua ni na bê ti lo kue. Lo zia azo na yâ ti agroupe nde nde ti sara kua ni, lo bungbi wen, cuivre, argent, lor nga na akeke ti cèdre. Na ndö ni, lo mû wango na Salomon, lo tene: “Ti fadeso, molenge ti mbi, zia Jéhovah aduti na mo, nga zia mo leke da ti Jéhovah Nzapa ti mo juska ahunzi nzoni, tâ gï tongana ti so lo tene mo la mo yeke sara ni.”1 Chron. 22:11, 14-16.

8. Ngbanga ti nyen la David alingbi fade ti tene so Salomon alingbi lani pëpe ti sara kua ti temple ni? Me nyen la David asara?

8 Diko 1 Chronique 22:5. David alingbi fade ti tene so Salomon alingbi pëpe ti bâ lege ti mara ti kota kua tongaso, ndali ti so a lingbi a leke temple ni na “mbeni lege so ayeke tâ pendere mingi” nga na ngoi ni so Salomon “ade maseka nga ade lo hinga ndo mingi pëpe.” Ye oko, David ahinga lani so Jéhovah ayeke leke Salomon ti sara kua so a mû na lo. Tongaso, David asara ye so lo lingbi ti sara ti mû maboko na kua ni na lege so lo leke aye ti kua ni gbani.

WARA NGIA NA FANGO KUA NA AZO

A nzere na e ti bâ aita-koli so angbâ ngangu ayeke sara akua mingi (Bâ paragraphe 9)

9. Mû mbeni tapande ti fa tongana nyen la aita so ayeke ambakoro alingbi ti duti na ngia ti mû akua ti ala na ambeni ita.

9 A lingbi bê ti aita so ayeke ambakoro anze pëpe tongana a lingbi ala mû akua ti ala na aita-koli so angbâ ngangu. Me tongana a fa kua na aita-koli so angbâ ngangu, akua ayeke tambela nzoni mingi. A yeke nzoni terê ti aita so amû li ni anzere tongana aita-koli so ala yeke fa ye na ala alingbi ti sara akua ni. Zia e mû mbeni tapande. Gbu li ti mo na ndö ti mbeni babâ so ayeke fa kua ti menuisier na molenge ti lo ti koli. Na ngoi so molenge ni ade kete lo yeke bâ babâ ti lo na sarango kua ni. Na ngoi so molenge ni akono, babâ ni afa na lo tongana nyen ti sara kua ni. Na pekoni, molenge ni nga akomanse ti sara kua ni, na babâ ni angbâ ti fa na lo  ambeni ye na ndö ni. Na ambeni ngoi lo na babâ ni la ayeke sara kua ni, me a si na mbeni ngoi molenge ni la ayeke sara kua ni mingi ahon babâ ni. Terê ti babâ so asara ye na ndara so ayeke nzere mingi ndali ti so molenge ni asara kua na place ti lo nga so lo bâ pëpe so lo doit gï ti bâ ndo na ndö ti kua ni. Legeoko nga, terê ti aita so ayeke ambakoro anzere tongana ala fa akua na aita so angbâ ngangu si ala sara akua na yâ ti bungbi.

10. Moïse abâ lani tënë ti gloire na komandema tongana nyen?

10 A lingbi aita so ayeke ambakoro asara kota bê pëpe. Bâ sarango ye ti Moïse na ngoi so ambeni zo na yâ ti camp ti azo ti Israël akomanse ti sara ye tongana aprophète. (Diko Nombre 11:24-29.) Josué, so ayeke mû maboko na Moïse, aye ti kanga lege na ala. Lo pensé lani so azo ni so ayeke mû place ti Moïse. Me Moïse atene: “Mo sara mbanda ndali ti mbi? Sara mbanda pëpe, mbi ye ti tene azo ti Jéhovah kue aga aprophète na Jéhovah azia yingo ti lo na ndö ti ala.” Moïse abâ maboko ti Jéhovah na yâ ti kua ni. Moïse aye ti tene a gonda gï lo pëpe, lo ye si awakua ti Jéhovah kue awara matabisi ti yingo so lo yeke na ni. Legeoko tongana Moïse, terê ti e ayeke nzere tongana amba ti e awara akua na yâ ti bungbi?

11. Mbeni ita-koli atene nyen na ndö ti ziango kua ti lo na ambeni ita?

11 Laso, e yeke na atapande ti aita-koli mingi so asara kua ngangu teti angu mingi na so afa ye na aita-koli ti sara akua mingi. Na tapande, mbeni ita so iri ti lo ayeke Peter asara kua ahon ngu 74 na yâ ti kua ti ngoi kue, na yâ ni lo sara ngu 35 na yâ ti mbeni filiale na Europe. Ade ti ninga ape, lo yeke lani surveillant ti bureau ti service. Fadeso Paul, mbeni ita so angbâ ngangu so asara lani kua na terê ti Peter teti angu mingi la ayeke sara kua ni na place ti lo. Na ngoi so a hunda Peter na ndö ti kua ti lo so achangé, lo tene: “A nzere na mbi mingi so aita so a fa kua na ala ayeda ti sara kua ni na ala sara ni nzoni.”

E NE AMBAKORO

12. Nyen la e lingbi ti manda na lege ti mbaï ti Roboam so Bible asara tënë ni?

12 Na peko ti so Salomon akui, molenge ti lo Roboam aga gbia. Na ngoi so Roboam abezoin wango ti sara akua ti lo, lo hunda kozoni ambakoro-koli. Lo ke wango ti ala ni. Me lo yeda na wango ti amaseka-koli so lo na ala akono oko so ayeke sara kua na lo fadeso. Ye ti peko ni ayeke lani gï vundu (2 Chron. 10:6-11, 19). Nyen la e manda na lege ti ye so? A yeke na lege ti ndara ti sara ye alingbi na wango so ambakoro so ahinga ye ahon e amû na e. Atâa so aita so angbâ ngangu alingbi ti changé ambeni fason ti sarango ye, a lingbi ala ke hio pëpe wango ti ambakoro.

13. A lingbi aita so angbâ ngangu asara kua maboko na maboko na aita-koli so ayeke ambakoro tongana nyen?

13 Ambeni ita so angbâ ngangu alingbi ti duti coordinateur ti bungbi ti a-ancien so ambakoro ayeke na yâ ni. Atâa so kua ti aita so achangé, a yeke nzoni ala hunda wango na ambakoro so ahinga ye ahon ala kozo si ala mû adesizion. Paul so e sara tënë ti lo fade, so ayeke sara kua ti surveillant na place ti Peter na yâ ti mbeni ndokua na Béthel, atene: “Mbi yeke mû ngoi ti hunda wango na Peter, nga mbi wa amba ti mbi so ayeke na yâ ti ndokua ni ti sara nga tongaso.”

14. Nyen la e manda na lege ti sarango kua maboko na maboko ti bazengele Paul na Timothée?

14 Timothée, mbeni maseka-koli, asara lani kua na terê ti bazengele Paul teti angu mingi. (Diko aPhilippien 2:20-22.) Paul asû mbeti na azo ti Corinthe, lo tene: “Mbi yeke tokua Timothée na ala, ndali ti so lo yeke molenge ti mbi so mbi ndoye lo mingi nga so lo yeke be-ta-zo na yâ ti Seigneur. Lo  yeke kiri ande ti dabe ti ala na akode ti mbi na ndö ti tënë ti Christ Jésus, a-oko kode so mbi yeke fa na ye na ndo kue na yâ ti acongrégation oko oko kue.” (1 aCor. 4:17). Nduru tënë so afa so Paul na Timothée asara lani kua maboko na maboko mingi. Paul amû lani ngoi ti fa “akode ti [lo] na ndö ti tënë ti Christ Jésus” na Timothée. Timothée amanda lani ye nzoni na Paul aye lo mingi, nga Paul ayeke na confiance so lo yeke bâ lege ti aita ti Corinthe nzoni mingi. So ayeke mbeni nzoni tapande so a-ancien alingbi ti mû peko ni laso na ngoi so ala yeke leke aita-koli ti mû li ni na yâ ti congrégation.

E KUE E YEKE NA KUA TI SARA

15. Wango so Paul amû na aChrétien ti Rome alingbi ti mû maboko na e tongana nyen na ngoi so mbeni ye achangé na yâ ti gigi ti e?

15 Ngoi ti e ayeke tâ pendere mingi. Mbage ti bungbi ti Jéhovah so ayeke na sese ayeke gue na li ni na alege mingi, me guengo na li ni so ahunda achangement. Na ngoi so ye achangé na yâ ti gigi ti e wani, a yeke nzoni e sara terê ti e kete, e zia lê ti e na ndö ti ye so anzere na Jéhovah me ye so anzere na e wani pëpe. Ti sara tongaso ayeke sara si e duti beoko. Paul asû mbeti na aChrétien ti Rome, lo tene: “Mbi tene na zo oko oko kue na popo ti ala ti bâ terê ti lo wani ahon ti so a lingbi zo abâ terê ti lo na ni pëpe, me ti bâ terê ti lo si lo duti na li so ayeke nzoni, zo oko oko alingbi na konongo ti mabe so Nzapa amû na lo. Ni la, tongana ti so e yeke na amembre mingi na yâ ti terê oko, me amembre ni so, ala kue asara gï oko kua pëpe, e nga, atâa so e yeke mingi, e yeke gï terê oko so ayeke beoko na Christ.”aRom. 12:3-5.

16. Nyen la ambakoro, ala so angbâ ngangu nga na awali so asara mariage awe alingbi ti sara ti ngbâ ti bata siriri na beoko na yâ ti bungbi ti Jéhovah?

16 Atâa dutingo ti e ayeke so wa, zia e kue e sara kue ti maï aye ti Royaume ti Jéhovah. Ala ambakoro, ala fa kua so ala yeke sara na aita-koli so angbâ ngangu. Ala so angbâ ngangu, ala yeda na akua so a mû na ala, ala sara terê ti ala kete nga ala ngbâ ti ne ambakoro. Ala awali so asara amariage awe, ala mû tapande ti Priscille, wali ti Aquila, so amû maboko na Aquila na bê ti lo kue na ngoi so aye achangé na yâ ti gigi ti ala.Kus. 18:2.

17. Confiance wa la Jésus ayeke na ni na adisciple ti lo? Kua wa la lo leke ala ti sara?

17 Na ndö ti tënë ti fango na azo ti sara akua mingi, mbeni tapande ti hon ti Jésus ayeke dä ape. Lo hinga lani so lo yeke ngbâ ande ti fa tënë na sese pëpe na ambeni zo la ayeke sara ande kua ni na peko ti lo. Atâa so adisciple ti lo ayeke mbilimbili-kue pëpe, lo yeke na confiance na ala na lo tene na ala so ala yeke sara ande akua so ayeke kota ahon ti so lo sara (Jean 14:12). Lo fa lani ye na ala nzoni, na ala fa nzoni tënë na yâ ti akodro nde nde so ayeke na yâ ti dunia.aCol. 1:23.

18. Kua wa la ayeke ku e? Nyen la e lingbi ti sara fadeso?

18 Na peko ti kuâ ti Jésus, Jéhovah azingo lo ti wara fini na yayu, kâ lo mû na lo gbâ ti akua ti sara nga na komandema “na ndö ti gouvernement kue, komandema kue, ngangu kue [nga] na ndö ti ala kue so akomande”. (aÉph. 1:19-21). Tongana e kui be-ta-zo kozo na Harmaguédon, a yeke zingo e ti duti na fini na yâ ti mbeni fini dunia so ayeke mbilimbili, so apendere kua ayeke duti ande dä mingi ti sarango ni. Ye oko, ti fadeso, mbeni kota kua ayeke dä so e kue e lingbi ti sara ni: kua ti fango nzoni tënë nga na sarango adisciple. Zia e kue, maseka wala mbakoro, e ngbâ ti ‘duti na ye mingi ti sara na yâ ti kusala ti Seigneur’.1 aCor. 15:58.