Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Janvier 2017

Mo hinga?

Mo hinga?

Na ngoi ti giriri a yeke hon lani na wâ tongana nyen?

MBAÏ so ayeke na Genèse 22:6 atene so ti tene Abraham aleke terê ti lo ti mû mbeni sandaga na mbeni ndo so ayo, Abraham “amû keke ti wâ ti zongo na sandaga ni lo mû na molenge ti lo Isaac ti yô ni, lo mû wâ na maboko ti lo nga na zembe, na ala use kue ahon legeoko.”

Mbeti ti Nzapa afa pëpe tongana nyen la a yeke tingo wâ na ngoi ti giriri. Na ndö ti mbaï so, mbeni zo so ayeke sû tënë na ndö ti Bible atene so “a yeke ngangu ti bata lê ti wâ na ngoi ti yongoro tambela” so Abraham na Isaac asara. Tongaso, peut-être na yâ ti mbaï so a ye ti sara tënë ti aye so ala bezoin ni ti tingo na wâ.

Ye oko, ambeni wandara afa so a yeke kete ye pëpe ti tingo wâ na ngoi ti giriri. Azo abâ so a yeke nzoni ti mû wâ na ndo ti avoizin tongana lege ayeke dä ahon ti tene ala wani agi ti sara ngbii si wâ aza. Awandara mingi atene ti ala so ye so Abraham amû ni lani ayeke peut-être mbeni ta so a kanga chaîne na terê ni ti yô na ni. Na yâ ti ta ni, a yeke wara acharbon so wâ angbâ na terê ni so a mû ni na bï so aga kozo (Ésaïe 30:14). Ti mû alê ti wâ so a yeke hon na ni so ti tingo na wâ na ambeni keke ti wâ so ayeke za pendere na ngoi ti mbeni yongoro tambela ayeke lani ngangu pëpe.