Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Janvier 2016

Ala sara kue ti “zia yengo tere ti ala ti aita angbâ ti gue”

Ala sara kue ti “zia yengo tere ti ala ti aita angbâ ti gue”

“Zia yengo tere ti ala ti aita angbâ ti gue.”—AHÉB. 13:1.

ABIA: 72, 119

1, 2. Ngbanga ti nyen la Paul atokua lani lettre na aChrétien so ayeke aHébreu?

NA NGU 61, acongrégation so ayeke na Israël ayeke lani kamême na siriri. Atâa so bazengele Paul ayeke lani na kanga na Rome, lo yeke ku lani kungo ti tene a zi lo hio. A zi lani Timothée, so lo na lo ayeke voyagé, na kanga ade ti ninga ape, na ala leke lani ti gue ti bâ aita so ayeke na Judée (aHéb. 13:23). Ye oko, gi na yâ ti ngu oku, “aturugu so ayeke se kando angoro Jérusalem,” tongana ti so Jésus atene kozo awe. A lingbi aChrétien so ayeke na Judée, na mbilimbili ala so ayeke na Jérusalem, asara ye hio. Jésus atene lani na ala ti kpe hio tongana ala bâ aturugu so ase kando angoro Jérusalem.—Luc 21:20-24.

2 Jésus amû wango so na adisciple ti lo a sara ngu 28 awe. Na yâ ti angu ni so, aChrétien so ayeke na Jérusalem angbâ lani be-ta-zo atâa akpale nga na akango lege so ala wara (aHéb. 10:32-34). Ye oko, Paul ahinga lani so ala ga nduru ti tingbi na ambeni ngangu kpale so ayeke tara mabe ti ala (Mat. 24:20, 21; aHéb. 12:4). Lo ye lani ti tene ala leke tere ti ala nzoni ti ku akpale kue so alingbi ti si. Ala yeke na bezoin ti  gbu ngangu nga ti duti na kpengba mabe ahon ti kozo si ala lingbi ti sö fini ti ala. (Diko aHébreu 10:36-39.) Ndani la, yingo ti Jéhovah apusu Paul ti tokua na ala mbeni lettre so ala yeke tâ na bezoin ni. Laso a iri lettre so mbeti na aHébreu.

3. Ngbanga ti nyen a lingbi e sara ye alingbi na lettre so Paul atokua na aChrétien so ayeke aHébreu?

3 Laso, a lingbi e nga kue e sara ye alingbi na lettre so Paul atokua lani na akozo Chrétien so ayeke aHébreu. Ngbanga ti nyen? Ngbanga ti so e nga kue e yeke na yâ ti mara kpale so ala yeke na yâ ni lani. Na yâ ti “angoi ti akpale so ayeke ngangu na zo ti kanga bê na yâ ni,” awakua ti Jéhovah agbu ngangu na yâ ti atara nga na akangango lege mingi (2 Tim. 3:1, 12). Me mingi ti e ayeke na siriri, nga a yeke sara ngangu na e vîi tongaso ape. Ni la, legeoko tongana ti aChrétien ti ngoi ti Paul, e yeke na bezoin ti tene lê ti e akpengba. Ngbanga ti nyen? Na yâ ti ngoi kete, e yeke tingbi na mbeni kota kpale so ayeke tara mabe ti e.—Diko Luc 21:34-36.

4. Versê wa la a soro ni ndali ti ngu 2016? Ngbanga ti nyen a lingbi na ni?

4 Nyen la ayeke mû maboko na e ti leke tere ti e ndali ti ye so ayeke ku e so? Na yâ ti mbeti so Paul atokua na aHébreu, lo fa gbâ ti aye so alingbi ti mû maboko na e ti kpengba mabe ti e. Mbeni kpengba ye so lo fa ayeke na aHébreu 13:1. Versê ni awa e atene: “Zia yengo tere ti ala ti aita angbâ ti gue.” Versê so la a soro ni ndali ti ngu 2016.

Versê ti ngu 2016: “Zia yengo tere ti ala ti aita angbâ ti gue.” —aHébreu 13:1

YENGO TERE TI AITA AYEKE NYEN?

5. Yengo tere ti aita ayeke nyen?

5 Yengo tere ti aita ayeke nyen? Tënë ti Grec phi·la·del·phiʹa so Paul asara kua na ni aye ti tene “tâ yengo so mbeni zo aye na ita ti lo.” Yengo tere ti aita ayeke tongana mbeni kpengba yengo tere so ayeke na popo ti afami wala akamarade so aye tere mingi (Jean 11:36). E yeke tene gi na yanga ape so e yeke aita me e yeke fa so e yeke aita na lege ti asarango ye ti e (Mat. 23:8). Paul atene: “Na yâ ti yengo tere ti aita, zia ala duti na tâ yengo tere na popo ti ala. Na ndo ti tënë ti nengo mba na popo ti ala, zia ala duti azo so amû li ni kozo ti sara ni.” (aRom. 12:10). Mara ti yengo tere so akpengba songo so ayeke na popo ti awakua ti Nzapa.

6. Azo wa la atâ Chrétien ayeke bâ ala tongana aita ti ala?

6 Na yâ ti ambeti so aChrétien asû, a yeke wara tënë “yengo tere ti aita” fani mingi. Na ngoi ti aJuif ândö, mingi ni, tënë “ita” aye ti sara tënë ti mbeni zo ti sewa na alingbi nga ti sara tënë ti mbeni zo so ayeke na yâ ti sewa ni ape. Me tongana zo ni ayeke Juif ape, ala yeke iri lo ita ape. Ye oko, ti e so e yeke atâ Chrétien zo kue so ayeke tâ Chrétien ayeke “ita” ti e atâa mara ti lo ayeke nyen (aRom. 10:12). Jéhovah afa na e ti ye tere na popo ti e tongana aita (1 aThes. 4:9). Me ngbanga ti nyen a yeke kota ye ti ngbâ ti ye tere tongana aita?

NGBANGA TI NYEN A YEKE KOTA YE MINGI TI NGBÂ TI YE AITA TI E?

7. (a) Kota raison wa la apusu e ti ye tere na popo ti e? (b) Fa mbeni raison so ndali ni a yeke kota ye ti ye tere na popo ti e.

7 Kota raison so apusu e ti ye tere na popo ti e ayeke so Jéhovah la ahunda na e ti sara tongaso. E lingbi pëpe ti tene so e ye Jéhovah na oko ngoi ni e ke ti ye aita ti e (1 Jean 4:7, 20, 21). Na ndo ni, e yeke na bezoin ti aita ti e, mbilimbili na ngoi ti akpale. Paul ahinga lani so ambeni  Chrétien so ayeke aHébreu, so lo tokua mbeti na ala, ayeke dö ande ada ti ala na akungba ti ala ti zia ti hon. Jésus afa lani so ngoi ni so ayeke duti ngangu mingi (Marc 13:14-18; Luc 21:21-23). Kozo na ngoi ni so, aChrétien so ayeke tâ lani na bezoin ti ye tere mingi na popo ti ala.—aRom. 12:9.

8. Nyen la a lingbi e sara laso kozo si kota ye ti vundu akomanse?

8 Kota ye ti vundu so mara ni ade asi lâ oko ape ayeke nduru ti si (Marc 13:19; Apoc. 7:1-3). E yeke tâ na bezoin ande ti sara ye alingbi na wango so, so atene: “I ga, i azo ti mbi, i lï na da ti i, i kanga yanga ti da ti i na peko ti i; i honde tere ti i kete, juska ngonzo ahon.” (És. 26:20). “Da ti i” so a sara tënë ni ge so alingbi ti duti acongrégation ti e. Ndo so la e na aita ti e, e yeke ga dä ti voro Jéhovah. Gi gango na bungbi lakue alingbi ape. Lani Paul adabe ti aChrétien Hébreu so a yeke nzoni ala pusu mba ti duti na “ndoye na ti sara apendere kusala”. (aHéb. 10:24, 25). Laso a yeke nzoni e ye tere mingi tongana aita, sarango tongaso ayeke mû maboko na e ti gbu ngangu na yâ ti akpale nga na akangango lege kue so e yeke tingbi ande na ni.

9. (a) Alege wa la azi na e ti fa tâ yengo tere ti aita laso? (b) Mû ambeni tapande so afa so awakua ti Jéhovah aye tere tongana aita.

9 Même laso, kozo si kota ye ti vundu ato nda ni, e yeke na bezoin ti ye tere mingi tongana aita. Mingi ti aita ti e abâ pasi ndali ti yengingo ti sese, ngu so asuku amû ndo, kota pupu, ngu-ingo so asuku wala ambeni kpale nde. Ambeni ayeke bâ pasi ndali ti kangango lege (Mat. 24:6-9). Na ndo ni, lâ oko oko e yeke tingbi na kpale ti nginza ndali ti so e yeke na yâ ti sioni dunia so (Apoc. 6:5, 6). Teti so akpale so ayeke gue na li ni mingi, lege azi na e nga ti fa tâ yengo tere ti aita. Atâa so ‘ndoye ti mingi ti azo ayeke dë’ a lingbi e fa so e ngbâ ti ye tere mingi tongana aita.—Mat. 24:12. [1]

TONGANA NYEN LA E LINGBI TI NGBÂ TI YE TERE TONGANA AITA?

10. Nyen la e yeke bâ ni fadeso?

10 Atâa akpale wa la e tingbi na ni, tongana nyen la e yeke sara kue ti ngbâ ti ye tere tongana aita? Na yâ ti aye wa la e yeke fa tâ yengo tere so na mbage ti aita ti e? Na peko ti so bazengele Paul atene: “Zia yengo tere ti ala ti aita angbâ ti gue,” lo fa gbâ ti aye so aChrétien alingbi ti sara ti fa so ala ye tere. Zia e bâ ambeni ye ni omene.

11, 12. Ti yamba agene aye ti tene nyen? (Bâ foto so ayeke na tongo nda ti article ni.)

11 “Ala girisa pëpe tënë ti yambango agene.” (Diko aHébreu 13:2.) Tënë so a kiri na pekoni na “yambango agene” aye ti tene “ti sara nzoni bê na awande”. Tënë so adabe ti e na tapande ti Abraham na Lot. Ala use kue asara lani nzoni bê na agene so ala hinga ala ape. Andâ azo ni so ayeke a-ange (Gen. 18:2-5; 19:1-3). Paul apensé na atapande so la si lo mû wango na aChrétien so ayeke aHébreu ti ye tere tongana aita na lege ti yambango agene.

12 E yeke yamba agene na lege so e yeke tisa ambeni zo na ndo ti e ti te ye wala ti sara ngia nga ti kpengba ala? E yeke pëpe na bezoin ti tö gbâ ti kobe wala ti vo gbâ ti ye si e yamba agene. A yeke nzoni e tisa pëpe gi azo so ayeke sara nzoni ye na e na pekoni (Luc 10:42; 14:12-14). Ye so e ye ayeke ti kpengba mba me pëpe ti fa so e la e yeke na ye mingi. Même si e hinga surveillant ti circonscription na wali ti lo nzoni ape, e yeke tisa ala na ndo ti e? (3 Jean 5-8). Atâa so e yeke na aye mingi  ti sarango ni nga e yeke tingbi na akpale lâ oko oko, a lingbi e “girisa pëpe tënë ti yambango agene”.

13, 14. Tongana nyen la e lingbi ti ‘dabe ti e na aita so ayeke na kanga na yâ ti zingiri’?

13 “Ala dabe ti ala na aita so ayeke [na kanga].” (Diko aHébreu 13:3.) Paul ayeke sara lani pëpe tënë ti azo kue so ayeke na da ti kanga. Me lo yeke sara tënë ti aita so a kanga ala ndali ti tënë ti mabe ti ala. Na ngoi so Paul asû lettre so na aChrétien so ayeke aHébreu lo yeke lani na yâ ti zingiri na kanga a sara ngu osio tongaso awe (aPhil. 1:12-14). Lo gonda aita ni ndali ti so ala “kangbi mawa” na azo so ayeke na da ti kanga (aHéb. 10:34). Ambeni ita amû lani maboko na Paul na ngoi so a kanga lo, me aChrétien so ayeke aHébreu alango ti ala ayo. So ala lango ayo so ala mû maboko na lo tongana nyen? Ala sara ni na lege ti asambela so ala sara ndali ti lo na bê ti ala kue.—aHéb. 13:18, 19.

14 Legeoko nga laso, e lingbi ti lango ayo na aita so ayeke na kanga. Tongaso, e lingbi pëpe ti mû maboko na ala tongana ti so aita so alango nduru na ndo so a kanga ala dä ayeke sara ni. Me e lingbi ti kangbi mawa na aita be-ta-zo so nga ti fa so e ye ala tongana aita ti e tongana e dabe ti e na ala lakue nga e toto ndali ti ala na Jéhovah na yâ ti asambela ti e. Na tapande, e lingbi ti sambela ndali ti aita ti e nga même ndali ti amolenge so ayeke na kanga na Érythrée, so na popo ni e yeke na ita Paulos Eyassu, ita Isaac Mogos, nga na ita Negede Teklemariam so ayeke na kanga ahon ngu 20 awe.

15. E yeke bâ mariage ti e na nene ni tongana nyen?

15 “Zia azo kue abâ mariage na nene ni mingi.” (Diko aHébreu 13:4.) E yeke fa so e ye aita ti e tongana e sara kue ti duti nzoni-kue (Tim. 5:1, 2). Tongana “mbeni zo ague juska ti sara sioni na ita ti lo nga ti nzi adroit ti lo” na sarango lango-sioni na lo wala na mbeni fami ti lo, a yeke buba yâ ti confiance so ala yeke na ni na mba, confiance so la ayeke na gunda ti yengo tere ti aita (1 aThes. 4:3-8). Tara ti bâ tënë ti bê ti mbeni wali so ahinga so koli ti lo ayeke handa lo na bango porno. Mara ti sarango ye tongaso afa so koli ti lo aye lo nga lo ne ye so a ku na mbage ti azo so asara mariage?—Mat. 5:28.

16. Tongana nyen la ti duti na ngia na ye so e yeke na ni ayeke mû maboko na e ti ye aita ti e?

16 “Zia aye so ayeke dä alingbi na ala.” (Diko aHébreu 13:5.) Ti zia bê kue na Jéhovah ayeke sara si e wara ngia na ye so e yeke na ni. Ye so ayeke mû maboko na e ti duti na nzoni bango ndo na ndo ti aye ti sese (1 Tim. 6:6-8). A yeke mû nga maboko na e ti bâ so songo ti e na Jéhovah nga na amba ti e aChrétien ayeke kota mingi ahon aye kue so e lingbi ti vo. Mbeni zo so ayeke na ngia na ye so lo yeke na ni ayeke dema ape, lo yeke bi tënë na li ti zo ape, lo yeke sara bê ti ye ape. Kota bê ayeke kanga lege na e ti ye aita ti e. Zo so ayeke na ngia na ye so lo yeke na ni ayeke mû ye na azo.—1 Tim. 6:17-19.

17. Ti “duti na mbeto oko pëpe” ayeke mû maboko na e tongana nyen ti ye tere tongana aita?

17 “Duti na mbeto oko pëpe.” (Diko aHébreu 13:6.) Ti zia bê kue na Jéhovah ayeke sara si e yeke na mbeto ape ti luti na gbele akpale kue so e yeke tingbi na ni. Ti duti na mbeto ape ayeke sara si e duti na nzoni bango ndo. Tongana e ye  tere tongana aita nga e yeke na nzoni bango ndo ayeke mû maboko na e ti kpengba mba nga ti dë bê ti mba (1 aThes. 5:14, 15). Même na ngoi ti kota ye ti vundu, e yeke “luti na [e] yô li ti [e] na nduzu” ndali ti so e hinga so ngoi ti zingo e aga nduru awe.—Luc 21:25-28.

Mo bâ na nene ni kua so a-ancien ayeke sara ndali ti e? (Bâ paragraphe 18)

18. Tongana nyen la e lingbi ti ye a-ancien tongana aita ti e?

18 “Ala dabe ti ala na azo so ayeke mû li ni.” (Diko aHébreu 13:7, 17.) Tongana e gbu li ti e na ndo ti angangu kua so a-ancien ayeke sara sân ti tene a futa ala, a yeke sara si e yeke kiri ti ye ala mingi. E ye lâ oko ape ti sara mbeni ye ti zia vundu na bê ti ala. Me, e ye ti mä yanga ti ala na bê ti e kue. Na sarango tongaso e yeke ne ‘ala mingi mingi teti kusala so ala yeke sara’.—1 aThes. 5:13.

E NGBÂ TI SARA NI MINGI AHON TI KOZO

19, 20. Tongana nyen la e lingbi ti ngbâ ti ye tere mingi tongana aita ahon ti kozo?

19 Kite ayeke pëpe so a hinga awakua ti Jéhovah nzoni mingi ndali ti so ala ye tere na popo ti ala tongana aita. Paul kue ahinga ni lani tongaso. Me lo wa ala ti “ngbâ ti sara ni mingi mingi ahon ti kozo”. (1 aThes. 4:9, 10). Biani, lege ayeke dä ti sara ni mingi ahon ti kozo.

20 Tongaso, na ngoi so e yeke bâ versê ti ngu so na yâ ti Da ti Royaume na yâ ti ngu so, zia e gbu li ti e na ndo ti ahundango ndo so: Mbi lingbi ti sara nyen ti yamba agene ahon ti kozo? Tongana nyen la mbi lingbi ti dabe na aita so ayeke na da ti kanga? Mbi fa so mbi ne ye so Nzapa aleke na lege ti mariage? Nyen la ayeke mû maboko na mbi ti wara tâ ngia na ye so mbi yeke na ni? Tongana nyen la mbi lingbi ti zia bê kue na Jéhovah? Tongana nyen la mbi lingbi ti sara kua maboko na maboko na azo so ayeke mû li ni? Tongana e sara ye alingbi na aye omene so, versê ti ngu so ayeke duti pëpe gi tongana mbeni senge tableau na yâ ti Da ti Royaume. A yeke dabe ti e ti sara ye alingbi na wango so atene: “Zia yengo tere ti ala ti aita angbâ ti gue.”—aHéb. 13:1.

^ [1] (paragraphe 9) Ti wara ambeni tapande so afa so aTémoin ti Jéhovah aye tere na ngoi ti akpale, bâ Tour ti Ba Ndo ti lango 15 ti juillet 2002, l. 8-9, nga na buku Royaume ti Nzapa akomanse kua awe! chap. 20.