Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JANVIER 2016

Yingo afa na yingo ti e

Yingo afa na yingo ti e

“Yingo wani afa na yingo ti e so e yeke amolenge ti Nzapa.” —AROM. 8:16.

ABIA: 109, 108

1-3. Aye wa la asi na Pentecôte so asara si lango ni so ayeke nde? Aye so asi lani asara si prophétie wa aga tâ tënë? (Bâ foto so ayeke na tongo nda ti article ni.)

A YEKE lani na dimanche na ngbonga gumbaya ti ndapre na Jérusalem. Na lango ni so tere ti azo anzere lani mingi ahon tanga ti alango kue. Ngbanga ti so a yeke lani lango ti mbeni matanga nga lango ti sabbat. Na ndapre ni, kota prêtre amû offrande na yâ ti temple, tongana ti so a yeke sara ka. Na pekoni, na ngbonga gumbaya, lo mû amapa use so a sara na mama ni na sandaga so a yengi ni, a sara amapa ni na akozo lê ti blé (Lév. 23:15-20). Offrande so afa tongo nda ti fango lê ti blé. A yeke lani na Pentecôte ti ngu 33.

2 Na ngoi so a yeke mû lani offrande so na yâ ti temple, mbeni ye so ayeke kota mingi ayeke lani nduru ti si, ye ni ayeke si na yâ ti temple ni ape me na yâ ti mbeni kubu so ayeke na nduzu na Jérusalem. Ambeni Chrétien so wungo ti ala ayeke 120 abungbi lani na ala ‘ngbâ ti sambela’. (Kus. 1:13-15). Ye so ayeke nduru ti si na ala so aye ti gue oko na ye so kota prêtre ayeke sara lani lakue na ngoi ti Pentecôte ti ngu oko oko. A yeke ye so prophète Joël asara tënë ni lani a sara ngu 800 awe (Joël 2:28-32; Kus. 2:16-21). Kota ye so ayeke lani nduru ti si so ayeke nyen?

3 Diko Kusala 2:2-4. Yingo vulu ti Nzapa aga lani na ndo ti  aChrétien so abungbi lani na yâ ti kubu so ayeke na nduzu na Jérusalem (Kus. 1:8). Ala komanse ti tene prophétie wala ti sara tënë ti apendere ye so ala mä na ala bâ. Bazengele Pierre afa lani na gbâ ti azo so abungbi ngbanga ti nyen la ye so asi so ayeke kota ye. Na pekoni, lo tene na ala: “Ala changé bê ti ala, na zia a batize ala oko oko na iri ti Jésus Christ teti pardon ti asiokpari ti ala, na fade ala yeke wara yingo vulu so ayeke matabisi so a mû senge senge.” Na lango ni so azo nduru na 3000 ayeda na tënë ni so, a batize ala na ala wara yingo vulu so a mû zendo ni.—Kus. 2:37, 38, 41.

4. (a) Ngbanga ti nyen a yeke nzoni ti gi ti hinga ye na ndo ti ye so asi na Pentecôte? (b) Nyen la asi peut-être na oko lango ni so angu mingi kozo? (Bâ kete tënë.)

4 Ngbanga ti nyen Pentecôte ti ngu 33 ayeke kota ye mingi na lê ti e? A yeke pëpe ngbanga ti ye so asi lani na temple na Jérusalem. Me a yeke ndali ti so Jésus Christ so ayeke Kota Prêtre asara si prophétie ni aga tâ tënë. [1] Na lango ni so, kota prêtre amû amapa use na offrande na Jéhovah. Amapa so a mû na offrande na temple aye ti sara tënë ti adisciple ti Jésus so a soro ala ti gue na yayu, so a mû ala na popo ti azo so siokpari ayeke na tere ti ala ti ga amolenge ti Nzapa. Lege azi na ambeni zo so ayeke tongana “kozo li ti ye” ti gue na yayu ti komande legeoko na Jésus na yâ ti Royaume so ayeke ga ande na gbâ ti aye ti nzoni na azo so amä yanga (Jacq. 1:18; 1 Pi. 2:9). Tongaso, atâa beku ti e ayeke ti gue na yayu ti komande legeoko na Jésus wala ti wara fini na ndo ti sese so ayeke ga ande paradis, aye so asi na Pentecôte ti ngu 33 ayeke kota ye mingi ndali ti e.

A YEKE SORO AZO TI GUE NA YAYU TONGANA NYEN?

5. E hinga tongana nyen so fason so a soro azo na lege ti yingo vulu ayeke nde nde?

5 Tongana mo yeke mbeni oko ti adisciple so yingo aga lani na ndo ti li ti ala tongana wâ, mo yeke girisa lango ni so ape. Mo yeke duti na kite ape so a soro mo na lege ti yingo vulu ti gue na yayu, mbilimbili tongana mo wara nga na lege ti miracle matabisi ti sarango tënë na yanga ti kodoro nde (Kus. 2:6-12). Me eskê azo kue so a soro ala ti gue na yayu a yeke soro ala gi na mbeni lege so adö bê tongana ti so a soro lani na adisciple 120 so? Ên-ën. Na tapande, tanga ti azo so angbâ lani na Jérusalem na lango ni so a soro ala na ngoi ti batême ti ala (Kus. 2:38). Yingo vulu aga lani na li ti ala tongana wâ ape. Na ndo ni, a yeke aChrétien kue la a soro ala na ngoi ti batême ti ala ape. A soro lani azo ti Samarie na lege ti yingo vulu na peko ti batême ti ala (Kus. 8:14-17). Na mbage, a soro lani Corneille na azo ti da ti lo na lege ti yingo vulu kozo si ala wara batême. Ye so ayeke lani tâ nde mingi.—Kus. 10:44-48.

6. Nyen la aChrétien kue so a soro ala ti gue na yayu awara ni? Ye so amû lege na ala ti hinga nyen?

6 A yeke soro azo kue ti gue na yayu gi na oko fason ape. Ambeni alingbi ti hinga hio so a iri ala ti gue na yayu, me ti ambeni yeke yeke si ala ga ti hinga ni. Ye oko, atâa a soro ala tongana nyen, bazengele Paul afa ye so ayeke si na ala, lo tene: “Na peko ti so ala mä na bê awe, a kpo mbeni nzoroko na tere ti ala, yingo vulu so a mû zendo ni ândö; a yeke yingo vulu so si afa na e kozo atene e yeke wara ande ye ti héritier ni biani, ti ku na zingo azo so ayeke ti Nzapa wani na lege ti mbeni ngere so a futa ti zi e, si a sepela gloire ti lo.” (aÉph. 1:13, 14). Tongaso, Jéhovah asara kua na yingo vulu ti lo ti fa polele na aChrétien ni so lo soro ala ti gue na yayu. A yeke na lege so la yingo vulu ‘afa na ala kozo atene’ ala yeke wara fini ti lakue lakue ande na yayu me na sese ape.—Diko 2 aCorinthien 1:21, 22; 5:5.

7. Nyen la a lingbi Chrétien oko oko kue so a soro lo ti gue na yayu asara si lo wara futa ti lo na yayu?

 7 Tongana a soro mbeni Chrétien ti gue na yayu aye ti tene so nyen na nyen lo yeke gue na yayu? Ên-ën. Lo yeke hinga biani so a iri lo ti gue na yayu. Me ti hinga wala lo yeke wara futa ti lo na yayu a lingbi lo duti be-ta-zo na Jéhovah. Pierre atene: “Ndani la, aita, ala sara ngangu kue ti sara si iringo so a iri na ala nga sorongo so a soro na ala aduti tâ ye biani; teti tongana ala ngbâ ti sara aye so, fade ala yeke tï lâ oko pëpe. Biani, a yeke tongaso si fade a yeke mû lege na ala nzoni ti lï na yâ ti royaume ti Seigneur na Sauveur ti e Jésus Christ, royaume so ayeke ngbâ lakue lakue.” (2 Pi. 1:10, 11). A lingbi Chrétien oko oko kue so a soro lo ti gue na yayu asara ngangu ti ngbâ be-ta-zo. Tongaso ape, lo yeke wara futa ti lo ni ape.—aHéb. 3:1; Apoc. 2:10.

ZO NI AYEKE HINGA NI TONGANA NYEN?

8, 9. (a) Ngbanga ti nyen a yeke ngangu na mingi ti aita ti hinga ye so asi na mbeni Chrétien na ngoi so a soro lo ti gue na yayu? (b) Mbeni ita ayeke hinga tongana nyen so a iri lo ti gue na yayu?

8 A lingbi ti duti ngangu na mingi ti awakua ti Jéhovah laso ti hinga ye so asi na mbeni zo na ngoi so Nzapa asoro lo ti gue na yayu. Na a yeke na lege ni ndali ti so a soro ala ti gue na yayu ape. Nzapa aleke lani na bê ti lo ti tene azo aduti na fini lakue lakue na ndo ti sese (Gen. 1:28; Ps. 37:29). Me ti soro ambeni zo ti duti tongana agbia na aprêtre na yayu ayeke lani ye so lo leke kozo ape. So ayeke mbeni lekengo ye so ayeke tâ nde. Tongana a iri mbeni zo ti gue na yayu, lege so lo yeke pensé na ni, bango ndo ti lo nga na beku so lo yeke na ni ayeke changé.—Diko aÉphésien 1:18.

9 Me mbeni zo ayeke hinga tongana nyen so a iri lo ti gue na yayu? Kiringo tënë ni asigigi polele na yâ ti tënë so bazengele Paul atene na aChrétien so ayeke na Rome, so a soro ala ti gue na yayu, so ayeke lani azo “so a iri ala ti duti azo so ayeke nzoni-kue”. Lo tene na ala, lo tene: “Teti ala wara lani pëpe mbeni yingo ti dutingo ngbâa so asara si ala kiri aduti na mbeto, me ala wara lani mbeni yingo so Nzapa amû ti mû ala ti ga amolenge ti lo. Na lege ti yingo so, e dekongo, e tene: ‘Abba, Babâ!’ Yingo wani afa na yingo ti e so e yeke amolenge ti Nzapa.” (aRom. 1:7; 8:15, 16). Na lege ti yingo vulu Nzapa ayeke fa na mbeni zo polele so lo iri lo ti komande legeoko na Jésus na yayu tongana gbia ti Royaume ti lo.—1 aThes. 2:12.

10. Tënë ti 1 Jean 2:27, so a tene aChrétien so a soro ala ti gue na yayu ayeke pëpe na bezoin ti mbeni zo ti fa ye na ala, aye ti tene nyen?

10 Azo so Nzapa airi ala ti gue na yayu ayeke na bezoin ape ti tene mbeni zo la atene na ala so a soro ala ti gue na yayu. Ala yeke na bezoin pëpe ti tene mbeni zo agi ti hinga ye so asi na ala. Jéhovah asara si ala wani ahinga biani so ala yeke gue na yayu. Bazengele Jean atene na aChrétien so a soro ala ti gue na yayu, lo tene: “Me ti ala, a yeke Lo so ayeke nzoni-kue si asoro ala, na ala kue ala hinga ye.” Lo tene nga lo tene: “Ti ala, sorongo so a soro na ala angbâ na ala. Na ala yeke na bezoin ti mbeni zo ti fa ye na ala pëpe. Legeoko tongana ti so sorongo ala ni afa ye na ala na ndo ti aye kue, na a yeke tâ tënë nga a yeke mvene pëpe, na gi tongana ti so a fa ye na ala, zia ala ngbâ ti duti beoko na lo.” (1 Jean 2:20, 27). A-Chrétien so a soro ala ti gue na yayu ayeke nga na bezoin ti tene Jéhovah afa ye na ala tongana tanga ti azo. Me ala yeke pëpe na bezoin ti tene mbeni zo la ayeda biani so a soro ala ti gue na yayu. Jéhovah asara kua na kota ngangu ti lo, so ayeke yingo vulu ti lo, ti fa na ala ni polele.

“A KIRI A DÜ” ALA

11, 12. Tënë wa la mbeni Chrétien so a soro lo ti gue na yayu alingbi ti hunda tere ti lo na ni? Me nyen la lo yeke na kite dä ape?

11 Na ngoi so a soro aChrétien na lege ti  yingo vulu ti gue na yayu ala yeke changé mingi, ndani la Jésus atene so “a kiri a dü” ala [2] (Jean 3:3, 5). Na pekoni, lo fa ndani, lo tene: “Zia bê ti mo adö pëpe ngbanga ti so mbi tene na mo: A lingbi a dü ala mbeni si. Pupu ayeke ya na ndo so bê ti lo aye, na mo yeke mä toto ni, me mo yeke hinga ndo so pupu ni alondo dä pëpe nga ndo so lo yeke gue dä pëpe. Zo kue so yingo adü lo ayeke tongaso.” (Jean 3:7, 8). A yeke polele so a yeke ngangu na mbeni Chrétien so a soro lo ti gue na yayu ti fa na mbeni zo so a soro lo ape tongana nyen la Nzapa airi lo wani ti gue na yayu.

12 Azo so a soro ala ti gue na yayu alingbi ti hunda tere ti ala: ‘Ndali ti nyen la Jéhovah asoro mbi me mbeni zo nde ape?’ Ala lingbi même ti hunda tere ti ala wala ala lingbi na iringo ndo ni so. Me ala yeke na kite ape so Jéhovah asoro ala. Ala yeke na ngia mingi nga ala kiri singila ndali ni. Ala yeke na ngia tongana ti Pierre so lo tene: “Zia a gonda Nzapa na Babâ ti Seigneur ti e Jésus Christ, ndali ti so, na lege ti kota nzoni bê so lo sara, lo kiri lo dü e fini ti duti na beku so ayeke na fini na lege ti zingongo so Jésus Christ azingo na kuâ, ti wara ye ti héritier so alingbi ti buba pëpe, so alingbi ti ga sioni pëpe nga so pendere ni alingbi ti hon pëpe. A bata ni na ala na yayu.” (1 Pi. 1:3, 4). Tongana aChrétien so a soro ala ti gue na yayu adiko tënë so, ala yeke duti na kite oko ape so ala la Babâ ti ala ayeke sara tënë na ala.

13. Na lege wa la fason so mbeni zo ayeke pensé na ni achangé na ngoi so a soro lo na lege ti yingo vulu ti gue na yayu? Nyen la asara si pensé ti lo ni achangé?

13 Kozo ti tene Nzapa asoro aChrétien so ti gue na yayu ala ye lani mingi beku so ala yeke na ni ti ngbâ na fini lakue lakue na ndo ti sese. Ala yeke ku lani kungo ngoi so Jéhovah ayeke sara si sese aga paradis nga lo yeke zi aye ti sioni kue. Peut-être ala yeke bâ na yâ ti li ti ala tongana nyen la ala yeke yamba ande afami ti ala wala akamarade ti ala so ayeke zingo ande na kuâ. Ala yeke ku lani kungo ti leke da ti ala ti lango na yâ ni nga ti te alê ti akeke so ala yeke lu (És. 65:21-23). Ngbanga ti nyen la lege so ala yeke pensé na ni achangé? A yeke pëpe ngbanga ti so beku so ala ayeke na ni kozo anzere na ala encore ape. A yeke nga pëpe ndali ti so ala yeke na vundu wala ndali ti so ala bâ pasi mingi. Ala mû desizion gi hio tongaso ape mo bâ mo tene a nzere na ala ape ti ngbâ na fini na ndo ti sese wala ala yeke duti ande na ngia ape na ndo ti sese ni. Wala ala ye gi pëpe ti gue ti bâ wala fini na yayu ayeke tongana nyen. Me a yeke Jéhovah la achangé lege so ala yeke pensé na ni. Na ngoi so Jéhovah airi ala, lo sara kua na yingo vulu ti lo ti changé lege so ala yeke pensé na ni kozo nga beku so ala yeke na ni.

14. A-Chrétien so a soro ala ti gue na yayu abâ fini ti ala na sese ge tongana nyen?

14 So aye ti tene so aChrétien so a soro ala ti gue na yayu aye ti kui? Paul akiri tënë, a tene: “Biani, e so e yeke na yâ ti tente so, e yeke dema, na ye ahon ndo ti e awe; teti e ye pëpe ti zi da ni so na tere ti e, me ti yü mbeni da ni so, si fini amene ye so ayeke kui kuingo.” (2 aCor. 5:4). A-Chrétien so a soro ala ti gue na yayu aye ti kui ape. Ala ye ti ngbâ na fini nga ti sara na Jéhovah legeoko na afami ti ala nga na akamarade ti ala lâ na lâ. Me atâa ye wa la ala yeke sara, ala yeke girisa pëpe pendere beku ti ala ti kekereke.—1 aCor. 15:53; 2 Pi. 1:4; 1 Jean 3:2, 3; Apoc. 20:6.

JÉHOVAH ASORO MO?

15. Aye wa la ayeke fa pëpe so a soro mbeni Chrétien na lege ti yingo vulu ti gue na yayu?

15 Peut-être mo yeke gi bê ti mo wala Jéhovah  asoro mo ti gue na yayu. Tongana ayeke tongaso mo lingbi ti hunda tere ti mo na ahundango ndo so: Mo bâ so mo yeke fa tënë mingi na bê ti mo kue? A nzere na mo mingi ti manda Bible nga ti gi ti hinga “aye ti Nzapa so nda ni alï mingi”? (1 aCor. 2:10). Mo bâ so Jéhovah airi tënë nzoni mingi na ndo ti kua ti mo ti fango tënë? Mo ye mingi ti sara aye so Jéhovah ahunda na mo ahon tanga ti aye kue? Mo ye amba ti mo mingi na mo bâ so mo yeke na kota kua ti mû maboko na ala ti sara na Jéhovah? Mo bâ na yâ ti fini ti mo so Jéhovah amû maboko na mo na yâ ti aye mingi? Tongana mo kiri tënë En na ahundango ndo so, andâ a iri mo ti gue na yayu la? Ên-ën, a yeke tongaso ape. Ndali ti nyen? Ndali ti so awakua ti Jéhovah kue alingbi ti pensé tongaso, atâa a soro ala ti gue na yayu wala pëpe. Nga, na lege ti yingo vulu ti Jéhovah lo lingbi ti mû mara ti ngangu so na mbeni wakua ti lo atâa beku ti zo ni ayeke so wa. Biani tongana mo yeke hunda tere ti mo ti hinga wala a iri mo ti gue na yayu, a ye ti fa so a iri mo ti gue na yayu ape. Azo so Jéhovah airi ala ti gue na yayu ayeke hunda tere ti ala hundango ape, ala hinga ni.

16. E hinga tongana nyen so a yeke pëpe azo kue so awara yingo ti Nzapa la lo iri ala ti gue na yayu?

16 Na yâ ti Bible, e yeke na tapande ti azo mingi so ayeke lani be-ta-zo na Jéhovah na so awara yingo vulu ti lo me ala gue na yayu ape. Jean Baptiste ayeke mbeni tapande ni. Jésus agonda lani Jean mingi me lo tene so Jean ayeke komande na yâ ti Royaume ti yayu ape (Mat. 11:10, 11). Yingo vulu afa nga lege lani na David (1 Sam. 16:13). Yingo vulu amû maboko na lo ti mä yâ ti aye ti Jéhovah so ndani alï mingi nga amû maboko na lo ti sû ambeni mbage ti Bible (Marc 12:36). Atâa so kue, bazengele Pierre atene so “David amontê na yayu pëpe”. (Kus. 2:34). Jéhovah amû yingo vulu ti lo na akoli so ti sara aye so apika bê mingi, me yingo afa na ala ape so a iri ala ti wara fini na yayu. So aye ti tene so ala yeke lani be-ta-zo kue ape wala ala lingbi ti komande na yayu ape? Ên-ën. A ye gi ti tene so Jéhovah ayeke zingo ande ala na kuâ ti wara fini na ndo ti sese na yâ ti paradis.—Jean 5:28, 29; Kus. 24:15.

17, 18. (a) Nyen la mingi ti awakua ti Jéhovah ayeke ku ni kungo laso? (b) Ahundango ndo wa e yeke sara tënë na ndo ni na yâ ti article ti peko?

17 Jéhovah airi mingi ti awakua ti lo laso ti gue na yayu ape. Ala yeke na oko beku so David, Jean Baptiste nga na akoli na awali so ayeke be-ta-zo na Jéhovah ayeke na ni lani. Legeoko tongana Abraham, ala yeke ku lani kungo ti duti na fini na ndo ti sese na ngoi so Royaume ti Nzapa ayeke komande na ndo ti ala (aHéb. 11:10). Gi tanga ti ala so a soro ala ti gue na yayu la angbâ na ndo ti sese na ngoi ti nda ni so (Apoc. 12:17). So ti tene so mingi ti aChrétien 144000 so a soro ala ti gue na yayu akui lani be-ta-zo awe.

18 Tongaso, tongana mbeni zo atene so a soro lo ti gue na yayu, a yeke nzoni aChrétien so ayeke na beku ti wara fini na sese asara ye tongana nyen? Tongana mbeni zo na yâ ti congrégation ti mo akomanse ti te mapa na ti nyon vin na ngoi ti Dango bê na kuâ ti Christ, mo yeke bâ lo tongana nyen? Mo yeke gi bê ti mo so wungo ti azo so atene a iri ala ti gue na yayu ayeke gue gi na li ni so? Akiringo tënë ni ayeke na yâ ti article ti peko.

^ [1] (paragraphe 4) Peut-être a sara lani matanga ti Pentecôte so na oko ngoi so Nzapa amû lani Ndia na Moïse na Sinaï (Ex. 19:1). Tongana a yeke tongaso, peut-être na oko lango ti yâ ti ngu so Moïse alï na azo ti Israël na yâ ti mbele ti Ndia la Jésus alï na Israël ti yingo na yâ ti fini mbele.

^ [2] (paragraphe 11) Ti hinga ambeni tënë na ndo ti kiringo ti dü mbeni zo, bâ Tour ti Ba Ndo ti lango 1 ti mai 2009, l. 3-11.