Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) JANVIER 2016

So e yeke sara kua legeoko na Nzapa asara si e yeke na ngia

So e yeke sara kua legeoko na Nzapa asara si e yeke na ngia

“So e yeke sara kusala legeoko na Nzapa, e voro nga yanga na ala ti tene ala yeda na kota nzobe ti Nzapa na ala hon nde pëpe na ye so kota nzobe ni aye.”—2 ACOR. 6:1.

ABIA: 75, 74

1. Atâa so Jéhovah ayeke lo ti ngangu ahon kue, lo hunda na azo ti sara nyen?

JÉHOVAH ayeke lo ti ngangu ahon kue, lo la lo créé aye kue, ndara nga na ngangu ti lo angbâ lakue. Job ahinga ni lani. Na ngoi so Jéhovah ahunda Job na ndo ti kua so lo sara ti créé aye, Job atene: “Mbi hinga Mo lingbi sara ye kue, na ye so Mo leke na bê ti Mo ti sara, ye oko alingbi gbanzi ye so pëpe.” (Job 42:2). Atâa so Jéhovah alingbi ti sara ye kue so lo leke ti sara sân ti tene mbeni zo amû maboko na lo, tâ gi na tongo nda ni, na ndoye lo hunda na azo ti sara kua legeoko na lo ti hunzi ye so lo leke na bê ti lo ti sara.

2. Kota kua wa la Jéhovah ahunda lani na Jésus ti sara?

2 Kozo ye so Nzapa acréé ayeke oko Molenge ti lo. Jéhovah amû lege na Molenge ti lo ti mû maboko na lo ti créé tanga ti aye kue, aye so lê abâ na aye so lê abâ ape (Jean 1:1-3, 18). Bazengele  Paul asara tënë so na ndo ti Jésus, lo tene: “A yeke na lege ti lo si a sara tanga ti aye kue na yayu nga na ndo ti sese, aye so lê abâ nga na aye so lê abâ pëpe, atâa a yeke atrône wala ala so akomande wala angorogbia wala akomandema. A sara tanga ti aye kue na lege ti lo nga ndali ti lo.” (aCol. 1:15-17). Tongaso, Jéhovah ane Molenge ti lo na lege so lo zia si lo mû maboko na lo ti créé aye nga lo fa na azo kota kua so Molenge ti lo asara.

3. Nyen la Nzapa ahunda lani na Adam ti sara? Ngbanga ti nyen?

3 Jéhovah ahunda nga lani na azo ti sara kua legeoko na lo. Na tapande, lo hunda lani na Adam ti zia iri na ndo ti anyama (Gen. 2:19, 20). Tere ti Adam adoit lani ti nzere na bango anyama ni, ti bâ asarango ye ti ala, ti bâ iri wa la ayeke nzoni ti tene lo zia na ndo ti ala oko oko. Jéhovah wani alingbi lani ti zia iri na ndo ti anyama so lo créé. Me na ndoye, lo mû lege na Adam ti sara ni. Nzapa amû nga kua na Adam ti sara si sese kue aga paradis (Gen. 1:27, 28). Mawa ni ayeke so, Adam asoro ti sara kua legeoko na Nzapa ape, ye so aga na kpale na lo nga na amolenge ti lo.—Gen. 3:17-19, 23.

4. Tongana nyen la ambeni zo asara kua legeoko na Nzapa ti sara ye so lo leke na bê ti lo ti sara?

4 Na pekoni, Nzapa ahunda na ambeni zo ti mû maboko na lo ti sara ye so lo leke na bê ti lo ti sara. Noé aleke lani arche so abata lo na azo ti sewa ti lo nga na anyama na fini na ngoi so kota ngu apika. Moïse azi lani azo ti Israël na Égypte. Josué ague na azo ti Israël na sese ti zendo. Salomon aleke lani temple na Jérusalem. Marie aga mama ti Jésus. Awakua be-ta-zo so nga na ambeni mingi asara lani kua legeoko na Nzapa ti sara ye so lo leke na bê ti lo ti sara.

5. Akua wa la e na Jéhovah e yeke sara ni? Eskê lo yeke fade na bezoin ti tene e na lo la e sara ni? (Bâ foto so ayeke na tongo nda ti article ni.)

5 Laso, Jéhovah ahunda na e ti mû maboko na Royaume ti lo so Christ la ayeke Gbia ni na bê ti e kue. Aye ayeke mingi ti sara na yâ ti kua ti Nzapa. Ambeni kua ni ayeke dä so azo kue la apeut ti sara ni ape, me e kue e lingbi ti fa nzoni tënë ti Royaume. Biani, Nzapa alingbi fade ti sara kua so lo wani. Lo lingbi fade ti ngbâ na yayu kâ lo sara tënë na azo na sese ge. Jésus atene lani so Jéhovah alingbi même ti sara si atênë adekongo na tënë ti Gbia ti Royaume ti lo (Luc 19:37-40). Me, Jéhovah amû lege na e ti “sara kusala maboko na maboko” na lo (1 aCor. 3:9). Bazengele Paul atene: “So e yeke sara kusala legeoko na Nzapa, e voro nga yanga na ala ti tene ala yeda na kota nzobe ti Nzapa na ala hon nde pëpe na ye so kota nzobe ni aye.” (2 aCor. 6:1). So e yeke sara kua legeoko na Nzapa ayeke mbeni kota pasa na a sara si e yeke na ngia mingi. Zia e bâ ambeni raison so ndali ni e yeke na ngia.

SO E YEKE SARA KUA LEGEOKO NA NZAPA AGA NA E NGIA

6. Kozo Molenge ti Nzapa atene nyen na ndo ti kua so lo sara na tere ti Babâ ti lo?

6 Ngbene ye giriri, awakua ti Nzapa ayeke na ngia ti sara kua legeoko na lo. Kozo ti tene kozo Molenge ti Nzapa aga na sese, lo tene: ‘Mbi yeke ti L’Éternel na komansema ti lege ti Lo . . . mbi yeke na tere ti Lo tongana wakode. Lakue Lo wara ngia na yâ mbi, mbi duti na ngia na gbele Lo lakue.’ (aProv. 8:22, 30). Jésus ayeke lani na ngia ti sara kua na tere ti Babâ ti lo, lo yeke na ngia ndali ti kua so lo sara ni nga ndali ti so lo hinga so Babâ ti lo aye lo. Ka ti e ayeke tongana nyen?

Mbeni kua so alingbi ti sara si zo ayeke na ngia mingi ahon fango tâ tënë na azo ayeke dä ape (Bâ paragraphe 7)

7. Ngbanga ti nyen kua ti sarango adisciple ayeke ga na e ngia?

7 Jésus atene e yeke wara ngia tongana e  mû ye na azo nga tongana a mû ye na e (Kus. 20:35). A nzere na e mingi so e wara tâ tënë, nga e yeke na ngia ti fa ni na azo. Na ngoi so e yeke fa tâ tënë ti Bible na azo, e bâ so azo so ayeke na nzara ti aye ti yingo ayeke na ngia tongana ala komanse ti mä yâ ti tënë ni, nga ala ye Nzapa na apendere tënë ti lo so ayeke na yâ ti Bible. A nzere na e mingi so ala changé bango ndo ti ala nga na sarango ye ti ala. E hinga so ti fa nzoni tënë ayeke kota ye mingi. A yeke sara si azo so akiri alê songo na Nzapa ayeke wara fini ti lakue lakue (2 aCor. 5:20). Mbeni kua so alingbi ti sara si zo ayeke na ngia mingi ahon kua ti fango tënë, so amû lege na azo ti changé sarango ye ti ala ti wara fini lakue lakue, ayeke dä ape.

8. Ambeni zo atene nyen na ndo ti ngia so e yeke wara tongana e sara kua legeoko na Nzapa?

8 Atâa so e yeke na ngia tongana azo ayeda na tënë so e fa, a nzere nga na e mingi so e hinga so kua so e sara na Jéhovah anzere na lo mingi nga lo bâ ni na nene ni. (Diko 1 aCorinthien 15:58.) Marco, so ayeke na Italie, atene: “A nzere na mbi mingi ti hinga so mbi yeke sara kua na Jéhovah me pëpe na mbeni zo so ayeke girisa hio ye so mbi sara.” Legeoko nga, Franco so asara kua ti ngoi kue na Italie atene: “Jéhovah ayeke dabe ti e lakue na lege ti Bible nga na lege ti akobe ti yingo so lo ye e nga so ye kue so e sara ndali ti lo ayeke kota ye na lê ti lo, même si na lê ti e ngangu so e sara ayeke ye oko ape. Ti sara kua legeoko na Nzapa asara si mbi yeke na ngia nga asara si mbi hinga so mbi yeke na mbeni ye ti sara na yâ ti fini ti mbi.”

SO E YEKE SARA KUA LEGEOKO NA NZAPA ASARA SI E GA NDURU MINGI NA LO NGA NA AMBA TI E

9. Mara ti songo wa ayeke lani na popo ti Jéhovah na Jésus? Ngbanga ti nyen?

9 Tongana e sara kua ndo oko na azo so e ye ala, e yeke ga nduru mingi na ala, e yeke hinga ala nga na anzoni sarango ye ti ala pendere mingi. E yeke manda gi pëpe ti hinga ye so ala sara me e yeke hinga nga ye so ala zia na gbele ala ti sara nga tongana nyen la ala yeke sara ni. Jésus asara lani kua legeoko na Babâ ti lo ndali ti angu mingi, ala lë mbeni kpengba songo ti ndoye so yâ ni alingbi ti fâ ape. Na ndo ti songo so ayeke na popo ti Jésus na Babâ lo, lo tene: “Mbi na Babâ e yeke oko.” (Jean 10:30). A nzere na ala mingi ti duti beoko, ti sara kua legeoko na mango tere.

10. Ngbanga ti nyen kua ti fango tënë asara si e ga nduru mingi na Nzapa nga na amba ti e?

10 Jésus ahunda na Jéhovah na yâ ti sambela ti bâ ndo na ndo ti adisciple ti lo. Ngbanga ti nyen? Lo sambela, lo tene: “Tongaso si ala duti oko tongana ti so e yeke oko.” (Jean 17:11). Tongana e sara ye alingbi na afango ye ti Jéhovah nga e fa tënë, e yeke hinga apendere sarango ye ti lo. E yeke hinga ngbanga ti nyen a yeke kota ye ti zia bê ti e na lo nga ti mû peko ti fango lege ti lo. Tongana e ga nduru na Nzapa, lo yeke ga nduru na e. (Diko Jacques 4:8.) E yeke  ga nga nduru na aita ti e ndali ti so akpale ti e, angia ti e nga na aye so e na ala e leke na bê ti e ti sara ayeke oko. Biani, e na ala kue e yeke sara oko kua, e yeke na ngia, nga e yeke gbu ngangu legeoko. Octavia so ayeke na Grande Bretagne atene: “Ti sara kua legeoko na Jéhovah asara si mbi ga nduru mingi na aita ndali ti so songo ti mbi na ala ayeke gi tongaso ape, me ye so mbi na akamarade ti mbi e zia na gbele e ti sara ayeke oko nga e mû fini ti e ti sara gi na Jéhovah.” Mo kue mo yeke na oko bango ndo so? Mo yeke ga nduru mingi na aita tongana mo bâ ngangu so ala yeke sara ti nzere na Nzapa.

11. Ngbanga ti nyen e yeke ga ande nduru mingi na Jéhovah nga na amba ti e na yâ ti fini dunia?

11 Peut-être laso e ye Jéhovah nga na amba ti e, me na yâ ti fini dunia so mbilimbili ayeke duti ande dä e yeke ye ala mingi. Gbu li na ndo ti kua so e yeke sara ande. E yeke yamba ande azo so a yeke zingo ala na kuâ ti fa na ala alege ti Jéhovah. E yeke sara ande si sese aga paradis. So ayeke kete kua ape, e yeke duti ande na ngia ti sara kua maboko na maboko nga ti ga nzoni-kue na gbe ti Royaume ti Nzapa so Christ ayeke Gbia ni. Azo ti sewa ayeke ga ande nduru mingi na mba nga na Jéhovah so ayeke “mû ye alingbi na nzara ti ye kue so ayeke na fini. “ (Ps. 145:16).

SO E YEKE SARA KUA LEGEOKO NA NZAPA ABATA E

12. Tongana nyen la fango tënë ayeke bata e?

12 A lingbi e kpengba songo ti e na Jéhovah. Teti so e yeke na yâ ti dunia ti Satan nga siokpari ayeke na tere ti e, a yeke ngangu na e ape ti komanse ti pensé tongana ti azo ti dunia so nga ti sara ye tongana ti ala. A lingbi ti haka yingo ti dunia so na mbeni ngu so ayeke sua na ayeke gboto e na mbeni ndo so e ye ti gue dä ape. Ti tene suango ti ngu ni agboto e ape, a lingbi e pika ngu ngangu ti hon na mbeni ndo nde. Legeoko nga, a lingbi e sara ngangu ti tene yingo ti sioni dunia ti Satan so agboto e ape. Na ngoi so e yeke fa tënë na azo e yeke zia lê ti e na ndo ti aye so ayeke kota ye nga na aye ti nzoni so e yeke wara na lege ti yingo, me pëpe na ndo ti aye so alingbi ti woko mabe ti e (aPhil. 4:8). Fango tënë ayeke kpengba mabe ti e ndali ti so ayeke sara si e dabe ti e na azendo ti Nzapa nga na afango lege ti lo so lo mû na e na ndoye. A yeke mû nga maboko na e ti ngbâ ti duti na apendere sarango ye so ayeke bata e si Satan na dunia ti lo agboto e ape.— Diko aÉphésien 6:14-17.

13. Mbeni ita so ayeke na Australie atene nyen na ndo ti kua ti fango tënë?

13 Tongana e ngbâ ti fa tënë mingi, nga e sara ambeni ye ti voro Jéhovah, e yeke gi bê ti e mingi na ndo ti akpale ti e ape nga ayeke bata e. Joël so ayeke na Australie atene: “Fango tënë asara si mbi hinga biani aye so ayeke si na yâ ti fini ti azo. A dabe ti mbi na kpale so azo ayeke wara nga na ye ti nzoni so mbi wara na sarango ye alingbi na afango ye ti Bible na yâ ti fini ti mbi. Fango tënë asara si mbi ngbâ ti sara tere ti mbi kete, a sara nga si mbi zia bê ti mbi na Jéhovah nga na aita ti mbi.”

14. Ngbanga ti nyen so e ngbâ ti fa tënë afa so yingo ti Nzapa ayeke na e?

14 Fango tënë asara si e hinga na bê ti e kue so yingo ti Nzapa ayeke na e. Zia e mû mbeni tapande, tara ti bâ so kua ti mo ayeke ti kangbi mapa na azo ti vaka ti mo. A yeke futa mo ndali ti kua ni so ape nga a yeke kiri na mo ape nginza so mo vo na aye ti kua ni. Na ndo ni, mo ga ti bâ so azo mingi aye mapa ni ape, na ambeni zo ni ake mo ndali ti so mo yeke kangbi ni na ala. Mo yeke ngbâ ti sara kua ni? Gi hio tongaso, nzara ti kua ni ayeke sigigi na yâ ti mo na  mo yeke zia lege ni. Me mingi ti e angbâ ti fa tënë teti angu mingi atâa so a hunda ti sara ngangu nga a bezoin nginza, même atâa so azo ahe e wala ala sara ngonzo na tere ti e. Ye so afa so yingo ti Nzapa ayeke na e.

SO E YEKE SARA KUA LEGEOKO NA NZAPA AFA SO E NDOYE LO NGA NA AMBA TI E

15. Tongana nyen la kua ti fango nzoni tënë ague oko na ye so Nzapa aleke na bê ti lo ti sara ndali ti azo?

15 Gbu li ti mo kete, kua ti fango tënë ague oko na ye so ndoye apusu Jéhovah ti sara ndali ti azo. Jéhovah aleke lani ti tene azo aduti na fini na sese teti lakue lakue, atâa so Adam asara siokpari, Jéhovah achangé ye so lo leke ti sara so ape (És. 55:11). Tongaso, lo leke ti zi azo na gbe ti ngbanga ti siokpari nga na kuâ. Ti sara ni, Jésus aga lani na sese na lo mû fini ti lo ndali ti azo so amä yanga. Me ti wara ye ti nzoni na lege ti sacrifice so, a lingbi azo amä yanga ti Nzapa si. Ni la, Jésus afa lani na azo ye so Nzapa aku na mbage ti ala ti sara, na lo mû yanga na adisciple ti lo ti sara nga tongaso. Na ngoi so e yeke fa tënë nga e mû maboko na azo ti ga kamarade ti Nzapa, e yeke sara kua legeoko na Nzapa na yâ ti ye so lo leke na ndoye ti sö azo na yâ ti siokpari na kuâ.

16. Na lege wa fango tënë ague oko na acommandement ti Nzapa so ayeke kota ahon tanga ni kue?

16 Tongana e mû maboko na azo ti wara lege so ague na fini ti lakue lakue, e fa so e ye ala nga e ye Jéhovah “so aye si mara ti azo nde nde kue asö fini ti ala na ala si na tâ hingango ye na ndo ti tâ tënë.” (1 Tim. 2:4). Na ngoi so mbeni Farizien ahunda Jésus na commandement so ayeke kota ahon atanga ni kue, Jésus atene: “‘Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.’ So ayeke commandement so ayeke kota ahon atanga ni kue na a yeke kozoni la. Use commandement ni, so akpa ti kozoni so, ayeke so: ‘Mo ndoye mba ti mo tongana mo wani.’” (Mat. 22:37-39). Tongana e yeke fa tënë, e fa so e sara ye alingbi na acommandement so.—Diko Kusala 10:42.

17. Tënë ti bê ti mo ayeke tongana nyen na ndo ti pasa so e yeke na ni ti fa nzoni tënë?

17 Nzapa airi tënë nzoni na ndo ti e mingi. Jéhovah amû na e mbeni kua so ayeke ga na e ngia, so asara si e ga nduru mingi na lo nga na amba ti e nga kua ni asara si e yeke na kpengba songo na lo. A sara nga si e ye Nzapa nga na amba ti e. Dutingo ti awakua ti Jéhovah kutu mingi na ndo ti sese kue ayeke nde nde, me atâa e yeke maseka wala mbakoro, e yeke zo ti mosoro wala wayere, e yeke na ngangu wala e yeke na ngangu ape, e kue e yeke gi ti fa tënë ti mabe ti e na azo. Tënë ti bê ti e na ti Chantal so ayeke na France ague oko, lo tene: “Nzapa so ayeke na ngangu ahon azo kue, lo so acréé ye kue, Nzapa so ayeke na ngia atene na mbi: ‘Gue! Fa tënë! Fa tënë ti mbi, fa ni na bê ti mo kue. Mbi mû na mo ngangu, Mbeti ti mbi Bible, a-ange ayeke na tere ti mo, na sese mbi mû na mo akamarade, mbi yeke fa ye na mo lakue, mbi yeke mû na mo ambilimbili wango na ngoi so alingbi.’ A yeke mbeni kota pasa mingi ti sara ye so Jéhovah ahunda na e nga ti sara kua legeoko na Nzapa ti e.”