Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Février 2017

Atënë so azo ahunda

Atënë so azo ahunda

Bazengele Paul atene so Jéhovah ayeke “zia ande pëpe si a tara ala ahon ti so ala lingbi ti kanga bê dä”. (1 aCor. 10:13). So aye ti tene so Jéhovah aleke kozo awe ye so e lingbi ti kanga bê dä nga na pekoni lo soro atara so e yeke wara ande?

Tongana tënë so ayeke tâ tënë, gbu li ti mo na ndö ti ye so alingbi ti sara na ndö ti fini ti e. Na tapande, molenge ti mbeni ita-koli afâ terê ti lo. Vundu ahon ndö ti babâ ni. Lo hunda terê ti lo wala Jéhovah aleke kozo awe ti tene lo na wali ti lo alingbi ti gbu ngangu na yâ ti ye ti ngangu so. Na yâ ti dunia so, mingi ti e ayeke wara aye ti ngangu. Tongaso, a lingbi e tene so Jéhovah ayeke na ngangu na ndö ti aye kue so ayeke si na yâ ti fini ti e?

Tongana e gbu li ti e nzoni na ndö ti atënë so Paul atene na 1 aCorinthien 10:13, e yeke tene so Bible ayeda pëpe na tënë so a tene Jéhovah aleke kozo awe ye so e lingbi ti kanga bê dä nga na pekoni lo soro atara so e yeke wara ande. Zia e bâ araison osio so ndali ni e tene tongaso.

Kozoni, Jéhovah amû na e azo liberté ti soro ye so e ye. Lo ye ti tene e wani e soro ye so e ye ti sara na yâ ti gigi ti e (Deut. 30:19, 20; Jos. 24:15). Tongana e soro ti sara aye so anzere na Jéhovah, e lingbi ti zia bê ti e na lo ti fa lege na e (aProv. 16:9). Me tongana e soro ti sara aye so anzere na lo pëpe, e yeke wara akpale ti peko ni (aGal. 6:7). Tongaso, tongana Jéhovah la ayeke soro atara so e yeke wara, e yeke biani na liberté ti soro ye so e ye la?

Use ni, Jéhovah ayeke bata e pëpe na ‘ngoi so ye so e ku terê ti e na ni pëpe asi’. (Zo-ti. 9:11). Ambeni ye ti ngangu so aye ti peko ni alingbi ti duti ngangu alingbi ti si na e, peut-être ndali ti so e duti na mbeni sioni ndo na mbeni sioni ngoi. Jésus asara lani tënë ti mbeni ye ti ngangu so asi na azo 18 so tour ti Siloam atuku na ndö ti ala si a fâ ala, na lo fa so a yeke pëpe Nzapa la asara si ala kui (Luc 13:1-5). A yeke na lege ni pëpe ti tene so kozo si mbeni ye ti ngangu asi, Nzapa ayeke soro kozo awe azo so ayeke ngbâ ande na fini na ala so ayeke kui.

Ota ni, a lingbi e oko oko kue e ngbâa be-ta-zo na Jéhovah. Girisa pëpe so Satan adë kite  na ndö ti tënë ti dutingo be-ta-zo ti azo so ayeke sara na Jéhovah, lo tene so tongana e wara atara e yeke ngbâ be-ta-zo na Jéhovah ape (Job 1:9-11; 2:4; Apoc. 12:10). Tongana Jéhovah akanga lege ti tene ambeni tara asi na e, a yeke kpa mo bâ mo tene Satan ayeke na raison.

Osio ni, Jéhovah asoro ti hinga pëpe aye kue so asi na e. Tënë so a tene Nzapa asoro kozo awe atara so ayeke si na e aye ti fa so lo doit ti hinga aye kue so ayeke si na e kekereke. Me Bible atene tongaso pëpe. Biani, Jéhovah alingbi ti hinga kozo ye so ayeke si kekereke (És. 46:10). Me Bible afa so lo soro ti hinga pëpe aye kue so ayeke si na yâ ti angoi so ayeke ga (Gen. 18:20, 21; 22:12). Jéhovah ayeke ndoye nga lo yeke mbilimbili, lo yeke kanga lege pëpe na liberté so e yeke na ni ti soro ye e wani.​—Deut. 32:4; 2 aCor. 3:17.

Tongaso, Paul aye ti tene nyen tongana lo tene: “Nzapa ayeke . . . zia ande pëpe si a tara ala ahon ti so ala lingbi ti kanga bê dä”? Ge, Paul afa ye so Jéhovah ayeke sara na ngoi ti atara, me pëpe kozo na atara ni. Atënë ti Paul so adë bê ti e so atâa atara wa la e wara na yâ ti fini ti e, Jéhovah ayeke mû maboko na e tongana e zia bê ti e na lo (Ps. 55:22). E yeke bâ fadeso araison use so Paul atene tënë so ndali ni.

Kozoni, atara so e yeke wara ayeke “gï ti so ayeke si ka na azo kue.” So e ngbâ na yâ ti dunia ti Satan so, e yeke tingbi na akpale peut-être même aye ti ngangu. Me tongana e zia bê ti e na Jéhovah, e lingbi ti gbu ngangu na yâ ti atara ni nga ti ngbâ be-ta-zo (1 Pi. 5:8, 9). Na yâ ti akozo versê ti 1 aCorinthien chapitre 10, Paul asara tënë ti atara so azo ti Israël awara na yâ ti benyama (1 aCor. 10:6-11). Ala so azia lani bê ti ala na Jéhovah agbu ngangu na yâ ti atara ni. Me ambeni zo ti Israël ake lani yanga ti Jéhovah. Ala ngbâ be-ta-zo ape ndali ti so ala zia bê ti ala na lo pëpe.

Use ni, “Nzapa ayeke be-ta-zo”. Aye so Nzapa asara na azo ti lo ândö afa so lo fa tâ ndoye na “azo so aye lo nga angbâ ti bata acommandement ti lo.” (Deut. 7:9). A fa nga so Nzapa ayeke sara ye lakue alingbi na azendo ti lo (Jos. 23:14). Ti gue oko na aye so lo sara ti fa so lo yeke be-ta-zo, azo so aye Jéhovah nga amä yanga ti lo ayeke na confiance so lo yeke sara ye alingbi na azendo use so lo mû atâa atara wa la ala tingbi na ni: (1) Lo yeke zia pëpe si mbeni tara ague ngbii aga ngangu ti tene ala kanga bê dä, nga (2) “lo yeke leke . . . lege” na ala.

Jéhovah “adë bê ti e na yâ ti atara kue so e wara”

Tongana nyen la Jéhovah ayeke leke lege na azo so azia bê ti ala na lo na ngoi so ala tingbi na atara? Biani tongana lo ye, lo lingbi ti zi gï tara ni. Me girisa ape so Paul atene so Jéhovah ayeke ‘leke lege ti tene ala lingbi ti gbu ngangu dä.’ Ni la, na yâ ti aye mingi lo “leke lege” na lege so lo mû na e ye so e bezoin ni tongaso si e lingbi ti ngbâ be-ta-zo. Bâ ambeni fason so Jéhovah alingbi ti leke lege na e:

  • Jéhovah “adë bê ti e na yâ ti atara kue so e wara”. (2 aCor. 1:3, 4). Jéhovah alingbi ti sara si na lege ti Bible, yingo vulu ti lo, nga na lege ti kobe ti yingo so ngbâa be-ta-zo ayeke mû na e, li ti e aduti kpô nga bê ti e adë.​—Mat. 24:45; Jean 14:16, kete tënë na gbe ni, aRom. 15:4.

  • Jéhovah alingbi ti fa lege na e na lege ti yingo vulu (Jean 14:26). Na ngoi so e yeke na yâ ti atara, yingo vulu alingbi ti mû maboko na e ti dabe ti e na ambaï nga na amama-ndia ti Bible tongaso si e lingbi ti mû nzoni desizion.

  • Lo lingbi nga ti sara kua na a-ange ti lo ti mû maboko na e.​—aHéb. 1:14.

  • Jéhovah alingbi ti sara kua na aita ti e ti mû maboko na e. Ala lingbi ti kpengba e na lege ti atënë ti yanga ti ala nga na asarango ye ti ala.​—aCol. 4:11.

Tongaso, nyen la e manda na lege ti tënë so Paul atene na 1 aCorinthien 10:13? Jéhovah ayeke soro pëpe atara so e yeke tingbi na ni. Me e yeke na kite ape so tongana e zia bê ti e na Jéhovah, e yeke gbu ngangu na yâ ti atara kue. E hinga so lakue Jéhovah ayeke leke lege na e tongaso si e lingbi ti ngbâ be-ta-zo na lo.