Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) DÉCEMBRE 2016

Jéhovah afuta azo so agi lo ngangu

Jéhovah afuta azo so agi lo ngangu

“Zo so aga nduru na Nzapa a lingbi lo mä na bê so Nzapa ayeke dä na lo ga zo ti futango azo so ayeke gi lo ngangu.”AHÉB. 11:6.

ABIA: 85, 134

1, 2. (a) Ndoye ague oko na mabe tongana nyen? (b) Ahundango ndo wa la e yeke bâ ni?

E NDOYE Jéhovah “ngbanga ti so lo ndoye e kozoni.” (1 Jean 4:19). Mbeni ye so Jéhovah asara ti fa so lo ndoye awakua be-ta-zo ti lo ayeke so lo iri tënë nzoni na ndo ti ala. Tongana e ye Nzapa ti e mingi, e yeke hinga na bê ti e kue so lo yeke dä nga so lo yeke futa biani azo so lo ye ala.Diko aHébreu 11:6.

2 Ti futa azo ayeke sarango ye so a hinga Jéhovah na ni. Tongana e hinga na bê ti e kue so Nzapa ayeke futa azo so agi lo ngangu, mabe ti e ayeke kpengba ndali ti so “mabe ayeke hingango biani so aye so mo yeke ku ni kungo ayeke si biani.” (aHéb. 11:1). Biani, mabe ayeke hingango biani so e yeke wara aye ti nzoni so Nzapa amû zendo ni. Ye oko, tongana nyen la beku so e yeke na ni ti wara mbeni futa ayeke mû maboko na e? Tongana nyen la Jéhovah afuta awakua ti lo ti giriri nga na ti laso? Zia e bâ ni.

JÉHOVAH ATENE LO YEKE SARA TUFA NA NDO TI AWAKUA TI LO

3. Zendo wa la ayeke na Malachie 3:10?

3 Jéhovah wani atene lo yeke futa awakua be-ta-zo ti lo, tongaso lo tisa e ti gi ti wara tufa ti lo. Bible atene: “I tara Mbi . . . , L’Éternel  Ti Sabaoth atene, ti bâ tongana Mbi lungula fenêtre ti yayu na i pëpe, na Mbi sa na ndo i ye ti nzoni so ndo alingbi na ni pëpe.” (Mal. 3:10). Tongana e yeda ti tara Jéhovah tongana ti so lo tisa e ti sara ni, e yeke fa so e bâ lo na nene ni mingi nga e kiri singila mingi na lo.

4. Ngbanga ti nyen la e lingbi ti zia bê ti e kue na tënë ti dengo bê so Jésus atene na Matthieu 6:33?

4 Jésus adë bê ti adisciple ti lo so tongana ala zia Royaume ti Nzapa na kozo ndo, Nzapa ayeke mû maboko na ala. (Diko Matthieu 6:33.) Jésus atene tongaso ndali ti so lo bâ lakue so azendo ti Jéhovah aga tâ tënë. Jésus ahinga so azendo ti Nzapa atï na ngu lâ oko pëpe (És. 55:11). E nga kue e lingbi ti hinga biani so tongana, na bê ti e kue, e fa so e yeke na mabe na Jéhovah, lo yeke sara ye alingbi na zendo ti lo so: “Fade mbi yeke zia mo lâ oko pëpe nga mbi yeke girisa mo lâ oko pëpe.” (aHéb. 13:5). E lingbi ti bâ so tënë ti Bible so ague oko na tënë ti Jésus na ndo ti gingo kozoni Royaume ti Nzapa nga na mbilimbili ti lo.

Jésus afa lani so a yeke futa adisciple ti lo ndali ti asacrifice so ala sara (Bâ paragraphe 5)

5. Ngbanga ti nyen la kiringo tënë ti Jésus na Pierre akpengba mabe ti e?

5 Mbeni lâ bazengele Pierre ahunda Jésus: “E dö aye ti e kue e zia na e mû peko ti mo. E yeke wara ande nyen biani?” (Mat. 19:27). Jésus asuku pëpe na Pierre ndali ti so lo hunda tënë so na lo, me Jésus atene na adisciple ti lo so a yeke futa ala ndali ti asacrifice so ala sara. Abazengele so ayeke be-ta-zo nga na ambeni zo ayeke komande ande legeoko na lo na yayu. Me même laso futa ayeke dä. Jésus atene: “Zo kue so azia ada ti lo, aita ti lo ti koli, aita ti lo ti wali, babâ ti lo, mama ti lo, amolenge ti lo, na ayaka ti  lo ngbanga ti iri ti mbi, fade lo yeke wara fani mingi ahon so, na lo yeke wara ande fini ti lakue lakue.” (Mat. 19:29). Adisciple ti lo ayeke wara aye ti nzoni mingi ahon asacrifice kue so ala sara. Biani, ti wara ababâ, amama, aita ti koli na ti wali nga na amolenge na yâ ti bungbi ayeke kota ahon aye kue so e ke ni wala e dö ni e zia ndali ti Royaume.

“MBENI KALE TI MANGBOKO NDALI TI ÂME”

6. Ngbanga ti nyen la Jéhovah amû zendo ti futa awakua ti lo?

6 So Jéhovah atene lo yeke futa awakua ti lo, lo yeke mû maboko na ala ti gbu ngangu na ngoi so aye atara mabe ti ala. Na ndo ti so awakua ti Jéhovah Nzapa awara gbâ ti aye ti nzoni laso, ala yeke ku kungo ti wara aye ti nzoni mingi na yâ ti ngoi so ayeke ga (1 Tim. 4:8). Biani, so e hinga na bê ti e kue so Jéhovah ayeke “ga zo ti futango azo so ayeke gi lo ngangu”, a yeke mû maboko na e ti luti ngangu na yâ ti mabe.—aHéb. 11:6.

7. Tongana nyen la beku ayeke tongana mbeni kale ti bateau?

7 Na yâ ti Fango ye ti Jésus na ndo ti hoto, lo tene: “Ala duti na ngia na ala huru na ngia, teti futa ti ala ayeke kota na yayu. A yeke tongaso si lani a sara ye ti ngangu na aprophète so aga kozo na ala.” (Mat. 5:12). Ambeni wakua ti Nzapa ayeke wara ande futa na yayu. Ambeni ayeke na beku ti wara fini ti lakue lakue na yâ ti paradis na ndo ti sese. Ala nga ayeke na raison ti ‘duti na ngia nga ti huru na ngia’. (Ps. 37:11; Luc 18:30). Atâa beku ti e ayeke ti gue na yayu wala ti wara fini na sese, beku so ayeke tongana “mbeni kale ti mangboko ndali ti âme ti e, a luti nzoni nga a luti ngangu”. (aHéb. 6:17-20). Gi tongana ti so mbeni kale ayeke sara si mbeni bateau aluti na ngoi ti kota pupu, hingango biani so a yeke futa e alingbi ti mû maboko na e ti ngbâ ti hon ndo ti agingo bê ti e, ti gbu li ti e nzoni nga ti ngbâ ti kpengba songo ti e na Jéhovah. A lingbi nga ti mû maboko na e ti wara ngangu ti gbu ngangu na yâ ti angangu kpale.

8. Tongana nyen la beku ayeke na ngangu ti sara si e gi bê ti e ahon ndo ni ape?

8 Beku so Bible amû na e ayeke na ngangu ti sara si agingo bê ti laso ahon ndo ti e pëpe. Gi tongana ti so mbeni pommade asara si poro ti tere ti e adë, azendo ti Nzapa alingbi ti sara si agingo bê ti e adë. Ti ‘zia kungba ti e na ndo’ ti Jéhovah na ti hinga so ‘fade Lo bata e’ adë bê ti e (Ps. 55:23). E lingbi ti duti na confiance kue so Nzapa alingbi ti sara “ye mingi ahon ndo ti aye kue so e hunda wala so e bi bê ti e dä.” (aÉph. 3:20). A tene gi pëpe so Jéhovah ayeke mû maboko na e mingi wala ahon ti so e hunda, me a tene lo yeke sara ni “mingi ahon ndo ti aye kue so e hunda”.

9. Tongana nyen la e lingbi ti hinga na bê ti e kue so Jéhovah ayeke sara tufa na ndo ti e?

9 Ti wara futa ni, e bezoin ti mä na bê kue na Jéhovah nga ti sara ye alingbi na afango lege ti lo. Moïse atene lani na azo ti Israël, atene: “Fade L’Éternel airi tënë nzoni na ndo mo biani na sese so L’Éternel Nzapa ti mo ayeke mû na mo ti kamata ti ga ye ti héritier ti mo. Fade L’Éternel Nzapa ti mo airi tënë nzoni na ndo mo, legeoko tongana Lo ze na mo.” (Deut. 15:4-6). Mo yeke na confiance kue so Jéhovah ayeke sara tufa na ndo ti mo tongana mo ngbâ ti sara na lo be-ta-zo? Mo yeke na raison ti duti na mara ti confiance tongaso.

JÉHOVAH AYEKE ZO TI FUTANGO ALA LANI

10, 11. Jéhovah afuta lani Joseph tongana nyen?

10 A sû Bible ndali ti nzoni ti e. Na yâ ni a sara tënë ti gbâ ti awakua be-ta-zo ti Jéhovah so lo futa ala (aRom. 15:4). Mbeni pendere tapande ni ayeke ti Joseph. Kozoni, aita ti lo amä tere ala kä lo na ngbâa. Na pekoni, wali ti wa ti lo abi tënë na li ti lo na a zia lo na kanga na Égypte. Ye so akangbi lani lo na Nzapa? Oko pëpe. “L’Éternel ayeke na  Joseph, Lo fa nzobe na lo, . . . L’Éternel asara si ye so Joseph asara aga nzoni.” (Gen. 39:21-23). Na yâ ti angoi ti akpale so, Joseph akanga bê lo ku Nzapa ti lo.

11 Ambeni ngu na pekoni, Pharaon azi Joseph, ngbâa so asara tere ti lo kete, na kanga nga lo sara si lo ga use zo so ayeke na komandema na Égypte (Gen. 41:1, 37-43). Na ngoi so wali ti lo adü na lo amolenge-koli use, “Joseph adi iri ti kozoni Manassé, Teti (lo tene) Nzapa asara si bê ti mbi agirisa kusala ti vundu ti mbi kue, na da ti babâ ti mbi kue. Lo di iri ti use ni Éphraïm, Teti Nzapa asara si mbi dü amolenge na sese ti vundu ti mbi.” (Gen. 41:51, 52). Ndali ti so Joseph angbâ be-ta-zo na Nzapa, lo futa lo na ye so asara si a bata fini ti azo ti Israël nga na ti azo ti Égypte. Kota ye ni ayeke so Joseph ahinga so Jéhovah la afuta lo nga asara tufa na ndo ti lo.—Gen. 45:5-9.

12. Tongana nyen la Jésus angbâ lani be-ta-zo na yâ ti atara?

12 Jésus Christ nga angbâ ti mä yanga ti Nzapa na yâ ti aye so atara mabe ti lo na a futa lo lani. Nyen la amû lani maboko na lo ti ngbâ be-ta-zo? Bible atene: “Ndali ti ngia so a zia na gbele lo, lo gbu ngangu juska lo kui na ndo ti keke ti pasi, lo bi kamene yongoro.” (aHéb. 12:2). Jésus awara lani ngia biani ndali ti so lo sara si iri ti Nzapa aga nzoni-kue. Na ndo ni, Babâ ti lo afuta lo na lege so lo bâ lo na nzoni lê nga lo mû na lo apendere pasa mingi. Bible atene so lo “duti na tere ti trône ti Nzapa na mbage ti koli.” Bible atene nga: “Nzapa ayä lo na nduzu na mbeni kota ndo so ahon ti kozo ni, na nzoni bê Nzapa amû na lo iri so ayeke na ndo ti tanga ti airi kue.”—aPhil. 2:9.

JÉHOVAH AYEKE GIRISA PËPE AYE SO E SARA

13, 14. Jéhovah abâ aye so e sara ndali ti lo tongana nyen?

13 E lingbi ti duti na confiance so Jéhovah abâ na nene ni angangu kue so e sara ti sara kua ti lo. Lo hinga ye kue so asara si e yeke nzoni ape nga ye kue so asara si peut-être e yeke na kite na bê ti e. Lo yeke bâ mawa ti e tongana akpale ti nginza asara si bê ti e anze wala kobela wala agingo bê asara si e lingbi ti sara kua ti lo mingi pëpe. Nga, e lingbi ti duti na confiance kue so Jéhovah so aye e mingi abâ na nene ni ye so awakua ti lo ayeke sara ti ngbâ be-ta-zo na lo.Diko aHébreu 6:10, 11.

14 Girisa nga pëpe so e lingbi ti ga nduru na lo so lo “mä sambela” na hingango so lo yeke bi bê ti lo na ndo ti akpale ti e (Ps. 65:3). “Babâ so ayeke sara nzoni bê mingi na zo nga Nzapa ti dengo bê kue” ayeke mû na e ye kue so e bezoin ni ti ngbâ ti duti na nzoni songo na lo. Na ambeni ngoi lo lingbi ti sara ni na lege ti aita ti e aChrétien (2 aCor. 1:3). A ndu bê ti Jéhovah mingi tongana e bâ mawa ti amba ti e. “Zo so asara be-nzoni na awanzinga, lo mû ye na L’Éternel ti perdé, na fade L’Éternel afuta lo teti nzo kusala ti lo.” (aProv. 19:17; Mat. 6:3, 4). Tongaso, tongana e mû maboko na azo so ayeke na yâ ti kpale na bê ti e kue, Jéhovah abâ nzoni ye so e sara so tongana bon la e sara na lo. Na lo tene lo yeke futa nzoni ye so.

AFUTA SO E WARA LASO NGA TETI LAKUE LALKUE

15. Afuta wa la mo yeke ku ni kungo? (Bâ foto so ayeke na tongo nda ti article so.)

15 Beku ti wara “couronne ti mbilimbili, couronne so Seigneur, wafango ngbanga so ayeke mbilimbili, ayeke mû . . . na lango ni so tongana futa” akpengba aChrétien so a soro ala ti gue na yayu (2 Tim. 4:7, 8). Ye oko, tongana mo yeke na mbeni beku nde, a ye ti tene pëpe so Nzapa abâ mo pëpe na nene ni. “Ambeni ngasangbaga” ti Jésus kutu mingi ayeke ku kungo ti wara futa ti ala  ti fini ti lakue lakue na yâ ti paradis na ndo ti sese. Na yâ ti paradis, “fade ala wara ngia na yâ siriri so awu mingi.”—Jean 10:16; Ps. 37:11.

16. Tënë ti dengo bê wa la e wara na 1 Jean 3:19, 20?

16 Na ambeni ngoi, e lingbi ti bâ so e yeke sara ye mingi na yâ ti kua ti Jéhovah pëpe, wala e lingbi ti hunda tere ti e wala angangu so e yeke sara anzere na Jéhovah. E lingbi même ti bâ so e lingbi pëpe na mbeni futa. Ye oko, zia e girisa lâ oko pëpe so “Nzapa ayeke kota ahon bê ti e, na lo hinga ye kue.” (Diko 1 Jean 3:19, 20.) Lo yeke futa akua kue so mabe na ndoye so e yeke na ni na mbage ti lo apusu e ti sara ni ndali ti lo, atâa e bâ so ye so e sara ayeke ye oko pëpe.Marc 12:41-44.

17. Ambeni futa wa la e wara laso?

17 Même na yâ ti alango ti nda ni ti sioni dunia ti Satan so, Jéhovah ayeke sara tufa na ndo ti azo ti lo. Lo sara si e yeke na gbâ ti hingango ye nga e yeke na ngia ti duti na yâ ti sewa ti aita ti dunia kue (És. 54:13). Tongana ti so Jésus atene, Jéhovah ayeke futa e laso na lege so lo mû lege na e ti duti na yâ ti sewa ti aita so aye tere, mbeni sewa so ayeke na yâ ti dunia kue (Marc 10:29, 30). Na ndo ni, a futa azo so ayeke gi Nzapa ngangu na lege so a mû na ala siriri ti bê so mara ni ayeke dä ape, ye so ala yeke na ni alingbi na ala nga ala yeke na ngia.—aPhil. 4:4-7.

18, 19. Awakua ti Jéhovah abâ afuta so ala wara tongana nyen?

18 Awakua ti Jéhovah na yâ ti dunia kue awara apendere futa mingi na mbage ti lo. Na tapande, Bianca so ayeke na Allemagne atene: “Mbi lingbi pëpe ti kiri singila kue na Jéhovah ndali ti maboko so lo mû na mbi na yâ ti agingo bê ti mbi nga ndali ti so lo yeke na tere ti mbi lâ oko oko. Dunia so e yeke dä ayeke kirikiri mingi na a lingbi ti changé ni pëpe. Me tongana mbi sara kua maboko na maboko na Jéhovah, mbi bâ so mbi yeke na yâ ti maboko ti lo, na mbi duti nzoni. Na ngoi kue so mbi sara sacrifice ndali ti lo, lo kiri na ni na mbi fani ngbangbo oko na lege so lo sara tufa na ndo ti mbi.”

19 Bâ tapande ti Paula so ayeke na ngu 70 na Canada so kobela ti bio ti peko, so a iri ni spina-bifida, akanga lege na lo ngangu. Lo tene: “So mbi lingbi pëpe ti tambela mingi asara pëpe si mbi fa tënë mingi pëpe. Mbi fa tënë na alege nde nde, na tapande, na lege ti téléphone nga na alege kue so azi. Ti kpengba mbi wani, mbi sara aversê nga na apensé so ayeke na yâ ti ambeti ti e na yâ ti mbeni cahier tongaso si mbi sara kua na ni ngoi na ngoi. Mbi iri ni ‘Cahier so asara si mbi ngbâ na fini.’ Bê ti e ayeke nze gi teti kete ngoi tongana e zia lê ti e na ndo ti azendo ti Jéhovah. Atâa ye so asi na e ayeke so wa, Jéhovah ayeke lakue dä ti mû maboko na e.” Peut-être ye so asi na mo ayeke nde na ti Bianca wala na ti Paula. Me mo lingbi ti gbu li ti mo na ndo ti alege so Jéhovah afuta mo nga na azo so ayeke na tere ti mo. Ti gbu li ti mo na ndo ti alege so Jéhovah afuta mo na ngoi ni so, nga tongana nyen la lo yeke futa mo ande na yâ ti angoi so ayeke ga ayeke nzoni mingi.

20. Nyen la e yeke ku ti wara tongana e ngbâ ti sara na Jéhovah na âme ti e kue?

20 Girisa lâ oko pëpe so ti sambela na bê ti mo kue nga ti sara lisoro lakue na Nzapa, “futa ti pekoni ayeke kota.” Mo lingbi ti duti na kite pëpe so “na peko ti so [mo] sara ye so bê ti Nzapa aye awe, [mo yeke] wara ye ti peko ti zendo ni.” (aHéb. 10:35, 36). Tongaso, zia e ngbâ ti kpengba mabe ti e laso nga e sara kua ti Jéhovah na âme ti e kue. E yeke na confiance so Jéhovah ayeke futa ande e ndali ni.Diko aColossien 3:23, 24.