Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Août 2017

Ndoye: Mbeni pendere sarango ye

Ndoye: Mbeni pendere sarango ye

JÉHOVAH amû yingo ti lo na bazengele Paul ti sû asarango ye gumbaya so aga na lege ti yingo vulu (aGal. 5:22, 23). A bungbi apendere sarango ye so kue a iri ni “lengo ti yingo”. * Lengo so ayeke nga mbage ti “fini zo” so aChrétien adoit ti yü ni (aCol. 3:10). Legeoko tongana ti so lê ti mbeni keke ayeke lë tongana a bâ lege ni nzoni, mbeni zo ayeke lë lengo ti yingo tongana lo zia si yingo vulu asara kua nzoni na yâ ti fini ti lo.​—Ps. 1:1-3.

Kozo mbage ti lengo ti yingo so Paul asara tënë ni ayeke ndoye, so ayeke pendere sarango ye. A yeke pendere ni tongana nyen? Paul atene so tongana lo yeke na ndoye ape, lo yeke “ye oko pëpe.” (1 aCor. 13:2). Me ndoye ni ayeke gï nyen, na tongana nyen la e lingbi ti gi ti maï ni nga ti sara ye na ni lâ na lâ?

NDOYE AYEKE NYEN?

Atâa so a yeke ngangu ti fa mbilimbili sarango ye so ayeke ndoye, Bible afa tongana nyen la ndoye ayeke sara ye. Na tapande, Bible atene ndoye “ahinga ti kanga bê ti ku nga lo sara nzoni na zo”. Nga lo “wara ngia na yâ ti tâ tënë”, “lo kanga bê na gbele aye kue, lo mä na bê na aye kue, lo zia beku na ndö ti aye kue, lo gbu ngangu na yâ ti aye kue.” Ndoye aye nga ti sara tënë ti yengo so zo aye na mbeni zo ngangu, tâ bingo bê na mbeni zo nga kpengba songo so zo ayeke na ni na mba ti lo. Me mbeni zo so ayeke na ndoye ape ayeke sara bê ti ye, ayeke sara baba, ayeke sara ye ti songo bê ti zo, ayeke zo ti kion, ayeke bata zo na bê nga ayeke pardonné zo ape. E ye ti duti na mara ti asioni sarango ye so ape me e ye ti fa tâ ndoye so alondo na bê ti e, ndoye so agi “gï aye so anzere na lo pëpe”.​—1 aCor. 13:4-8.

JÉHOVAH NA JÉSUS AZIA NZONI TAPANDE TI NDOYE

“Nzapa ayeke ndoye.” (1 Jean 4:8). Akua kue nga na aye kue so lo sara afa ni. Kota ye so lo sara so afa ndoye ti lo na mbage ti azo ayeke so lo tokua lani Jésus na sese ti bâ pasi na ti kui ndali ti e. Bazengele Jean atene: “A bâ ndoye ti Nzapa na mbage ti e na lege so: Nzapa atokua lani oko Molenge ti lo na dunia so si e lingbi ti wara fini na lege ti lo. A bâ ndoye ni na lege so, a yeke e la e ndoye Nzapa pëpe, me a yeke lo la si lo ndoye e na lo tokua Molenge ti lo tongana sandaga so amû lege ti leke songo na popo ti zo na Nzapa, sandaga ndali ti asiokpari ti e.” (1 Jean 4:9, 10). Grâce na ndoye ti Nzapa, e lingbi ti wara pardon ti siokpari ti e, beku nga na fini.

Jésus afa ndoye ti lo na mbage ti azo na lege so lo yeda ti sara ye alingbi na ye so Nzapa aye. Paul atene: “[Jésus a]tene: ‘Bâ, mbi ga ti sara ye so bê ti mo aye.’ . . . Na lege ti ‘ye so bê ti lo aye’ so, a sara si e ga nzoni-kue na lege ti terê ti Jésus Christ so lo mû na sandaga gï fani oko biani biani awe.” (aHéb. 10:9, 10). Zo oko alingbi ti fa mara ti kota ndoye so pëpe. Jésus atene: “Tongana mbeni zo akä fini ti lo na kuâ ndali ti akamarade ti lo, mbeni ndoye ti hon so ayeke dä pëpe.” (Jean 15:13). E so e yeke azo so e yeke mbilimbili-kue pëpe e lingbi ti sara ye na ndoye tongana ti so Jéhovah na Jésus asara na mbage ti e so? En. Zia e bâ tongana nyen la e lingbi ti sara ni.

 “ALA NGBÂ TI TAMBELA NA YÂ TI NDOYE”

Paul awa e, atene: “Ala ga azo so asara ye tongana ti Nzapa, ndali ti so ala yeke amolenge so lo ndoye ala mingi, na ala ngbâ ti tambela na yâ ti ndoye, gï tongana ti so Christ nga andoye e na lo kä terê ti lo na kuâ ndali ti e.” (aÉph. 5:1, 2). E yeke “ngbâ ti tambela na yâ ti ndoye” tongana na ngoi kue e fa so e yeke na ndoye. E yeke tene gï na yanga ape so e yeke na ndoye me e yeke fa ni na yâ ti asarango ye ti e. Jean atene: “Amolenge so mbi ndoye ala mingi, zia e ndoye terê na tënë pëpe wala na yanga pëpe, me na lege ti kusala nga na tâ tënë.” (1 Jean 3:18). Na tapande, e yeke fa “nzoni tënë ti Royaume” ndali ti so e ye Jéhovah nga na amba ti e (Mat. 24:14; Luc 10:27). E yeke tambela nga na yâ ti ndoye tongana e kanga bê na azo, e sara nzoni na ala nga e pardonné ala. Ni la Bible awa e, atene: “Gï tongana ti so Jéhovah apardonné ala na bê ti lo kue, ala nga ala sara tongaso.”​—aCol. 3:13.

Ye oko, tongana e mû wango na zo wala e kiri na zo na nzoni lege, a ye ti tene pëpe so e yeke na ndoye ape. Na tapande, ti tene ambeni babâ na mama akaï molenge ti ala so ayeke toto, ala yeke mû gï na lo aye kue so lo hunda. Me ambeni babâ na mama so aye biani molenge ti ala ayeke ke ambeni ye na kuru go tongana a yeke kota ye ti sara ni. Legeoko nga, Nzapa ayeke ndoye, me “zo so Jéhovah aye lo, lo yeke gboto mê ti lo”. (aHéb. 12:6). Tongana e tambela na yâ ti ndoye, e yeke gi ti fa lege na zo nzoni tongana bezoin ni ayeke dä (aProv. 3:11, 12). Tongana e yeke sara ni a lingbi e girisa ape so e nga kue siokpari ayeke na terê ti e nga mingi ni e yeke sara ye na ndoye ape. Tongaso, na yâ ti ambeni ye, e kue e bezoin ti sara ye na ndoye mingi ahon ti kozo. E yeke sara ni tongana nyen? Zia e bâ ambeni ye ota so e lingbi ti sara.

TONGANA NYEN LA E LINGBI TI MAÏ NDOYE?

Kozoni, hunda Nzapa ti mû na mo yingo ti lo, so ayeke sara si zo asara ye na ndoye. Jésus atene so Jéhovah ayeke mû “yingo vulu na ala so ahunda ni na lo”. (Luc 11:13). Tongana e sambela Nzapa ti mû na e yingo vulu na e sara ngangu ti “ngbâ ti tambela na lege ti yingo”, e yeke sara ye na ndoye mingi ahon ti kozo (aGal. 5:16). Na tapande, tongana mo yeke ancien, mo lingbi ti hunda Nzapa ti mû na mo yingo vulu ti mû maboko na mo ti mû wango ti Bible na azo na ndoye. Wala tongana mo yeke mbeni babâ wala mama, mo lingbi ti hunda Nzapa ti mû na mo yingo ti lo ti mû maboko na mo ti fa lege na amolenge ti mo, na ngonzo ape, me na ndoye.

Use ni, gbu li na ndö ti lege so Jésus asara ye lani na ndoye même tongana azo agi yanga ti lo (1 Pi. 2:21, 23). E bezoin ti gbu li ti e na ndö ti tapande ti Christ mbilimbili na ngoi so ambeni zo ason bê ti e wala asara ye na e na lege ni ape. Na angoi tongaso, nzoni hunda so e lingbi ti hunda na terê ti e ayeke so: ‘Tongana fade a yeke Jésus, lo yeke sara ye tongana nyen?’ Mbeni ita-wali so iri ti lo ayeke Leigh abâ lani so hundango tënë so amû maboko na lo ti gbu li ti lo kozo si lo sara ye. Lo tene: “Mbeni lâ, mbeni zo so mbi na lo e sara kua atokua na amba ti mbi ti place ti kua asioni message na ndö ti mbi nga na ndö ti kua so mbi yeke sara. A son bê ti mbi ngangu. Me na pekoni mbi hunda terê ti mbi: ‘Mbi yeke mû tapande ti Jésus tongana nyen na yâ ti sarango ye ti mbi na mbage ti zo so?’ Na peko ti so mbi gbu li ti mbi na ndö ti ye so Jésus ayeke sara, mbi mû desizion ti zi bê ti mbi dä nga ti sara si a ga pëpe mbeni tënë. Na pekoni, mbi mä so mba ti mbi ti place ti kua so ayeke na kota kpale ti seni nga lo yeke na kota vundu. Mbi tene na nda ni so peut-être tënë so lo ye ti tene so la lo sara na message so ape. Gbungo li na ndö ti tapande ti Jésus so asara ye na ndoye même na ngoi so a gi yanga ti lo amû maboko na mbi ti fa mara ti ndoye ti lo na mbage ti mba ti mbi ni.” Ti tâ tënë ni, tongana e mû tapande ti Jésus, e yeke sara ye lakue na ndoye.

Ota ni, gi ti duti na ndoye so agi gï aye ndali ti lo wani ape so a hinga na atâ Chrétien (Jean 13:34, 35). Ti duti na mara ti ndoye so, Mbeti ti Nzapa awa e ti gi ti duti na “bango ndo” so Jésus ayeke lani na ni. So lo zia yayu ti ga, “lo dö aye  ti lo kue lo zia” ndali ti e même “juska na kuâ”. (aPhil. 2:5-8). Tongana e mû tapande ti Jésus so agi gï ye ndali ti nzoni ti lo wani ape, apensé ti e nga na atënë ti bê ti e ayeke duti tongana ti lo, na a yeke pusu e ti zia aye so agbu bê ti amba ti e kozo na ti e. Ambeni nzoni ye wa la e yeke wara tongana e gi ti maï ndoye?

ANZONI YE SO NDOYE AGA NA NI

Tongana e ndoye azo, anzoni ye ti peko ni ayeke mingi. Zia e bâ ambeni use:

Tongana e ndoye azo, anzoni ye ti peko ni ayeke so wa?

  • SEWA TI AITA NA YÂ TI DUNIA KUE: Ndali ti so e ye terê na popo ti e, e hinga so atâa congrégation wa la e gue dä na ndö ti sese so, aita ayeke yamba e na ngia. A yeke biani ye ti nzoni so ‘bungbi ti e ti aita kue na yâ ti dunia’ aye e! (1 Pi. 5:9). E yeke wara mara ti ndoye so gï na popo ti azo ti Nzapa.

  • SIRIRI: Ti “kanga bê na mba na yâ ti ndoye” ayeke sara si e duti ‘beoko na yâ ti kamba ti siriri so abungbi e oko.’ (aÉph. 4:2, 3). E yeke bâ siriri so na ngoi ti abungbi nga na akota bungbi ti e. Bibe ti siriri so ayeke tâ nde mingi na ti dunia ti laso so kangbi ayeke dä, ni la ape? (Ps. 119:165; És. 54:13). Tongana e gi ti duti na siriri na amba ti e, e fa so e ye ala mingi, na a nzere na Babâ ti e ti yayu.​—Ps. 133:1-3; Mat. 5:9.

“NDOYE AKPENGBA ZO”

Paul atene: “Ndoye akpengba zo.” (1 aCor. 8:1). Ndoye ayeke kpengba zo tongana nyen? Na 1 aCorinthien chapitre 13 so a iri ni “Psaume ti ndoye”, lo fa tongana nyen la ndoye ayeke kpengba zo. Kozoni kue, ndoye agi ye so anzere na amba ti lo (1 aCor. 10:24; 13:5). Na ndö ni, ndali ti so ndoye ayeke pensé na nzoni ti amba ti lo, akanga bê, nga asara nzoni na zo, a yeke kpengba songo na popo ti azo ti sewa nga a yeke sara si acongrégation aduti beoko.​—aCol. 3:14.

Ndoye ti e na mbage ti Nzapa ayeke kota ahon tanga ti andoye kue nga ayeke kpengba zo. Ndoye so abungbi azo kue ti sara na Jéhovah “maboko na maboko” atâa kodro ti ala, mara ti ala nga yanga ti kodro ti ala ayeke so wa (Soph. 3:9). Zia e leke na bê ti e ti ngbâ ti duti na pendere mbage ti lengo ti yingo vulu ti Nzapa so na yâ ti gigi ti e lâ oko oko.

^ par. 2 So ayeke kozo article ti a-article gumbaya so ayeke sara ande tënë na ndö ti mbage oko oko ti lengo ti yingo.