Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 6 2016

 KOTA MAMA-TENE NI | TÂ TËNË NA NDO TI AYE SO AYEKE NA YAYU KÂ

Ahundango ndo na ndo ti azo so ayeke na yayu

Ahundango ndo na ndo ti azo so ayeke na yayu

Mo hunda tere ti mo lâ oko awe na ndo ti yayu nga na ti azo so ayeke kâ? Tongana a yeke tongaso, a yeke gi mo oko ape. A sara angu saki mingi awe la azo ayeke hunda ka tere ti ala na ndo ti tënë so. Ambeni apensé so akotara, so a lingbi azo ane ala mingi, la ayeke kâ na yayu. Ambeni apensé ti ala so yayu ni ayeke mbeni nzoni ndo so siriri ayeke dä, so a-ange nga na anzoni zo so akui la ayeke kâ. Ti ambeni zo ni, ala bâ ti ala yayu ni tongana mbeni ndo so anzapa kutu mingi mingi la ayeke dä.

Azo mingi atene ti ala so e lingbi lâ oko ape ti hinga aye so ayeke na yayu kâ, ndali ti so mbeni zo oko so alondo kâ aga ti sara tënë na ndo ni na e ayeke dä ape. Ye oko, mara ti tënë tongaso ayeke na lege ni ape. Jésus Christ ayeke lani na yayu kâ, kozo si lo ga na sese ge. Lo tene polele na akota zo ti nzapa ti aJuif ti ândö, lo tene: “Mbi londo na yayu mbi zu ti sara pëpe ye so bê ti mbi aye, me ti sara ye so bê ti lo so atokua mbi aye.” Ni la, Jésus amû lani, na abazengele ti lo, sango ti aye so lo bâ na lê ti lo, lo tene: “Na yâ ti da ti Babâ ti mbi, ando ti lango ayeke mingi.”—Jean 6:38; 14:2.

Biani, Babâ ti Jésus ayeke Nzapa, so iri ti lo ayeke Jéhovah, na “da” ti lo Jéhovah ni ayeke na yayu (Genèse 22:14). Tongaso, mbeni zo oko, so alingbi ti fa aye so ayeke na yayu kâ nzoni mingi ahon Jéhovah Nzapa nga na Jésus Christ, ayeke dä ape. Ala fa lani, na ambeni wakua be-ta-zo, asango mingi na ndo ti aye so ayeke na yayu na lege ti avision ti aye so adö bê ti zo.

Na yâ ti mbage so ayeke ga, a yeke sara ande tënë na ndo ti ambage ti Bible so afa aye so azo ni so abâ na yâ ti ambeni vision ni. Na ngoi so mo yeke diko ye na ndo ti avision ni so, girisa ape so aye so ayeke na yayu ayeke aye so e lingbi pëpe ti ndu ni na maboko ti e wala ti bâ ni na lê ti e. Me, ahon ti fa peko ti aye ni na mbeni lege so gi azo ti yingo la alingbi ti mä yâ ni, Nzapa aleke si a fa peko ti avision ti aye so ayeke na yayu na mbeni lege so e azo e lingbi ti mä yâ ni. Avision so ayeke aidé ande mo ti hinga azo so ayeke na ‘ando ti lango so ayeke mingi’ na yayu kâ so.