Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

TOUR TI BA NDO NO. 5 2016

 KOTA MAMA-TENE NI | NA NDO WA LA MO LINGBI TI WARA DENGO BÊ?

Ala wara dengo bê na ngoi ti akpale

Ala wara dengo bê na ngoi ti akpale

Akpale alingbi ti si na e na alege nde nde. E lingbi ti sara tënë na ndo ti mara ti akpale nde nde kue ge ape, me zia e gbu li na ndo ti ambeni tapande osio so e sara fade tënë ni kozo awe. Bâ tongana nyen la azo so atingbi na mara ti akpale nde nde awara tâ dengo bê so alondo na Nzapa.

NA NGOI TI KPALE TI WARANGO KUA TI NGINZA

““Mbi manda ti yeda ti sara mara ti akua kue, nga ti kpe ti vo aye senge senge.”—Jonathan

Seth * atene: “A zi mbi na wali ti mbi lani na kua na oko ngoi. Teti ngu use, gi mungo maboko ti asewa ti e nga na akete kete kua ti maboko so e yeke sara la a-aidé e. Ye ti pekoni ayeke so, wali ti mbi, Priscilla atï na yâ ti kota vundu nga mbi bâ tere ti mbi so mbi yeke ye oko ape.

“Ala hinga tongana nyen la e hon ndo ni? Priscilla ayeke bata lani lakue na li atënë ti Jésus so ayeke na Matthieu 6:34. Jésus atene so a lingbi e gi bê ti e ape ndali ti kekereke, ndali ti so lango oko oko ayeke na agingo bê ti lo wani. Nga so Priscilla ayeke zi lani bê ti lo na yâ ti sambela, a aidé lo ti gbu ngangu. Âdu ti mbi, Psaume 55:23 la adë bê ti mbi. Tongana ti zo so asû Psaume so, mbi mû aye so ane mbi, mbi bi na ndo ti Jéhovah, na mbi bâ so lo mû ngangu na mbi. Atâa so laso mbi wara kua awe, e sara kue ti duti na aye mingi ape ti gue oko na wango ti Jésus so ayeke na Matthieu 6:20-22. Na ndo ni kue, e ga nduru na Nzapa nga e ga nduru na mba.”

Jonathan atene: “Bê ti mbi agi mbi lani mingi ndali ti ye so alingbi ti si kekereke, na ngoi so kete ndokua so e zi na sewa atï. Ndali ti kpale ti konomi so asi, angangu kua kue so e sara teti ngu 20 atï na ngu. Mbi na wali ti mbi e komanse lani ti papa ndali ti nginza. E peut même ti vo ye lani na carte banquaire ape, ndali ti so e sara mbeto ti tene banque ni ake ni.

“Me Tënë ti Nzapa nga na yingo vulu ti lo a-aidé e ti mû anzoni desizion. Mbi manda ti yeda ti sara mara ti akua kue, nga ti kpe ti vo aye senge senge. Teti so e yeke aTémoin ti Jéhovah, amba ti e amû nga maboko na e. Ala sara si e kiri e bâ so e ne nga ala mû maboko na e na angoi so ye ahon tâ ndo ti e.”

 TONGANA YÂ TI MBENI MARIAGE ABUBA

Raquel atene: “Na ngoi so, tâ gi tongaso, koli ti mbi azia mbi, ye ni azia kä nga na ngonzo na bê ti mbi. Nga vundu ahon ndo ti mbi. Me mbi ga lani nduru na Nzapa na lo dë bê ti mbi. Siriri ti Nzapa abata lani bê ti mbi na ngoi so mbi yeke sambela lo lâ na lâ. A kpa mo bâ mo tene lo leke bê ti mbi so afâ lani so.

“Nga grâce na Tënë ti lo, so ayeke Bible, mbi hon ndo ti ngonzo ti mbi nga na bibe ti batango zo na bê. Mbi bata na bê ti mbi atënë ti bazengele Paul so atene na aRomain 12:21: ‘Zia si sioni ahon mo na ngangu pëpe, me mo ngbâ ti hon ndo ti sioni na lege ti ye ti nzoni.’”

“‘Lâ ti girisango’ ye ayeke dä. . . . Fadeso, mbi zi bê ti mbi na ndo ti kpale ti mbi ni nga mbi zia ambeni fini ye na gbele mbi.”—Raquel

“Mbeni nzoni kamarade ti mbi a-aidé mbi ti bâ so alingbi mbi girisa na ndo ti aye so asi so. Lo fa na mbi Zo-ti-fa-tene 3:6 nga lo tene na mbi na nzoni bê so ‘lâ ti girisango’ ye ayeke dä. Ti sara ye alingbi na wango so ayeke kete ye ape, me a yeke ye so mbi bezoin ni lani la. Fadeso, mbi zi bê ti mbi na ndo ti kpale ti mbi ni nga mbi zia ambeni fini ye na gbele mbi.”

Elizabeth atene: “Tongana yâ ti mariage ti mo abuba, mo bezoin mungo maboko. Mbi yeke na mbeni nzoni kamarade so amû maboko na mbi tongaso lâ na lâ. Lo yeke toto legeoko na mbi, lo yeke dë bê ti mbi nga lo sara si mbi bâ tere ti mbi so a ye mbi ahon ti tene mbi bâ so a ke mbi. Mbi yeke na kite oko ape so Jéhovah ayeke sara kua lani na lo ti soigné avundu ti bê ti mbi.”

NA NGOI SO TERE TI MO ASON WALA MO GA MBAKORO

“Na peko ti so mbi sambela Nzapa awe, mbi bâ so yingo ti lo amû na mbi ngangu.”—Luis

Luis, so e sara tënë ti lo kozo awe, ayeke na mbeni kota kobela ti bê, na fani use, a ngbâ kete lo kui. Fadeso, lango oko oko, a yeke zia oxygène na hôn ti lo teti l’heure 16. Lo tene: “Mbi yeke sambela Jéhovah lakue. Na peko ti so mbi sambela Nzapa awe, mbi bâ so yingo ti lo amû na mbi ngangu. Sambela la amû lege na mbi ti gbu ngangu, ngbanga ti so mbi yeke na mabe na lo nga mbi hinga so lo yeke bâ lege ti mbi.”

Petra, so ayeke na yâ ti ngu 80, atene: “Mbi ye ti sara aye mingi, me mbi peut ape. Ti bâ so ngangu ti mbi ayeke kiri na peko, asara mbi nzoni ape. Ngangu ayeke na mbi ape nga lakue mbi yeke nyon gi yorö. Fani mingi, mbi yeke na a-oko pensé ti Jésus so ahunda lani na Babâ ti lo ti zi mbeni ngangu ye yongoro na lo, tongana lege ayeke dä. Me Jéhovah amû ngangu na Jésus, nga lo mû ngangu na mbi. Sambela aga tongana yorö  so mbi yeke nyon lâ na lâ. Mbi yeke yapu na peko ti so mbi sambela Nzapa.”—Matthieu 26:39.

Julian ayeke nga na oko pensé ni so. Nduru na ngu 30 la lo yeke tiri na kobela ti sclérose en plaques, so ayeke mbeni kobela so ayeke buba ambeni ye na yâ ti cerveau ti zo. Julian atene: “Mbi duti lani na ndo ti chaise ti wayinda, me fadeso mbi duti na ndo ti puse ti azo ti bubango gere. Me gigi ti mbi anzere ndali ti so mbi yeke mû ni ti sara na kua ndali ti amba ti mbi. Ti mû ye alingbi ti sara si pasi ti zo adë kete, nga Jéhovah ayeke ngbâ lakue ti mû ngangu na e na ngoi so e bezoin ni, tongana ti so lo mû zendo ni na e. Tongana ti Paul, mbi lingbi biani ti tene: ‘Mbi wara ngangu ti sara aye kue ndali ti lo so lo mû ngangu ni na mbi.’”—aPhilippien 4:13.

TONGANA MBENI ZO SO MO YE LO AKUI

Antonio atene: “Na ngoi so oto akpo babâ ti mbi si lo kui, kozoni mbi yeda na ni ape. Ye so asi so ayeke na lege ni ape, lo ngbâ ti tambela ti lo lani gi na gere. Me, mbi peut ti sara lani mbeni ye ape. Lo linda lani yâ ti coma teti lango oku la si na pekoni lo kui. Na lê ti mama ti mbi, mbi yeke kanga toto, me tongana mbi yeke gi mbi oko, mbi yeke toto ngangu. Mbi yeke hunda tere ti mbi, mbi tene: ‘Ngbanga ti nyen tongaso? Ngbanga ti nyen tongaso?’

“Na yâ ti angoi ti ngangu so, mbi yeke hunda lani Jéhovah ti mû maboko na mbi ti hon ndo ti vundu ti mbi nga ti mû na mbi siriri ti bê. Na yeke yeke mbi wara dengo bê. Mbi dabe ti mbi so Bible atene so ‘lâ na pasa’, wala aye so azo aku tere ti ala na ni ape, alingbi ti si na zo kue. Teti so Nzapa alingbi ti tene mvene ape, mbi hinga biani so mbi yeke bâ ande babâ ti mbi na ngoi ti zingongo ti akuâ.”—Zo-ti-fa-tene 9:11; Jean 11:25; Tite 1:2.

“Atâa so molenge ti e ti koli akui na yâ ti accident ti avion, e ngbâ ti bata na li ti e apendere ngoi so e passé legeoko.”—Robert

Robert, so a sara tënë ti lo na yâ ti mbage so ahon, ayeke na oko bango ndo so. Lo tene: “Mbi na wali ti mbi e wara siriri ti bê so a sara tënë ni na aPhilippien 4:6, 7. A ga na lege ti asambela ti e na Jéhovah. Siriri ti bê ni so amû lege na e ti sara lisoro na awagosinga na ndo ti tënë ti beku ti zingongo ti akuâ. Atâa so molenge ti e ti koli akui na yâ ti accident ti avion, e ngbâ ti bata na li ti e apendere ngoi so e passé legeoko. E tara ti pensé gi na angoi ni so.”

“Na ngoi so amba ti e, aTémoin ti Jéhovah, atene na e so ala bâ e na télé na fango tënë ti mabe ti e na sarango vundu mingi ape, e tene na ala so, biani a yeke grâce na gbâ ti asambela so a tene ni ndali ti e. Mbi hinga biani so Jéhovah la ayeke mû lani maboko na e na lege ti gbâ ti atënë ti dengo bê so ala tene na e.”

Tongana ti so gbâ ti atapande so afa, Nzapa alingbi ti mû dengo bê na azo so atingbi na mara ti akota kpale nde nde. Ka ti mo? Hinga so atâa kpale wa la mo tingbi na ni, mo lingbi ti wara dengo bê so apeut ti aidé mo ti hon na yâ ti angoi ti ngangu ni so. * Tongaso, tourné na mbage ti Jéhovah ti wara mungo maboko. Lo yeke “Nzapa ti dengo bê kue.”—2 aCorinthien 1:3.

^ par. 5 A changé ambeni iri so ayeke na yâ ti article so.

^ par. 23 Tongana mo ye ti tene a mû maboko na mo ti ga nduru na Nzapa wala ti tene Nzapa adë bê ti mo, e wa mo ti bâ aTémoin ti Jéhovah ti vaka ti mo wala ti sû mbeti na mbeni ndokua ti ala so ayeke nduru na mo.