Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 4 2016

Sarango ye ti ngangu alingbi ti hunzi mbeni lâ?

Sarango ye ti ngangu alingbi ti hunzi mbeni lâ?

A sara ye ti ngangu na mo wala na mbeni zo ti sewa ti mo lâ oko awe? Eskê mbeni raison ayeke dä so apusu mo ti sara mbeto ti tene mbeni lâ a sara ye ti ngangu na mo? A fa sarango ngangu na zo tongana mbeni “kota kpale ti seni so ayeke gue gi guengo na li ni na yâ ti dunia.” Zia e bâ ambeni tapande ni.

SARANGO NGANGU NA YÂ TI SEWA NGA NA BUNGBINGO NA AWALI NA NGANGU: Bendo ti Gigi atene: “Tongana a mû wali ota, a si na oko awe ti tene koli ti lo asara ngangu na lo wala abungbi na lo na ngangu.” Ye ti mawa ni ayeke so, “a tara ti bâ so, na yâ ti dunia kue, tongana a mû wali oku, gbä a yeke si na oko ti tene a gbu lo na ngangu a bungbi na lo wala a tara ti bungbi na lo na ngangu.”

TËNË TI ABANDIT: Mbeni mbeti afa so, na États-Unis, a yeke wara agroupe ti abandit ahon 30 000 tongaso. Na Amerika ti mbongo, tongana a mû azo ota, zo oko atene so asara ye ti ngangu na lo awe.

FANGO AZO: A tara ti bâ so azo afâ amba ti ala nduru na 500 000 na ngu 2012. Wungo ni so ahon wungo ti azo so akui na ngoi ti abira na oko ngu ni so. Na mbongo ti Afrika nga na akodoro so ayeke na bê ti Amerika la wungo ti fango zo ni ahon ti ambeni mbage ti sese. Gi na yâ ti ngu oko, a fâ azo na yâ ti akodoro so ayeke na mbongo ti Amerika ahon 100 000, so na popo ni a fâ azo 50 000 tongaso gi na kodoro ti Brésil. Eskê a lingbi ti kanga lege biani biani na sarango ye ti ngangu?

A LINGBI TI KANGA LEGE NA SARANGO YE TI NGANGU?

Ngbanga ti nyen la sarango ye ti ngangu amû yâ ti dunia kue tongaso so? A fa ambeni ye so ayeke na gunda ni, na tapande: akpale so alondo ndali ti so a sara ye na lege ni ape na mbage ti ambeni zo, nyongo samba ahon ndo ni nga na nyongo mbangi, azo so abâ fini ti amba ti ala na nene ni ape, sarango ye ti ngangu ti akota zo so amolenge ayeke na gbele ni, nga azo so abâ so a yeke sara ye oko ape na azo so asara ye ti sioni.

Ti tâ tënë ni, na ambeni mbage ti dunia a yeke sara effort ti kanga lege na sarango ye ti ngangu. Na kodoro ti Brésil, na yâ ti gbata ti São Paulo so gbâ ti azo ayeke dä, a bâ so na yâ ti angu 10 so ahon, wungo ti azo so a fâ ala akiri na peko mingi. Me, amara ti sarango ye ti ngangu nde nde amû yâ ti gbata ni, nga tongana a mû azo 100 000 so alango kâ, a yeke fâ azo 10 tongaso na popo ni. Me, lawa la sarango ngangu na zo ayeke hunzi biani biani?

Ye so alingbi ti leke biani biani kpale ti sarango ye ti ngangu andu nga bango ndo ti azo nga na sarango ye ti ala. Ti tene azo ti sarango ngangu na azo achangé aye tongana bibe ti baba, kota bê nga na pensengo gi na ala wani, a lingbi ala duti na ndoye, bibe ti nengo azo nga na ti pensengo na amba ti ala.

Nyen la alingbi ti pusu mbeni zo ti sara amara kota changement so? Gbu li na ndo ti aye so Bible afa:

  • “Ndoye ti Nzapa ayeke so: e bata acommandement ti lo.”—1 Jean 5:3.

  • “Kpengo mbeto ti L’Éternel ayeke ti ke sioye.”—aProverbe 8:13.

Ndoye ti Nzapa nga na mbeto ti ziango vundu na bê ti lo ayeke ambeni kota ye so alingbi ti mû maboko  même na azo so ayeke sara ye ti ngangu ti changé asarango ye ti ala, ti changé gi kete ape, me ti gue juska ti changé asioni sarango ye ti ala kue. Eskê tënë ni so ayeke tâ tënë la?

Bâ tapande ti Alex, * so asara ngu 19 na da ti kanga na Brésil ndali ti so lo sara aye ti ngangu na azo fani mingi. Lo ga lani Témoin ti Jéhovah na ngu 2000, na peko ti so aTémoin ti Jéhovah amanda Bible na lo. Eskê lo changé biani sioni sarango ye ti lo so? En, na vundu asara lo mingi ndali ti aye ti sioni so lo sara lani so. Lo tene: “Mbi komanse fadeso ti ye Nzapa ndali ti so lo sara si mbi bâ so lo pardonné mbi biani. Bibe ti kiringo singila nga na ndoye so mbi yeke na ni na mbage ti Jéhovah a-aidé mbi ti changé asioni lege ti mbi.”

César, so ayeke nga na Brésil, ayeke na popo ti azo so ayeke nzi na ngombe. Teti ngu 15 tongaso, gigi ti lo lani la. Nyen la asara si lo changé? Na ngoi so lo yeke lani na da ti kanga, aTémoin ti Jéhovah ague na mbage ti lo, na lo kue lo manda Bible. César atene: “Kozo ti tene na yâ ti gigi ti mbi, mbi wara mbeni beku la. Mbi manda ti ye Jéhovah. Mbi manda nga ti kpe mbeto ti lo, so ti tene ti kpe ti kiri ti sara ye ti sioni na ti zia vundu na bê ti lo. Mbi ye ti fa singila ti bê ti mbi ndali ti nzoni bê ti lo. Ndoye ni so nga na kpengo mbeto ti lo la amû ngangu na mbi ti changé.”

Manda tongana nyen ti duti na yâ ti dunia so sarango ngangu ayeke dä ape

Nyen la atapande so afa na e? A fa na e so Bible ayeke na ngangu ti changé fini ti azo, na lege so lo yeke changé fason so ala yeke pensé na ni (aÉphésien 4:23). Alex so e sara tënë ti lo fade akiri atene: “Ye so mbi manda na yâ ti Bible ayeke tongana mbeni nzoni ngu so atuku na ndo ti mbi, so yeke yeke ayeke sukula asioni pensé ti mbi. Mbi pensé lâ oko ape so mbi lingbi lani ti zia lege ni.” Biani, tongana yâ ti li ti e asi singo na nzoni tënë ti Bible, a lingbi ti tomba wala ti sukula asioni sarango ye ti e. Bible ayeke na ngangu ti sukula e (aÉphésien 5:26). Ye ti pekoni ayeke so, asioni zo nga na ala so ayeke pensé gi na ala wani alingbi ti changé sioni sarango ye ti ala na ti ga azo so ayeke nzoni nga so aye siriri (aRomain 12:18). Ala wara siriri na yâ ti gigi ti ala na lege so ala sara ye ague oko na afango ye ti Nzapa.—Ésaïe 48:18.

A-Témoin ti Jéhovah kutu miombe, so ayeke na yâ ti akodoro 240, awara ye so alingbi ti zi biani biani tënë ti sarango ye ti ngangu. Azo so ayeke ti amara nde nde nga so alondo na ando nde nde amanda ti ye Nzapa nga ti kpe mbeto ti lo, me nga ti ye amba ti ala, na dutingo na yâ ti siriri tongana mbeni sewa na yâ ti dunia kue (1 Pierre 4:8). Ala fa biani so a lingbi ti wara mbeni dunia so sarango ye ti ngangu na zo ayeke dä ape.

NA YÂ TI NGOI KETE, SARANGO YE TI NGANGU AYEKE HUNZI!

Bible afa so na yâ ti ngoi kete, Nzapa ayeke zi sarango ye ti ngangu na ndo ti sese. Dunia ti laso, so sarango ngangu ayeke na yâ ni so, aga nduru awe ti tingbi na “lango ti ngbanga nga ti futingo azo so akpe Nzapa pëpe.” (2 Pierre 3:5-7). Mbeni zo ti sara ande ye ti ngangu na amba ti lo ayeke dä ape. Nyen la apusu e ti yeda so Nzapa ayeke na nzara ti ga ti zi sarango ye ti ngangu biani biani?

Bible atene so Nzapa ake “zo so kua ti lo ayeke ti sara ngangu na amba ti lo.” (Psaume 11:5, Mbeti ti Nzapa, Tënë so amû fini). Lo so aleke aye kue aye siriri nga na fango ngbanga ti mbilimbili (Psaume 33:5; 37:28). A yeke ndali ni la lo yeke zia ande lege na azo ti sioni lakue lakue ape.

Biani, mbeni fini dunia so siriri ayeke na yâ ni aga nduru awe (Psaume 37:11; 72:14). Ngbanga ti nyen mo gi ti hinga nyen la mo lingbi ti sara ti duti na yâ ti dunia ni so, so sarango ngangu na zo ayeke na yâ ni ape so?