Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 3 2017

Mbi ye mingi ti duti na terê ti amaseka so ayeke na yâ ti congrégation

 BIBLE ACHANGÉ FINI TI AZO

Mbi ye pikango ballon ti maboko mingi ahon aye kue

Mbi ye pikango ballon ti maboko mingi ahon aye kue
  • A DÜ LO NA NGU: 1928

  • NA KODRO TI: COSTA RICA

  • LO YEKE ÂNDÖ: KOTA ZO TI PIKANGO BALLON TI MABOKO NGA ZO TI SARANGO ANGIA TI NGINZA

GIGI TI MBI ÂNDÖ

Mbi kono na kodro ti Puerto Limón, mbeni gbata so ayeke na mbage ti Est ti Costa Rica nga na akodro so ayeke na terê ni. Babâ na mama ti mbi adü e miombe, mbi yeke mbasambala molenge ni. Babâ ti mbi akui na ngoi so mbi yeke na ngu miombe. Na pekoni, gï mama ti mbi oko la abata e amolenge ni.

Pikango ballon ti maboko ayeke lani lakue mbeni mbage ti fini ti mbi. Mbi komanse pikango ballon depuis kete ti mbi. Na ngoi so mbi ga nduru ti wara ngu 20, mbi lï na yâ ti mbeni équipe ti pikango ballon. Na ngoi so mbi yeke pika ballon na yâ ti équipe ni so, mbi yeke na ngu 20 na ndö ni, mo ye ti bâ mbeni zo so ayeke gi ti wara azo so alingbi ti ga akota zo ti pikango ballon aga, na lo hunda mbi ti gue ti pika ballon na mbeni kota équipe ti Nicaragua. Me, teti so mama ti mbi ayeke na nzoni seni ape na ngoi ni so, na mbi la mbi yeke bâ lege ti lo, mbi ye ti gue na Nicaragua ni ape. Tongaso, mbi ke ti gue. Kete na pekoni, mbeni zo nde so ayeke gi ti wara azo so alingbi ti ga akota zo ti pikango ballon atisa mbi ti gue ti pika ballon na yâ ti mbeni équipe na kodro ti Costa Rica, so na yâ ni a yeke wara gï azo so ayeke pika ballon nzoni si a soro ala. Ti so ni so, mbi yeda ti gue. Na ngu 1949 ti si na ngu 1952, mbi ga membre ti équipe ti pikango ballon ti kodro ni nga mbi pika ambeni ballon lani na kodro ti Cuba, Mexique nga na Nicaragua. Mbi yeke pika ballon nzoni mingi nga place so a zia mbi dä mbi sara faute ape na yâ ti match 17. Mbi ye mingi ti mä azo so ayeke dekongo na iri ti mbi.

Mawa ni ayeke so, mbi sara nga mbeni vie so ayeke kirikiri mingi. Atâa so mbi yeke gï na ndeko oko, me lakue mbi yeke sigi na awali gbani. Mbi yeke nyon nga sämba mingi. Mbeni lâ, mbi soullé na mbeni bï, me na ngoi so mbi zingo na ndapre, mbi hinga ape tongana nyen la mbi kiri na yanga-da ti mbi na bï ni so. Mbi yeke sara nga angia ti nginza nga na loterie mingi.

Na ngoi so mbi ngbâ na yâ ti mara ti vie ni so, mama ti mbi aga ti lo Témoin ti Jéhovah. Lo tara ti fa tënë ti mabe ti lo na mbi, me kue gba ndali ti so mbi lï mingi na yâ ti pikango ballon ti mbi ni. Tongana mbi yeke na ndö ti terrain mbi ngbâ ti sara entrainement, asi na ngoi ti tengo kobe, nzara ayeke sara mbi ape. Pensé ti mbi kue ayeke gï na ndö ti pikango ballon ni. Mbi ye pikango ballon ti maboko mingi ahon aye kue.

Me na ngoi so mbi yeke na ngu 29, mbi bâ pasi na mbeni kota kä so mbi wara na ngoi so mbi yeke gi ti gbu ballon na ngoi ti mbeni  match. Na peko ti so kä ni amu, mbi zia lege ti pikango ballon ni. Me, mbi ngbâ ti mû maboko na yâ ti formation ti pikango ballon so a leke ni na yâ ti mbeni équipe ti akota zo ti pikango ballon ti maboko so ayeke na terê ti da ti mbi.

LEGE SO BIBLE ACHANGÉ FINI TI MBI

Na ngu 1957, mbi yeda na mbeni mbeti ti tisango ndo so a mû ni na mbi ti gue na kota bungbi ti aTémoin ti Jéhovah so asara ni na yâ ti mbeni stade so mbi pika ballon ti maboko lani dä. Tongana mbi duti na millieu ti azo so aga, mbi bâ kangbi so ayeke na popo ti sarango ye na nengo terê so ayeke na popo ti aTémoin ti Jéhovah nga na sarango ye ti azo so ayeke dekongo nga ayeke sara ye kirikiri na popo ti gbâ ti azo so aga ti bâ pikango ballon. Ye so mbi bâ na ngoi ti kota bungbi ni so apusu mbi ti komanse ti manda Bible na aTémoin ti Jéhovah nga ti gue na abungbi ti ala.

Gbâ ti afango ye ti Bible so mbi manda apika bê ti mbi mingi. Na tapande, Jésus afa kozoni awe so na lâ ti nda ni, adisciple ti lo ayeke fa ande nzoni tënë ti Royaume ti Nzapa na yâ ti dunia mobimba (Matthieu 24:14). Mbi hinga nga so atâ Chrétien ayeke sara kua ti ala ti fango tënë so ti wara nginza na pekoni pëpe. Jésus atene: “Ala wara ye senge senge, ala mû ni na azo senge senge.”—Matthieu 10:8.

Na ngoi so mbi yeke manda Bible, mbi yeke haka ye so mbi diko na ye so mbi bâ na popo ti aTémoin ti Jéhovah. A nzere na mbi mingi ti bâ effort so ala yeke sara sân ti fatigué, ti fa nzoni tënë ti Royaume ti Nzapa na yâ dunia kue. Mbi bâ so ala yeke sara asacrifice so Jésus ahunda na aChrétien ti sara ni. Ni la, na ngoi so mbi diko Marc 10:21, mbi bâ tisango ndo ti Jésus so atene, “ga mo mû peko ti mbi,” asara si mbi ye ti ga Témoin ti Jéhovah.

Ti sara aye ni so, a hunda na mbi ngoi. Na tapande, a sara angu mingi awe la mbi yeke joué lotérie ti kodro ni na numero ti mbi ti “chance” so yenga oko oko. Me, mbi manda na yâ ti Bible so Nzapa ayeke fâ ande ngbanga na ndö ti azo so ayeke voro “nzapa so ayeke mû chance na zo,” nga na azo ti sarango bê ti ye (Ésaïe 65:11; aColossien 3:5). Tongaso, mbi soro ti zia lege ti sarango jeu ti nginza. Kozo dimanche so aga na peko ti so mbi zia lege ti sarango alotérie ni, numero ti “chance” ti mbi ni agagné. Azo ahe mbi ndali ti so mbi joué na yenga ni so ape nga ala pusu mbi ngangu ti kiri ti joué encore, me mbi ke. Mbi ke ti sara jeu biani biani.

Mbi tingbi encore na mbeni tara ni, na ngoi so mbi “yü fini zo” tâ gï na lango so mbi wara batême na ngoi ti mbeni kota bungbi ti aTémoin ti Jéhovah (aÉphésien 4:24). Na lakui ni, mbi kiri na hôtel so mbi lango dä so, na mbi wara ngbene ndeko ti mbi, lo yeke ku mbi na devant ti porte ti chambre ti mbi ni. Na lo tene na mbi: “Sammy, ga si. Ga e sara ngia kete ma.” Me hio mbi tene na lo: “Ên-ën!” Mbi tene na lo so, fadeso mbi yeke sara ye alingbi na andia ti Bible na ndö ti tënë ti nzoni sarango ye na yâ ti gigi ti mbi (1 aCorinthien 6:18). Lo tene: “Nyen?” Na pekoni, lo bâ tënë so Bible atene na ndö ti lango-sioni tongana senge ye nga lo hunda juska ti tene e kiri e sara ndeko. Me, mbi lï yeke na yâ ti chambre ti mbi na mbi kanga porte ni na clé na peko ti mbi. Laso, mbi yeke na ngia ti tene so ngbene ye so mbi ga Témoin ti Jéhovah na ngu 1958, mbi ngbâ lakue be-ta-zo na yâ ti changement so mbi sara na yâ ti gigi ti mbi so.

NZONI YE SO MBI WARA NA PEKONI

Mbi bâ so tongana mbi sû aye ti nzoni so mbi wara na mungo peko ti afango ye ti Bible, mbi peut ti sara mbeni buku. Ambeni ye ti nzoni ayeke so, mbi yeke fadeso na gbâ ti anzoni kamarade, gbâ ti aye ti sarango ni na yâ ti gigi ti mbi nga mbi yeke na tâ ngia.

Mbi ngbâ ti ye pikango ballon ti maboko, me mbi changé bango ndo ti mbi na ndö ti aye so ayeke kota ye. Na yâ ti pikango ballon ti maboko so, iri ti mbi awu mingi nga mbi wara gbâ ti nginza, me aye ni so kue aninga ape. Ye oko, songo ti mbi na Nzapa nga na sewa ti e ti aita kue, so mbi yeke na yâ ni, la ayeke ngbâ teti lakue lakue. Bible atene: “Dunia so angbâ ti hon nga na nzara ti lo kue. Me zo so asara ye so bê ti Nzapa aye, lo ngbâ lakue lakue.” (1 Jean 2:17). Laso, mbi ye Jéhovah Nzapa nga na awakua ti lo mingi ahon aye kue.