Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 2 2016

 KOTA MAMA-TENE NI | NGBANGA TI NYEN LA JÉSUS ABÂ PASI NA LO KUI?

Eskê aye ni so asi lani biani?

Eskê aye ni so asi lani biani?

Na nze ti mars wala avril ti ngu 33, a fâ Jésus ti Nazareth. A bi tënë ti mvene na li ti lo, a pika lo sioni nga a kanga lo na ndo ti mbeni keke. Lo kui lani na yâ ti kota pasi. Me, Nzapa azingo lo na kuâ, nga lango 40 na pekoni, Jésus ague na yayu.

E yeke wara kpengba mbaï so na yâ ti aÉvangile osio so ayeke na yâ ti mbage ti Mbeti ti Nzapa, so azo airi ni Fini Testament. Me, eskê aye ni so asi lani biani? Hunda ni so ayeke pendere nga a lingbi e bâ ni na nene ni. Tongana mbaï ni so ayeke tâ tënë ape, andâ tënë ti mabe ti aChrétien ayeke ye oko ape nga beku ti fini ti lakue lakue na yâ ti Paradis ayeke gi mbeni senge bango li (1 aCorinthien 15:14). Me, tongana aye ni so asi lani biani, a ye ti fa so mbeni pendere beku ayeke dä ndali ti azo ti dunia, mbeni beku so mo kue mo lingbi wara ni. Ni la, eskê ambaï ti aÉvangile ni ayeke gi bango li? wala a yeke tâ ye.

YE SO AMBENI YE NDE AFA

Atënë ti aÉvangile ayeke tongana atënë ti tere ape. A fa aye so ayeke tâ ye nga a fa ambeni nzene nzene ye dä. Na tapande, a fa gbâ ti airi ti ambeni ndo so zo alingbi ti gue laso ti bâ ni. A sara tënë ti ambeni zo, so même ambeni wandara ayeda so ala yeke dä lani.Luc 3:1, 223.

 Ambeni wasungo-mbeti na ngoi ti Jésus, nga so ayeke na fini lani na peko ti kuâ ti lo, asara tënë ti Jésus na yâ ti ambeti ti ala. * Fason so a fâ na Jésus, so a fa na yâ ti aÉvangile ni, ayeke fason so aRomain ayeke fâ lani na azo na ngoi ni kâ. Na ndo ni, a ba yâ ti ambaï ni ape, a tene gi tâ tënë. A fa même so na ambeni ngoi, adisciple ti Jésus asara ye na lege ni ape (Matthieu 26:56; Luc 22:24-26; Jean 18:10, 11). Ye so aye ti fa so, azo so asû aÉvangile ni asara ye lani na lege ni nga ala tene gi tâ tënë na ndo ti Jésus.

ESKÊ JÉSUS AZINGO LANI BIANI NA KUÂ?

Atâa so mingi ti azo ayeda so Jésus ayeke lani dä na lo kui, ambeni zo ayeke hunda tere ti ala wala lo zingo lani biani na kuâ. Même abazengele ti Jésus adë kite na ngoi so a ga a tene na ala ti kozoni so a zingo Jésus na kuâ awe (Luc 24:11). Me na pekoni, ala zia lege ni na ngoi so ala nga na ambeni disciple ni abâ Jésus so azingo na kuâ awe. Na ndo ni, na mbeni ngoi oko tongaso, adisciple ahon 500 tongaso abâ lo.1 aCorinthien 15:6.

Atâa so a lingbi ti kanga ala na ti fâ ala ngbanga ni, na mbeto ape adisciple ni afa na azo so a zingo Jésus na kuâ awe, ala fa ni même na ambeni zo so amû yanga si a fâ Jésus ni (Kusala 4:1-3, 10, 19, 20; 5:27-32). Tongana ala hinga fade biani so a zingo Jésus na kuâ ape, eskê adisciple ni so alingbi ti sara ye na mbeto ape tongaso? Ti tâ tënë ni, a yeke ngbanga ti so a zingo Jésus na kuâ la si tënë ti mabe ti aChrétien amû lani ndo nga même laso.

Aye so aÉvangile afa na ndo ti kuâ ti Jésus nga na ti zingongo ti lo na kuâ afa so atënë ni ayeke tâ tënë. Tongana mo diko na mo gbu li na ndo ti atënë ni so, mo yeke yeda ande so aye ni so asi lani biani. Mo yeke kiri ti yeda na ni encore tongana mo hinga ngbanga ti nyen la aye ni so asi lani. Mbage so aga na peko ayeke fa ni na e.

^ par. 7 Tacite, so a dü lo na yâ ti ngu 55 tongaso, asû na mbeti atene: ‘Christus [wala Christ], so ayeke gunda ti iri “Chrétien”, awara kuâ na lege ti ngbanga so mbeni gouverneur ti e Ponce Pilate afâ, na ngoi ti komandema ti Tibère.’ A yeke wara nga Suétone (so ayeke na fini na ngoi ti akozo Chrétien); Josèphe, mbeni wasungo mbaï so ayeke Juif (so ayeke na fini na ngoi ti akozo Chrétien); nga Pline le Jeune, gouverneur ti Bithynie (so ayeke na fini na popo ti ngu 100-200).