Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 2 2017

Wara ngia na mungo ye na zo

Wara ngia na mungo ye na zo

Alexandra aduti na yâ ti bus, lo yeke ku ti fâ frontière so ayeke na popo ti mbeni kodro ti Amérique du Sud ti gue na mbeni kodro ni. Bus ni aye ti hon, me lo bâ mbeni koli so ayeke Chinois angbâ ti lo ti luti. Lo descend ti bâ ye so apassé, na lo bâ so maseka-koli Chinois so ayeke gi ti tene yanga ti Espagnol so lo hinga ni nzoni ape na mbeni turugu so ayeke bata frontière ni, ti fa na lo akpale so lo yeke na ni. Teti so Alexandra asara bungbi na yâ ti congrégation ti aTémoin ti Jéhovah so ayeke na yanga ti Chinois, a sara si lo yeda na bê ti lo kue ti fa peko ti tënë so koli ni ayeke tene so na turugu ni.

Koli ni atene so ambeti ti lo kue ayeke na lege ni, me a nzi ni nga na nginza ti lo kue. Kozoni kue, turugu ni ayeda na tënë ni so ape; lo pensé même so Alexandra akpa mbeni zo so ayeke mû zo na ngbâa ti sara na commerce. Na ndani, lo yeda na tënë ti koli ni, me so koli ni ayeke na mbeti ape so, a hunda na lo ti payé amende. Teti so lo yeke na nginza ape, Alexandra aye ti mû na lo dollar 20 (wala 10000 tongaso). Koli so ahinga pëpe tongana nyen la lo peut ti kiri singila na lo nga lo tene so ni yeke kiri na ni na lo ahon dollar 20 so. Alexandra afa so lo yeke gi pëpe ti tene a futa lo na pekoni, me lo yeke na ngia ti mû maboko na azo ndali ti so lo bâ so ayeke na lege ni ti sara tongaso. Lo mû na koli ni ambeni mbeti ti e nga lo tisa lo ti manda Bible na aTémoin ti Jéhovah.

A nzere ka na azo ti mä so a sara nzoni bê na awande. Kite ayeke dä ape so azo so ayeke voro Nzapa na alege nde nde kue wala même azo so avoro Nzapa ape alingbi ti sara tongaso. Mo yeke nduru ti sara nga nzoni bê na zo? Hunda so ayeke nzoni mingi ndali ti so Jésus atene: “Mungo ye na zo aga na ngia mingi ahon warango ye na tïtî zo.” (Kusala 20:35). Awandara nga kue abâ so tongana mo mû ye ayeke sara nzoni mingi na mo. Zia e bâ na alege wa la e lingbi ti mû ye.

“ZO SO AMÛ YE NA NGIA”

Aye so asi afa so ti mû ye na zo nga ti duti na ngia ayeke aye so ague oko. Bazengele Paul atene so, “Nzapa andoye zo so amû ye na ngia.” Lo sara tënë so na aChrétien so asara nzoni bê ti mû maboko na amba ti ala Chrétien so ayeke na yâ ti akpale (2 aCorinthien 8:4; 9:7). Paul atene pëpe so ala mû ye ndali ti so ala yeke na ngia. Me vrai tënë ni ayeke so, ala yeke na ngia ndali ti so ala mû ye na zo.

Ni la, mbeni gingo nda ti ye afa so, ti mû ye “ayeke sara si mbage ti cerveau ti zo so asara ka si terê ti lo anzere, so asara si lo sara songo na amba ti lo nga so asara si lo yeke na confiance na amba ti lo asara kua, na ayeke sara si terê lo anzere mingi.” Mbeni gingo nda ti ye ni nde afa nga so, “ti mû nginza na mbeni zo, a sara si zo so amû ni ayeke na ngia mingi ahon aye so lo vo ndali ti lo wani.”

Dutingo ti mo asara si mo bâ so mo lingbi pëpe ti mû ye mingi na azo? Tâ tënë azo kue alingbi ti duti na ngia tongana ti “zo so amû ye na ngia.” Tongana mo mû ye na nzoni bibe, ye ni ayeke pëpe na bezoin ti tene akono si. Mbeni Témoin ti Jéhovah atokua lani mbeti so na azo so asigi na mbeti so legeoko na offrande so lo mû ni, lo tene: “Na yâ ti angu so kue mbi lingbi ti mû gï mbeni ye so akono  ape na offrande na Da ti Royame.” Ye oko, lo kiri lo tene: “Jéhovah Nzapa amû ye na mbi mingi ahon même so mbi mû. . . . Merci so ala sara si mbi wara lege ti mû matabisi so, asara si bê ti mbi adë.”

Biani, a yeke pëpe gï nginza la si zo alingbi ti mû na zo. Ambeni lege ti mungo ye na zo ayeke dä mingi.

TI MÛ YE NA ZO AYEKE SARA NZONI NA SENI TI MO

Mungo ye ayeke ga na nzoni ye na mo nga na ambeni zo

Bible atene: “Zo so asara nzoni bê na zo ayeke bâ nzoni na pekoni, me zo so asara sioni na mba ti lo aga na kpale na ndö ti lo wani.” (aProverbe 11:17). Azo ti nzoni bê ayeke mû ye na zo. Ala yeke nduru ti bi bê na zo, ti mû ngoi ti ala wani, ngangu ti ala, nga na ambeni ye tongaso ndali ti ambeni zo. Sarango tongaso, aga na ala aye ti nzoni na alege nde nde na yâ ti fini ti ala. Mbeni nzoni ye ni ahon ayeke so, ayeke sara nzoni na seni ti ala.

Agingo nda ti ye afa so zo so ayeke nduru ti mû maboko na amba ti lo ayeke bâ pasi mingi pëpe na kobela, ambeni douleur wala dépression. Mingi ni, ala yeke na nzoni seni. Ti mû ye na nzoni bê ayeke sara même si seni ti ambeni zo so abâ pasi na ambeni kota kobela so a kaï ni gbâ aga kamême nzoni, na tapande kobela ti sclérose en plaque (so ayeke mbeni kobela so ayeke buba ambeni ye na yâ ti cerveau ti zo) wala SIDA. A fa nga so azo so anyon sämba mingi, si aga nzoni na pekoni ayeke mû même maboko na ambeni zo ti hon ndö ti kpale ti ala nga ala lingbi ti sara effort ti kpe ti kiri ti tï na yâ ti oko kpale ni so.

Ye ni ayeke tongaso, ndali ti so a fa so “tongana zo abâ mawa ti mba ti lo, lo sara nzoni bê na zo, ayeke sara si lo duti na asioni pensé mingi pëpe.” Mungo ye alingbi ti sara si vundu ahon ndö ti zo mingi pëpe nga tension ti lo amonté mingi pëpe. Azo so koli wala wali ti ala akui ayeke wara vundu mingi ape tongana ala mû ye na ambeni zo.

Kite ayeke dä ape na ndö ti ye so. Ti mû ye ayeke sara nzoni na mo.

MUNGO YE NA ZO ASARA SI ZO NI AMÛ YE

Jésus atene lani na adisciple ti lo, lo tene: “Ala mû ye lakue na azo, na azo ayeke mû ye ande na ala. A yeke haka ye nzoni, a pete ndö ni, a yengi ni, ye ni asi na ayeke tuku tukungo na sese, si a tuku ni na yanga ti bongo ti ala. Ndali ti so a yeke oko ye so ala mû ti haka na ye na azo si a yeke mû ande ti haka na ye na ala.” (Luc 6:38). Tongana mo yeke mû ye na zo, azo alingbi ti fa singila ti bê ti ala na mo nga alingbi ti sara si ala nga kue aga azo so ayeke mû ye na zo. Mungo ye, ayeke sara nga si mo yeke duti na nzoni songo na azo nga mo ga kamarade ti ala.

Mungo ye ayeke sara si zo ayeke na nzoni songo na mba ti lo nga na akamarade ti lo

Azo ti gingo nda ti ye so amanda ye na ndö ti songo so ayeke na popo ti azo atene so “tongana azo ayeke sara nzoni bê lakue na amba ti ala, ayeke pusu amba ti ala ni nga ti sara tongaso.” Ni la, mbeni gingo nda ti ye afa so “gï senge dikongo ye na ndö ti kota nzoni bê so mbeni zo asara ayeke sara si azo akiri asara nzoni bê mingi na amba ti ala. Tongana mbeni zo asara ye ti nzoni, ye so lo sara so alingbi ti ndu bê ti azo mingi wala même azo ngbangbo mingi atâa so lo hinga ala ape nga lo tingbi terê na ala lâ oko ape.” Tënë so aye ti tene so tongana mbeni zo oko asara nzoni bê, a lingbi ti komanse ti pusu ambeni zo ti sara nzoni bê na amba ti ala, na a lingbi ti sara si azo kue ti yâ  ti mbeni kodro aga azo so ayeke sara nzoni bê na zo. A nzere na mo ti sara kodro na mara ti ndo tongaso ape? Biani, gbâ ti aye ti nzoni alingbi ti ga tongana azo kue ayeke mû ye na zo.

Tapande ti mbeni ye so asi na kodro ti Floride so ayeke na États-Unis afa ye so alingbi ti ga na peko ti sarango nzoni bê na zo. Mbeni groupe ti aTémoin ti Jéhovah ayeda ti gue ti sara kua na peko ti mbeni kota pupu so abuba aye na yâ ti kodro ni. Na ngoi so ala yeke ku ti wara aye so ala bezoin ni ti sara na kua ti mbeni da so ala ga ti leke ni, ala bâ so gbagba ti mbeni zo so alango na ndo ni so abuba na ala hunda ti leke ni na lo. Ambeni ngoi na pekoni, na yâ ti lettre so voisin ni atokua na kota ndokua ti aTémoin ti Jéhovah, lo tene: “Mbi yeke ngbâ ti kiri singila lakue. Ade mbeni zo asara na mbi mbeni pendere ye tongana ti so azo so asara so ape.” Ti fa singila ti bê ti lo, lo tokua mbeni offrande na nzoni bê ti sara na ye so lo iri ni kota kua ti aTémoin ti Jéhovah.

MÛ PEKO TI KPENGBA TAPANDE TI MUNGO YE SO AHON ATANGA NI KUE

Mbeni kpengba ye so awandara awara ni na yâ ti gingo ye ti ala ayeke so “nzara ti mungo ye na zo ayeke mbeni ye so ayeke na yâ ti terê ti azo.” Gingo dä ti ye ni afa so “amolenge ayeke komanse ti mû ye na zo kozo si ala manda ti sara tënë,” Ngbanga ti nyen? Bible afa kiringo tënë ni na ngoi so a tene so a leke lani azo “na image ti [Nzapa] wani”, ndani la azo ayeke na amara sarango ye ti Nzapa.—Genèse 1:27.

Nzoni bê ayeke na popo ti apendere sarango ye ti terê ti Zo so acréé e, Jéhovah Nzapa. Lo mû na e fini nga na aye kue so e yeke na bezoin ni ti duti na ngia (Kusala 14:17; 17:26-28). E lingbi ti hinga Babâ ti e ti yayu nga ti hinga ye so lo leke na ndoye ndali ti e na lege ti mandango Tënë ti lo, Bible. Buku ni so afa nga aye so Nzapa aleke ti sara ndali ti kekereke ti e * (1 Jean 4:9, 10). Teti so nzoni bê alondo na Jéhovah Nzapa wani nga lo la lo sara mo na image ti lo, a yeke ye ti dongo bê pëpe ti mû tapande ti Nzapa so ayeke sara nzoni ye ndali ti mo nga so mo yeke na pasa ti tene lo yeda na mo.—aHébreu 13:16.

Mo rappelé na Alexandra, so a sara tënë ti lo na tongo nda ti article so? Nyen la apassé na peko ni? Atâa so mbeni zo so avoyagé legeoko na Alexandra atene na lo so lo bi fade nginza ti lo so na ngonda gï senge senge, koli so lo aidé lo so airi ndo na akamarade ti lo na yâ ti gbata so bus ni ayeke luti ka dä, na lo ngbâ lo futa nginza ni. Na ndö ni, koli so asara ye alingbi na tënë ti Alexandra so nga lo komanse ti manda Bible. A nzere na lo mingi ti kiri ti tingbi na koli ni so, nze ota na pekoni na ngoi ti kota bungbi ti aTémoin ti Jéhovah so asara ni na yanga ti Chinois na kodro ti Pérou. Ti fa singila ti bê ti lo ndali ti aye kue so Alexandra asara ndali ti lo, koli ni atisa lo nga na azo so lo na ala avoyagé oko ti ga na kota bungbi ni so ti ga ti te ye na restaurant ti lo.

Ti mû ye nga ti mû maboko na ambeni zo alingbi ti sara si zo awara ngia mingi. Ahon so, tongana mo yeke sara nzoni bê na azo, mo lingbi nga ti mû maboko na azo ti hinga Jéhovah Nzapa nzoni, lo so amû anzoni matabisi kue (Jacques 1:17). Mo yeke wara ngia na mungo ye na zo?

^ par. 21 Ti hinga tënë mingi na ndö ni, bâ buku Bible afa nyen biani?, so aTémoin ti Jéhovah asigi na ni. Gue na mbage so atene AMBETI TI E> ABUKU & ABROCHURE, so ayeke nga na ndö ti site www.jw.org.