Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 2 2017

 KOTA MAMA-TENE NI | MO YEKE YEDA NA KOTA MATABISI TI NZAPA?

Mbeni matabisi so ahon atanga ni kue

Mbeni matabisi so ahon atanga ni kue

Taille crayon so ayeke na maboko ti Jordan so a leke ni na forme ti bateau, akpa mbeni ye so ayeke pendere ape. Me, a yeke mbeni ye so ngere ni ayeke ngangu mingi. Jordan atene: “Russell, so ayeke mbeni ngbene kamarade ti sewa ti e la amû ni na mbi, na ngoi so mbi ngbâ lani kete.” Na peko ti kuâ ti Russell, Jordan ahinga so Russell ayeke mbeni zo so asara kota ye mingi na yâ ti fini ti âta ti Jordan ti koli nga na babâ na mama ti lo, na ye so adë bê ti ala na yâ ti angoi ti ngangu. Jordan atene: “So mbi hinga ye mingi na ndö ti Russell so, kete matabisi so lo mû na mbi so ayeke kota ye mingi na lê ti mbi ahon aye kue.”

Tongana ti so tapande ti Jordan afa, na lê ti ambeni zo mbeni matabisi alingbi ti duti kete wala ngere ni ayeke ngangu ape. Me, tongana matabisi so a mû na mbeni zo anzere na lo, a lingbi ti duti kota ye mingi na lê ti lo même si ayeke gï mbeni senge ye. Bible asara tënë ti mbeni matabisi so ngere ni ayeke ngangu mingi na yâ ti tënë so: “Nzapa andoye tâ azo ti dunia so mingi si lo mû gï oko Molenge ti lo si zo kue so amä na bê na lo, a lingbi ti futi lo pëpe, me lo yeke na fini ti lakue lakue.”—Jean 3:16.

Mbeni matabisi alingbi ti ga na zo fini ti lakue lakue. Eskê a lingbi ti wara mbeni matabisi so ngere ni ayeke ngangu mingi tongaso? Ambeni zo abâ matabisi ni so na nene ni ape, me atâ chrétien abâ ti ala ni tongana ye so ayeke “ngangu mingi”. (Psaume 49:8; 1 Pierre 1:18, 19). Me ngbanga ti nyen Nzapa amû fini ti Molenge ti lo tongana mbeni matabisi ndali ti azo ti dunia?

Bazengele Paul afa ndani na yâ ti tënë so: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue.” (aRomain 5:12). Kozo koli, Adam, asara siokpari na lege so lo ke yanga ti Nzapa na mbana nga ye ti peko ni ayeke kuâ. Na lege ti Adam, amolenge ti lo kue na yâ ti dunia awara kuâ.

“Futa ti peko ti siokpari ayeke kuâ, me matabisi so  Nzapa amû ayeke fini ti lakue lakue na lege ti Christ Jésus Seigneur ti e.” (aRomain 6:23). Ti zi azo na gbe ti ngbanga ti kuâ so ayeke na li ti ala, Nzapa atokua Molenge ti lo, Jésus Christ, na sese ge, ti mû fini ti lo so ayeke mbilimbili-kue na sacrifice ndali ti dunia. Na lege ti sacrifice so, so a-iri ni ‘ye so a futa’, azo kue so afa mabe na Jésus ayeke wara ande fini ti lakue lakue.—aRomain 3:24.

Ti atufa kue so Nzapa ayeke sara na ndö ti awakua ti lo na lege ti Jésus Christ, Paul atene: “Singila na Nzapa ndali ti matabisi ti lo so lo mû ni senge senge, so a lingbi ti fa ndani kue pëpe.” (2 aCorinthien 9:15). Biani, sacrifice ni so ayeke tâ pendere ye so e hinga pëpe tongana nyen ti fa ni. Me na popo ti amatabisi kue so Nzapa amû na azo, ngbanga ti nyen la sacrifice ti Jésus so ayeke kota ye mingi? Tongana nyen la matabisi ni so ahon atanga ti amatabisi ti Nzapa? * Nga tongana nyen la e lingbi ti fa singila ti bê ti e ndali ni? E tisa mo ti bâ akiringo tënë ti Bible na ndö ti ahunda so na yâ ti ambage use so ayeke ga na peko ni so.

^ par. 8 Jésus wani ayeda ti “kä fini ti lo na kuâ ndali ti e.” (1 Jean 3:16). Ye oko, sacrifice ni so ayeke mbage ti ye so Nzapa aleke na bê ti lo ti sara. Ambage so ayeke ga na peko, a yeke sara tënë na ndö ti kua ti Nzapa tongana Zo so amû ye so a futa ti zi na azo.