Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 1 2016

 BIBLE ACHANGÉ FINI TI AZO

Mû gi na mbi ngu oko ti siriri nga na ti ngia awe

Mû gi na mbi ngu oko ti siriri nga na ti ngia awe
  • A DÜ LO NA NGU: 1971

  • NA KODORO TI: FRANCE

  • LO YEKE ÂNDÖ: ZO SO AYE SARANGO YE TI KIRIKIRI NGA ZO TI NYONGO MBANGI

GIGI TI MBI ÂNDÖ:

Mbi na asewa ti mbi e lango lani na Tellancourt, mbeni kete kodoro so ayeke na mbage ti nord-est ti France. Babâ ti mbi ayeke Français na mama ti mbi ayeke zo ti Italie. Na ngoi so mbi yeke na ngu miombe, e gue na Italie, na yâ ti mbeni quartier ti Rome so awayere ayeke dä mingi. Babâ na mama ti mbi ayeke papa lani ngangu ndali ti so ala yeke na kpale ti nginza.

Na ngoi so mbi yeke na ngu 15, mama ti mbi apusu mbi ti wara akamarade. Tongaso, mbi komanse ti lango na gigi teti ambeni ngoi. Hio na pekoni, mbi komanse ti wara asioni kamarade. Mbeni lâ, mbeni koli so akpa nzoni zo aga na mbage ti mbi, lo yôro na mbi mbangi, na mbi mû ni, ngbanga ti so mbi ye ti fa so mbi ga koli awe. Hio, mbi tï na yâ ti kua ti nyongo ti mbangi nga na ti sarango ye ti kirikiri. Fani mingi, a gbu mbi na ngangu a lango na mbi. Gigi ayeke encore ye oko na lê ti mbi ape; tongana mbi kui lani ason nga mbi ape. Mbi yeke lani gi mbi oko. Na ngu 16, mbi tara ti fâ tere ti mbi lani na nyongo ngbenda ti whisky oko kue na mbi gue mbi tï na yâ ti mbeni ngu. Ye ti pekoni ayeke so, teti lango ota, mbi lï na yâ ti coma.

Mbi komanse ti hinga nzerengo ti gigi, me na mbage, mbi ga sioni zo nga zo so asara ye na lege ni ape. Mbi yeke gue mbi sara lango-sioni na azo na da ti ala, mbi zia mbangi na yâ ti ye ti nyongo ti ala, na pekoni mbi yeke nzi aye ti ala. Mbi yeke sara kua lani na agroupe ti abandit, ti kä mbangi ti ala na akodoro so ayeke na yâ ti Italie. Mbi wara tënë na Lapolice lege mingi. Gigi ti mbi aga lani kirikiri na ndani ayeke dä ape. Me, mbi hinga lani so raison so mbi yeke na fini ayeke dä. Mbi sambela Nzapa ti tene lo mû gi na mbi ngu oko ti siriri nga na ti ngia awe.

LEGE SO BIBLE ACHANGÉ FINI TI MBI:

Na ngoi so mbi yeke na ngu 24, mbi mû desizion ti gue na Angleterre. Gigi ti mbi ayeke lani na lê ti kuâ ngbanga ti so mbi yeke kä lani mbangi. Kozo si mbi hon, mbi gue mbi bâ mama ti mbi, na li ti mbi akpe tongana mbi bâ mbeni koli, so iri ti lo ayeke Annunziato Lugarà, so ayeke fa na lo tënë ti Bible. * Teti so mbi hinga so, ândö, lo yeke mbeni  sioni zo, mbeto asara mbi na mbi hunda lo nyen la lo yeke gi ge nyen. Lo fa na mbi aye so lo changé na yâ ti gigi ti lo ti ga Témoin ti Jéhovah, nga lo tene na mbi ti tene mbi gi aTémoin ti Jéhovah ti tene ala manda na mbi Bible, tongana mbi si kâ na Angleterre ni. Mbi yeda. Mawa ni ayeke so, tongana mbi si kâ, mbi kiri na yâ ti ngbene sarango ye ti mbi.

Mbeni lâ, mbi tingbi na mbeni Témoin ti Jéhovah so angbâ ti kangbi Tour ti Ba Ndo na Réveillez-vous ! na ndo ti mbeni lege, so azo ayeke hon dä mingi, na Londres. Tongana mbi rappelé na zendo so mbi mû na Annunziato, mbi hunda na Témoin ni ti manda Bible na mbi.

Aye so mbi manda adö bê ti mbi mingi. Na tapande, bê ti mbi apika tongana mbi diko tënë so ayeke na 1 Jean 1:9, so atene na ndo ti Nzapa atene: “Tongana e fa asiokpari ti e na gigi, lo yeke be-ta-zo nga mbilimbili ti pardone siokpari ti e na ti sukula e.” Versê so andu bê ti mbi mingi ngbanga ti so, gigi so mbi yeke na ni asara si mbi bâ tere ti mbi so mbi yeke saleté mingi. Hio, mbi komanse ti gue na abungbi na Da ti Royaume ti aTémoin ti Jéhovah. A yamba mbi kâ nzoni. Tongana mbi bâ yengo tere so ayeke na popo ti ala, mbi kue mbi ye ti ga mbeni membre ti yâ ti bungbi ti ala ni, ngbanga ti so a yeke mbeni ye so mbi yeke gi ni gingo depuis so la.

A yeke lani ngangu na mbi ape ti zia lege ti mbangi nga na sarango ye ti kirikiri, me a yeke lani ngangu na mbi ti changé asarango ye ti mbi. Mbi bâ so a lingbi mbi ne azo kue. Me juska laso kue, mbi ngbâ ti tiri na asioni pensé. Me na lege ti mungo maboko ti Jéhovah, mbi sara a-effort mingi. Nze omene na peko ti so a manda Bible lani na mbi, mbi wara batême, mbi ga Témoin ti Jéhovah, na ngu 1997.

NZONI YE SO MBI WARA NA PEKONI:

Na peko ti batême ti mbi, mbi sara mariage na Barbara, so lo kue lo ga lani Témoin ti Jéhovah ade ti ninga ape. Tongana mbeni ngbene kamarade ti mbi abâ tongana nyen la mbi changé, lo kue lo komanse ti manda Bible. Na pekoni, lo ga Témoin, lo na ita ti lo ti wali kue. Na pekoni encore, ita ti atâ ti mbi ti wali, so ngu ti lo ahon 80, akomanse ti manda Bible na lo wara batême kozoni si lo kui.

Mbi yeke sara kua fadeso tongana ancien na yâ ti congrégation ti mbi, na mbi na wali ti mbi e yeke fa tënë teti al’heure mingi. E yeke fa tënë na azo so ayeke tënë yanga ti Italien, na gbata ti Londres. Na ambeni ngoi, vundu ayeke sara mbi mingi ndali ti aye so mbi sara ândö, me Barbara ayeke aidé ka mbi mingi. Mbi yeke na mbeni nzoni sewa, so mbi yeke gi ni depuis, nga mbi yeke na Babâ ti mbi ti ndoye so mbi ye ka ti wara ni depuis. Mbi hunda lani na Nzapa ngu oko ti siriri nga na ti ngia, me lo mû na mbi mingi ahon so!

Mbi yeke na mbeni nzoni sewa, so mbi yeke gi ni depuis, nga mbi yeke na Babâ ti mbi ti ndoye so mbi ye ka ti wara ni depuis

^ par. 10 Bâ article, “Bible achangé fini ti azo: Mbi fono lani lâ oko sân ngombe ti mbi ape,” tënë ti Annunziato Lugarà, na yâ ti Tour ti Ba Ndo ti lango 1 ti juillet 2014, lembeti 8-9.