Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 1 2016

 KOTA MAMA-TENE NI | NGBANGA TI NYEN A LINGBI E SARA YE NA LEGE NI?

Sarango ye na lege ni ayeke ga na nzoni ye

Sarango ye na lege ni ayeke ga na nzoni ye

“E hinga e tene e yeke na nzoni yingo-ti-hinga, ngbanga ti so e ye ti sara ye mbilimbili na yâ ti aye kue.”—aHébreu 13:18.

Na yâ ti Bible, tënë ti Grec so a kiri peko ni na “sarango ye na lege ni” aye ti sara tënë ti mbeni ye so ayeke mbilimbili na yâ ti aye kue. A ye nga ti sara tënë ti mbeni pendere ye so a yeke bâ ni na yâ ti sarango ye ti azo.

A-Chrétien amû tënë ti bazengele Paul so na nene ni mingi, so lo tene: “E ye ti sara ye mbilimbili na yâ ti aye kue.” Tënë so aye ti tene nyen?

TIRI NI AYEKE NA YÂ TI TERE TI E

Mingi ti azo, na ndapre, ayeke bâ ka lê ti ala na tatara kozo si ala hon na tambela ti ala. Ngbanga ti nyen? Ngbanga ti so ala ye ti duti pendere na lê ti azo. Me, mbeni ye ayeke dä so ayeke pendere ahon li so e sara wala pendere bongo so e yü. Tongana sarango ye ti e ayeke nzoni, bongo so e yü akiri asara si e yeke pendere mingi, me tongana sarango ye ti e ayeke na lege ni ape, même si e yü bongo tongana nyen, a yeke nzere nga na lê ti azo ape.

Bible afa polele so e azo e yeke lakue na nzara ti sara ye so ayeke na lege ni ape. Genèse 8:21 atene: “Suma ti bibe ti bê ti zo ayeke sioni, a komanse tongana lo de pendere.” Tongaso, a lingbi e tiri na sioni nzara so a dü e na ni so. Bazengele Paul afa tiri so lo yeke tiri na siokpari so ayeke na tere ti lo tongaso: “Na yâ ti bê ti mbi, mbi wara ngia biani na yâ ti ndia ti Nzapa, me mbi bâ na yâ ti amembre ti tere ti mbi mbeni ndia so ayeke sara bira na ndia ti bibe ti mbi na so ayeke gue na mbi tongana ngbâa na mbage ti ndia ti siokpari so ayeke na yâ ti amembre ti tere ti mbi.”—aRomain 7:22, 23.

Na tapande, tongana bê ti e apusu e ti sara ye so ayeke na lege ni ape, a lingbi e hinga so a forcé e ape ti sara gi ye so bê ti e ahunda na e ti sara. A yeke e la e yeke soro. Tongana e soro ti tomba sioni pensé ni so, e lingbi ti ngbâ ti sara ye na lege ni atâa so e yeke na popo ti azo so ayeke sara ye na lege ni ape.

SONGO BENDA NA YÂ TI TIRI NI SO

Ti duti zo so ayeke sara ye na lege ni, a lingbi e wara mbeni ndia so e doit ti mû peko ni. Mawa ni ayeke so, azo mingi laso ayeke mû ngoi ti ala ti décidé na ndo ti abongo so ala doit ti yü, a hon ti gbu li na ndo ti aye so ala doit ti sara ti duti na nzoni sarango ye. Ye ti pekoni ayeke so, atâa so aye so ala yeke sara ayeke na lege ni ape, ala yeke gi araison kue ti fa so a yeke na lege ni. Mbeni buku (The Honest Truth About Dishonesty) atene: “E yeke gi alege kue ti fa so e yeke azo so ayeke sara ye na lege ni.” Me, eskê mbeni nzoni ndia ayeke dä so apeut ti mû maboko na e ti kpe ti sara ye na lege ni ape? En, a yeke dä.

Azo million mingi abâ so Bible a-aidé ala na ndo ti tënë ni so. Andia ti Bible ayeke nde mingi na tanga ti andia (Psaume 19:8). Bible amû na e awango so andu sewa, kua ti nginza, sarango ye ti e nga na songo ti e na Nzapa. Atënë ti yâ ni angbâ lakue ti mû maboko na azo. Atâa e yeke ti kodoro wa, ti mara wa wala e yeke zo wa, andia ti Bible abâ e kue. Tongana e diko Bible, e gbu li na ndo ti aye so a fa na e nga e sara ye  alingbi na ni, a yeke leke e si e ga azo so ayeke sara ye na lege ni.

Ti hinga atâ tënë so ayeke na yâ ti Bible ayeke nzoni, me ti wara lege ti hon ndo ti bibe ti sarango ye so ayeke na lege ni ape, a yeke encore nzoni mingi. Me, e yeke na yâ ti mbeni dunia so ayeke pusu e ti sara ye so ayeke na lege ni ape. A yeke ndali ni la si a lingbi e sambela Nzapa ti tene lo mû maboko na e (aPhilippien 4:6, 7, 13). Na sarango tongaso, e peut ti wara ngangu ti ngbâ ti sara ye so ayeke nzoni nga ti sara ye so ayeke na lege ni na yâ ti aye kue.

ANZONI YE TI PEKO NI

Hitoshi, so e sara tënë ti lo na yâ ti ambage so ahon, awara aye ti nzoni ndali ti so a hinga lo tongana zo so ayeke sara kua ti lo na lege ni. Lo yeke sara kua fadeso na gbe ti mbeni zo so aye mara ti sarango ye ni so. Hitoshi atene: “A nzere na mbi mingi ti wara mbeni kua so asara si bê ti mbi afâ ngbanga na ndo ti mbi ape.”

Ambeni zo kue awara aye ti nzoni tongana lo. Zia e bâ tapande ti ambeni zo so awara aye ti nzoni na sarango ye alingbi na tënë ti Bible so ahunda na e “ti sara ye mbilimbili na yâ ti aye kue.”

  • Bê ti e afâ ngbanga na ndo ti e ape

    “Mbi zia ekole na ngu 13 ti gue ti sara kua na azo ti nzi. Ye ti pekoni ayeke so anginza so kue mbi wara ayeke gi nginza ti nzi. Na peko ti so mbi sara mariage, aTémoin ti Jéhovah akomanse ti manda Bible na mbi na koli ti mbi. E manda so Jéhovah * ake sarango ye na lege ti handa, tongaso e mû desizion ti changé. Na ngu 1990, e mû tere ti e ti sara gi na Jéhovah, nga e wara batême, e ga Témoin ti Jéhovah.”—aProverbe 6:16-19.

    “Ândö, yâ ti da ti mbi asi singo na akungba ti nzi, me fadeso aye ni so ayeke encore dä ape; ye so asara si bê ti mbi afâ ngbanga na ndo ti mbi ape. Tongana mbi pensé na gbâ ti angu so mbi mû lani ti sara aye so ayeke na lege ni ape, mbi yeke kiri merci na Jéhovah so lo sara nzoni bê na mbi so. A nzere na mbi mingi ti gue lakue ti lango na bï na hingango so, fadeso, mbi nzere na lê ti Jéhovah.”—Cheryl, na Irlande.

    “Na ngoi so patron ti mbi amä so mbi ke ti yeda na goro so mbeni kota client aye ti pete na mbi, lo tene: ‘Nzapa ti mo asara si mo ga mbeni zo so zo apeut ti sara confiance na lo! Pasa la e yeke na ni ti wara mo na yâ ti ndokua ti e so.’ Ti sara ye na lege ni na yâ ti aye kue asara si bê ti mbi afâ ngbanga na ndo ti mbi ape na gbele Jéhovah Nzapa. A sara nga si mbi peut ti mû maboko na afami ti mbi nga na amba ti mbi ti sara mara ni.”—Sonny, na Hong Kong.

  • Siriri ti bê

    “Mbi yeke sara kua na yâ ti mbeni kota banque. Na yâ ti kua ni so, bibe ti gango zo ti mosoro asara si azo ayeke pusu ka sarango ye na lege ni na peko. Mingi ti azo ayeke tene: ‘Sioni ti nyen la ayeke dä tongana kete ye so zo asara, so ayeke na lege ni ape, aga na mosoro nga konomi ague na li ni?’ Me, so mbi sara ti mbi ye na lege ni, a sara si mbi yeke na siriri ti bê. Mbi leke na bê ti mbi ti ngbâ ti sara ye na lege ni atâa aye ti pekoni ayeke so wa. Apatron ti mbi ahinga so mbi peut ti tene mvene na ala ape wala ndali ti ala ape.”—Tom, na États-Unis.

  • Mo wani mo yeke bâ so mo ne

    “Chef ti mbi ti kua ahunda na mbi ti tene mvene na ndo ti ambeni kungba so agirisa na place ti kua, me mbi ke. Tongana a hinga azo so anzi aye ni so, patron ti mbi agonda mbi ngbanga ti so mbi sara ye na lege ni. Na yâ ti sioni dunia so, ti sara ye na lege ni a hunda ti sara mbeto ape. Me, na nda ni, azo ayeke sara confiance na e na ala yeke ne e.”—Kaori, na Japon.

Bê so afâ ngbanga na ndo ti zo ape, siriri ti bê nga na nengo so e ne na lê ti azo ayeke ambeni ye ti nzoni so e lingbi ti wara tongana e yeke sara ye na lege ni. Mo yeda na tënë so?

^ par. 18 Jéhovah ayeke iri ti Nzapa na yâ ti Bible.

TI HINGA AMBENI TËNË

Tongana nyen andia ti Nzapa ayeke sara nzoni na e?

Jésus afa ndani so e bezoin ti tene Bible afa lege na e. Lo fa nga akota ndia ni use.