Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 1 2016

 MBENI TËNË TI NDARA TI ÂNDÖ NDALI TI AZO TI LASO

Gi bê ti mo ahon ndo ni ape

Gi bê ti mo ahon ndo ni ape

YE SO BIBLE AFA: “Ala zia ti gi bê ti ala na ndo ti âme ti ala.”—Matthieu 6:25.

Ye so aye ti tene nyen? Jésus atene atënë so lani na ngoi so lo yeke fa ye na ndo ti mbeni hoto. Ti gue oko na mbeni bakari, tënë ti Grec so a kiri peko ni na “ti gi bê” aye ti sara tënë ti “sarango ye so zo ayeke sara ka, so ayeke na lege ni, tongana lo tï na yâ ti yere, nzara asara lo wala tongana lo tingbi na akpale ti lâ oko oko.” Mingi ni, tënë ni andu gingo bê na ndo ti aye so apeut ti si kekereke. A yeke sioni ape ti gi bê na ndo ti aye so e yeke na bezoin ni nga ti pensé na nzoni duti ti azo so e ye ala (aPhilippien 2:20). Me tongana Jésus atene “ala gi bê ti ala lâ oko pëpe,” lo ye ti gboto mê ti adisciple ti lo ti gi bê ti ala ahon ndo ni ape, wala ti sara mbeto ahon ndo ni ape ndali ti aye ti kekereke. Ye so apeut ti sara si ala yeke na ngia ape.—Matthieu 6:31, 34.

Tënë ni alingbi na ngoi ti e? A yeke nzoni ti mä wango ti Jésus so. Ngbanga ti nyen? Ambeni mbeti afa so tongana azo agi bê ti ala ahon ndo ni, cerveau ti ala ayeke wu tere ape, nga ni la “ayeke na gbe ti akobela tongana kobela ti kä ti yâ (ulcère), kobela ti bê nga na asthme.”

Jésus afa vrai raison so ndali ni a lingbi e gi bê ti e ahon ndo ni ape: a yeke changé nga ye oko ape. Lo tene: “Zo wa na popo ti ala, tongana lo ngbâ ti gi bê ti lo, lo lingbi ti zia mbeni kete lango na ndo ti fini ti lo?” (Matthieu 6:27). Pensengo na ndo ti akpale ti e apeut nga ti zia nzene nzene penze-ngbonga oko tongaso na ndo ti fini ti e ape wala même ti sara ape si gigi ti e aga nzoni. Nga mingi ni, aye ayeke passé ka pëpe tongana ti so e sara mbeto ni. Mbeni wandara atene so, tongana mbeni zo ayeke gi bê ti lo na ndo ti kekereke, andâ lo yeke buba ngangu ti lo la, ndali ti so mingi ni, aye so e pensé e tene ayeke si ande, ni la ayeke si ka ape.

E lingbi ti kpe ti gi bê ti e ahon ndo ni tongana nyen? Kozoni, sara confiance na Nzapa. Asingana andeke so Nzapa amû na ala kobe nga na afleur so lo yü na ala bongo, si na e azo, so e yeke gi ti sara ye so bê ti lo aye, lo lingbi ti mû na e aye so e yeke na bezoin ni ape? (Matthieu 6:25, 26, 28-30). Use ni, pensé gi na ye so mo yeke na bezoin ni na yâ ti lango ni so. Jésus atene: “Ala gi bê ti ala lâ oko pëpe ngbanga ti kekereke, teti fade kekereke ayeke na agingo bê ti lo wani.” So lo tene “akpale ti lango oko oko alingbi na lango ni,” eskê ayeke mvene la?—Matthieu 6:34.

Tongana e sara ye alingbi na wango ti ndara ti Jésus so, e yeke kpe ande ti sara sioni na tere ti e wani. Na ndo ni, e yeke wara siriri ti bê so Bible airi ni “siriri ti Nzapa”.—aPhilippien 4:6, 7.