Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 6 2017

Cadeau so ayeke kota mingi ahon atanga ni kue ayeke ye so a futa ti zi na azo, ndali ti so grâce na ni azo ayeke wara fini ti lakue lakue

 KOTA MAMA-TENE NI | Cadeau wa la ayeke pendere mingi?

Cadeau wa la ayeke pendere mingi?

Cadeau wa la ayeke pendere mingi?

“Nzoni matabisi kue nga na matabisi kue so ayeke mbilimbili-kue alondo na nduzu si adescend, ndali ti so a londo na Babâ ti alumière so ayeke na lê ti nduzu.” (Jacques 1:17). Versê so afa Jéhovah, Babâ ti e ti yayu, tongana Nzapa so ayeke mû ye na zo. Me na popo ti acadeau kue so Nzapa asara na azo, mbeni oko ayeke dä so ayeke kota mingi ahon atanga ni kue. A yeke so wa? Tënë ti Jésus so ayeke na Jean 3:16 afa na e atene: “Nzapa andoye tâ azo ti dunia so mingi si lo mû gï oko Molenge ti lo si zo kue so amä na bê na lo, a lingbi ti futi lo pëpe, me lo yeke na fini ti lakue lakue.”

Cadeau so Nzapa amû, so ayeke oko Molenge ti lo, ayeke biani cadeau so ayeke kota mingi so mbeni zo ade ti wara mara ni lâ oko ape, ngbanga ti so cadeau ni apeut ti zi e na gbe ti ngbâa ti siokpari, mbakoro nga na kuâ (Psaume 51:5; Jean 8:34). Atâa nyen la e sara, e wani e lingbi pëpe ti sara mbeni ye ti zi terê ti e na gbe ti ngbâa so. Me na lege ti kota ndoye ti Nzapa, lo mû na e ye so e bezoin ni ti sigi na gbe ti ngbâa so. Na mungo oko Molenge ti lo, Jésus Christ, tongana ye so a futa ti zi azo, Jéhovah Nzapa amû beku ti fini ti lakue lakue na azo so amä yanga ti lo. Me ye so a futa ti zi azo ayeke nyen? Ngbanga ti nyen la a yeke kota ye? E yeke wara ye ti nzoni dä tongana nyen?

Ye so a futa ti zi azo ayeke ye so apayé ni na place ti mbeni ye so abuba wala ti zi mbeni zo na gbe ti ngbâa. Bible atene so a créé lani akozo babâ na mama ti e, Adam na Ève, na siokpari na terê ti ala pëpe na a mû na ala, nga na amolenge so ala yeke dü, beku ti duti na fini lakue lakue na yâ ti paradis na ndö ti sese (Genèse 1:26-28). Ala girisa pasa so ndali ti so ala ke yanga ti Nzapa, ni la ala ga awasiokpari. Nyen la asi na pekoni? Bible atene: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” (aRomain 5:12). Ahon ti tene fade Adam adü amolenge so ayeke mbilimbili-kue, lo dü ala na siokpari na terê ti ala na ye ti peko ni ayeke kuâ.

Na ndö ti tënë ti ye so a futa na place ti mbeni ye, a hunda ti tene ye so a futa ni alingbi na place ti ye so abuba. Na ngoi so Adam ake yanga ti Nzapa na mbana, lo sara siokpari na ye ti peko ni ayeke so lo yeke mbilimbili-kue encore ape. Tongana ti so Bible atene, ye so asara si amolenge ti Adam aga angbâa ti siokpari nga na kuâ. Tongaso, ye so a mû a futa na place ni ayeke fini ti mbeni zo so ayeke mbilimbili-kue, fini ti Jésus, so a mû na sandaga ti zi azo na gbe ti ngbâa (aRomain 5:19; aÉphésien 1:7). A yeke gï ndali ti so na ndoye Nzapa afuta mbeni ye ti zi na azo la si e azo e yeke na beku ti wara ye so Adam na Ève agirisa ni lani, so ayeke ti duti na fini lakue lakue na yâ ti paradis na ndö ti sese.​—Apocalypse 21:3-5.

Na lege ti ye so Nzapa asara so, kite ayeke dä ape so cadeau so ayeke kota mingi ahon atanga ni kue ayeke ye so a futa ti zi na azo, ndali ti so grâce na ni azo ayeke wara fini ti lakue lakue. Ti bâ nene ti ‘matabisi so ayeke mbilimbili-kue’ so, zia e bâ tongana nyen la cadeau ni so ague oko na aye nde nde so e bâ na yâ ti mbage so ahon, so a mû lege na e ti bâ mbeni cadeau na nene ni.

A kaï nzara so e yeke na ni. E azo e yeke na kota nzara ti ngbâ na fini, a yeke ye so a dü e na ni dungo  (Zo-ti-fa-tene 3:11). Atâa so e wani e lingbi ti kaï nzara ni so ape, sandaga ti Jésus asara si e lingbi ti kaï nzara so. Bible atene: “Ndali ti so futa ti peko ti siokpari ayeke kuâ, me matabisi so Nzapa amû ayeke fini ti lakue lakue na lege ti Christ Jésus Seigneur ti e.”​—aRomain 6:23.

A mû na e ye so e yeke na bezoin ni. Mbeni zo alingbi ti mû mara ti sandaga tongaso ndali ti e ape. Bible atene: “Teti ye so a hunda ti futa ndali ti fini ti azo ayeke ngangu mingi si a yeke hon ti lo ngangu ti ala lakue.” (Psaume 49:8). Tongaso, e azo e yeke tâ na bezoin ti tene Nzapa amû maboko na e ti sigi na gbe ti ngbâa ti siokpari na kuâ. Me “na lege ti ye so Christ Jésus afuta ti zi azo,” Nzapa amû na e ye so e bezoin ni.​—aRomain 3:23, 24.

A mû ni tâ na nzoni ngoi ni. Bible atene na e, atene: “Tongana e ngbâ lani awasiokpari, Christ akui ndali ti e.” (aRomain 5:8). Ndali ti so Nzapa amû sandaga so na ngoi so “e ngbâ lani awasiokpari” sandaga ni afa na e so Nzapa aye e mingi atâa so e yeke na siokpari na terê ti e. Nga a mû maboko na e ti ku gbâ ti aye ti nzoni so ayeke ga ande atâa so a lingbi e gbu ngangu na yâ ti aye ti peko ti siokpari.

A mû ni na sioni bibe ape. Bible afa ye so apusu Nzapa ti mû Molenge ti lo na sandaga, atene: “A bâ ndoye ti Nzapa na mbage ti e na lege so: Nzapa atokua lani oko Molenge ti lo na dunia so si e lingbi ti wara fini na lege ti lo. A bâ ndoye ni na lege so, a yeke e la e ndoye Nzapa pëpe, me a yeke lo la si lo ndoye e.”​—1 Jean 4:9, 10.

Tongana nyen la mo lingbi ti fa so mo bâ na nene ni kota cadeau so ahon atanga ni kue so? Dabe ti mo na tënë so Jésus atene na Jean 3:16 so afa so gï azo so “amä na bê” na lo la ayeke sö ala ande. Tongana ti so Bible afa, mabe ayeke “hingango biani so aye so mo yeke ku ni kungo ayeke si biani.” (aHébreu 11:1). Ti duti na beku ni so, a lingbi e wara tâ hingango ye na ndö ti Bible. Ni la, e hunda na mo ti manda ye na ndö ti Jéhovah Nzapa, Lo so amû ‘matabisi so ayeke mbilimbili-kue’ so nga ti gi ti hinga ye so mo lingbi ti sara ti wara fini ti lakue lakue so sandaga ti Jésus aga na ni na mo.

Mo lingbi ti manda aye ni so kue tongana mo diko ambeti so ayeke na ndö ti site www.jw.org, so atënë ni alondo na yâ ti Bible. A yeke nzere na aTémoin ti Jéhovah ti mû maboko na mo. E hinga biani so, tongana mo manda ye na ndö ti kota cadeau ni so nga mo wara ye ti nzoni dä, a yeke pusu mo ti tene: “Singila na Nzapa na lege ti Jésus Christ Seigneur ti e!”​—aRomain 7:25.