Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 6 2017

 AZO AHUNDA ATENE . . . 

A-Chrétien adoit ti sara matanga ti Noël?

A-Chrétien adoit ti sara matanga ti Noël?

Azo mingi na yâ ti dunia amä na bê so matanga ti Noël ayeke matanga ti dungo ti Jésus Christ. Eskê mo pensé so akozo Chrétien, ala so ayeke lani na terê ti Jésus, ayeke sara lani matanga ti Noël? Mo hinga ye so Bible atene na ndö ti amatanga ti dungo? Tongana e wara akiringo tënë na ahunda so, a yeke aidé e ti hinga wala aChrétien adoit ti sara matanga ti Noël wala ala doit ti sara ape.

Kozoni, Bible asara pëpe tënë ti matanga ti dungo Jésus wala matanga ti dungo mbeni wakua ti Nzapa so ayeke be-ta-zo. Bible asara gï tënë ti azo use so asara matanga ti dungo ala. Ala use kue ayeke azo so avoro pëpe Jéhovah, Nzapa so a sara tënë ti lo na yâ ti Bible, nga na ngoi ti matanga ti ala ni ambeni ye ti sioni asi (Genèse 40:20; Marc 6:21). Mbeni mbeti (the Encyclopædia Britannica) atene so akozo Chrétien ake lani “tënë ti sarango matanga ti dungo so alondo na apaïen.”

A dü Jésus na lango wa?

Bible afa pëpe mbilimbili lango so a dü na Jésus. Mbeni mbeti (McClintock and Strong’s Cyclopedia) atene so na yâ ti Fini Testament wala même mbeni mbeti nde, e lingbi pëpe ti wara mbeni ye so alingbi ti fa na e mbilimbili lango so a dü na Jésus. Ti tâ tënë ni, tongana fade Jésus aye ti tene adisciple ti lo asara matanga ti dungo lo, ka lo sara kue ti tene ala hinga lango so a dü na lo.

Use ye ni ayeke so, Bible afa pëpe so Jésus wala mbeni disciple ti lo asara lani matanga ti Noël. Tongana ti so mbeni mbeti (New Catholic Encyclopedia) atene, tënë matanga ti Noël asigi ti kozoni na yâ ti mbeni mbeti (Chronograph of Philocalus) so ayeke mbeni mbeti ti aRomain so afa lango ti ambeni matanga ti dungo na yâ ni, so a sigi na ni na ngu 336. A yeke polele so aye ni so asi na peko ti so a hunzi sungo Bible nga a sara angu mingi na peko ti so Jésus aga na sese. Ni la, McClintock nga na Strong atene so “sarango matanga ti Noël ayeke ye so Nzapa la azia gere ni na sese ape wala ayeke nga pëpe na yâ ti Fini Testament so a sû ândö.” *

Nyen la Jésus ahunda na adisciple ti lo ti dabe ti ala na ni?

So Jésus ayeke Kota Wafango ye, lo fa na adisciple ti lo polele ye so ala doit ti sara, na a sû ni na yâ ti Bible. Me tënë ti sarango matanga ti Noël ayeke na yâ ni ape. Legeoko tongana ti so mbeni maître aye pëpe si a-élève ti lo asara ye ague nde na ye so lo fa na ala, Jésus nga aye pëpe si adisciple ti lo asara “ye ahon ti so a sû” na yâ ti Bible.​—1 aCorinthien 4:6.

Na mbage, mbeni ye ayeke dä so ayeke kota mingi so akozo Chrétien ahinga ni nzoni: A yeke ti dabe na kuâ ti Jésus. Jésus lo wani lo fa na adisciple ti lo lawa la ala doit ti sara na ni nga tongana nyen ala yeke sara ni. A sara tënë ti aye ni so lo fa so nga na ti lango ti kuâ ti lo na yâ ti Bible.​—Luc 22:19; 1 aCorinthien 11:25.

Tongana ti so e londo ti bâ, Noël ayeke matanga ti dungo, na akozo Chrétien asara pëpe matanga ni so, so alondo na apaïen so. Mbeni ye ni nga ayeke so, Bible afa pëpe so Jésus wala mbeni zo nde asara lani matanga ti Noël. A yeke ndali ti araison so la si aChrétien kutu mingi na yâ ti dunia abâ so ala doit ti sara pëpe matanga ti Noël.

^ par. 6 Ti hinga tënë mingi na ndö ti nda ti matanga ti Noël, bâ mbage so atene, “Azo ahunda atene . . . Tâ tënë na ndo ti Noël ayeke so wa?” so ayeke na yâ ti Tour ti Ba Ndo ti lango 1 ti décembre 2014, a yeke nga na ndö ti www.jw.org.