Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 5 2017

Mbi na wali ti mbi, Tabitha, e ngbâ ti fa tënë ti Nzapa

 BIBLE ACHANGÉ FINI TI AZO

Mbi pensé lani so Nzapa ayeke dä ape

Mbi pensé lani so Nzapa ayeke dä ape
  • A DÜ LO NA NGU: 1974

  • NA KODRO TI: RÉPUBLIQUE DÉMOCRATIQUE TI ALLEMAGNE

  • LO YEKE ÂNDÖ: MBENI ZO SO AMÄ NA BÊ SO NZAPA AYEKE DÄ APE

GIGI TI MBI ÂNDÖ

A dü mbi na mbeni kete kodro ti kodro ti Saxe, so na pekoni aga mbeni oko ti akodro so ayeke na yâ ti République Démocratique ti Allemagne (RDA). Na yanga-da ti e ngia nga na yengo terê ayeke dä, nga babâ na mama ti mbi afa na mbi anzoni sarango ye. Kodro ti RDA ayeke mbeni kodro so ayeke Communiste, na ti mingi ti azo lani na Saxe, tënë ti Nzapa ayeke nga kota ye na lê ti ala ape. Na mbi lani, Nzapa ayeke dä ape. Juska mbi wara ngu 18, abango ndo use asara ye mingi na ndö ti mbi: tënë ti mango na bê na Nzapa ape nga na tënë ti Communisme.

Ngbanga ti nyen la si mbi ye tënë ti Communisme? Ngbanga ti so pensé so a tene zo kue ayeke gï oko so anzere na mbi mingi. Na ndö ni, mbi pensé so ayeke nzoni ti kangbi yâ ti aye na azo alingbi terê, tongaso si ambeni zo aga azo ti mosoro mingi na ambeni atï na yâ ti kota yere ape. Ni la, mbi linda na yâ ti mbeni bungbi ti amaseka so ayeke acommuniste. Na ngu 14, mbi bi terê ti mbi mingi na yâ ti mbeni kua so abâ lege ti rongo akugbe-mbeti so azo abi ni ti kiri ti sara si aga mbeni fini kugbe-mbeti. Terê ti akota zo ti gbata ti Aue anzere mingi, ala sara na mbi ambeni cadeau. Atâa so mbi yeke lani maseka, mbi wara lege ti hinga ambeni kota zo ti poroso ti kodro ti RDA. Mbi bâ mbi tene nzoni lege la mbi yeke mû so nga nzoni gigi ti kekereke ayeke ku mbi.

Gï gbagburu, aye kue achangé. Na ngu 1989, Mur ti Berlin atï nga bungbi ti akodro ti Europe ti Est so ayeke acommuniste atï nga. Aye ni abuba gï na peko ti terê. Mbi ga ti bâ so sarango ye na lege ni ape amû ndo na yâ ti kodro ti RDA. Na tapande, tongana mbeni zo aye tënë ti Communisme ape, a yeke bâ lo tongana senge zo. Ye tongaso apeut ti si tongana nyen? Eskê e acommuniste e yeda ka so azo kue ayeke gï oko ape? Tënë ti Communisme ayeke gï senge tënë ti bango li? Mbi gi bê ti mbi lani mingi.

Ye so asara si na pekoni mbi bi terê ti mbi na kua ti mozoko nga na sarango adessin. So mbi wara lani lege ti manda pikango mozoko na ekole, na mbi peut ti wara pasa lani ti gue na Université ni, a sara si mbi ye lani ti ga mbeni zo ti pikango mozoko nga mbeni zo so ayeke sara adessin. Na ndö ni, mbi dö anzoni sarango ye so a fa lani na mbi na kete ti mbi, mbi zia. Ye so ayeke kota ye lani na lê ti mbi ayeke ti sara vie, ti gi gï awali awe. Me, mozoko, sarango dessin nga na vie ti kirikiri ni so asara si agingo bê ti mbi ahunzi ape. Même adessin so mbi sara asara zo mbeto. Nyen la ayeke ku e kekereke? Ngbanga ti nyen la e yeke na fini?

 Na ngoi so mbi ga ti wara akiringo tënë so mbi yeke na bezoin ni, bê ti mbi adö. Na mbeni lakui na ekole, mbi duti na popo ti mbeni groupe ti a-étudiant so angbâ ti sara lisoro na ndö ti gigi ti kekereke. Mandy * so ayeke mbeni étudiant ni ayeke Témoin ti Jéhovah. Gï na ngoi ni so, lo fa na mbi nzoni lege. Lo tene na mbi, lo tene: “Andreas, tongana mo ye ti wara akiringo tënë na ahunda ti mo na ndö ti fini nga na gigi ti kekereke, Bible la alingbi ti fa ni na mo.”

Mbi yeke na confiance na tënë ni so kue ape, me mbi decidé ti gi akiringo tënë ni na yâ ti Bible. Mandy afa na mbi Daniel chapitre 2, na ye so mbi diko dä apika bê ti mbi mingi. Prophétie ni so afa molongo ti akodro, wala agouvernement so akomande dunia kue depuis ândö juska laso. Mandy afa na mbi ambeni prophétie ti Bible so asara tënë na ndö ti gigi ti e ti kekereke. Na nda ni, mbi wara akiringo tënë na ahunda ti mbi awe! Me zo wa la asû aprophétie ni so? Nga zo wa la alingbi ti fa ye na ndö ti gigi ti kekereke tâ nzoni mingi tongaso? Eskê aye so afa so Nzapa ayeke dä biani la ape?

LEGE SO BIBLE ACHANGÉ FINI TI MBI

Mandy afa mbi na Horst nga na Angelika, mbeni koli na wali ti lo so ayeke aTémoin ti Jéhovah, na ala aidé mbi ti mä yâ ti Bible nzoni. Hio mbi hinga so aTémoin ti Jéhovah la ayeke gï oko bungbi ti Nzapa so ayeke di lakue iri ti Nzapa, Jéhovah, nga ala yeke fa ni na azo (Psaume 83:18; Matthieu 6:9). Mbi manda so Jéhovah Nzapa amû na azo pasa ti ngbâ na fini lakue lakue na yâ ti paradis na ndö ti sese. Mbeti ti Psaume 37:9 atene: “Azo so angbâ ti ku Jéhovah, sese ayeke ga ye ti ala.” Ye so amû lege na mbi ti hinga so, azo kue so asara ye alingbi na andia ti Nzapa so ayeke na yâ ti Bible, alingbi ti duti na yâ ti paradis ni.

Me, mbi sara ngangu ti changé sarango ye ti mbi tongaso si mbi sara ye ague oko na aye so Bible afa. Anzoni ye so mbi wara na yâ ti kua ti pikango mozoko asara si mbi ga zo ti baba, ni la kozoni kue mbi doit ti manda ti sara terê ti mbi kete. Na ndö ni, a yeke kete ye na mbi ape ti zia lege ti asioni sarango ye ti mbi. Mbi yeke na ngia mingi ti bâ so Jéhovah ayeke kanga bê, lo yeke na nzoni bê nga lo comprendre azo so ayeke sara ngangu kue ti sara ye alingbi na aye so Bible afa.

Juska na ngoi so mbi wara ngu 18, mbi mä na bê na tënë ti Communisme nga na tënë so a tene Nzapa ayeke dä ape. Ngbene ye na ngoi ni so, Bible achangé fini ti mbi. Aye so mbi manda asara si mbi gi bê ti mbi encore na ndö ti gigi ti kekereke ape nga a sara si mbi hinga ndani so mbi yeke na fini. Na ngu 1993, mbi wara batême mbi ga Témoin ti Jéhovah nga na ngu 2000, mbi sara mariage na Tabitha, mbeni wali so aye Jéhovah mingi. E mû ngoi mingi ti aidé amba ti e ti hinga Bible. Mingi ti azo so e tingbi na ala ayeke azo so ayeke ândö tongana mbi, ala nga kue amä na bê na tënë ti Communisme nga na tënë so a tene Nzapa ayeke dä ape. A nzere na mbi mingi ti fa na ala ti hinga Jéhovah.

NZONI YE SO MBI WARA NA PEKONI

Na ngoi so mbi komanse ti gue na popo ti aTémoin ti Jéhovah pan, a sara babâ na mama ti mbi nzoni oko ape. Me na pekoni ala bâ so sarango ye ti mbi achangé ndali ti so mbi yeke na popo ti aTémoin ti Jéhovah. Anzere na mbi mingi so fadeso ala yeke diko Bible nga ala yeke gue na abungbi ti aTémoin ti Jéhovah.

Mbi na Tabitha e wara ngia na yâ ti mariage ti e ndali ti so e sara kue ti sara ye alingbi gï na awango so Bible amû na akoli na awali so asara mariage awe. Na tapande, so e sara ye alingbi na wango so Bible amû na ndö ti dutingo be-ta-zo na koli wala wali ti e, a sara si mariage ti e akpengba.​—aHébreu 13:4.

Mbeto ti gigi asara encore mbi ape nga mbi gi bê ti mbi ndali ti gigi ti kekereke ape. Mbi yeke na yâ ti mbeni sewa ti aita ti mbi aTémoin ti Jéhovah so ayeke na ndö ti sese kue, sewa so ayeke na tâ siriri nga ayeke beoko. Na yâ ti sewa ni so, e yeke sara kangbi na popo ti mba ape. Ye so mbi ye la nga mbi yeke sara kue ti sara ye tongaso na mbage ti azo na yâ ti gigi ti mbi kue.

^ par. 12 A changé iri ni.