Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo  |  No. 5 2017

 KOTA MAMA-TENE NI | BIBLE ATENE NYEN NA NDÖ TI A-ANGE?

A-ange apeut ti aidé mo tongana nyen?

A-ange apeut ti aidé mo tongana nyen?

A-ange so ayeke be-ta-zo aye mingi ti hinga aye so azo ayeke sara na ala yeke sara kua mingi ti sara si ye so bê ti Jéhovah aye asi biani. Na ngoi so Nzapa asara sese, a-ange “adekongo na ngia legeoko, nga amolenge ti Nzapa kue ato nda ti dekongo ti sepela lo.” (Job 38:4, 7). Na yâ ti mbaï ti azo, a-ange afa so ala yeke na nzara ti ‘zia lê ti ala mbilimbili’ na ndö ti aprophétie so andu aye so ayeke si ande na ndö ti sese.​—1 Pierre 1:11, 12.

Bible afa so ti tene a sara si ye so bê ti Nzapa aye asi biani, na ambeni ngoi a-ange ayeke bata avrai wakua ti Nzapa (Psaume 34:7). Na tapande:

  • Na ngoi so Jéhovah afuti sioni gbata ti Sodome na Gomorrhe, a-ange amû lani maboko na Lot so ayeke be-ta-zo na Nzapa, lo na sewa ti lo ti kpe.​—Genèse 19:1, 15-26.

  • Ândö na Babylone, na ngoi so a fâ ngbanga ti kuâ na li ti aHébreu ota, so ayeke amaseka, na a bi ala na yâ ti mbeni four so achauffé ngangu, Nzapa “atokua ange ti lo na lo zi awakua ti lo.”​—Daniel 3:19-28.

  • Na peko ti so Daniel, so ayeke zo ti mbilimbili, asara bï oko na yâ ti dû ti asioni bamara, lo fa so lo sö kuâ ngbanga ti so Nzapa “atokua ange ti lo na lo kanga yanga ti abamara ni.”​—Daniel 6:16, 22.

Ngbene ye giriri la a-ange ayeke mû maboko na awakua ti Nzapa so ayeke be-ta-zo

A-ANGE AMÛ MABOKO NA CONGRÉGATION TI AKOZO CHRÉTIEN

Na ambeni ngoi, a-ange ti Nzapa amû maboko na congrégation ti akozo Chrétien na ngoi so a bezoin ti tene a sara mbeni ye si ye so Jéhovah aleke ti sara asi biani. Na tapande:

  • Mbeni ange azi ayanga ti da ti kanga so a kanga abazengele dä, na lo tene na ala ti gue ti fa tënë na yâ ti temple.​—Kusala 5:17-21.

  • Mbeni ange atene na Philippe so ayeke fa tënë ti Nzapa ti mû mbeni lege so ayeke na yâ ti désert, so alondo na Jérusalem ti si na Gaza, na ti gue ti fa tënë na mbeni zo ti Éthiopie so alondo na Jérusalem ti voro Nzapa.​—Kusala 8:26-33.

  • Tongana ngoi alingbi awe ti tene Nzapa azia lege na azo so ayeke aJuif ape ti ga aChrétien, mbeni ange aga na Corneille, so ayeke mbeni turugu ti kota kamba ti Rome, na yâ ti vision na lo tene na lo ti tene na bazengele Pierre ti ga na da ti lo.​—Kusala 10:3-5.

  • Na ngoi so bazengele Pierre ayeke na da ti kanga, mbeni ange asi na lo na lo zi lo na da ti kanga ni.​—Kusala 12:1-11.

 A-ANGE APEUT TI AIDÉ MO TONGANA NYEN?

Ye oko afa ape so Nzapa ayeke sara kua laso na a-ange ti aidé azo na lege ti amiracle tongana ti so Bible atene. Me, Jésus asara tënë ti mbeni ye so ayeke passé laso, lo tene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” (Matthieu 24:14). Eskê mo hinga so adisciple ti Christ ayeke sara kua ni so na gbe ti fango lege ti a-ange?

A-ange ayeke mû maboko ti tene a fa nzoni tënë na ndö ti sese mobimba

Mbeti ti Apocalypse afa so a-ange asara ye mingi ti aidé azo kue na ndö ti sese ti hinga ye na ndö ti Jéhovah Nzapa nga na aye so lo leke ti sara tënë ti azo. Bazengele Jean asara tënë so na mbeti, lo tene: “Mbi bâ mbeni ange nde so ayeke huru kâ na lê ti nduzu, lo yeke na mbeni nzoni tënë ti lakue lakue ti fa ni tongana nzoni sango na azo so asara kodro na ndö ti sese, na amara kue, akete mara kue, azo ti ayanga ti kodro kue nga na azo ti kodro kue. Lo yeke tene na kota go: ‘Ala kpe mbeto ti Nzapa na ala mû gloire na lo, ndali ti so l’heure ti tene lo fâ ngbanga asi awe, tongaso ala voro Lo so asara yayu na sese, ngu-ingo na ali ti ngu.’” (Apocalypse 14:6, 7). Laso gbâ ti aye so asi afa so a-ange ayeke mû maboko na kua ti fango tënë ti Royaume so a yeke sara ni na ndö ti sese kue. A yeke tâ tënë so, même tongana gï mbeni zo ti sioni oko achangé asarango ye ti lo na lo kiri na Jéhovah, “ngia ayeke na popo ti a-ange ti Nzapa”.​—Luc 15:10.

Nyen la ayeke si ande tongana a hunzi kua ti fango tënë ni? Ye so ayeke si na pekoni ayeke so “aturugu [ti ange] so ayeke na yayu” ayeke aidé ande Jésus Christ, so ayeke Gbia ti agbia, ti sara “bira ti kota lâ ti Nzapa, Lo so ngangu ti lo ahon angangu kue” na ngoi ti Harmaguédon (Apocalypse 16:14-16; 19:14-16). A-ange so ayeke na ngangu mingi so ayeke sara kua tongana azo so Nzapa asara kua na ala ti fâ ngbanga na ngoi so Seigneur Jésus ayeke “kiri na peko ti sioni na azo . . . so asara ye alingbi pëpe na nzoni tënë na ndö ti Seigneur ti e Jésus.”​—2 aThessalonicien 1:7, 8.

Me, hinga na bê ti mo so a-ange aye mingi ti bâ aye so mo yeke sara. Ala yeke gi bê ti ala mingi na ndö ti nzoni duti ti azo so ayeke na nzara ti voro Nzapa, nga Jéhovah asara kua na ala lege mingi ti kpengba nga ti bata awakua be-ta-zo ti lo na ndö ti sese.​—aHébreu 1:14.

Fadeso, e oko oko kue e yeke na mbeni ngangu desizion ti mû. Eskê e yeke mä yanga nga e yeke sara ye alingbi na nzoni tënë so a yeke fa ni na ndö ti sese kue? A yeke nzere mingi na aTémoin ti Jéhovah ti ndo so mo yeke dä ti aidé mo ti wara ye ti nzoni na lege ti mungo maboko ti a-ange ti Nzapa so ayeke ngangu mingi nga andoye e.

 

TI HINGA AMBENI TËNË

NZONI TËNË SO ALONDO NA NZAPA!

Mo lingbi ti sara nyen ti ga nduru na Nzapa?

Nzapa ayeke mä asambela kue? E yeke sambela lo tongana nyen? E lingbi ti sara nga nyen ti ga nduru na lo? Bâ atënë so a tene ge.

TOUR TI BA NDO

Avision na ndo ti azo so ayeke na yayu

Nyen la Bible afa na ndo ti Jéhovah Nzapa, Jésus Christ nga na a-ange be-ta-zo so?