Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juillet 2017

Ngbanga ti nyen ti “sepela Jah”?

Ngbanga ti nyen ti “sepela Jah”?

“Ala sepela Jah! . . . A nzere mingi nga a yeke na lege ni ti sepela lo!”—PS. 147:1.

ABIA: 104, 152

1-3. (a) Na bango ni, a sû Psaume 147 na ngoi wa? (b) Nyen la e lingbi ti manda na lege ti Psaume 147?

TONGANA mbeni zo asara mbeni kua so a mû na lo nzoni wala lo yeke na mbeni nzoni sarango ye, lo lingbi ti tene a gonda lo. Tongana e yeke gonda azo, biani, e yeke na araison mingi ti gonda Jéhovah Nzapa! E lingbi ti gonda lo ndali ti kota ngangu ti lo, so e yeke bâ ni na yâ ti apendere ye so lo sara. E lingbi nga ti gonda lo ndali ti so lo sara ye na azo na ndoye, na e yeke bâ ni na lege ti ye so Molenge ti lo wani afuta ti zi azo.

2 Bê ti zo ti sungo Psaume 147 apusu lo ti sepela Jéhovah. Lo wa nga ambeni zo ti sepela Nzapa legeoko na lo.—Diko Psaume 147:1, 7, 12.

3 E hinga pëpe iri ti zo so asû psaume so, me na bango ni, zo ti sungo ni ayeke na fini lani na ngoi so Jéhovah akiri na azo ti Israël na Jérusalem na peko ti so a gue na ala na Babylone (Ps. 147:2). So a kiri na azo ti Nzapa na ndo so ala yeke voro Nzapa dä na lege ni, a pusu zo ti sungo psaume so ti sepela Jéhovah. Me lo fa ambeni raison nde ti sepela Jéhovah. Araison ni ayeke so wa? Na yâ ti fini ti mo, araison wa la mo yeke na ni ti tene na kota go “Alléluia!”?—Ps. 147:1, kete tënë na gbe ni.

 JÉHOVAH ADË BÊ TI AZO SO VUNDU AHON NDÖ TI ALA

4. Tongana Gbia Cyrus azi azo ti Israël lani, bê ti ala ayeke tongana nyen? Ngbanga ti nyen?

4 Tara ti bâ tënë ti bê ti azo ti Israël na ngoi so ala yeke na Babylone. Azo so agbu ala ague na ala kâ ahe ala, atene: “Ala he na e mbeni bia ti Sion.” Me a nzere na aJuif ti he bia na ndembe ni so ape. Kota ye so amû lani ngia na ala ayeke Jérusalem, me a futi ni awe (Ps. 137:1-3, 6). Bê ti ala ayeke lani na kota vundu, na ala yeke na bezoin ti tene a dë bê ti ala. Ye oko, tongana ti so prophétie ti Mbeti ti Nzapa afa lani, Cyrus, gbia ti Perse, azi ala. Lo sö benda na ndö ti Babylone na lo tene: ‘Jéhovah amû yanga na mbi ti sara na lo mbeni da na Jérusalem. Azo kue so ayeke azo ti lo, zia Jéhovah Nzapa ti ala aduti na ala, zia ala kiri.’ (2 Chron. 36:23). Biani, ye so asi so adë bê ti azo ti Israël so ayeke na Babylone.

5. Zo ti sungo Psaume 147 atene nyen na ndö ti ngangu ti Jéhovah ti sava zo?

5 Jéhovah adë bê ti mara ti Israël kue tongana mbeni groupe, me lo dë nga bê ti zo oko oko kue ti mara ni. Jéhovah ayeke sara nga tongaso laso. Zo ti sungo psaume atene na ndö ti Nzapa, atene: “Azo so kä ayeke na bê ti ala, Lo sara si kä ni amü, nga lo kanga akä ti ala.” (Ps. 147:3). Tongana e tï kobela wala vundu ahon ndö ti e, e lingbi ti hinga biani so Jéhovah ayeke bi bê na e. Laso, Jéhovah ayeke tâ na nzara ti dë bê ti e nga ti sara si kä ti bê ti e amü (Ps. 34:18; És. 57:15). Lo mû na e ndara nga na ngangu si e lingbi ti hon ndö ti akpale kue so e lingbi ti wara ni.—Jacq. 1:5.

6. Tongana nyen la e lingbi ti wara nzoni na lege ti atënë so ayeke na Psaume 147:4? (Bâ foto so ayeke na tongo nda ti article so.)

6 Na pekoni, zo ti sungo psaume ni ayô lê ti lo lo bâ ndo na nduzu na lo tene so Jéhovah ‘adiko wungo ti atongoro; lo iri ala kue na iri ti ala.’ (Ps. 147:4). Ngbanga ti nyen la zo ti sungo psaume ni akomanse fadeso ti sara tënë na ndö ti aye so ayeke na lê ti nduzu? Bâ tënë so si: Zo ti sungo psaume ni alingbi ti bâ atongoro na lê ti lo, me lo hinga pëpe tâ wungo ti ala kue. Tongana ngoi ayeke hon, wungo ti atongoro so e lingbi ti bâ ni ague na li ni mingi. Awandara ahinga so wungo ti atongoro so ayeke na yâ ti bungbi ti atongoro so sese ayeke dä ayeke milliard mingi. Nga peut-être wungo ti abungbi ti atongoro so ayeke na yâ ti dunia kue ahon wungo ni so mingi. E azo e lingbi pëpe ti diko wungo ti atongoro. Me Lo so asara aye kue airi ala oko oko kue na iri ti ala. So aye ti tene so, na lê ti Jéhovah, tongoro oko oko kue ayeke nde nde (1 aCor. 15:41). Ka ti e azo ti sese? Nzapa so ahinga place so tongoro oko oko ayeke dä na ngoi kue ahinga nga mo: lo hinga ndo so mo yeke dä, atënë ti bê ti mo nga tâ ye so mo bezoin ni na ngoi kue.

7, 8. (a) Nyen la Jéhovah ahinga na ndö ti e? (b) Mû mbeni tapande so afa so Jéhovah ayeke bâ mawa ti e.

7 Jéhovah abi bê ti lo gï pëpe na mo, me nga lo yeke na ngangu ti mû maboko na mo ti hon ndö ti akpale nga lo yeke bâ mawa ti mo. (Diko Psaume 147:5.) Peut-être mo bâ so kpale so mo yeke na yâ ni ahon ngangu ti mo na mo lingbi ti gbu lê ni ape. Nzapa ahinga awokongo ti mo, ‘lo dabe ti lo so mo yeke fuku ti sese.’ (Ps. 103:14). So e yeke mbilimbili-kue ape, e yeke sara a-oko faute fani mingi. Lakue, tongana e tene mbeni tënë so ayeke na lege ni ape, tongana e sara nzara ti mbeni ye so ayeke na lege ni ape wala tongana e sara bê ti ye ti mbeni zo, e yeke regretté ni mingi. Jéhovah ayeke sara ka mara ti afaute so ape, me lo hinga nzoni mingi atënë ti bê ti e.—És. 40:28.

 8 Peut-être mo bâ awe tongana nyen ngangu maboko ti Jéhovah amû maboko na mo ti hon ndö ti mbeni tara (És. 41:10, 13). Bâ tapande ti Kyoko, mbeni ita-wali pionnier so bê ti lo anze kue na peko ti so a tokua lo na mbeni fini ndo. Tongana nyen la Jéhovah afa so lo hinga akpale ti lo? Na yâ ti fini congrégation ti lo, aita mingi acomprendre lo. Lo bâ ti lo so Jéhovah ayeke tene na lo: “Mbi ye mo mingi, gï pëpe ndali ti so mo yeke pionnier, me nga ndali ti so mo yeke molenge ti mbi ti wali nga mo mû terê ti mo na mbi. Mbi ye mo wara ngia ti duti Témoin ti mbi.” Tongana nyen la Jéhovah afa na mo so “zo alingbi pëpe ti hinga kota ti hingango ndo ti lo”?

JÉHOVAH AMÛ NA E AYE SO E BEZOIN NI

9, 10. Tongana Jéhovah ayeke mû maboko na e, kozo ye so lo yeke mû na e ayeke nyen? Fa mbeni tapande.

9 E kue e yeke na bezoin ti aye tongana kobe, bongo nga na da. Peut-être mo yeke gi bê ti mo so mo yeke wara pëpe kobe ti te alingbi na nzara ti mo. Me Jéhovah la asara si sese adü gbâ ti kobe ndali ti aye kue so ayeke na fini, même ndali ti akete corbeau so atoto na lo. (Diko Psaume 147:8, 9.) Tongana Jéhovah angbâ ti mû kobe na acorbeau, mo lingbi ti duti na confiance so lo yeke mû na mo nga aye so mo bezoin ni.—Ps. 37:25.

10 Kota ye ni ayeke so Jéhovah amû na e aye so e bezoin ni ti tene mabe ti e angbâ ti kpengba, nga lo mû na e “siriri ti Nzapa so ahon ndö ti bibe kue”. (aPhil. 4:6, 7). Bâ tapande ti Mutsuo na wali ti lo. Jéhovah asara si mabe ti ala angbâ ti kpengba na ngoi so, na ngu 2011, sese ayengi na gbe ti kota ngu-ingo na Japon na ngu ni abuba aye na yâ ti kodro ni. Ala sö kuâ ndali ti so ala monté na ndö ti da ti ala. Ye oko, na lango ni so, ala girisa mingi ti aye ti ala. Na bï ni so, ala lango na yâ ti mbeni chambre so ayeke na nduzu so wâ ayeke dä ape nga dê asara dä mingi. Na ndade ni, ala gi mbeni ye so alingbi ti kpengba ala. Gï oko mbeti so ala wara ayeke Annuaire ti ngu 2006. Na ngoi so Mutsuo azi mbeti ni, lo bâ li ti tënë ni na Français so atene “Sese so ayengi na gbe ti kota ngu-ingo so afâ azo mingi ahon atanga ni.” Mbage so asara tënë ti sese so ayengi na Sumatra na ngu 2004 na asara si sese ayengi na gbe ti kota ngu-ingo, na a buba aye ahon atanga ni kue. Mutsuo na wali ti lo atoto na ngoi so ala diko ye so asi na aita kâ. Ala bâ so Jéhovah amû na ala tâ ye so ala bezoin ni ti tene ala kpengba. Nga, na ndoye, Jéhovah amû na ala ambeni ye so ala bezoin ni. Aita ti ala ti bungbi amû na ala kobe na bongo. Me ye so akpengba ala mingi ayeke so aita so aga na iri ti bungbi aga abâ aita kue ti congrégation ni. Mutsuo atene: “Mbi bâ so Jéhovah ayeke tâ na terê ti e oko oko kue na lo yeke bâ lege ti e. So tâ ye ti dengo bê!” Kozoni, Nzapa amû na e aye so e bezoin ni ti tene mabe ti e angbâ ti kpengba, na pekoni lo mû na e aye so e bezoin ni na lege ti mitele.

BÂ NZONI NA LEGE TI MUNGO MABOKO TI NZAPA

11. A lingbi azo kue so aye ti bâ nzoni na lege ti mungo maboko ti Nzapa asara nyen?

11 Jéhovah ayeke lakue nduru ti ‘mû na nduzu azo so asara terê ti ala kete’. (Ps. 147:6a). So Jéhovah ayeke nduru ti sara ye ndali ti e, tongana nyen la e lingbi ti bâ nzoni dä? A lingbi e duti na nzoni songo na lo. Ti duti na nzoni songo na lo, a lingbi e sara terê ti e kete (Soph. 2:3). Azo so asara terê ti ala kete ayeke ku Nzapa ti leke aye kue so ayeke na lege ni ape nga ti zi apasi ti ala. Jéhovah abâ ala na nzoni lê.

12, 13. (a) Ti tene Nzapa amû maboko na e, nyen la a lingbi e sara ape? (b) Azo wa la ayeke zia ngia na bê ti Jéhovah?

 12 Na mbage, Nzapa ‘abi azo ti sioni na sese.’ (Ps. 147:6b). So kota tënë la! Ti bâ nzoni na lege ti tâ ndoye ti Jéhovah nga ti kpe kota ngonzo ti lo, a lingbi e ke ye so lo ke (Ps. 97:10). Na tapande, a lingbi e ke lango-sioni. So aye ti tene a lingbi e gue yongoro na aye kue so alingbi ti gue na e ti sara mara ti sioni ye so, so na popo ni mo yeke wara bango porno (Ps. 119:37; Mat. 5:28). So alingbi ti duti kete tiri ape, me a yeke nzoni ti sara ngangu, ndali ti so a yeke sara si e wara tufa ti Jéhovah.

13 Na yâ ti tiri so, a lingbi e zia bê ti e na Jéhovah, me pëpe na ndö ti e wani. Eskê a yeke nzere na Jéhovah tongana e zia bê ti e gï na ndö ti e wani wala na ndö ti azo? “Ngangu ti mbarata azia ngia na bê” ti Jéhovah ape nga “zo so gere ti lo akpengba apika bê ti lo pëpe.” (Ps. 147:10). Me a lingbi e ngbâ ti sambela Jéhovah nga e voro yanga na lo ti mû maboko na e. Jéhovah ayeke nde na azo ti mungo wango, lo yeke fatigué lâ oko ape ti mä asambela ti e même tongana e hunda lo fani mingi ti mû maboko na e. “Jéhovah ayeke na ngia ndali ti azo so akpe mbeto ti lo, azo so aku ti tene lo fa tâ ndoye ti lo na ala.” (Ps. 147:11). Ndali ti so lo yeke be-ta-zo nga lo ye e, e hinga so lo yeke ngbâ ande ti mû maboko na e ti hon ndö ti asioni nzara ti bê ti e.

14. Nyen la zo ti sungo psaume ahinga na bê ti lo kue?

14 Jéhovah adë bê ti e so lo yeke mû maboko na azo ti lo na ngoi so ala yeke na bezoin ni. Na ngoi so azo ti Israël akiri na Jérusalem, zo ti sungo psaume agbu li ti lo na ndö ti lege so Jéhovah amû lani maboko na ala. Lo he bia, lo tene: “Lo sara si abarre ti yanga ti gbagba ti gbata ti mo akpengba; lo iri tënë nzoni na ndö ti amolenge ti mo so ayeke na yâ ti mo. Lo ga na siriri na yâ ti akodro ti mo.” (Ps. 147:13, 14). So zo ti sungo psaume ahinga so Jéhovah ayeke sara si abarre ti yanga ti gbagba ti gbata ni akpengba ti bata azo so avoro lo, a dë bê ti lo mingi.

Tongana nyen la Bible alingbi ti mû maboko na e na angoi so atara ahon ndö ti e? (Bâ aparagraphe 15-17)

15-17. (a) Na ambeni ngoi, atara ti e alingbi ti sara si e duti na bango ndo wa? Me tongana nyen la Jéhovah ayeke mû maboko na e na lege ti Bible? (b) Mû mbeni tapande ti fa tongana nyen la ‘tënë ti Nzapa amû loro hio.’

15 Peut-être mo tingbi na akpale so asara si mo gi bê ti mo. Jéhovah alingbi ti mû na mo ndara ti hon ndö ti akpale ni. Zo ti sungo psaume ni atene na ndö ti Nzapa ti lo, lo tene: “Lo tokua na sese yanga so lo mû, na tënë ni amû loro hio.” Na peko ti so zo ti sungo psaume atene so Jéhovah ‘atokua neige, lo sara si akete kete glason amû ndo nga lo bi akota glason ti lo na sese,’ lo hunda ndo, lo tene: “Zo wa la apeut ti luti na lê ti ngangu dê ti lo zo wa?” Lo tene nga so Jéhovah ‘amû yanga, na ala ga ngu.’ (Ps. 147:15-18). Nzapa ti e so ahinga ye kue, so ayeke na ngangu kue nga so akomande aglason nga na neige alingbi ti mû maboko na mo ti hon ndö ti akpale kue so mo wara.

16 Laso, Jéhovah afa lege na e na lege ti tënë ti lo, Bible. Nga “tënë [ti lo] amû loro hio” na lege so Jéhovah ayeke fa lege na e tâ na ngoi so e bezoin ni. Gbu li ti mo na ndö ti lege so mo wara nzoni na lege ti Bible, ambeti so “ngbâa be-ta-zo so ayeke sara ye na ndara” asigi na ni, JW télédiffusion, jw.org, a-ancien nga na amba ti e aChrétien (Mat. 24:45). Mo bâ tongana nyen la Jéhovah ayeke fa lege na mo hio?

17 Simone abâ awe ngangu so Bible ayeke na ni ti mû maboko na zo. Lo bâ lani so lo yeke ye oko ape, na lo bâ so Nzapa alingbi  ti bâ mara ti zo tongana lo so na nzoni lê ape. Ye oko, na angoi so bê ti lo anze, lo ngbâ gï ti sambela, lo yeke bâ ndo na mbage ti Jéhovah ti mû maboko na lo. Lo ngbâ nga ti manda Bible lo wani. Lo tene: “Lakue tongana mbi yeke na yâ ti mbeni kpale, Jéhovah ayeke kpengba mbi nga lo yeke fa lege na mbi.” Ye so amû maboko na lo ti gi ti duti lakue na nzoni bango ndo.

18. Ngbanga ti nyen la mo hinga biani so Jéhovah aye mo? Araison wa la mo yeke na ni ti tene na kota go: “Ala sepela Jah”?

18 Zo ti sungo psaume so ahinga so Jéhovah aye lani mingi azo ti lo, azo ti Israël ti giriri. A yeke gï oko mara so Nzapa amû na ala “tënë ti lo” nga so lo fa na ala “andia ti lo so afa lege na zo nga na angbanga so lo fâ.” (Diko Psaume 147:19, 20.) Laso, e yeke na pasa so gï e oko la iri ti Nzapa ayeke na ndö ti e. So e hinga Jéhovah nga so e yeke na Bible so ayeke fa lege na e, e yeke na kpengba songo na lo. Legeoko tongana zo ti sungo Psaume 147, biani mo yeke na araison mingi ti tene na kota go: “Ala sepela Jah!” nga ti wa azo ti sara nga ni.