Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Juillet 2017

Gingo amosoro so ayeke atâ mosoro

Gingo amosoro so ayeke atâ mosoro

“Ala gi ti wara akamarade ndali ti ala wani na lege ti amosoro so ayeke mbilimbili pëpe.”—LUC 16:9.

ABIA: 32, 154

1, 2. Ngbanga ti nyen la awayere ayeke duti ande dä lakue na yâ ti dunia ti laso?

LASO, kode so azo asigi na ni ti wara na nginza ayeke ngangu nga ayeke na lege ni ape. Na tapande, a yeke ngangu ti tene amaseka awara kua ti nginza. Azo mingi ayeke zia fini ti ala na lê ti kuâ ti gue na akodro so mosoro ayeke dä mingi. Yere amû ndo, même na yâ ti akodro so mosoro ayeke dä. Nga, azo so ayeke na nginza mingi akiri awara gbâ ti nginza na ngoi so gigi ti awayere akiri aga ngangu. Ade ti ninga ape ambeni zo atene so nginza ti kete wungo ti azo so ayeke na mosoro mingi alingbi na nginza kue so tanga ti azo ti dunia ayeke na ni. Atâa so a yeke ngangu ti hinga wala a yeke duti ande tongaso, a yeke polele so azo milliard mingi ayeke awayere, me ti ambeni, mosoro so ala yeke na ni alingbi ti mû lege na ala ti bata ahale ti ala na yâ ti angoi so ayeke ga. Jésus ahinga ni, ni la lo tene: “Awayere ayeke ngbâ lakue na ala.” (Marc 14:7). Ngbanga ti nyen la mara ti kangbi tongaso ayeke dä?

2 Jésus ahinga lani so kode ti warango nginza na yâ ti dunia so ayeke changé ape juska Royaume ti Nzapa aga. Aye ti poroso, abungbi ti vorongo nzapa nga na bungbi ti dengo buze ti dunia, so Apocalypse 18:3 asara tënë ni tongana “awadengo buze”, ayeke mbage  ti dunia ti Satan. Azo ti Nzapa alingbi ti duti biani nde na aye ti poroso nga na abungbi ti vorongo nzapa ti wataka. Ye oko, mingi ti azo ti Nzapa alingbi pëpe ti duti biani nde na bungbi ti dengo buze ti dunia ti Satan.

3. Ahundango ndo wa la e yeke bâ ni ande?

3 E so e yeke aChrétien, a yeke nzoni e bâ yâ ti bango ndo ti e na ndö ti bungbi ti dengo buze ti dunia so, na lege so e hunda terê ti e na ahundango ndo so: ‘Tongana nyen la mbi lingbi ti sara kua na aye ti sese so mbi yeke na ni ti fa so mbi yeke be-ta-zo na Nzapa? Tongana nyen la mbi lingbi ti mû mbage mingi pëpe na bungbi ti dengo buze ti dunia so? Aye wa la asi so afa so azo ti Nzapa azia bê ti ala kue na lo laso?’

TOLI TI ZO TI BANGO LEGE TI AYE SO LO YEKE MBILIMBILI PËPE

4, 5. (a) Nyen la asi na zo ti bango lege ti aye na yâ ti toli ti Jésus? (b) Wango wa la Jésus amû lani na adisciple ti lo?

4 Diko Luc 16:1-9. Toli ti Jésus na ndö ti zo ti bango lege ti aye, so lo yeke mbilimbili pëpe, asara si e gbu li ti e. Na peko ti so a tene so zo ti bango lege ti aye ni abuba aye ti patron ti lo, lo “sara ye na lege ti ndara” ti “gi ti wara akamarade” ti mû maboko na lo na ngoi so a zi lo na kua. * Biani, Jésus ayeke wa lani pëpe adisciple ti lo ti sara ye na mbeni lege so ayeke na lege ni ape ti mû lege na ala ti ngbâ na fini na yâ ti dunia so. Lo fa lani so sarango ye tongaso ayeke ti “amolenge ti aye ti ngoi so”, me lo sara kua na toli so ti fa mbeni kpengba ye.

5 Jésus ahinga so legeoko tongana ti so zo ti bango lege ti aye ni awara ngangu kpale, mingi ti adisciple ti Jésus abezoin ti wara nginza na lege ti dengo buze ti dunia so, so ayeke na lege ni ape. Tongaso lo wa ala, lo tene: “Ala gi ti wara akamarade ndali ti ala wani na lege ti amosoro so ayeke mbilimbili pëpe, tongaso si na ngoi so amosoro ni ahunzi, akamarade so [wala, Jéhovah na Jésus] ayamba ala na ando ti lango so angbâ lakue lakue.” Nyen la e lingbi ti manda na lege ti wango ti Jésus so?

6. E hinga tongana nyen so bungbi ti dengo buze ti laso ayeke pëpe na yâ ti ye so Nzapa aleke lani na bê ti lo ti sara?

6 Atâa so Jésus afa pëpe ndani so lo tene so amosoro ayeke “mbilimbili pëpe,” Bible afa polele so Nzapa aleke lani na bê ti lo pëpe ti tene mbeni bungbi ti dengo buze aduti dä. Na yaka ti Éden, Jéhovah amû lani aye na Adam na Ève ahon ti so ala yeke na bezoin ni (Gen. 2:15, 16). Ambeni ngoi na pekoni, na ngoi so yingo vulu asara kua na ndö ti congrégation ti akozo Chrétien so a soro ala ti gue na yayu, “même mbeni oko na popo ti ala atene pëpe so aye so lo yeke na ni ayeke gï ti lo wani, me ala bungbi aye ti ala kue oko.” (Kus. 4:32). Prophète Ésaïe asara tënë ti ngoi so azo kue ayeke sara kua ande na amosoro ti sese senge senge (És. 25:6-9; 65:21, 22). Me ti si na ngoi ni so, adisciple ti Jésus abezoin ti “sara ye na lege ti ndara” ti wara nginza na lege so ala yeke sara kua na “amosoro so ayeke mbilimbili pëpe” so ayeke na yâ ti dunia so, nga na oko ngoi ni ti gi ti nzere na lê ti Nzapa.

SARA KUA NA AMOSORO SO AYEKE MBILIMBILI PËPE NA NDARA

7. Wango wa la Jésus amû na Luc 16:10-13?

7 Diko Luc 16:10-13. Zo ti bango lege ti aye na yâ ti toli ti Jésus awara akamarade ndali ti nzoni ti lo wani. Ye oko, Jésus awa adisciple ti lo ti wara akamarade na yayu gï ndali ti nzoni ti ala wani pëpe. Lo ye ti tene e hinga so lege so e yeke sara kua na amosoro ti e so ayeke mbilimbili pëpe alingbi ti fa wala e yeke be-ta-zo na Nzapa wala pëpe. E lingbi ti fa ni tongana nyen?

8, 9. Fa atapande ti aita so asara kua na amosoro so ayeke mbilimbili pëpe ti fa so ala yeke be-ta-zo.

 8 Mbeni lege ti sara kua na aye ti sese so e yeke na ni ti fa so e yeke be-ta-zo ayeke ti mû ambeni ye ti mû maboko na kua ti fango tënë na yâ ti dunia kue so Jésus asara tënë ni lani (Mat. 24:14). Mbeni maseka-wali na Inde abata pata kete kete na yâ ti mbeni kete boîte ti lo, na lo ke même ti vo aye ti sarango na ngia tongaso si lo ngbâ ti zia pata na yâ ti boîte ni. Tongana boîte ni asi awe, lo mû ni ti tene a sara na kua ti fango tënë. Mbeni ita-koli na Inde ayeke na yaka ti coco. Lo mû gbâ ti acoco na aita so ayeke sara kua na bureau ti traduction ti yanga ti Malayalam. Lo tene so so aita kâ abezoin ti vo acoco, tongana lo mû ni na ala, a yeke mû maboko na ala mingi ahon ti mû nginza. So ayeke sarango ye na ndara. Legeoko nga, aita na Grèce ayeke mû lakue na sewa ti Béthel mafuta ti olive, fromage nga na ambeni kobe nde.

9 Mbeni ita so alondo na Sri Lanka si lo yeke na kodro-wande azia ndo ti lo na Sri Lanka ti tene a sara abungbi nga na akota bungbi dä, nga ti tene awakua ti ngoi kue alango dä. Lo lingbi lani ti wara nginza na peko ti ndo ti lo ni, me sacrifice so lo sara amû maboko mingi na aita so ayeke na moyen ape. Na yâ ti mbeni kodro so a kanga lege na kua ti e, aita azia ada ti ala ti tene a sara abungbi dä, na a mû lege na apionnier mingi nga na ambeni ita so ayeke na moyen ape ti wara mbeni ndo ti sara abungbi dä sân ti futa nginza mingi.

10. Anzoni ye wa la e yeke wara tongana e mû ye?

10 Atapande so afa tongana nyen la azo ti Nzapa ayeke “be-ta-zo na yâ ti kete kete ye,” so ti tene na lege so ala yeke sara kua na aye ti sese so ala yeke na ni, aye so ayeke kota ye ape tongana a haka ni na amosoro so ala wara na lege ti songo ti ala na Nzapa (Luc 16:10). Akamarade ti Jéhovah so abâ sarango mara ti asacrifice tongaso tongana nyen? Ala hinga so ti mû ye na zo ayeke mbeni lege ti wara ‘atâ’ mosoro (Luc 16:11). Mbeni ita-wali so ayeke mû ye lakue ndali ti kua ti fango tënë afa mbeni tufa so lo wara, lo tene: “So mbi yeke mû ye lakue, mbi bâ so mbeni ye asi na mbi na yâ ti angu so ahon. Mbi bâ so tongana mbi yeke mû ye mingi ayeke pusu mbi ti sara nzoni bê na amba ti mbi mingi. Mbi yeke nduru mingi ti pardonné zo, ti kanga bê na azo nga a yeke ngangu na mbi pëpe ti hon ndö ti vundu ti mbi nga ti yeda na awango.” Azo mingi ahinga so mungo ye asara si songo ti ala na Nzapa akiri akpengba.—Ps. 112:5; aProv. 22:9.

11. (a) Tongana nyen la ti mû ye mingi afa so e “sara ye na lege ti ndara”? (b) Nyen la ayeke passé laso na popo ti awakua ti Nzapa? (Bâ foto so ayeke na tongo nda ti article so.)

11 Ti sara kua na aye ti sese so e yeke na ni ti sara si kua ti Royaume ague na li ni ayeke mbeni lege ti “sara ye na lege ti ndara”. A mû lege na e ti mû maboko na azo alingbi na dutingo ti e. Ambeni ita so ayeke na nginza alingbi ti sara kua ti ngoi kue pëpe wala ala lingbi pëpe ti gue na ndo so a bezoin awafango tënë dä mingi. Me ala yeke na ngia ti hinga so nginza so ala yeke mû ni ayeke mû maboko na ambeni zo ti sara kua ti Nzapa (aProv. 19:17). A-offrande so e mû na bê ti e kue asara si azo awara ambeti ti e nga amû maboko na kua ti fango tënë na yâ ti aterritoire so yere ayeke dä mingi me so azo mingi ayeke ga na yâ ti tâ tënë. Na yâ ti akodro  tongana Congo, Madagascar nga na Rwanda, mingi ni aita adoit lani ti soro ti mû kobe na asewa ti ala wala ti vo aBible. A yeke si so ngere ti Bible oko alingbi na nginza ti kua ti yenga oko wala ti nze oko. Fadeso, ndali ti so azo mingi ayeke mû a-offrande nga ‘ye so ambeni ayeke na ni ahon ndö ni akanga lê ti ye so amanke ambeni’, a sara si bungbi ti Jéhovah akiri na peko ti Bible nga akangbi ni na zo oko oko kue na yâ ti sewa nga na azo so ayeke manda Bible. (Diko 2 aCorinthien 8:13-15.) Tongaso, azo so amû ye nga na azo so awara ye alingbi ti ga akamarade ti Jéhovah.

MÛ MBAGE MINGI PËPE NA YÂ TI “DENGO BUZE TI GIGI SO”

12. Tongana nyen la Abraham afa so lo zia bê ti lo na Nzapa?

12 Mbeni lege ti ga kamarade ti Jéhovah ayeke ti mû mbage mingi pëpe na yâ ti dengo buze ti dunia so na ti gi ‘atâ’ mosoro. Abraham, mbeni be-ta-zo ti ândö, amä yanga, na lo zia kodro ti Ur so mosoro ayeke dä mingi ti lango na gbe ti atente nga ti sara si songo ti kamarade ti lo na Jéhovah akpengba (aHéb. 11:8-10). Lo bâ Nzapa lakue tongana Zo so ayeke mû tâ mosoro na zo, na lo gi lâ oko ape ti wara mosoro na mbeni lege so afa so lo zia bê ti lo na Nzapa pëpe (Gen. 14:22, 23). Jésus awa e ti duti na mara ti mabe so na lege so lo tene na mbeni maseka-koli so ayeke zo ti mosoro, lo tene: “Tongana mo ye ti ga mbilimbili-kue, gue mo kä aye ti mo, mû nginza ni na awayere na mo yeke wara ande mosoro na yayu; na mo ga mo mû peko ti mbi.” (Mat. 19:21). Koli so ayeke na mara ti mabe ti Abraham ape, me ambeni zo afa so ala zia bê ti ala kue na Nzapa.

13. (a) Wango wa la Paul amû lani na Timothée? (b) Tongana nyen la e lingbi ti sara ye alingbi na wango ti Paul so laso?

13 Timothée ayeke lani mbeni koli so ayeke na mabe. Na peko ti so Paul airi Timothée “mbeni nzoni turugu ti Christ Jésus”, Paul atene na lo: “Mbeni zo so ayeke sara kua ti turugu ayeke bi terê ti lo pëpe na yâ ti dengo buze ti gigi so, tongaso si lo nzere na lê ti zo so amû lo na kua ti turugu ni.” (2 Tim. 2:3, 4). Adisciple ti Jésus ti laso, so na popo ni mo yeke wara aita ahon kutu oko, so ayeke sara kua ti ngoi kue, ayeke sara kue ti sara ye alingbi na wango ti Paul so. Ala yeke dö sese na ye so ngangu ti asabango ti dunia so ayeke sara na zo. Ala yeke dabe ti ala na mama-ndia so: “Zo so amû bon ayeke ngbâa ti zo so asara na lo bon ni.” (aProv. 22:7). Satan aye ti tene e mû ngoi nga na ngangu ti e kue ti duti angbâa ti dengo buze ti dunia so. Ambeni desizion so e mû alingbi ti sara si e ga angbâa ti sarango bon teti angu mingi. Futango akota da nga na angangu oto na même futango gbâ ti nginza ndali ti matanga ti mariage alingbi ti zia bon na li ti zo teti angu mingi. E yeke fa so e sara ye na ndara tongana e gi ti duti na aye mingi ape, e gi ti mû abon mingi ape nga e buba nginza ti e mingi ape. Tongana e sara tongaso, e yeke na ngoi ti sara kua tongana angbâa ti Nzapa ahon ti sara kua tongana angbâa ti dengo buze ti dunia so.—1 Tim. 6:10.

14. A lingbi e leke na bê ti e ti ngbâ ti sara nyen? Fa ambeni tapande.

14 Ti tene e duti na aye mingi ape, a lingbi e zia Royaume ti Nzapa na kozo ndo. Mbeni koli na wali ti lo ayeke lani na mbeni kota ndokua ti dengo buze. Ye oko, ala ye lani ti kiri na yâ ti kua ti ngoi kue, ni la ala kä ndokua ti ala, bateau ti ala nga na ambeni ye ti ala. Na pekoni, ala hunda ti mû maboko na kua ti lekengo kota ndokua ti e na Warwick, New York. Mbeni ye ti nzoni so ayeke nde so ala wara ni lani ayeke so ala na molenge ti ala nga na koli ti lo asara kua na Béthel. Nga, na ngoi so ala yeke kâ, babâ na mama ti koli ti molenge ti ala aga amû mbage na lekengo kota ndokua ti e na Warwick teti ambeni yenga. Mbeni ita-wali na Colorado, na États-Unis, so ayeke pionnier awara kua ti nginza na yâ ti mbeni banque, me kua ni amû ngoi ti lo mingi ape. Sarango kua ti lo anzere na azo ti banque ni mingi, ni la ala  hunda lo ti mû angbonga mingi ti sara kua na banque ni, na ala tene ala yeke futa lo ahon ti so lo yeke wara fani ota. Ye oko, ndali ti so kua ni ayeke mû lege na lo pëpe ti sara kua ti lo ti pionnier nzoni, lo ke ti sara kua ni. So ayeke gï ambeni tapande ti gbâ ti asacrifice so awakua ti Jéhovah asara. Tongana e leke na bê ti e ti ngbâ ti zia aye ti Royaume na kozo ndo, a fa so e bâ na nene ni mingi songo ti e ti kamarade na Nzapa nga na atâ mosoro ahon aye ti sese.

NA NGOI SO MOSORO AHUNZI

15. Amosoro wa la asara si zo ayeke na ngia mingi?

15 Ti duti na mosoro ayeke pëpe mbeni ye so afa so Nzapa airi tënë nzoni na ndö ti e. Jéhovah ayeke iri tënë nzoni na ndö ti azo so asara “anzoni kusala”. (Diko 1 Timothée 6:17-19.) Na tapande na ngoi so Lucia * ahinga so a bezoin awafango tënë na Albanie, lo londo na Italie lo gue kâ na ngu 1993, lo yeke lani na mbeni kua ape, me lo zia bê ti lo kue na Jéhovah. Lo manda yanga ti Albanais na lo mû maboko na azo ahon 60, na ala mû terê ti ala na Nzapa. Atâa so e kue e yeke pëpe na yâ ti aterritoire so azo aye tënë ti Royaume mingi, ye kue so e sara ti mû maboko na azo ti wara lege so ague na fini na ti ngbâ na ndö ni ayeke mbeni ye so e na ala e yeke girisa ni ande lâ oko ape.—Mat. 6:20.

16. (a) Nyen la ayeke si ande na abungbi ti dengo buze ti laso? (b) A lingbi ye so e hinga na ndö ti ye so ayeke si kekereke asara nyen na ndö ti bango ndo ti e na ndö ti aye ti sese?

16 Jésus atene: “Na ngoi so amosoro ni [so ayeke mbilimbili pëpe] ahunzi,” me lo tene pëpe ‘tongana amosoro ni ahunzi’. (Luc 16:9). Tingo ti abanque nga na akpale ti nginza so ambeni kodro ayeke na ni na lâ ti nda ni so ayeke ye oko ape tongana a haka ni na ye so ayeke nduru ti si na yâ ti dunia kue na yâ ti ngoi so ayeke ga. Dunia ti Satan, so ti tene abungbi ti poroso, abungbi ti vorongo ti wataka nga na abungbi ti dengo buze, ayeke tï ande. Prophète Ézéchiel na prophète Sophonie atene lani so lor nga na argent, so ayeke kota ye mingi na yâ ti dengo buze na yâ ti dunia teti angu mingi so, ayeke ga ande asenge ye (Ézéch. 7:19; Soph. 1:18). E yeke pensé nyen tongana e yeke gue ti kui na e bâ so e buba atâ mosoro ndali ti “amosoro so ayeke mbilimbili pëpe”? Peut-être tënë ti bê ti e ayeke duti ande tongana ti mbeni koli so na yâ ti gigi ti lo kue lo sara kua na lo wara gbâ ti nginza, me na nda ni lo bâ so a yeke gï afaux billet (aProv. 18:11). Biani, amosoro so ayeke hunzi ande, tongaso zia mbeni ye akanga lege na mo pëpe ti sara kua na ni ti “gi ti wara akamarade” na yayu. Ye kue so e sara ti maï aye ti Royaume ti Jéhovah ayeke sara si e yeke biani na ngia.

17, 18. Nyen la akamarade ti Nzapa ayeke ku ti wara ni?

17 Na ngoi so Royaume ti Nzapa ayeke ga ande, zo oko ayeke loué ande da ape wala zo oko ayeke sara ande bon ape. Kobe ayeke duti ande gbani gbani na zo ayeke wara ni senge senge, azo ayeke duti ande na bezoin ti adocteur wala ti yorö ape. Akamarade ti Jéhovah ayeke bâ ande nzoni na lege ti aye so sese ayeke mû na ala. Lor, argent nga na atênë ti ngangu ngere ayeke duti ande aye so a yeke sara na apendere ye, pëpe ti tene zo aga zo ti mosoro na pekoni. A yeke mû ande apendere keke, atênë nga na awen ti sara na apendere da. Akamarade ti e ayeke mû ande maboko na e ndali ti so ala ye ti sara ni, me pëpe ti tene e futa ala. E kue e yeke wara ande aye so sese ayeke mû na e.

18 So ayeke gï mbage ti pendere futa so azo so agi ti wara akamarade na yayu ayeke wara ande. Awakua ti Jéhovah so ayeke na sese ayeke dekongo ande na ngia na ngoi so ala yeke mä Jésus atene: “Ala so Babâ ti mbi asara tufa na ndö ti ala, ala ga ala wara Royaume so a leke ni ndali ti ala ngbene ye so a zia gere ti dunia.”—Mat. 25:34.

^ par. 4 Jésus atene ape so tënë so a bi na li ti koli so ayeke tâ tënë wala mvene. Tënë ti Grec so a kiri peko ni na “a tene” na Luc 16:1 amû lege na zo ti bâ so a pa zo ti bango lege ti aye ni pango. Ye oko, Jésus aluti na ndö ti sarango ye ti zo ti bango lege ti aye ni me pëpe na ndö ti ndani so a zi lo na kua.

^ par. 15 Mbaï ti gigi ti Lucia Moussanett asigi na yâ ti Réveillez-vous ! ti lango 22 ti juin 2003, l. 18-22.