Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Tour ti Ba Ndo (ti mandango ni)  |  Janvier 2018

Mo hinga?

Mo hinga?

A yeke sara lani kua na amama-ndia ti Ndia ti Moïse na ngoi so a yeke leke atënë so alondo na popo ti azo ti Israël lâ oko oko?

NA AMBENI ngoi a yeke sara kua na ni. Zia e bâ mbeni tapande ni. Deutéronome 24:14, 15 atene: “Zo so mo mû lo na kua, so ye atia lo nga lo yeke wayere, mo sara ye ti likisi na lo pëpe, atâa lo yeke ita ti mo zo ti Israël wala wande . . . Tongaso pëpe, lo yeke toto na Jéhovah ndali ti ye so mo sara, na tënë ayeke duti na li ti mo ndali ni.”

Fango ta so a sû plainte ti zo ti kua so asara kua na yaka ti mbeni zo na ndö ni

Na yâ ti angu 600 kozo na ngoi ti e, a wara mbeni mbeti na Ashdod. Na yâ ti mbeti ni, a sû tënë ti plainte so mbeni zo asara na terê ti mbeni zo. A sû plainte ni peut-être ndali ti mbeni zo ti kua. Peut-être zo ti kua ni aro pëpe alê ti kobe alingbi na wungo so lo doit ti ro na ni. Mbeti ni, so a sû ni na ndö ti mbeni fango ta, atene: “Na peko ti so mbi wakua ti mo [wala, zo so aga na plainte ni] mbi zia na yâ ti gogoro alê ti kobe so a ko ni na yâ ti alango so ahon, Hoshayahu, molenge ti Shobay, aga amû bongo ti mbi wakua ti mo. . . . Amba ti mbi azo ti kua, so mbi na ala e ko alê ti kobe na gbe ti lâ, ayeke duti ande atémoin . . . so tënë ti mbi ayeke tâ tënë. Tënë oko ayeke na li ti mbi ape . . . Tongana gouverneur apensé so a yeke ti lo pëpe ti sara si a kiri na bongo ti mbi wakua ti lo na mbi, zia lo sara ni ndali ti so lo bâ mawa ti mbi. A lingbi mo duti gï kpô pëpe na ngoi so a mû bongo ti mbi wakua ti mo awe.”

Simon Schama, mbeni zo ti sungo mbaï, atene so plainte so “afa na e aye mingi ahon gï tënë ti mbeni zo ti kua so abâ so mbeni ye ayeke dä ape ti sara ti kiri ti wara [bongo ti lo]. A fa nga so zo so asara plainte ni ahinga mbeni ye na ndö ti andia ti Bible, mbilimbili andia so a sû na Lévitique nga na Deutéronome so ake na zo ti sara aye ti ngangu na awayere.”