Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO (TI MANDANGO NI) AOÛT 2016

Atënë so azo ahunda

Atënë so azo ahunda

Ngbanga ti nyen awato ti Jésus abi tënë na li ti lo lani ndali ti sukulango maboko?

Mbeni oko ti atënë so awato ti Jésus aluti na ndo ni ti bi tënë na li ti lo na adisciple ti lo lani la. Na yâ ti Ndia ti Moïse a yeke wara gbâ ti acommandement na ndo ti dutingo na saleté pëpe na lege ti aye tongana kobela so asara si tere ti zo ayeke yuru, buruma, nga ye so a lingbi a sara na azo wala anyama so akui. Ndia ni afa nga tongana nyen la a lingbi ti zi asioni ye na tere ti zo. A lingbi ti sara ni na lege ti sandaga, sukulango zo wala ti fi ngu na tere ti zo ni.—Lév., chap. 11-15; Nom., chap. 19.

Arabbin ti aJuif asigigi na anzene nzene tënë na ndo ti andia so. Mbeni mbeti atene so ti hinga ye so asara si mbeni zo aga sioni, a yeke “hunda ndo na ndo ti aye so ague na zo ni si lo wara kobela ni, tongana nyen la alingbi ti gbu ambeni zo nga azo oke la alingbi ti gbu ala, akungba nga na aye wa la alingbi ti ga sioni wala pëpe na lege ti kobela ni, nga na nda ni, aye wa la a lingbi a sara ti tene zo ni akiri aga nzoni.”

Awato ti Jésus ahunda lo, atene: “Ngbanga ti nyen adisciple ti mo ayeke sara ye pëpe alingbi na ngobo ti azo ti giriri, me ala yeke te kobe na maboko ti ala so ayeke sioni?” (Marc 7:5). A-Farizien so aye lani pëpe ti tene so a lingbi zo asukula maboko ti lo si lo te kobe. Na lege ti angobo so arabbin azia na sese, ala hunda ti tene zo asukula maboko ti lo juska na nduzu kozo si lo te kobe. Mbeti so e sara tënë ni na nduzu so atene nga: “Ala yeke sara nga tënë lani na ndo ti asembe wa la a lingbi a zia ngu na yâ ni ti tuku na maboko ti azo, ngu wa la ayeke nzoni, zo wa la ayeke tuku ni nga a lingbi a tuku ngu ni na maboko ti ala juska na ndo wa.”

Kiringo tënë ti Jésus na azo ti lungo ndia so ayeke lani ngangu ape. Lo tene na amokonzi-nzapa ti lege ti vorongo ti aJuif ti ngoi ti akozo Chrétien, lo tene: “Ala awahandango lê ti zo so, a yeke na lege ni si Ésaïe atene prophétie na ndo ti ala, tongana ti so Mbeti ti Nzapa atene: ‘Azo so agonda mbi na yanga ti ala, me bê ti ala ague yongoro mingi na mbi. A yeke senge senge si ala ngbâ ti voro mbi, ngbanga ti so aye so ala yeke fa ayeke gi acommandement so alondo na azo.’ Ala dö lege ti commandement ti Nzapa ala zia na ala bata ngangu ngobo ti azo.”—Marc 7:6-8.