Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 3 2016

 KOTA MAMA-TENE NI | TONGANA MBENI ZO SO E YE LO MINGI AKUI

A yeke sioni ti sara vundu ti kuâ?

A yeke sioni ti sara vundu ti kuâ?

Kobela asara mo aninga kete na tere ti mo awe? Peut-être teti so mo sava hio na pekoni, mo girisa na ndo ti kobela ni. Me, sarango vundu ti kuâ ayeke ti lo tongaso ape. Pakara Alan Wolfelt asû na yâ ti mbeni buku (Healing a Spouse’s Grieving Heart) atene: “Mbeni ye so a iri ni hongo ndo ti ‘vundu ti kuâ’ ayeke dä ape.” Lo kiri lo tene: “Tongana angoi ayeke hon nga tongana ambeni zo ayeke mû maboko na mo, vundu ti mo ni ayeke dë kete.”

Na tapande, bâ tongana nyen la Abraham asara lani ye na ngoi so wali ti lo akui. Bible atene so, “Abraham aga ti toto kuâ ti Sara, na ti toto na vundu teti lo.” Tënë “aga ti” afa so a hunda lani na lo ngoi mingi ti hon ndo ti vundu ti kuâ ti wali ti lo ni. * Mbeni tapande ni ayeke ti Jacob, so a handa lo a tene so mbeni sioni nyama ti ngonda afâ molenge ti lo Joseph. Lo sara vundu teti “ lâ mingi,” na azo ti sewa ti lo awara lege ape ti dë bê ti lo. Angu mingi na pekoni, tënë ti kuâ ti Joseph ni angbâ ti sara lo nzoni ape.—Genèse 23:2; 37:34, 35; 42:36; 45:28.

Abraham asara vundu ti kuâ ti wali ti lo Sara so lo ye lo ming

Laso nga, azo mingi ayeke sara vundu ti kuâ ti mbeni zo so ala ye lo mingi aninga. Zia e bâ ambeni tapande ni use.

  • “Koli ti mbi, Robert, akui na lango 9 ti juillet ngu 2008. Lango so lo kui na ni ayeke nga nde na atanga ni ape. Na peko ti so e nyon café na ndapre awe, tongana ti so e yeke sara ka, na ngoi so lo londo ti gue na kua, e embrassé mba, e gbu tere na kate nga e tene na mba ‘mbi ye mo mingi.’ Angu omene na pekoni, mbi ngbâ ti sara vundu ti kuâ ti lo. Ti mbi, mbi peut lâ oko ape ti hon ndo ti vundu ni so.”—Gail, so ayeke na ngu 60.

  • “Atâa so wali ti mbi akui asara ngu 18 tongaso awe, mbi ngbâ ti pensé na lo nga ti sara vundu ti kuâ ti lo. Tongana mbi bâ mbeni pendere ye, mbi yeke pensé gi na lo, na mbi yeke imaginé ngia so lo yeke duti fade na ni tongana lo bâ ye ni so.”—Etienne, so ayeke na ngu 84.

E yeke azo, a yeke na lege ni ti sara vundu ti kuâ wala ti tene vundu ni so angbâ na yâ ti bê ti e aninga. Fason ti sarango vundu ti azo ayeke nde nde. A yeke nzoni e fâ ngbanga ape na ndo ti fason so mbeni zo ayeke sara na vundu ti kuâ. Nga, a lingbi e kpe ti fâ ngbanga na ndo ti e wani tongana a si so e sara vundu ti kuâ ahon ndo ni. Tongana nyen la e peut ti hon ndo ti vundu ni so?

^ par. 4 Isaac nga kue, so ayeke molenge ti Abraham, asara lani vundu ti kuâ ti mama ti lo so aninga. Mbage so atene “Sara ye na mabe tongana ti ala”, so ayeke na yâ ti mbeti so, ayeke fa na e so, Isaac asara vundu ti kuâ ti mama ti lo, Sara, teti angu ota.—Genèse 24:67.