Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 3 2016

 KOTA MAMA-TENE NI | TONGANA MBENI ZO SO E YE LO MINGI AKUI

Tongana nyen ti hon ndo ti vundu ti kuâ?

Tongana nyen ti hon ndo ti vundu ti kuâ?

A yeke wara gbâ ti awango na ndo ti tënë ni so. Me, kue la ayeke aidé ape. Na tapande, a peut ti fa na mo so a yeke nzoni mo toto ape wala mo fa vundu ti mo ni ape. Me, ambeni apeut ti fa na mo so a yeke nzoni mo fa avundu ti mo kue na gigi. Me, Bible afa ambeni bango ndo na ndo ti atënë ni so, so awandara ti laso kue ayeda na ni.

Na yâ ti angobo ti ambeni kodoro, a bâ so a yeke na lege ni ape ti tene koli atoto. Me, kamene ti nyen la ayeke dä tongana mbeni koli atoto na lê ti gbâ ti azo? Ambeni docteur so asoigné kobela ti li ayeda so a yeke lege ni ti tene mbeni zo afa vundu ti bê ti lo na lege ti toto. Ti sara vundu apeut ti gue ngbii ti sara si mo girisa kete na ndo ti zo so akui so. Me, kangango ndo ti vundu apeut ti sara sioni mingi na mo. Tongaso, Bible atene ape so a yeke sioni ti tene mbeni koli atoto na lê ti gbâ ti azo. Bâ tapande ti Jésus. Na ngoi ti kuâ ti kamarade ti lo Lazare, Jésus atoto na lê ti azo, atâa so lo yeke na ngangu ti zingo akuâ!—Jean 11:33-35.

Fani mingi, sarango ngonzo ahon ndo ni ayeke mbeni fason ti fango vundu ti e na gigi, mbilimbili tongana tënë ti kuâ ni atï gi gbagburu tongaso. Mbeni zo, so sewa ti lo akui, apeut ti sara ngonzo ndali ti araison mingi. Na tapande, tongana mbeni zo so azo ane lo mingi atene na lo mbeni tënë so ayeke na lege ni ape. Mike, so ayeke na Afrique du Sud, atene: “Mbi yeke lani gi na ngu 14 la babâ ti mbi akui. Na ngoi ti lungo kuâ ni, kota zo ti eglize ni atene so Nzapa ayeke na bezoin ti anzoni zo, ndani la lo yeke mû ala hio na tere ti lo. * Tënë ni so ason bê ti mbi mingi ndali ti so e yeke na bezoin ti babâ ti e. Laso, tënë ni so angbâ ti son mbi, atâa so a sara ngu 63 awe.”

Ka tongana bê ti e afâ ngbanga na ndo ti e? Tongana mbeni zo akui gi gbagburu tongaso, peut-être e yeke tene na yâ ti bê ti e, ‘Tongana mbi sara fade ye tongaso, ka ye so adoit ti si ape.’ Wala peut-être ndangba tingbingo tere ti e na zo so akui so ahunzi na papa. Ye so apeut ti sara si bê ti e afâ ngbanga na ndo ti e.

Tongana bê ti mo ayeke fâ ngbanga na ndo ti mo mingi nga mo yeke sara ngonzo mingi, a yeke nzoni mo kanga ndo ni ape. Me, sara tënë ni na mbeni kamarade ti mo, lo yeke mä ande mo nzoni nga lo yeke dë bê ti mo na fango na mo so ambeni zo nga kue ayeke na mara ti oko pensé ni so. Bible atene: “Tâ ndeko andoye lakue; na lâ ti ye ti vundu, lo yeke tongana tâ ita.”—aProverbe 17:17.

Jéhovah Nzapa so acréé e alingbi ti duti kota kamarade ti mbeni zo so sewa ti lo akui. Ni la, fa atënë ti bê ti mo na lo na yâ ti sambela, ngbanga ti so ‘lo yeke bi bê ti lo na ndo ti mo.’ (1 Pierre 5:7). Na ndo ni, lo mû zendo so azo kue so ayeke sara tongaso ayeke wara ande dengo bê ndali ti so ala yeke wara “siriri ti Nzapa so ahon ndo ti bibe kue”. (aPhilippien 4:6, 7). Ni la, zia Nzapa adë bê ti mo na lege ti Bible. Sara molongo ti aversê so alingbi ti dë bê ti mo. (Bâ  encadré so ayeke na gbe ni ge). Mo peut  même ti tara ti bata ambeni versê ni na li ti mo. Atënë ti yâ ti aversê ni so apeut ti aidé ande mo na bï na ngoi so mo yeke gi mo oko nga tongana lango agbu lê ti mo ape.—Ésaïe 57:15.

Ade ti ninga ape, wali ti Jack akui na kobela ti cancer. Jack so ayeke na ngu 40 atene so, na ambeni ngoi, lo bâ so lo yeke gi lo oko mingi. Me, sambela la a-aidé lo. Lo tene: “Tongana mbi sambela Jéhovah, mbi bâ so mbi yeke mbi oko ape. Fani mingi, mbi yeke zingo na milieu ti bï na mbi peut ti kiri ti lango ape. Me na ngoi so mbi diko nga mbi gbu li ti mbi na ndo ti ambeni tënë ti dengo bê na yâ ti Bible nga na pekoni, tongana mbi fa atënë ti bê ti mbi kue na Nzapa na yâ ti sambela, bê ti mbi adë. Ye so ayeke sara si mbi wara lege ti lango.”

Mama ti mbeni maseka-wali, so iri ti lo ayeke Vanessa, akui na peko ti mbeni kobela. Vanessa nga kue abâ ngangu ti sambela. Lo tene: “Na ngoi so aye ayeke ngangu na mbi mingi, mbi yeke di gi iri ti Nzapa na kota go na mbi yeke toto. Jéhovah ayeke mä asambela ti mbi nga lo yeke mû na mbi ngangu so mbi yeke na bezoin ni.”

Ambeni wanganga atene na azo so agirisa asewa ti ala na so a yeke ngangu na ala ti hon ndo ti vundu ni so, ti mû tere ti ala wala ngoi ti ala ti sara ambeni kua ndali ti nzoni ti amba ti ala. Sarango tongaso apeut ti ga na ngia na ala nga alingbi ti sara si vundu ti ala ni adë kete (Kusala 20:35). Mingi ti aChrétien so mbeni sewa ti ala akui abâ so ti aidé ambeni zo ayeke ga na kota dengo bê.—2 aCorinthien 1:3, 4

^ par. 5 A yeke pëpe ye so Bible afa la. Me, Bible afa aye ota so asara si azo ayeke kui.—Zo-ti-fa-tene 9:11; Jean 8:44; aRomain 5:12.