Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 3 2016

 BIBLE ACHANGÉ FINI TI AZO

Mbi manda ti mû nengo na awali nga na mbi wani

Mbi manda ti mû nengo na awali nga na mbi wani
  • A DÜ LO NA NGU: 1960

  • NA KODORO TI: FRANCE

  • LO YEKE ÂNDÖ: ZO TI NYONGO SIONI MBANGI NGA ZO SO AYEKE NE AWALI APE

GIGI TI MBI ÂNDÖ:

A dü mbi na kodoro ti Mulhouse, so ayeke na mbage ti nord-est ti France, na yâ ti mbeni quartier so sarango ye ti ngangu na zo ahon ndo ni dä. Na kete ti mbi, azo aye papa lani na yâ ti quartier ti e mingi. Na yâ ti fami ti e, e yeke ne ka awali ape nga a yeke ngangu ti tene akoli ahunda wango na ala. A fa na mbi so place ti awali ayeke ka gi na yâ ti cuisine, ti bâ lege ti akoli ti ala nga na amolenge ti ala.

Na kete ti mbi lani, gigi ayeke ngangu na mbi. Na ngoi so mbi wara ngu bale-oko, babâ ti mbi akui ndali ti so lo yeke nyon ka sämba mingi. Ngu oku na pekoni, mbeni yaya ti mbi ti koli afâ tere ti lo. Gi na yâ ti oko ngu ni so, na ngoi so ambeni sewa use atiri na popo ti ala, a fâ mbeni zo na lê ti mbi tongaso, na ye ni so asara mbi nzoni ape. Azo ti sewa ti mbi afa na mbi kpongo zo na zembe, pikango ngombe nga ti tiri tongana a hunda ti sara tongaso. Ndali ti aye ni so, mbi komanse ti sara atatouage na tere ti mbi nga ti ga zo ti nyongo sämba.

Na ngu 16, lango oko oko, mbi yeke nyon gbenda ti sämba 10 ti si na 15 tongaso. Na pekoni, mbi komanse ti nyon mbangi. Ti vo aye ni so, mbi yeke kä agbagbarango wen nga mbi yeke nzi ye. Na ngu 17, mbi sara kanga déjà awe. Tongana a diko ni kue, a dë ngbanga fani 18 na li ti mbi ndali ti nzi nga na sarango ye ti ngangu na zo.

Na ngu 20 tongaso, gigi ti mbi akiri aga kirikiri. Na yâ ti lango oko, mbi peut ti roulé kugbe ti mbangi 20 na mbi nyon ni, nga mbi yeke nyon ambeni sioni yorö na tere ni. Fani mingi, a ngbâ kete mbi kui na yâ ni. Mbi komanse ti kä mbangi, na ye so asara si mbi yeke fono lakue gi na ngombe nga na zembe. Mbeni lâ, mbi pika mbeni koli na ngombe, me merci so lê ti ngombe ni amû gi wen ti ceinture ti lo! Na ngu 24, mama ti mbi akui na a sara si mbi ga encore sioni mingi. Tongana azo atingbi na mbi na lege, mbeto ayeke sara ala, ala yeke fâ lege. Teti so mbi yeke tiri ka mingi, asamedi na adimanche a yeke wara ka gi mbi na yâ ti acommisariat wala na hôpital ti soigné akä ti mbi.

Na ngu 28, mbi sara mariage. Tongana ti so ala peut ti hinga, mbi yeke ne lani wali ti mbi ni ape. Mbi yeke zonga ka lo lani nga mbi yeke pika lo. E yeke sara ye tongana ti ambeni koli na wali ape. Mbi pensé ti mbi mbi tene gbâ ti aye ti baba so mbi nzi si mbi mû na lo so alingbi awe. Na pekoni, mbeni ye so mbi ku tere ti na ni ape asi. A-Témoin ti Jéhovah akomanse ti manda Bible na lo. Na peko ti kozo  mandango ye ni, lo zia lege ti nyongo manga, lo ke ti mû anginza ti nzi ti mbi ni nga lo kiri na mbi aye ti lo ti baba ni. Ye ni so ason mbi ngangu. Mbi kanga lege na lo ti manda Bible ni nga mbi yeke nyon manga na mbi tuku guru ni na lê ti lo. Mbi yeke zia kamene na lê ti lo na lê ti azo na yâ ti quartier.

Na mbeni bï, na ngoi so mbi soulé ngangu, mbi bi wâ na yâ ti da ti e. Wali ti mbi la aga azi mbi na molenge ti e ti wali, so ayeke na ngu oku, na yâ ti wâ ni. Na ngoi so sämba ni akpe na lê ti mbi awe, bê ti mbi akomanse ti fâ ngbanga na ndo ti mbi. Ti mbi, Nzapa apeut lâ oko ape ti pardonné mbi. Mbi rappelé so mbeni lâ, mbeni prêtre atene so azo ti sioni ayeke gue ande na enfer. Même docteur so ayeke soigné ka mbi atene na mbi: “Ye oko ti sara ngbanga ti mo ayeke dä ape! Mo buba ti mo awe.”

LEGE SO BIBLE ACHANGÉ FINI TI MBI:

Na peko ti wâ ni so, e gue e lango na ndo ti akogara ti mbi. Na ngoi so aTémoin ti Jéhovah ni aga ti bâ wali ti mbi, mbi ngbâ mbi hunda ala, mbi tene: “Eskê Nzapa apeut ti pardonné asiokpari ti mbi kue?” Ala fa na mbi versê ti 1 aCorinthien 6:9-11. Versê ni afa asarango ye so Nzapa afâ ngbanga na ndo ni, me a kiri a tene: “Ambeni na popo ti ala ayeke ândö tongaso.” Tënë ni so afa na mbi so mbi peut ti changé. Na pekoni, aTémoin ti Jéhovah ni afa na mbi so Nzapa aye mbi na dikongo na mbi versê ti 1 Jean 4:8. Tënë ni adë bê ti mbi na mbi hunda ala ti manda Bible na mbi fani use na yâ ti yenga oko, nga mbi komanse ti gue na abungbi ti ala. Mbi yeke sambela lani Jéhovah lakue.

Nze oko na pekoni, mbi zia lege ti nyongo mbangi nga na sämba. Hio, yâ ti tere ti mbi akomanse ti son! Mbi yeke bâ asioni bango-li, li ti mbi ayeke son, crampe nga na ambeni ye ni nde so ayeke sara zo tongana lo zia lege ti nyongo mbangi ayeke sara mbi. Me, na oko ngoi ni, mbi bâ so Jéhovah ayeke mû maboko na mbi nga lo mû ngangu na mbi. Mbi bâ aye ni tongana ti bazengele Paul. Na ndo ti tënë ti mungo maboko so Nzapa amû na lo, Paul tene: “Mbi wara ngangu ti sara aye kue ndali ti lo so lo mû ngangu ni na mbi.” (aPhilippien 4:13). Ambeni ngoi na pekoni, mbi zia nga lege ti nyongo manga.—2 aCorinthien 7:1.

Bible a-aidé mbi ti hinga ye so mbi yeke sara na yâ ti gigi ti mbi nga asara si sewa ti e aga nzoni. Asarango ye ti mbi na mbage ti wali ti mbi achangé. Mbi komanse ti ne lo nga ti tene “ pardon” nga na “merci.” Mbi ga mbeni nzoni babâ. Na peko ti so mbi manda Bible teti ngu oko tongaso, mbi mû fini ti mbi na Jéhovah nga mbi wara batême, na mungo peko ti tapande ti wali ti mbi.

NZONI YE SO MBI WARA NA PEKONI:

A yeke grâce na afango ye ti Bible la mbi ngbâ na fini so. Même afami ti mbi so ayeke aTémoin ti Jéhovah ape apensé lani so peut-être mbangi la ayeke fâ ande mbi wala a yeke fâ ande mbi na yâ ti tiri.

Afango ye ti Bible asara si sewa ti mbi aga nzoni mingi, ngbanga ti so a fa na mbi ti sara kua ti mbi ti koli nga ti babâ (aÉphésien 5:25; 6:4). E komanse ti sara aye na sewa. Fadeso, ahon ti tene mbi pensé so place ti wali ti mbi ayeke gi na cuisine, mbi yeke na ngia ti aidé lo si lo sara kua ti lo ti fango tënë ti Nzapa na azo, so lo yeke sara ni teti l’heure mingi. Lo yeke nga na ngia ti aidé mbi na yâ ti kua ti mbi ti ancien na yâ ti congrégation.

Ndoye ti Jéhovah Nzapa nga na nzoni-bê ti lo andu bê ti mbi mingi. Ye so asara si mbi yeke na kota nzara ti sara tënë ti asarango ye ti tere ti lo so na azo so a bâ ala tongana azo so apeut ti changé ape, ndali ti so azo kue abâ lani mbi tongaso. Mbi hinga so Bible apeut ti sara si gigi ti mbeni zo akiri aga nzoni. Bible afa na mbi ti ye azo na ti ne ala, atâa ayeke koli wala wali. Nga, a fa na mbi ti ne tere ti mbi wani.

TI HINGA AMBENI TËNË

Tongana nyen andia ti Nzapa ayeke sara nzoni na e?

Jésus afa ndani so e bezoin ti tene Bible afa lege na e. Lo fa nga akota ndia ni use.