Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

TOUR TI BA NDO NO. 3 2016

 KOTA MAMA-TENE NI | TONGANA MBENI ZO SO E YE LO MINGI AKUI

Dë bê ti azo so sewa ti ala kui

Dë bê ti azo so sewa ti ala kui

A si na mo awe ti bâ so ayeke ngangu na mo ti aidé mbeni zo so agirisa mbeni sewa ti lo so lo ye lo mingi? Na ambeni ngoi, e hinga vrai ye so e peut ti tene wala ti sara ape, tongaso e yeke zi yanga ape nga e sara mbeni ye ape. Me, ambeni nzoni ye ayeke dä so e peut ti sara ni.

Kota ye ni ayeke ti tene mo duti na tere ti zo ni na tenengo na lo ambeni tënë so afa so mo yeke pensé na lo. Na yâ ti angobo ti ambeni kodoro, tongana mo gbu mbeni zo na kate wala mo zia maboko na ndo ti go ti lo yeke, a yeke fa so mo bi bê na lo la. Tongana zo ni so, so sewa ti lo akui so, aye ti sara tënë, dengi mê mo mä lo nzoni. Kota ye so ahon atanga ni kue ayeke ti sara mbeni ye ndali ti sewa ni, peut-être na sarango mbeni kua so ayeke ngangu fadeso na ala ti sara ni, na tapande ti tö kobe, ti bâ lege ti amolenge wala ti aidé ala na lekengo kapa ti lungo kuâ ni, tongana ala ye. Ye ni so apeut ti ndu bê ti zo ni ahon gi ti tene apendere tënë na lo.

Tongana ngoi ayeke hon, mo peut ti sara tënë ti wakuâ ni, peut-être na lutingo na ndo ti apendere sarango ye ti lo wala ambeni pendere ye so mo dabe ti mo na ni na ndo ti lo. Mara ti lisoro tongaso apeut ti sara si zo ni ahe ngia kete. Na tapande, Pam, so  koli ti lo Ian akui asara angu omene awe, atene: “Azo ayeke sara ka na mbi tënë ti ambeni ye so Ian asara lani, so mbi hinga ni lâ oko ape. Ye so asara si bê ti mbi ayeke na ngia.”

Ambeni gingo nda ti ye afa so tongana mbeni zo agirisa mbeni sewa ti lo, na tongo nda ni, azo ayeke ga ti mû maboko na lo mingi, me kete na pekoni azo ni ayeke ga encore ape ndali ti so ala kiri na tere ti gbâ ti aye ti sarango ni so ala yeke na ni. Ni la, leke mbeni programme so mo peuti ti sara ni lakue ti gue ti bâ zo ni so. * Azo so agirisa sewa ti ala aye mingi tongaso, ngbanga ti so ayeke aidé ala ti hon ndo ti kota vundu ti ala ni.

Bâ tapande ti Kaori, mbeni maseka-wali na Japon. Lo sara lani vundu mingi ndali ti so mama ti lo akui nga anze 15 na pekoni yaya ti lo ti wali kue akui. Nzoni ye ni ayeke so, atâ kamarade ti lo amû maboko na lo lani aninga. Ritsuko, so ngu ti lo ahon ti Kaori mingi, ahunda lani na Kaori ni ti ga kamarade ti lo. Kaori atene: “Ti honde ape, tënë ni so anzere na mbi lani ape. Mbi ye mbeni zo nde amû place ti mama ti mbi ape, na zo oko alingbi nga ti mû place ti lo ape. Me, fason so mama Ritsuko asara na ye na mbage ti mbi apika bê ti mbi na asara si mbi ga nduru na lo. Lakue, e yeke gue legeoko ti fa tënë ti Nzapa na azo nga e yeke gue na abungbi legeoko. Lo yeke tisa nga mbi ti nyon thé, lo ga na mbi kobe nga lo yeke tokua ka alettre na mbi. Nzoni sarango ye ti mama Ritsuko asara ye mingi na ndo ti mbi.”

Mama ti Kaori akui asara fadeso angu 12 tongaso awe, na laso Kaori na koli ti lo ayeke sara kua ti fango tënë ti Nzapa teti al’heure mingi. Kaori atene: “Mama Ritsuko angbâ lakue ti pensé na mbi. Tongana mbi kiri na kodoro so lo yeke dä, mbi yeke gue ka ti bâ lo na lo yeke kpengba mbi.”

Mbeni tapande ti mbeni zo so awara aye ti nzoni na lege ti mungo maboko ti azo ayeke ti Poli, mbeni Témoin ti Jéhovah na Chypre. Poli ayeke lani na mbeni nzoni koli so iri ti lo ayeke Sozos, so asara ye tongana ti mbeni berger na lege so lo yeke tisa ka anyindu nga na awomua ti ga ti te kobe (Jacques 1:27). Mawa ni ayeke so, na ngoi so Sozos awara ngu 53, lo kui na kobela ti cancer ti li. Poli atene: “Mbi perdre koli ti mbi so mbi ye lo mingi so e na lo e sara ngu 33 ti mariage.”

Gi mbeni lege ti mû maboko na azo so sewa ti ala akui

Na peko ti so a lu kuâ ni, Poli na molenge ti lo Daniel, so ayeke na ngu 15, ague alango na Canada. Kâ, ala komanse ti gue na congrégation ti aTémoin ti Jéhovah. Poli atene: “Aita ti yâ ti fini congrégation ni so ahinga ye oko ape na ndo ti aye so e sara ândö nga na aye ti ngangu so asi na e. Me ye ni so akanga lege na ala ape ti ga nduru na e, ti dë bê ti e nga ti aidé e. Mungo maboko ti ala ni atï tâ na ngoi so molenge ti mbi ayeke na bezoin ti babâ ti lo mingi! Aita so ayeke mû li ni na yâ ti congrégation ni so afa so ala yeke bi bê mingi na Daniel. Mbeni oko asara kue ti iri Daniel na ngoi so ala ye ti gue ti joué ballon.” Laso, Poli na molenge ti lo ni ayeke nzoni.

Tâ tënë, e peut ti mû maboko nga ti dë bê ti azo so ayeke na yâ ti vundu na alege mingi. Bible nga kue adë bê ti e na lege ti pendere beku ti kekereke.

^ par. 6 Ambeni zo ayeke sara même lango ti kuâ ni na ndo ti calendrier ti dabe ti ala ti dë bê ti zo ni na ngoi so lo yeke na bezoin ni mingi, na lango so alingbi na lango ti kuâ ni wala nduru na ni.