A sara nduru na ngu 40 tongaso awe la azo ti Israël ayeke na yâ ti benyama. Ala kinda gbâ ti angangu gbata. Fadeso, so ala sara camp ti ala na yâ ti benyama ti Moab awe, na mbage ti est ti Ngu ti Jourdain, ngoi ti tene ala lï na Sese ti Zendo alingbi awe. Balak, so ayeke gbia ti Moab, asara mbeto mingi ti tene azo ti Israël amû sese ti lo. Tongaso, lo tisa mbeni koli so iri ti lo ayeke Balaam ti ga na Moab na ti deba azo ti Israël.

Me Jéhovah atene na Balaam: ‘Mo deba azo ti Israël pëpe.’ Tongaso, Balaam ake ti gue. Gbia Balak atisa lo ti fani use ni nga lo mû zendo ti mû na Balaam aye kue so lo ye. Me kue Balaam ake. Na pekoni, Nzapa atene: ‘Mo peut ti gue. Me mo yeke tene gï peko ti tënë so mbi yeke fa ande na mo ti tene.’

Balaam amonté na ndö ti kororo ti lo na lo mû lege ti sud ti gue na Moab. Lo leke na bê ti lo ti gue ti deba azo ti Israël, atâa so Jéhovah atene na lo ti sara ni ape. Ange ti Jéhovah asi na lo na ndö ti lege fani ota. Balaam alingbi pëpe ti bâ ange ni, me gï kororo ni la apeut ti bâ lo. Kozoni, kororo ni azia ndö ti lege ni lo lï ngonda. Na pekoni, kororo ni akiri na terê ti mbeni gbagba ti tênë, na lo pete gere ti Balaam ni na terê ti gbagba ti tênë ni. Na ndani, kororo ni alango na sese na milieu ti lege ni. Na angoi kue so kororo ni ayeke sara aye ni so, Balaam ayeke pika lo na mbeni keke.

Na peko ti aye ota so, Jéhovah asara si kororo ni asara tënë. Kororo ni ahunda Balaam, atene: ‘Ngbanga ti nyen la mo pika mbi tongaso?’ Balaam atene: ‘Ngbanga ti so mo sara na mbi ye ti buba. Tongana mbi yeke fade na épée, ka mbi fâ mo awe!’ Kororo ni atene: ‘Mo yeke monté ka na ndö ti mbi asara angu mingi awe. Mbi sara mbeni ye tongaso kozoni na mo awe?’

Na pekoni, Jéhovah azi lê ti Balaam ti bâ ange ni. Ange ni atene: ‘Jéhovah atene lani na mo ti deba azo ti Israël pëpe.’ Balaam atene:  ‘Mbi sara siokpari awe. Mbi yeke kiri na ndo ti mbi.’ Me ange ni atene: ‘Mo peut ti gue na Moab ni, me mo yeke tene ande gï tënë so Jéhovah atene na mo.’

Eskê Balaam amanda ye na lege ti ye so asi so? Ên-ën. Na peko ti ye so, Balaam atara ti deba azo ti Israël fani ota, me lakue Jéhovah asara si lo iri tënë nzoni na ndö ti ala. Na ndani, azo ti Israël asara bira na azo ti Moab, na a fâ Balaam. Tongana fade Balaam amä yanga ti Jéhovah na tongo nda ni, ka a yeke duti fade nzoni ape?

“Ala sara hange na alege nde nde kue ti sarango bê ti ye, ngbanga ti so, atâa tongana mbeni zo ayeke na aye mingi, fini ti lo alondo pëpe na aye so lo yeke na ni.”​—Luc 12:15