Ambeni ngoi na pekoni, na ngoi so azo ti Israël ayeke na yâ ti benyama, Coré, Dathan, Abiram nga na ambeni zo 250 asara kpengba-li na Moïse. Ala tene na lo: ‘Ti ala ni ahon ndö ni awe! Ngbanga ti nyen la mo la mo yeke mû li ni na gï Aaron la ayeke kota Prêtre? Jéhovah ayeke na e kue, me gï na mo na Aaron ape.’ Tënë ni so anzere na Jéhovah oko ape. Lo bâ ni tongana sarango kpengbango-li na lo la!

Moïse atene na Coré nga na azo kue so amû peko ti lo so, lo tene: ‘Ala ga kekereke na ndapre, nga ala mû aye ti ziango lê ti wâ dä, ala tuku dukane na yâ ni. Jéhovah ayeke fa ande zo so lo soro lo.’

Na ndade ni, Coré na azo 250 ni so ague awara terê na Moïse na yâ ti tabernacle. Kâ, ala zia wâ na terê ti dukane ni mo bâ mo tene ala yeke aprêtre. Jéhovah atene na Moïse na Aaron, lo tene: ‘Ala zi terê ti ala yamba na terê ti Coré na azo ti lo.’

Atâa so Coré ague na terê ti Moïse na yâ ti tabernacle ni, Dathan, Abiram nga na afami ti ala ake ti ala ti gue. Jéhovah atene na azo ti Israël ti hon yongoro na terê ti atente ti Coré, Dathan nga na Abiram. Hio, azo ti Israël akpe yongoro na ni. Dathan, Abiram nga  na afami ti ala aluti na devant ti atente ti ala. Mo ye ti bâ, sese asuru na amene ala. Na yâ ti tabernacle ni, mbeni wâ alondo na yayu aga agbi Coré na azo ti lo 250 so kue.

Na pekoni, Jéhovah atene na Moïse: ‘Mo mû keke oko oko na maboko ti amokonzi ti mara oko oko, na mo sû iri ti ala na ndö ni. Me na ndö ti keke ti mara ti Lévi, mo sû iri ti Aaron na ndö ni. Mo zia ni na yâ ti tabernacle, nga keke ti zo so mbi yeke soro lo la ayeke sara ande fleur.’

Na ndade ni, Moïse asigi na akeke ni kue na lo fa ni na amokonzi ni. Keke ti Aaron la fleur asigi dä nga alê ti amande so abe awe ayeke na terê ni. A yeke na lege so la Jéhovah akiri afa biani so lo soro Aaron ti duti kota prêtre.

“Ala mä yanga ti ala so ayeke mû li ni na popo ti ala na ala woko terê ti ala na gbe ti ala.”​—aHébreu 13:17