ÉZÉCHIEL 34:23

KOTA TËNË NI: Aprophétie osio so asara tënë ti Messie nga na gango tâ tënë ni na ndö ti Christ

1-3. Ngbanga ti nyen la vundu asara lani Ézéchiel? Nyen la yingo ti Nzapa amû maboko na lo ti sû?

ÉZÉCHIEL ayeke na yâ ti ngu omene ti lo so a gue na lo na mbeni kodro-wande. * Vundu asara prophète ni mingi ndali ti sioni fason so a yeke komande na ni na Juda, so ayeke kodro ti lo. Lo bâ agbia mingi so akomande na Juda.

2 A dü Ézéchiel na milieu ti komandema ti Gbia Josias so ayeke be-ta-zo. A doit lani ti nzere na Ézéchiel mingi ti mä aye so Josias asara ti futi ayongoro yanda nga ti kiri na tâ vorongo Nzapa na place ni na Juda (2 Chron. 34:1-8). Me aye so Josias asara ngangu ti sara so angbâ ape ndali ti so mingi ti agbia so akomande na peko ti lo angbâ ti voro ayanda. A yeke ye ti dongo bê ape so na gbe ti komandema ti asioni gbia so mara ni aga sioni nga songo ti ala na Jéhovah abuba. Beku ayeke dä encore ape? Ên-ën, beku ayeke dä.

3 Na lege ti yingo ti Jéhovah, prophète ti lo so ayeke be-ta-zo asû mbeni prophétie, kozo prophétie na popo ti gbâ ti aprophétie, na ndö ti Messie. Lo so lo yeke duti ande Gbia nga Berger so ayeke kiri na tâ vorongo Nzapa biani biani na place ni nga lo yeke bâ ande lege ti ataba ti Jéhovah na nzoni bê. A yeke nzoni e gbu li ti e nzoni na ndö ti aprophétie so ndali ti so gango tâ tënë ni andu fini ti lakue lakue  so e yeke wara ande. Zia e gbu li ti e fadeso na ndö ti aprophétie osio, so ayeke na yâ ti mbeti ti Ézéchiel, so asara tënë ti Messie.

“Kete maboko ti keke ni” ayeke ga ‘mbeni keke ti cèdre so ayeke pendere mingi’

4. Prophétie wa la Ézéchiel atene lani? Jéhovah ato nda ti prophétie ni lani tongana nyen?

4 Na ngu 612 tongaso kozo na ngoi ti e, “Jéhovah asara tënë” na Ézéchiel, na lo tene mbeni prophétie so afa nda ti komandema ti Messie nga ndani so e bezoin ti zia bê ti e na Royaume ti lo. Jéhovah ato nda ti prophétie ni na tenengo na Ézéchiel ti tene mbeni prophétie na parabole na amba ti lo so a gue na ala na kodro-wande. Prophétie ni so afa tongana nyen la agbia ti Juda ayeke na mabe ape nga agboto lê na ndö ti komandema ti Messie so ayeke mbilimbili so bezoin ni ayeke dä.​—Ézéch. 17:1, 2.

5. Kota tënë ti parabole ni ayeke nyen?

5 Diko Ézéchiel 17:3-10. Kota tënë ti parabole ni ayeke so: Mbeni “kota aigle” afâ mbeni li ti keke ti cèdre na lo zia ni “na yâ ti mbeni gbata ti azo ti dengo buze.” Na pekoni, aigle ni amû “mbeni lê ti ngongoa ti kobe ti kodro ni” na lo lu ni na yâ ti mbeni yaka so kobe ayeke lë dä mingi “na terê ti kota ngu.” Ngongoa ni asigi, amaï aga “mbeni vigne so alë mingi”. Na pekoni, mbeni use “kota aigle” ni aga. “Keke ti vigne ni so ayôro agunda ti lo na mbage” ti use aigle ni ti ku ti tene aigle ni amû ni ague na ni na mbeni ndo so ngu ayeke dä mingi. Jéhovah ake sarango ye ti keke ti vigne so, lo fa so a yeke fâ agonda ti keke ni na “lo yeke hule ande biaku biaku”.

Kozo kota aigle ni aye ti sara tënë ti Nébucadnezzar, gbia ti Babylone (Bâ paragraphe 6)

6. Fa nda ti parabole ni.

6 Nda ti parabole ni ayeke nyen? (Diko Ézéchiel 17:11-15.) Na ngu 617 kozo na ngoi ti e, Nébucadnezzar, gbia ti Babylone (kozo “kota aigle” ni), asara camp na terê ti Jérusalem. Lo zi Jéhoïakin, gbia ti Juda (“li ti keke” ni), na ndö ti trône ti lo na lo gue na lo na Babylone (“gbata ti azo ti dengo buze” ni). Nébucadnezzar azia Sédécias (mbeni “lê ti ngongoa ti kobe ti kodro ni” so ayeke ti molongo ti agbia) na ndö ti trône na Jérusalem. Lo sara si fini gbia ti Juda so adeba yanga ti lo na iri ti Nzapa, sarango tongaso afa so a lingbi lo duti zo ti komande so ayeke be-ta-zo na gbe ti Nébucadnezzar (2 Chron. 36:13). Me atâa so Sédécias adeba yanga ti lo, lo sara kpengbango-li na azo ti Babylone na lo tourné na mbage ti Pharaon ti Égypte (use “kota aigle” ni) ti tene aturugu ti lo amû maboko na lo, me lo wara ni ape. So Sédécias asara ye pëpe alingbi na bä so lo dë Jéhovah ake ye so lo sara so (Ézéch. 17:16-21). Na nda ni, a zi Sédécias na mbata ti gbia na lo kui na kanga na Babylone.​—Jér. 52:6-11.

7. Aye wa la e lingbi ti manda na lege ti prophétie so a tene ni na parabole so?

7 Aye wa la e lingbi ti manda na lege ti prophétie so a tene ni na parabole so? Kozoni, a lingbi e so e yeke voro Nzapa na lege ni e sara ye alingbi na tënë ti yanga ti e. Jésus atene: “Zia ‘en’ ti ala angbâ gï ‘en,’ wala ‘ên-ën’ ti ala angbâ gï ‘ên-ën.’” (Mat. 5:37). Tongana e bâ so a yeke kota ye ti deba yanga na iri ti Nzapa ti tene tâ tënë, na  tapande na ngoi so e yeke témoin ti mbeni ye na da-ngbanga, e yeke bâ dengo bä ni so tongana kota ye. Use ni, a lingbi e sara hange na zo so e yeke sara confiance na lo. Bible awa e atene: “Zia bê ti mo na ndö ti amokonzi wala na ndö ti mbeni molenge ti zo pëpe, so lo lingbi ti sö zo pëpe.”​—Ps. 146:3.

8-10. Prophétie wa la Jéhovah afa na ndö ti Messie so ayeke Gbia? Prophétie ni aga tâ tënë tongana nyen? (Bâ nga encadré “Prophétie so asara tënë ti Messie: Pendere keke ti cèdre.”)

8 Me mbeni gbia ayeke dä so alingbi biani ti tene e zia bê ti e na lo. Na peko ti so Jéhovah afa prophétie so a tene ni na parabole na ndö ti maboko ti keke so a gue a zia ni na mbeni ndo so, lo gboto lê na ndö ti oko tënë ni so ti sara tënë ti Messie so ayeke ga Gbia.

9 Tënë ti prophétie ni. (Diko Ézéchiel 17:22-24.) Ti so ni so Jéhovah wani la ayeke sara ye me pëpe ambeni kota aigle. Lo yeke ko mbeni kete maboko ti keke ‘na li ti keke ti cèdre so ayo na nduzu mingi so, na lo yeke lu ni na li ti mbeni hoto so ayo na nduzu mingi.’ Kete maboko ti keke ni ayeke maï aga “mbeni keke ti cèdre so a yeke pendere mingi” so “mara ti andeke nde nde kue” ayeke wara ndo ti lango na yâ ni. Na pekoni, “akeke kue ti benyama” ayeke hinga so Jéhovah la asara si pendere keke so amaï.

10 Lege so prophétie ni aga tâ tënë. Jéhovah ako Molenge ti lo, Jésus Christ, na popo ti agbia so ayeke ahale ti David (“keke ti cèdre”), na lo lu lo na ndö ti Hoto ti Sion so ayeke na yayu (“hoto so ayo na nduzu mingi”). (Ps. 2:6; Jér. 23:5; Apoc. 14:1). Tongaso, Jéhovah ayâa na nduzu Molenge ti lo so awato ti lo abâ lo tongana “zo so ayeke senge zo ahon tanga ti azo kue”, na lege so lo mû na lo “trône ti babâ ti lo David.” (Dan. 4:17; Luc 1:32, 33). Legeoko tongana pendere keke ti cèdre so, Jésus Christ, Messie so ayeke Gbia, ayeke komande ande na ndö ti sese kue na azo kue ti gbe ti lo ayeke wara ande tënë nzoni na lege ti lo. So ayeke Gbia so alingbi biani ti tene e zia bê ti e na lo. Na gbe ti komandema ti Jésus, azo so amä yanga na ndö ti sese kue ayeke “duti na siriri na [ala] yeke gi bê ti [ala] pëpe, mbeto ti ye ti vundu ayeke sara [ala] pëpe.”​—aProv. 1:33.

11. Kpengba ye wa la e lingbi ti manda na lege ti prophétie na ndö ti “kete maboko ti keke” so aga “mbeni keke ti cèdre so ayeke pendere mingi”?

11 Ye so e lingbi ti manda na lege ti prophétie ni. Pendere prophétie na ndö ti “maboko ti keke” so aga ‘mbeni keke ti cèdre so ayeke pendere mingi’ amû maboko na e ti kiri tënë na kota hundango ndo so: Zo wa la e yeke sara confiance na lo? A yeke ye ti buba ti sara confiance na agouvernement ti azo nga na ngangu ti aturugu ti ala. Ti duti biani nzoni, a yeke na lege ti ndara ti zia bê ti e kue na Jésus Christ, Messie so ayeke Gbia. Gouvernement ti yayu so ayeke na maboko ti Jésus, so ayeke na ngangu ti komande nzoni, ayeke oko ye so amû beku na azo.​—Apoc. 11:15.

“Lo so ndia afa so ye ni ayeke ti lo”

12. Tongana nyen la Jéhovah afa polele so lo zia pëpe lege ti mbele so lo te na David?

12 So Nzapa afa nda ti prophétie na ndö ti a-aigle use so a tene ni na parabole, Ézéchiel ahinga so a yeke zi Sédécias, gbia so ayeke  be-ta-zo ape, so ayeke na popo ti agbia so ayeke ahale ti David, na ndö ti mbata ti gbia na a yeke gue na lo na Babylone. Peut-être prophète ni ahunda terê ti lo: ‘Ka ti mbele so Nzapa ate na David, so na yâ ni lo tene mbeni gbia so alondo na yâ ti sewa ti David ayeke komande teti lakue lakue so ayeke tongana nyen?’ (2 Sam. 7:12, 16). Tongana Ézéchiel agbu lani li ti lo na ndö ti hunda so, lo ku kiringo tënë ni ngbii ape. Na ngu 611 tongaso kozo na ngoi ti e, na mbasambala ngu so a gue na aJuif na Babylone, na ngoi so Sédécias ayeke komande na Juda, ‘Jéhovah asara tënë’ na Ézéchiel (Ézéch. 20:2). Jéhovah asara si lo tene mbeni prophétie na ndö ti Messie, prophétie ni afa polele so Nzapa azia pëpe lege ti mbele so lo te na David. Me prophétie ni afa so Messie so ayeke ga Gbia ayeke duti ande na droit ti komande tongana héritier ti David.

13, 14. Kota tënë ti prophétie so ayeke na Ézéchiel 21:25-27 ayeke nyen? Prophétie so aga tâ tënë tongana nyen?

13 Tënë ti prophétie ni. (Diko Ézéchiel 21:25-27.) Na atënë so ayeke polele, na lege ti Ézéchiel, Jéhovah asara tënë na “sioni mokonzi ti Israël”, lo so ngoi ti punir lo asi awe. Jéhovah atene na sioni gbia so atene a yeke mû “turban” nga na “couronne,” wala kpoto ti lo (aye so afa so lo yeke na komandema). Na pekoni, a yeke yâa na nduzu  azo so ayeke na komandema, so “ayeke na gbe ni”, na a yeke kiri na gbe ni ala so ayeke “kota”. Ala so ayeke na komandema ayeke ngbâ ti komande, me gï juska “lo so ndia afa so ye ni ayeke ti lo aga si”, na pekoni Jéhovah ayeke mû Royaume ni na lo.

14 Lege so prophétie ni aga tâ tënë. Na ngu 607 kozo na ngoi ti e, na ngoi so a futi Jérusalem, a kiri na Royaume ti Juda so ayeke “kota” na Jérusalem na gbe ni na ngoi so azo ti Babylone afuti gbata ni nga ala mû Gbia Sédécias so a zi lo na mbata ti gbia ala gue na lo na ngbâa. So fadeso mbeni hale ti Gbia David ayeke komande na Jérusalem ape, a yâa na nduzu “lo so ayeke na gbe ni”, so ayeke komandema ti agentil, na a zia lo ti komande na ndö ti sese, me lo yeke komande gï teti mbeni ngoi. Ngoi ti aGentil, wala “ngoi so a fa ndali ti amara”, ahunzi lani na ngu 1914 na ngoi so Jéhovah amû komandema na Jésus Christ (Luc 21:24). So Jésus ayeke hale ti Gbia David, kite ayeke dä ape so lo la lo yeke Messie so “ndia afa so” Royaume ti Nzapa “ayeke ti lo”. * (Gen. 49:10). Tongaso, na lege ti Jésus, Jéhovah asara ye alingbi na kota zendo so lo mû na David so mbeni hale ti lo ayeke duti héritier ti Royaume teti lakue lakue.​—Luc 1:32, 33.

Ndia amû na Jésus droit ti duti Gbia ti Royaume ti Nzapa (Bâ paragraphe 15)

15. Ngbanga ti nyen la e lingbi ti duti na confiance kue kue kue na Gbia, Jésus Christ?

 15 Ye so e lingbi ti manda na lege ti prophétie ni. E lingbi ti duti na confiance kue kue kue na Gbia Jésus Christ. Ngbanga ti nyen? Ngbanga ti so nde na agbia ti dunia so peut-être azo asoro ala wala so amû komandema na ngangu, Jéhovah la asoro Jésus nga lo “mû na lo . . . royaume” so ndia afa so ayeke ti lo (Dan. 7:13, 14). Biani, Gbia so Jéhovah azia lo na ndö ti mbata so alingbi biani ti tene e sara confiance na lo.

“Wakua ti mbi David ayeke ga” ande “berger ti ala”

16. Jéhovah apensé nyen na mbage ti ataba ti lo? “Aberger ti Israël” ti ngoi ti Ézéchiel asara ye lani na kundu ti ataba ni tongana nyen?

16 Jéhovah so ayeke Kota Berger ayeke pensé mingi na ndö ti tënë ti nzoni duti ti ataba ti lo, awakua ti lo so ayeke na sese (Ps. 100:3). Na ngoi so lo zia aberger, ala so ayeke na komandema ti bâ ndo na ndö ti ataba ti lo, lo yeke bâ tongana nyen la ala yeke sara ye na ataba ni. Tongaso, tara ti bâ vundu so adoit ti sara Jéhovah lani ndali ti sarango ye ti “aberger ti Israël” na ngoi ti Ézéchiel. Sân kamene, aberger so ‘ayeke komande na ndö ti ataba ni na ngangu nga ala yeke sara pasi na ala.’ Ye so asara si kundu ti ataba ni abâ pasi na mingi ti ala azia lege ti tâ vorongo Nzapa.​—Ézéch. 34:1-6.

17. Jéhovah asö lani ataba ti lo tongana nyen?

17 Nyen la Jéhovah ayeke sara? Jéhovah atene na azo ti Israël so ayeke komande na ngangu so, lo tene: “Mbi yeke hunda ande ataba ti mbi na maboko ti ala.” Lo kiri lo tene: “Mbi yeke zi ande ataba ti mbi.” (Ézéch. 34:10). Jéhovah ayeke sara lakue ye alingbi na tënë ti yanga ti lo (Jos. 21:45). Na ngu 607 kozo na ngoi ti e, lo sö ataba ti lo na lege so lo sara si azo ti Babylone aga azi komandema na maboko ti aberger so aye gï nzoni ti ala wani so. Ngu bale-mbasambala na pekoni, lo sö awakua ti lo so ayeke tongana ataba na gbe ti Babylone lo kiri na ala na kodro ti ala tongaso si kâ, ala lingbi ti kiri na tâ vorongo Nzapa na place ni. Me ataba ti Jéhovah angbâ azo so mbeni ye ti bata ala ayeke dä ape na gbe ti akomandema ti dunia so. “Ngoi so a fa ndali ti amara” ayeke ninga angu ngbangbo mingi.​—Luc 21:24.

18, 19. Prophétie wa la Ézéchiel atene na ngu 606 kozo na ngoi ti e? (Bâ foto so ayeke na tongo nda ti chapitre so.)

18 Na ngu 606 kozo na ngoi ti e, ngu oko tongaso na peko ti so a futi Jérusalem nga angu mingi kozo ti tene a zi azo ti Israël so a gue na ala na Babylone, Jéhovah amû yingo ti lo na Ézéchiel ti tene mbeni prophétie. Prophétie ni afa so Jéhovah so ayeke Kota Berger apensé mingi na ndö ti nzoni duti ti ataba ti lo teti lakue lakue. Prophétie ni afa tongana nyen la Messie so ayeke Gbia ayeke fa lege na ataba ti Jéhovah.

19 Tënë ti prophète ni. (Diko Ézéchiel 34:22-24.) Nzapa ‘ayeke soro mbeni berger’ so lo yeke iri lo “wakua ti mbi David”. So a sara kua na tënë “mbeni berger” legeoko na tënë “wakua” afa so Gbia ni ayeke kiri pëpe na komandema na ahale ti David, me lo la lo yeke duti héritier ti David teti lakue lakue. Berger so ayeke Gbia so ayeke mû ande kobe na ataba ti Nzapa nga lo yeke ga “mokonzi na popo  ti ala.” Jéhovah ayeke “te ande mbele ti siriri” na ataba ti lo. ‘Tufa ayeke tuku na ndö ti ala tongana ngu-nzapa so apika’ nga ala yeke duti nzoni. Siriri ayeke duti na popo ti azo me nga na popo ti azo na anyama.​—Ézéch. 34:25-28.

20, 21. (a) Prophétie na ndö ti “wakua ti mbi David” aga tâ tënë tongana nyen? (b) Atënë so Ézéchiel atene na ndö ti “mbele ti siriri” aye ti tene nyen teti kekereke ti e?

20 Lege so prophétie ni aga tâ tënë. So Nzapa airi Gbia ni “wakua ti mbi David,” na lege ti prophétie, lo yeke sara tënë ti Jésus so ayeke hale ti David so ndia amû lege na lo ti lë gbia (Ps. 89:35, 36). Na ngoi so Jésus ayeke lani na sese, lo fa so lo yeke “berger so ayeke nzoni mingi”, lo “kä fini ti [lo] na kuâ ndali ti ataba ni.” (Jean 10:14, 15). Me fadeso lo yeke Berger na yayu (aHéb. 13:20). Na ngu 1914, Jéhovah azia Jésus Gbia na lo mû na lo kua ti bango lege ti ataba ti lo na sese ge nga ti mû kobe na ala. Ngoi kete na pekoni, na ngu 1919, fini Gbia so azia “ngbâa be-ta-zo so ayeke sara ye na ndara” ti mû kobe na “azo ti kua”, awakua ti Nzapa so ayeke be-ta-zo so ayeke na beku ti gue na yayu wala ti wara fini na sese (Mat. 24:45-47). Na gbe ti fango lege ti Christ, ngbâa be-ta-zo angbâ ti mû kobe ti yingo nzoni na ataba ti Nzapa. Kobe so amû maboko na ala ti maï siriri nga na nzoni duti na yâ ti paradis ti yingo. Paradis ti yingo so angbâ ti kono.

21 Atënë so Ézéchiel atene na ndö ti “mbele ti siriri” nga na tufa so ayeke tuku tongana ngu-nzapa aye ti tene nyen teti kekereke ti e? Na yâ ti fini dunia so ayeke ga, awakua ti Jéhovah so ayeke voro lo na lege ni ayeke wara atufa kue so aga na lege ti “mbele ti siriri”. Na yâ ti paradis so ayeke duti ande na ndö ti sese, azo so ayeke be-ta-zo ayeke kiri ti sara pëpe mbeto ti bira, ti tene zo asara sioni na ala, ti nzara, ti kobela wala ti anyama ti ngonda (És. 11:6-9; 35:5, 6; 65:21-23). So ande na yâ ti paradis na sese ataba ti Nzapa ‘ayeke duti nzoni na zo oko ayeke zia mbeto na yâ ti ala pëpe’, a nzere na mo ape?​—Ézéch. 34:28.

Jésus so ayeke Berger na yayu ayeke bâ tongana nyen la a yeke sara ye na ataba ti Nzapa (Bâ paragraphe 22)

22. Jésus apensé nyen na ndö ti ataba ni? Tongana nyen la aita so ayeke sara kua tongana aberger a lingbi ti duti na mara bango ndo ti Jésus?

22 Ye so e lingbi ti manda na lege ti prophétie ni. Jésus ayeke pensé mingi na ndö ti nzoni duti ti ataba ni legeoko tongana Babâ ti lo. Berger so ayeke Gbia ayeke sara kue ti tene a mû kobe ti yingo nzoni na ataba ti Babâ ti lo nga ti tene ala duti na siriri nga ala duti nzoni na yâ ti paradis ti yingo. Ti duti na gbe ti Gbia so ti tene lo bâ lege ti e, a yeke tâ ye ti dengo bê. A lingbi ala so ayeke sara kua tongana aberger aduti na mara ti pensé ti Jésus na ndö ti ataba ni. A lingbi a-ancien abâ lege ti kundu ti ataba ni, “ala sara ni na bê ti ala wani” nga na “bê ti ala kue” nga ala duti azo so ataba ni alingbi ti mû tapande ti ala (1 Pi. 5:2, 3). Mbeni ancien ayeke ye lâ oko ape ti sara sioni na mbeni taba ti Jéhovah oko. Girisa pëpe atënë so Jéhovah atene na asioni berger ti Israël na ngoi ti Ézéchiel so lo tene: “Mbi yeke hunda ande ataba ti mbi na maboko ti ala.” (Ézéch. 34:10). Kota Berger ni ayeke bi bê mingi na fason so a yeke sara na ye na ataba ti lo, Molenge ti lo nga kue ayeke sara tongaso.

 “Wakua ti mbi David ayeke duti ande mokonzi ti ala lakue lakue”

23. Zendo wa la Jéhovah amû lani na ndö ti bungbingo azo ti mara ti Israël? Tongana nyen la Jéhovah asara si a ga tâ tënë?

23 Jéhovah aye ti tene awakua ti lo asara na lo ndo oko na yâ ti beoko. Na yâ ti prophétie so asara tënë ti kiringo na aye na place ni, Nzapa amû zendo atene ni yeke bungbi azo ti ni ndo oko, azo so aga na iri ti amara use ti royaume ti Juda nga na ti amara bale-oko ti royaume ti Israël, ni yeke bungbi ala ti ga “mara oko”. A yeke mo bâ mo tene lo sara si ‘anduru keke’ use ‘aga gï oko’ na maboko ti lo (Ézéch. 37:15-23). Na yâ ti mbeni gango tâ tënë ti prophétie ni, Nzapa akiri abungbi azo ti mara ti Israël oko na Sese ti Zendo na ngu 537 kozo na ngoi ti e. * Me dutingo beoko so ayeke lani gï kete tapande ti kota dutingo beoko so ayeke ga nga so ayeke ninga. Na peko ti so Jéhovah atene lo yeke bungbi azo ti Israël oko, lo fa na Ézéchiel tongana nyen la Gbia so ayeke komande ande ayeke bungbi atâ wakua ti Nzapa na ndö ti sese kue na yâ ti beoko so ayeke ngbâ lakue lakue.

24. Tongana nyen la Jéhovah afa Messie so ayeke duti Gbia? Komandema ti Gbia so ayeke duti ande tongana nyen?

24 Tënë ti prophétie ni. (Diko Ézéchiel 37:24-28.) Jéhovah akiri asara tënë ti Gbia so ayeke Messie atene “wakua ti mbi David”, “berger oko” nga “mokonzi”, me ge lo iri nga Lo so a mû Zendo ti lo so “gbia”. (Ézéch. 37:22). Komandema ti Gbia so ayeke duti ande tongana nyen? Lo yeke komande ande teti lakue lakue. So a sara kua na tënë “lakue lakue” nga na “ngbâ lakue lakue” afa so anzoni ye so  komandema ti Gbia so ayeke ga na ni ayeke hunzi ape. * Na gbe ti komandema ti Jésus beoko ayeke duti ande dä. Na gbe ti “gbia oko”, azo so ayeke be-ta-zo ayeke sara ande ye alingbi na a-oko ‘mbela’ nga “ala yeke lango ande na ndö ti sese” ndo oko. Komandema ti lo ayeke sara ande si azo ti gbe ti Gbia ni ayeke ga nduru mingi na Jéhovah Nzapa ahon ti kozo. Jéhovah ayeke te ande “mbele ti siriri” na azo ni. Jéhovah ayeke duti Nzapa ti ala, na ala yeke duti azo ti lo. Nga temple ti lo ayeke duti ande “na popo ti ala lakue lakue”.

25. Prophétie so asara tënë na ndö ti Messie so ayeke Gbia aga tâ tënë tongana nyen?

25 Lege so prophétie ni aga tâ tënë. Na ngu 1919, aChrétien so a soro ala ti gue na yayu so ayeke be-ta-zo abungbi lani oko na gbe ti “berger oko”, Jésus Christ, Messie so ayeke Gbia. Ambeni ngoi na pekoni, “azo mingi mingi,” so alondo na “popo ti amara kue, akete mara kue, azo ti kodro kue, ayanga ti kodro kue” abungbi oko na amba ti ala aChrétien so a soro ala ti gue na yayu (Apoc. 7:9). Ala bungbi aga “kundu oko ti ataba” na gbe ti “berger oko.” (Jean 10:16). Atâa beku ti ala ayeke ti gue na yayu wala ti wara fini na ndö ti sese, ala kue asara ye alingbi na ambela ti Jéhovah. Ye ti peko ni ayeke so, ala duti ndo oko na yâ ti paradis ti yingo tongana sewa ti aita so ayeke beoko na yâ ti dunia kue. Jéhovah asara si ala yeke na siriri nga temple ti lo, so aye ti sara tënë ti tâ vorongo Nzapa, ayeke na popo ti ala. Jéhovah ayeke Nzapa ti ala, na ala yeke na ngia ti duti awakua ti lo laso nga teti lakue lakue.

26. Tongana nyen la mo lingbi ti mû maboko ti tene beoko angbâ na yâ ti paradis ti yingo?

 26 Ye so e lingbi ti manda na lege ti prophétie ni. E yeke na pasa ti bungbi oko na yâ ti sewa ti aita ti dunia kue so ayeke beoko so ayeke voro Jéhovah na lege ni. Me pasa so asara si e yeke na mbeni kua ti sarango ni, a lingbi e mû maboko ti maï beoko ni. Tongaso, a lingbi e kue e sara mbage ti e ti ngbâ ti duti beoko na yâ ti aye so e mä na bê na ni nga na yâ ti asarango ye ti e (1 aCor. 1:10). Ti sara ni, e ye mingi ti te a-oko kobe ti yingo, e yeke sara ye alingbi na a-oko ndia ti Nzapa na ndö ti nzoni sarango ye nga e yeke sara kota kua so ayeke fango tënë ti Royaume nga sarango adisciple. Me tâ kota ye so asara si e yeke beoko ayeke ndoye. Tongana e sara kue ti gi ti duti na ndoye nga ti fa ni na alege nde nde, so andu ziango terê ti e na place ti amba ti e, bango mawa ti ala nga na mungo pardon, e yeke mû maboko na yâ ti dutingo beoko ti e. Bible atene so “ndoye ayeke kamba so abungbi ye mbilimbili.”​—aCol. 3:12-14; 1 aCor. 13:4-7.

Jéhovah asara tufa na ndö ti awakua ti lo so lo ye ala mingi so ayeke na yâ ti sewa ti aita so ayeke na yâ ti dunia kue (Bâ paragraphe 26)

27. (a) Mo pensé nyen na ndö ti aprophétie so ayeke na yâ ti mbeti ti Ézéchiel so asara tënë na ndö ti Messie? (b) Nyen la e yeke bâ na yâ ti achapitre ti peko?

27 E kiri singila mingi ndali ti aprophétie so ayeke na yâ ti mbeti ti Ézéchiel so asara tënë na ndö ti Messie. Tongana e diko aprophétie so nga e gbu li na ndö ni ayeke fa na e so Jésus Christ, Gbia ti e so e ye lo mingi, alingbi ti tene e sara confiance na lo, lo la ndia amû na lo droit ti komande, lo yeke bâ lege ti e na nzoni bê nga lo yeke sara si e ngbâ beoko teti lakue lakue. So tâ pasa si e yeke na ni ti duti azo ti gbe ti Gbia so ayeke Messie! Zia e girisa ape so aprophétie so asara tënë na ndö ti Messie so ayeke mbage ti kota mama-tene ti kiringo na tâ vorongo Nzapa na place ni so a fa ni na yâ ti mbeti ti Ézéchiel. Jésus ayeke lo so na lege ti lo Jéhovah ayeke bungbi azo ti lo ndo oko nga lo yeke sara si ala kiri avoro lo na lege ni (Ézéch. 20:41). Na yâ ti achapitre ti peko, e yeke bâ tënë na ndö ti pendere mama-tene ti kiringo na aye na place ni nga tongana nyen la a fa ni na yâ ti mbeti ti Ézéchiel.

^ par. 1 A komanse ti gue na aJuif na ngbâa na Babylone na ngu 617 kozo na ngoi ti e. Tongaso, omene ngu ni akomanse na ngu 612 kozo na ngoi ti e.

^ par. 14 A sara tënë ti molongo ti akotara ti Jésus so ayeke ahale ti David nzoni mingi na yâ ti aÉvangile.​—Mat. 1:1-16; Luc 3:23-31.

^ par. 23 Na chapitre 12 ti mbeti so, e yeke sara tënë na ndö ti prophétie ti Ézéchiel so asara tënë ti akeke use nga tongana nyen la aga tâ tënë.

^ par. 24 Mbeni mbeti atene na ndö ti tënë ti Hébreu so a kiri peko ni na “lakue lakue” nga na “ngbâ lakue lakue” atene: “Tënë so aye ti sara tënë ti ningango ti mbeni ye, me na yâ ni mo yeke wara nga tënë ti mbeni ye so achangé ape, mbeni ye so abuba ape nga so aninga mingi.”