Bɔtera na kɔ bɔ olili so na so

Bɔ tra na kɔ bɔ bahyehyɛ naso

 BUE 14

Nzuati yeɛ Nyameɛpiri Le Ahyehyɛdeɛ Ɔ?

Nzuati yeɛ Nyameɛpiri Le Ahyehyɛdeɛ Ɔ?

1. Nzuati yeɛ Nyameɛpiri hyehyɛle tete Isreal kyɛ maen ɔ?

Nyameɛpiri boaboale tete baba Abraham bosofoɛ noa yɛle bɛ maen, na ɔmane bɛ mmaraa ahoroɛ biemɔ. Ɔfrɛle sɔ maen ne “Isreal,” na bɛ ngome yeɛ ɔfale ye dwirɛ ne mane bɛ ɔ, na bafa naholɛ soen bama ye. (Edwein 147:19, 20) Yeti na mmenia bɔ bɛwɔ maen mukoraati so ne nate Israel so kɔhora konya nhyiraa.​—Kenga Genesis 22:18.

Nyameɛpiri yele Israelfoɛ nemɔ kyɛ ye adanzefoɛ. Bɛnwo abakɔsɛm maa yenwui kyɛ, sɛ mmenia di Nyameɛpiri mmaraa so a benya mvasoɛ pẽe. (Deuteronomium 4:6) Yeti, ná mmenia bɔ bɛwɔ maen ahoroɛ so ne kɔhora kɔfa Israelfoɛ so konwu Nyameɛpiri.​—Kenga Yesaia 43:10, 12.

2. Nzuati yeɛ bahyehyɛ naholɛ Kristofoɛ kyɛ kue ɔ?

Mmerɛ bie sĩ ne, Israelfoɛ ne hwerele Nyameɛpiri nyunu adom, na Yehowa fale Kristofoɛ asafo ne oosile sɔ maen ne gya nu. (Mateo 21:43; 23:37, 38) Kesalae, naholɛ Kristofoɛ ne yeɛ basi Israelfoɛ nemɔ gya nu kyɛ Yehowa Adanzefoɛ ɔ.​—Kenga Asomafoɛ Ne Nnwumaa 15:14, 17.

Yesu hyehyɛle ye sililɛfoɛ ne kyɛ kue, kyɛ bɛɛhã edwirɛ ne na bɛɛyɛ maen mukoraati ye asuafoɛ. (Mateo 10:7, 11; 24:14; 28:19, 20) Kesalae, sɔ adwuma ne ahɔ moa paa wɔ ayieleɛ mmerɛ he anu. Wɔ abakɔsɛm nu ne, ɛnnɛ paa yeɛ ole mmerɛ bɔ Yehowa aboaboa mmenia million pẽe noa wafi maenmaen mukoraati nu wawa naholɛ soen nu ɔ. (Nyekyire 7:9, 10) Bahyehyɛ naholɛ Kristofoɛ ne kyɛ kue kõ kyɛbɔ ɔkɔyɛ a bɛkɔbokaboka bɛnwo na bahyehyɛ bɛnwo ngunaen ɔ. Wɔ ewiase mukoraati ne, bele nhyehyɛeɛ bɔ ɔmaa benya Bible nu ngyerɛkyerɛ kõ wɔ bɛ nhyiamu ahoroɛ bo ɔ.​—Kenga Hebrifoɛ 10:24, 25.

 3. Sɛɛ yeɛ Yehowa Adanzefoɛ ahyehyɛdeɛ bɔ ɔwɔ berɛ ɛnnɛ ne hyɛle yebo ɔ?

Wɔ afoɛ 1870 nu ne, Bible asuafoɛ kue kãaba bie sa nwuni Bible nu naholɛ bɔ ne ɛso akata afoɛ pẽe ne biekũ. Né bɛse kyɛ nikyehorɛ tibɔ Yesu hyehyɛle Kristofoɛ asafo ne yeɛ ole kyɛ bɛkɔhã nzɛmba ne, yeti bɛ koso bɛhyɛle yebo bɛɛhãne ahennie nanwo dwirɛ ne wɔ maen ahoroɛ so. Wɔ 1931 nu ne, bɛfale dumaa Yehowa Adanzefoɛ bɛtole bɛnwo so.​—Kenga Asomafoɛ Ne Nnwumaa 1:8; 2:1, 4; 5:42.

4. Nhyehyɛeɛ beni yeɛ ɔwɔ Yehowa Adanzefoɛ soen nu ɔ?

Wɔ asomafoɛ ne abrɛ so ne, akwangyerɛ kue bɔ né bede Yesu bɛto nu kyɛ ye yeɛ ɔte asafo ne Ti ne bokale Kristofoɛ asafo ahoroɛ bɔ né bɛwɔ aseɛ pẽe so ne. (Asomafoɛ Ne Nnwumaa 16:4, 5) Sɔ ala yeɛ ɛnnɛ koso, mbanyi bɔ bele suanwu yeɛ bɛwɔ Akwangyerɛ Kue nanu ɔ, na bɛboka Yehowa Adanzefoɛ bɔ bɛwɔ wiase mukoraati ne. Bɛ yeɛ bɛnea Yehowa Adanzefoɛ asafo ti ahoroɛ bɔ bekyire Bible nu nwomaa ahoroɛ bo bɛkɔ dwudwolɛ ahoroɛ kɔbo 600 nu naso ɔ, na besa bɛnea maa betindim na bakyekyɛ. Yeti ɔmaa Akwangyerɛ Kue ne kora fa Twerɔnzɛm nu ngunaenhyɛ dwirɛ, ɔne akwangyerɛ ma asafo ahoroɛ kɔbo 100,000 bɔ bɛwɔ ewiase mukoraati ne. Wɔ asafo biala nu ne, mmienzua bɔ bɛfata ne sõ kyɛ asafo nu mbanyi anaa ɛnealɛfoɛ. Sɔ mmienzua he fi ɔdɔ nu nea Yehowa mmoaen naso.​—Kenga 1 Petro 5:2, 3.

Bahyehyɛ Yehowa Adanzefoɛ asafo ne kyɛ bɛhã nzɛmba ne, ná bɛyɛ mmenia asuafoɛ. Kyɛbɔ asomafoɛ ne yɛle ne, yɛ koso yɛkã edwirɛ ne wɔ awuro ne awuro nu. (Asomafoɛ Ne Nnwumaa 20:20) Yesa yɛne mmenia bɔ bele ahone páa bɔ bɛnye gye naholɛ nanwo ne sua Bible ne. Nakoso Yehowa Adanzefoɛ tte ahyehyɛdeɛ biala mbaen. Yɛte abusua kõ bɔ yele Baba bɔ ole ɔdɔ ɔ. Yɛte aliɛmaamɔ mmienzua ne mmrasua bɔ yenu biala dwene ye mango nwo ɔ. (2 Tɛsalonikafoɛ 1:3) Ɔnate kyɛ bahyehyɛ Yehowa asomvoɛ kyɛ bɛyɛ bɔ Nyameɛpiri kuro na bɛboka bɛnwo nati, bɛte abusua bɔ bele anigye paa wɔ aseɛ so ɔ.​—Kenga Edwein 33:12; Asomafoɛ Ne Nnwumaa 20:35.