Bɔtera na kɔ bɔ olili so na so

Bɔ tra na kɔ bɔ bahyehyɛ naso

 BUE 8

Nzuati Yeɛ Nyameɛpiri Ma Atẽe Maa Bɔne Ne Amaneɛnwunɛ Kɔ So Ɔ?

Nzuati Yeɛ Nyameɛpiri Ma Atẽe Maa Bɔne Ne Amaneɛnwunɛ Kɔ So Ɔ?

1. Ɔyɛle sɛɛ yeɛ bɔne wale ɔ?

Mmerɛ tenden yeɛ Nyameɛpiri amaa sona afa ali tumi, kyɛbɔ ɔkɔyɛ a ɔkɔla ali kyɛ bɛngɔhora bɛngɔye ɔhaw ahoroɛ bɔ sona fa nu ne bɛngofi berɛ le ɔ

Mmerɛ bɔ Satan pɛle ngondombo bɔ olimoa ne yeɛ bɔne hyɛle yebo ɔ. Ahyaseɛ ne, ná Satan te bɔfoɛ bɔ ɔte pɛ, nakoso “wanyina naholɛ nanu.” (Yohane 8:44) Né ɔpena kyɛ mmenia fa soen bɔ Nyameɛpiri ngome yeɛ ɔfata ye ne bɛma ye. Satan pɛle ngondombo hyirɛle Hawa, brasua bɔ olimoa ne, na ɔlakalakale ye maa otiele ye tra kyɛ okotie Nyameɛpiri. Adam ɔɔbokale ye so maa bɛyɛle Nyameɛpiri so asoserɛ. Bɔ ofili gyinaeɛ bɔ Adam sili nanu wale yeɛ ole bɔne ne ewue.​—Kenga Genesis 3:1-6, 19.

Mmerɛ bɔ Satan maa Hawa yɛle Nyameɛpiri so asoserɛ ne, ná ɔte atũa tia yenwo atẽe bɔ Nyameɛpiri le ye kyɛ odi tumi ne. Mmeni pẽe baaboka Satan so maa bapo Nyameɛpiri kyɛ bɛ Sodifoɛ. Ɛhe amaa Satan aayɛ “wiase sodifoɛ.”​—Kenga Yohane 14:30; 1 Yohane 5:19.

2. Aso na mvomsoɛ wɔ Nyameɛpiri abɔdeɛ nwo anaa?

Nyameɛpiri nyumaa mukoraati te pɛ. Ná mmenia ne abɔfoɛ bɔ Nyameɛpiri bɔle bɛ ne kɔhora kɔhɔ so kɔyɛ setie kɔma Nyameɛpiri. (Deuteronomium 32:4, 5) Nyameɛpiri bɔle yɛ ne, wama yɛ yenwo atẽe bɔ ɔmaa yɛkora yɛsi gyinaeɛ kyɛ yɛkɔyɛ bɔne anaa páa. Sɔ fanwodie ne maa yenya yenwo atẽe yekyire kyɛ yɛdɔ Nyameɛpiri.​—Kenga Yakobo 1:13-15; 1 Yohane 5:3.

3. Nzuati yeɛ Nyameɛpiri ama amaneɛnwunɛ ahɔ so waadwu ɛnnɛ ɔ?

Yehowa ama atẽe kyɛ bɛte ye tumidie so atũa oodwu mmerɛ bie. Nzuati ɔ? Kyɛbɔ ɔkɔyɛ a mmenia konwui kyɛ ebiala ngɔhora ngoli sona so tumi maa ongoyie sona yé mmerɛ bɔ ye sa nne nu ɔ. (Ɔsɛngafoɛ 7:29; 8:9) Kɔbo afoɛ 6,000 bɔ sona afa ali tumi ne amaa wala ali kyɛ sɔ dwirɛ ne te naholɛ. Mmenia bɔ bedi  tumi nanu biala hora yele kõɛ, nzɛmmɔnelilɛ, ndɛngyea, ɔne anwonyerɛ fille berɛ.​—Kenga Yeremia 10:23; Romanfoɛ 9:17.

Nakoso, Nyameɛpiri tumidie de ɔttekyɛ sona deɛ, bɛbɔ bede bɛto nu ne nya so mvasoɛ. (Yesaia 48:17, 18) Ɔngɔhyɛ, Yehowa kɔye sona tumidie mukoraati kofi berɛ. Mmenia bɔ bede Nyameɛpiri bɛto nu kyɛ bɛ sodifoɛ ngome yeɛ bɛkɔtena aseɛ naso ɔ.​—Yesaia 11:9.​—Kenga Daniel 2:44.

4. Yenwo atẽe beni yeɛ aboterɛ bɔ Nyameɛpiri ala ye ali ne amaa yanya ɔ?

Satan nwa ebiala nne berɛ bɔ okofi ye ahone nu kosõ Yehowa ɔ. Aso ɛmbena kyɛ ɛkɔmaa Satan dwirɛ ne kɔyɛ ngondombo anaa? Ɛkɔhora kɔyɛ sɔ! Aboterɛ bɔ Nyameɛpiri anyae ne amaa yanya yenwo atẽe bɔ yɛkɔfa yekohyire kyɛ yekuro kyɛ Nyameɛpiri koli yɛ so anaakyɛ sona. Yɛnate kyɛbɔ yɛbɔ yɛ bra so yeɛ yɛfa yekyire bɔ yɛpena kyɛ odi yɛ so ɔ.​—Kenga Hiob 1:8-12; Anyandera 27:11.

5. Yɛkɔyɛ sɛɛ na yaye Nyameɛpiri kyɛ yɛ sodifoɛ?

Yɛnate kyɛbɔ yɛbɔ yɛ bra so yeɛ yɛfa yekyire kyɛ yɛpena kyɛ Nyameɛpiri bayɛ yɛ Sodifoɛ ɔ

Sɛ yɛbɔ mmɔden yɛpena naholɛ soen bɔ ogyi Nyameɛpiri Dwirɛ Bible naso ne sĩ atẽe, na yɛfa yɛnwo yewura nu a, yɛkɔhora yɛkɔye Nyameɛpiri kyɛ yɛ Sodifoɛ. (Yohane 4:23) Sɛ yamva yɛnwo yanwurowura amanyɔnzɛm ne kõɛ nu kyɛbɔ Yesu yɛle ne a, na yɛpo Satan kyɛ yɛ sodifoɛ.​—Kenga Yohane 17:14.

Satan fa ye tumi hyɛ bra tɛɛ, ɔne nningyein bɔ ɔmvata nwo ngunaen. Sɛ yamva yɛnwo yanwura nu bie a, yɛ nnamvo ne yɛ mmusuafoɛ nanu bie kɔhora kɔgoro yɛnwo anaa bɛkɔpɔ yɛ. (1 Petro 4:3, 4) Yeti odikyɛ yɛbɔbɔ yesi gyinaeɛ. Aso mmenia bɔ bɛdɔ Nyameɛpiri ne yeɛ yɛne bɛ kɔbɔ anaa? Aso yɛkɔyɛ asoɛ yɛkɔma ye mmaraa bɔ nworɛ wɔ nu bɔ ofi ɔdɔ nu fa ma yɛ ne anaa? Sɛ yɛyɛ sɔ a, ná yɛma edwirɛ bɔ Satan hãne kyɛ sɛ yɛsõ Nyameɛpiri na sɛ yɛnwo kyere yɛ a, yɛkɔyakyi ɛsoen bɔ yɛfa yɛma ye ne, na yɛngotie ye ne bayɛ naholɛ.​—Kenga 1 Korintofoɛ 6:9, 10; 15:33.

Ɔdɔ bɔ Nyameɛpiri le ma sona ne maa yenya aworahyɛmuɛ kyɛ ɔkɔye bɔne ne amaneɛnwunɛ kofi berɛ. Bɛbɔ bɛfa b’abrabɔ bekyire kyɛ bede sɔ dwirɛ he bedi ne kɔtena aseɛ so daa.​—Kenga Yohane 3:16.