Bɔtera na kɔ bɔ olili so na so

Bɔ tra na kɔ bɔ bahyehyɛ naso

 BUE 6

Anyelasoɛ Beni Yeɛ Ɔwɔ Berɛ Ma Bɛbɔ Bawuwu Ne Ɔ?

Anyelasoɛ Beni Yeɛ Ɔwɔ Berɛ Ma Bɛbɔ Bawuwu Ne Ɔ?

1. Edwirɛ bɔ ɔyɛ anigye beni yeɛ ɔwɔ berɛ ma bɛbɔ bawuwu ne ɔ?

Mmerɛ bɔ Yesu dwule Betania bɔ opingye Yerusalem ne, né ye damvo Lazarus awu bɔ né wali ɛlɛnna ɔ. Yesu ne Martha ne Mary bɔ bɛte Lazarus bɔ wawu ne aliɛma mmrasuamɔ ne hɔle nekaa bɔ na basie ye ne. Wangyɛ yeɛ mmenia yili berɛ tɛkyɛ ɔ. Ɛkɔhora kɔfa w’adwene kobu anigye bɔ Martha ne Mary nyane ye mmerɛ bɔ Yesu tingyele Lazarus wale ngõa nu ne?​—Kenga Yohane 11:21-24, 38-44.

Né Martha se anigye dwirɛ bɔ ɔwɔ berɛ ma bɛbɔ bawuwu ne. Né ode di kyɛ Yehowa kotingye awufoɛ maa bɛkɔɔtena aseɛ so biekũ.​—Kenga Hiob 14:14, 15.

2. Tebea beni yeɛ awufoɛ wɔ nu ɔ?

Nyameɛpiri hã hyirɛle Adam kyɛ: “Ɛte nnɛtrɛ na nnɛtrɛ nu yeɛ ekosa kɔhɔ ɔ.”—GENESIS 3:19.

Bɛfale nɛtrɛ yeɛ bɛbɔle sona ɔ. (Genesis 2:7; 3:19) Yɛtte honhom abɔdeɛ bɔ yɛte ase wɔ anwoɔnaen nu ɔ. Yɛte abɔdeɛ bɔ yele anwoɔnaen ɔ, yeti sɛ yewu a yɛ nipadua ne bue bie biala ndena ngõa nu kõ. Sɛ yewu a, yɛ ameɛ ne koso wu, na yɛ nzusuleɛ mukoraati mini. Ɔnate kyɛ awufoɛ nze hwee nati, mmerɛ bɔ betingyele Lazarus bɛwale ngõa nu ne wanga kyɛ onwuni nikyeebie.​—Kenga Edwein 146:4; Ɔsɛngafoɛ 9:5, 6, 10.

Aso Nyameɛpiri yɛ abɔnefoɛ ayayadeɛ wɔ sẽe nu anaa? Ɔnate kyɛ Bible kã kyɛ awufoɛ nze hwee nati, ɔmaa yenwu kyɛ hell sẽe te ngyerɛkyerɛ bɔ ɔmaa mmenia dwudwo tia  Nyameɛpiri ɔ. Nyameɛpiri nguro ngyerɛkyerɛ bɔ yeɛ ole kyɛ ɔyɛ mmenia ayayadeɛ wɔ hell sẽe nu ne koraa.​—Kenga Yeremia 7:31.

3. Aso awufoɛ kɔhora ne yɛ kodwudwo anaa?

Awufoɛ ngora ndwudwo na bɛngora bɛnde dwirɛ. (Edwein 115:17) Nakoso, abɔfoɛ nanu biemɔ ttemayée, bɛkora bɛyɛ bɛnwo tekyɛ sona bɔ wawu ne, na bɛne yɛ adwudwo. (2 Petro 2:4) Yehowa nguro koraa kyɛ yɛne awufoɛ kodwudwo.​—Kenga Deuteronomium 18:10, 11.

4. Nwamɔ yeɛ bekotingye bɛ bɛkɔwa ngõa nu ɔ?

Bekotingye mmenia million apẽe bɔ bɛwɔ ewue kumãa nu ne maa bɛkɔɔtena ngõa nu wɔ aseɛ he aso biekũ. Bekotingye mmenia biemɔ po bɔ ɔnate kyɛ na bɛnze Nyameɛpiri nati bɛyɛle nningyein tɛɛ ne.​—Kenga Luka 23:43; Asomafoɛ Ne Nnwumaa 24:15.

Bɛbɔ bekotingye bɛ ne konya yenwo atẽe kosua Nyameɛpiri nwo naholɛ dwirɛ, na bayɛ setie bama Yesu bafa bahyire kyɛ bele ye nu gyidie. (Nyekyire 20:11-13) Bɛbɔ bekotingye bɛ bɛkɔwa ngõa nu bɔ bɛkɔyɛ bɔ ɔtengyɛ ne, bɛkɔhora bɛkɔnea atẽe kyɛ bɛkɔtena ase daa wɔ anigye nu wɔ aseɛ he aso.​—Kenga Yohane 5:28, 29.

5. Nzu yeɛ ewuetingyelɛ ne ma yenwu yɛfa Yehowa nwo ɔ?

Nyameɛpiri somane Ɔwa ne maa oowu mane yɛ kyɛbɔ ɔkɔyɛ a awufoɛ konya anyelasoɛ. Yeti ewuetingyelɛ ne maa yenwu Yehowa dɔ ɔne ye adom. Sɛ awufoɛ ba ngõa nu bieku a, nwa yeɛ ɛnea atẽe kyɛ ekonwu ye ɔ?​—Kenga Yohane 3:16; Romanfoɛ 6:23.