Pidatoma ine kutumikira ninga mpainiya, umaso wanga wacinja munjira yakuti nee ndikhaidikhira. (Aef. 3:20) Panango munabvundzika kuti pyenepi pyacitika tani. Mbandidzati kulonga pizinji, dikhirani ndikupangeni kuti umaso wanga watoma tani.

Ndabalwa ku Berlim, dziko ya Alemanya, miyezi mingasi pidatoma kwene Nkhondo Yaciwiri Ya Dziko Yonsene Yapantsi, mu caka 1939. Pikhali cifupi na kumala kwa nkhondo ineyi mu caka 1945, anyankhondo akhaponya mabhomba mazinji ku Berlim mukuphatisira ndeka. Mu ndzidzi ukhaponywa mabhomba anewa nyumba zizinji zikhali cifupi na nseu zapiswa, mbwenye ife tonsene panyumba pathu tathawa. Toera kutsidzikizika, ife tathawa mbitienda ku Erfurt, mu nzinda udabalwa mama.

Mama akhasaka kakamwe undimomwene, natenepa akhaleri mabukhu a anyakudziwisa pya filozofiya, pontho akhaenda m’magereja mazinji, mbwenye nee augumana. Mu caka 1948, Mboni za Yahova ziwiri zabwera panyumba pathu. Mama aapanga toera apite nyumba mbaacita mibvundzo mizinji. Mudapita mphindi zingasi, iye apanga ine na m’bale wanga kuti: “Ndagumana undimomwene!” Mukupita kwa ndzidzi, ine, mama, pabodzi na m’bale wanga tatoma kuenda ku misonkhano ku Erfurt.

Mu caka 1950, ife tabwerera pontho ku Berlim, kweneko tikhasonkhana ku Mpingo wa Berlim-Kreuzberg. Mukupita kwa ndzidzi, tafuluka mbitienda kunyumba inango, kweneko tikhasonkhana ku Mpingo wa Berlim-Tempelhof. Buluka penepo mama abatizwa, mbwenye ine ndikhanyinyirika. Thangwi yanji?

Cinthu cikhandicitisa kukhonda thambaruka cikhali kugopa. Maseze ndikhaenda mu utumiki mu pyaka piwiri, mbwenye nee ndamwazira munthu mphangwa. Pinthu pyadzacinja mu ndzidzi udadziwa ine abale na alongo adapangiza cipapo cawo mbaperekeka kuna Yahova. Anango akhadaikwa nkaidi ku mazunde a Nazi peno ku Mabulukiro a Dzuwa a Alemanya. Anango akhakwata mabukhu ncibisobiso mbaenda nawo ku Mabulukiro a Dzuwa a Alemanya, maseze iwo akhamangwa mbaikhwa  nkaidi. Pitsandzo pyawo pyandikhuya kakamwe. Ine ndanyerezera, khala abale anewa aikha umaso wawo pangozwi, pontho aikhwa nkaidi thangwi ya Yahova na abale awo, ine ndisafunikambo kumalisa kugopa.

Ndamalisa kugopa pidatoma ine kumwaza mphangwa mu kampanya yakupambulika mu caka 1955. Tsamba idabuluswa mu Informante, * M’bale Nathan Knorr alonga kuti kampanya ineyi ikhali ibodzi mwa makampanya makulu adacitwa kale na gulu. Iye alonga kuti amwazi mphangwa onsene mbadacita khundu mu kampanya ineyi “mbukhala mwezi wakutsandzayisa kakamwe m’basa yakumwaza mphangwa.” Mwandimomwene ndi pyenepi pidacitika! Mwakukhonda dembuka, ine ndaperekeka kuna Yahova, pontho ine, baba na m’bale wanga tabatizwa mu caka 1956. Mbwenye ndikhafunika kucita cisankhulo cakufunika kakamwe.

Ine ndikhadziwa kuti kutumikira ninga mpainiya ikhali basa yadidi yakuti ndikhafunika kuicita, mbwenye ndamala pyaka pizinji mbandidzati kucita pyenepi. Ine ndikhadasankhula kucita malonda, kugula pinthu kunja mbindipibweresa mu dziko ya Berlim. Buluka penepo, ndikhafuna kuphata basa yakuti mbidandiphedza toera kukhala na maluso mazinji mbandidzati kutoma upainiya. Ndi thangwi yace, mu caka 1961, ndatawira kuphata basa ku Hamburgo, mu nzinda ukulu wa Alemanya. Ine ndikhakomerwa kakamwe na basa ineyi, pyenepi pikhandicitisa kukhonda funa kupita m’basa ya ndzidzi onsene. Mbandidacitanji?

Ndisapereka takhuta kakamwe kuna Yahova, thangwi yakuphatisira abale aufuni toera kundiphedza kuikha pifuno pyauzimu pa mbuto yakutoma. Axamwali anga azinji akhatumikira ninga apainiya, natenepa iwo akhali citsandzo cadidi kwa ine. Kusiyapo pyenepi, M’bale Erich Mundt, wakuti akhali nkaidi ku mazunde andiphedza toera kunyindira Yahova. Iye alonga kuti abale akhanyindira mphambvu zawo basi nkaidi ku mazunde adzafewa. Mbwenye ale akhanyindira Yahova mwakukwana apitiriza kukhala akukhulupirika, pontho adzakhala mizati mu gulu ya Yahova.

Pontho, M’bale Martin Poetzinger wakuti mukupita kwa ndzidzi adzatumikira ninga m’bodzi wa Mathubo Akutonga apitiriza kuwangisa abale mbalonga: “Cipapo ndi cakufunika kakamwe cakuti munthu asafunika kukhala naco!” Pakumala kunyerezera mwacidikhodikho mafala anewa, ndasiya basa yanga mbanditoma kutumikira ninga mpainiya mwezi wa Junho wa caka 1963. Ceneci ndi cisankhulo cadidi kakamwe cakuti ndikhafunika kucicita. Pidapita miyezi miwiri, mbandidzati kusaka basa inango ndaphembwa toera kutumikira ninga mpainiya wakupambulika. Pidapita pyaka pingasi, Yahova andipasa nkhombo zizinji kupiringana zikhadikhira ine. Ndacemerwa toera kuenda Kuxikola ya Jiliyadhi, turma 44.

Cinthu cakufunika kakamwe cidapfundza ine ku Jiliyadhi makamaka na M’bale Nathan Knorr na Lyman Swingle ndi cakuti: “Lekani kusiya basa yanu mwakucimbiza.” Iwo atiwangisa toera tipitirize na basa yathu maseze pinentse. M’bale Knorr alonga: “Musafunika kuikha kupi manyerezero anu? Musafunika kuikha manyerezero anu ku pfumbi, pinthu pyakunyanyasa peno utcerengi? Peno musafunika kuikha manyerezero anu ku miti, maluwa peno ku nkhope yakutsandzaya? Pfundzani kufuna anthu!” Ntsiku inango, mu ndzidzi ukhafokotoza M’bale Swingle kuti anango asiya tani mwakucimbiza basa yawo, misozi yatoma kubuluka m’maso mwace. Iye asiya kucita nkhani yace mu mphindi zingasi toera akhurudzike. Pyenepi pyandikhuya kakamwe, pontho pyandiphedza toera ndikhonde kutsukwalisa Kristu na abale ace.—Mat. 25:40.

Ntsiku idamalisa ife xikola, abale angasi a pa Bheteli abwera kudzabvundza anango a ife kuti tinaenda katumikira kupi. Iwo akhalonga pinthu pyadidi thangwi ya madziko mazinji, mbwenye pidatawira ine kuti ndinaenda ku “Kongo (Kinshasa).” Iwo amatama pang’ono mbalonga: “Oh, Kongo! Yahova akupase nkhombo!” Mu ndzidzi unoyu, ku Kongo (Kinshasa) kukhabveka mphangwa za kuphiwa kwa anthu thangwi ya nkhondo. Mbwenye ine ndikhakumbuka pinthu pidapfundza ine ku Jiliyadhi. Pidamalisa ife xikola mwezi wa Setembro wa caka 1967, ine,  Heinrich Dehnbostel, pabodzi na Claude Lindsay, taenda ku Kinshasa, nzinda ukulu wa dziko ya Kongo.

Pidafika ife ku Kinshasa, tapfundza Cifransa miyezi mitatu. Buluka penepo taenda na ndeka ku Lubumbashi, nzinda wakuti kale ukhacemerwa Elisabethville. Nzinda unoyu ukhali kunterero kwa dziko ya Kongo, cifupi na madire a Zambiya. Ife tafuluka mbatienda kakhala panyumba ya amisionaryo yakuti ikhali pakati pa nzinda.

Mbuto zizinji za ku Lubumbashi zikhadzati kumwazwa mphangwa. Tadzumatirwa thangwi tikhali akutoma kumwaza mphangwa zadidi kuna anthu azinji a m’mbuto zenezi. Mu ndzidzi wakucepa, ife takhala na mapfundziro mazinji a Bhibhlya akuti nee tikhakwanisa kupfundza nawo onsene. Ife tikhamwazambo mphangwa kuna amuna akhaphata basa mu utongi peno kuna apolixa. Azinji akhalemedza kakamwe Mafala a Mulungu na basa yathu yakumwaza mphangwa. Anthu azinji akhalonga Ciswahili, natenepa ine na Claude Lindsay tapfundzambo cilongero ceneci. Mwakukhonda dembuka, ife taphembwa toera kuphedzera mpingo wa cilongero ca Ciswahili.

Maseze tatsandzaya na pinthu pizinji, ife tathimbanambo na pinentso. Kazinji kene ife tikhathimbana na anyankhondo akuledzera peno apolixa aukali akuti akhatipambizira pinthu pyakuti nee tikhapicita. Ntsiku inango, pikhacita ife misonkhano n’nyumba ya amisionaryo, apolixa akuti akhali na mfuti abwera mbapita nyumba, pontho atikwata mbatiendesa kupolixa. Kweneko iwo atikhalisa pantsi mpaka ndzidzi 10 wakumasiku, buluka penepo atisiya.

 Mu caka 1969, ine ndakhazikiswa ninga muyang’aniri wa cisa. Mu cisa ceneci, midzidzi inango ndikhafamba nsindzo wakulapha, m’matope na m’misitu ya ku Afrika. Cisa cinango cidacedzera ine, pakhali na nkhuku yakuti ikhagona na anapiye ace pantsi pakama yanga. Cipo ndinaduwala kundilamusa kukhacita iyo namacibese thangwi ikhalira namacibese kakamwe kunja mbakudzati kuca. Ndisakumbuka ndzidzi ukhaotha ife moto namasiku pabodzi na abale mbiticedza pya undimomwene wa Bhibhlya.

Cibodzi mwa pinentso pikulu pidathimbana na ife ndi cakuti pakhali na anthu akhalonga kuti ndi Mboni za Yahova, mbwenye akhaphedzera nsoka wa Kitawala. * Anango a iwo abatizwa mbakhala akulu a mpingo. Mbwenye abale na alongo athu akukhulupirika nee atawira kupeuswa na ‘miyala ineyi mikulu yakubisalika.’ (Yuda 12) Mukupita kwa ndzidzi, Yahova abulusa anthu anewa mu mpingo, buluka penepo anthu azinji kakamwe atoma kupita mu undimomwene.

Mu caka 1971, ndaphembwa toera kutumikira pa Bheteli ya Kinshasa. Ine ndikhacita mabasa mazinji ninga kutsalakana matsamba, kucita phembo yamabukhu na mabasa anango. Pa Bheteli, ndapfundza kuti ndinatsalakana tani basa yathu mu dziko ikulu yakuti mabasa anango nee akhafamba mwadidi. Midzidzi inango, matsamba akhatumiza Bheteli akhamala miyezi mizinji toera kufika m’mipingo. Nkandzo ukhali wakuti ndeka zenezi zikhasiya matsamba m’mabote akuti akhatcerera masumana mazinji. Mbwenye, basa ikhacitwa mwakukhonda tsalakana pinentso pyenepi na pinango.

Pinthu pikhandidzumatirisa ndikuona abale akhakwanisa kucita misonkhano mikulu, maseze nee akhali na kobiri izinji. Iwo akhatapa mataka a paculu toera kucita platifomu, pontho akhatema misengere na mitete toera kucita mapfufu. Iwo akhaluka makhangala a mitete toera kucita meza na mipando. Nakuti nee akhali na maperego, iwo akhasongola pimiti toera kukhoma napyo. Ine ndikhadzumatirwa kakamwe kuona abale na alongo mbaphatisira maluso awo toera kucita basa ineyi yakunentsa. Ine ndikhaafuna kakamwe. Ndaona kuti ndinaatsuwa kakamwe pidadziwa ine kuti ndinaenda katumikira ku mbuto inango.

Mu caka 1974, ndacinjwa toera kuenda ku Bheteli ya ku Nairobi, Keniya. Ife tikhali na basa izinji toera kucita, thangwi Bheteli ya Keniya ikhatsalakana basa yakumwaza mphangwa m’madziko khumi akuti anango mwa iwo basa yathu ikhakhondeswa. Kazinji kene ndikhatumwa toera kucedzera madziko anewa, makamaka dziko ya Etiopya, abale athu kweneko akhatcingwa, pontho akhathimbana na pinentso pizinji. Azinji a iwo akhatsalakanwa mwakuipa, kufungirwa nkaidi, pontho anango akhaphiwa. Mbwenye iwo apirira mwakukhulupirika thangwi akhali na uxamwali wakuwanga na Yahova, pontho unango na ndzace.

Mu caka 1980, ndatsandzaya kakamwe pidamanga ine banja na Gail Matheson wa ku Kanadha. Ine na Gail tikhali turma ibodzi ene Kuxikola ya Jiliyadhi. Ife tikhacedza basi ene mukuphatisira matsamba. Gail akhatumikira ninga misionaryo ku Boliviya. Pidapita pyaka 12, taonana pontho ku Nova York. Mukupita kwa ndzidzi, ife tamanga banja ku Keniya. Ine ndisapereka takhuta kakamwe kuna Gail thangwi ali na maonero auzimu, pontho ndzidzi onsene asakomerwa na piri na iye. Iye asapitiriza kukhala ndzanga wakufunika, pontho asandiphedza kakamwe.

Mu caka 1986, ine na Gail, tacinjwa toera kutumikira ninga muyang’aniri wa cisa, pontho mu ndzidzi ubodzi ene ndikhaphata basa na Komiti ya Filiali. Basa ineyi yakucedzera mipingo, ikhaphataniza kucedzera madziko akhatsalakanwa na Bheteli ya Keniya.

Ine ndisakumbuka masasanyiro akhacitwa toera kucita nsonkhano wa gawo ku Asmara (ku Eritreya) mu caka 1992, pontho mu ndzidzi unoyu basa yathu nee ikhakhondeswa mu cisa ceneci. Mwakutsukwalisa, tagumana nyumba ikulu yakuti nee ikhadamangwa mwadidi. Ntsiku ya nsonkhano, ndadzumatirwa kakamwe pidaona ine kuti abale asasanyira mwadidi nkati mwa nyumba ineyi toera kulambira Yahova. Mabanja mazinji abweresa nguwo toera kubalikisa,  pontho mwaluso iwo aphimbira makhundu onsene akuti nee akhali mwadidi. Tonsene akukwana 1.279, takomerwa kakamwe na nsonkhano unoyu wakutsandzayisa.

Kutumikira ninga muyang’aniri wa cisa akhali macinjo makulu kwa ife, thangwi tikhafunika kukhala m’mbuto zakusiyana-siyana masumana onsene. Ulendo unango tafikira panyumba yadidi kakamwe dhuzi na bara. Mbwenye ulendo unango tafikira panyumba ing’ono yakucitwa na malata yakuti ikhali ya anyabasa, pontho ikhali kutali na cimbuzi. Mbuto zikhatumikira ife nee zikhali cinthu cakufunika kakamwe, mbwenye pinakumbuka ife ndi basa yakumwaza mphangwa ikhacita ife pabodzi na apainiya na amwazi mphangwa aphinga. Pidacinjwa ife mbitipaswa basa inango, tasiya axamwali azinji akuti tisaatsuwa.

Kunkhomo kwa caka 1980 mpaka kutoma kwa caka 1990, basa yathu yatawiriswa m’madziko mazinji akhatsalakanwa na Bheteli ya Keniya. Na thangwi ineyi, Mabheteli na maofesi mazinji amangwa m’mbuto zenezi. Mu caka 1993 tacinjwa toera kuenda katumikira ku ofesi ya ku Adis-Abeba, Etiopya. Pakumala pyaka pizinji mbakatumikira Yahova mwacibisobiso, cincino abale atawiriswa toera kuntumikira mwaufulu.

Yahova apasa nkhombo basa yathu ku Etiopya. Abale na alongo azinji akutumikira ninga apainiya. Kutomera mu caka 2012, amwazi mphangwa akupiringana 20 purusentu asatumikira ninga apainiya a ndzidzi onsene. Kusiyapo pyenepi, abale azinji aenda m’maxikola a utumiki wa Mulungu, pontho gulu yathu yamanga Nyumba za Umambo zakupiringana 120. Mu caka 2004, banja ya Bheteli yafuluka mbienda kakhala ku Bheteli ipswa, pontho pa mbuto ineyi pamangwambo Nyumba ya Misonkhano, natenepa abale atsandzaya kakamwe.

Mukupita kwa pyaka, ine na Gail tacita uxamwali na abale na alongo azinji ku Etiopya. Mwandimomwene ife tisaafuna kakamwe thangwi iwo ndi akukoma ntima na aufuni. Cincino ife tisathimbana na nyatwa za ungumi, natenepa tacinjwa mbatienda ku Bheteli ya Europa Central. Kuno abale asatitsalakana mwadidi, mbwenye tisapitiriza kutsuwa axamwali athu akufunika a ku Etiopya.

Ife taona tekha kuti Yahova asakulisa tani basa yace. (1 Akor. 3:6, 9) Mwacitsandzo, pidatoma ine kumwaza mphangwa ku Ruwanda kuna anthu a ku Kongo akuti akhaphata basa mun’godhi mu dziko ineyi, ku Ruwanda nee kukhali na amwazi mphangwa. Cincino mu dziko ineyi muli na abale na alongo akupiringana 30.000. Mu caka 1967, mu dziko ya Kongo (Kinshasa) mukhali na amwazi mphangwa akukwana 6.000. Cincino mu dziko ineyi muli na amwazi mphangwa akukwana 230.000, pontho anthu akupiringana miliyau ibodzi agumanika pa Cikumbuso mu caka 2018. M’madziko onsene akhatsalakanwa na Bheteli ya Keniya, cincino muli na amwazi mphangwa akupiringana 100.000.

Pyaka pyakupiringana 50 nduli, Yahova aphatisira abale azinji toera kundiphedza kupita m’basa ya ndzidzi onsene. Maseze ndiciri wakugopa, ndapfundza kunyindira Yahova mwakukwana. Pidandicitikira ku Afrika pyandiphedza toera kukhala wakupirira mbanditsandzaya na pinthu piri na ine. Ine na Gail tadzumatirwa na kutambira alendo kukhacita abale na alongo, kupirira nyatwa zizinji na kunyindira kwawo Yahova. Ndisapereka takhuta kakamwe kuna Mulungu thangwi yakupangiza kukoma ntima kwace kuna ine. Mwakukhonda penula, Yahova andipasa nkhombo zizinji kupiringana zikhadikhira ine.—Masal. 37:4.