MWAKUBVERANA na Mwambo wa Mose, madjiwa peno nkhangaiwa zikhali zakutawirika kuna Yahova ninga ntsembe. Mwambo ukhalonga pya ntsembe, mbalame zenezi ziwiri ndzidzi onsene zisalongwa pabodzi pene. Ingasoweka ibodzi inango ikhaphatisira pa mbuto ya indzace. (Lev. 1:14; 12:8; 14:30) Thangwi yanji pyenepi pikhali pyadidi? Thangwi ibodzi ndi yakuti pikhanentsa toera kugumana madjiwa. Thangwi yanji?

Madjiwa asakhala m’makhundu onsene a Izraeli m’miyezi ya malimwe. Pyaka pyonsene pa mwezi wa Outubro madjiwa asaenda m’madziko akupisa, mbabwerera angaona kuti ndzidzi wakupisa uli cifupi na kufika mu Izraeli. (Nyimbo Ikulo 2:11, 12; Yer. 8:7) Natenepa pyenepi pisabveka kuti mu ndzidzi wakale pikhali pyakunentsa kakamwe kuna Aizraeli kupereka madjiwa ninga ntsembe mu ndzidzi wa khoni.

Mbwenye nkhangaiwa nee zisabuluka kazinji kene, mbazienda m’madziko anango, pontho zikhagumanika mu Izraeli ndzidzi onsene wa caka. Kusiyapo pyenepi nkhangaiwa zikhafuiwa. (Onanimbo Juwau 2:14, 16.) Bukhu inango inalonga pya pinyama na miti inalongwa m’Bhibhlya (Bible Plants and Animals) yalonga: “M’pisa na m’mizinda ya ku Palestina anthu akhafuya nkhangaiwa. Pontho pa mudzi ubodzi na ubodzi pakhagumanika nyumba peno mphako ya nkhangaiwa.”—Onanimbo Izaiya 60:8.

Yahova apangiza kuti ndi wa maonero adidi, pontho ali na ufuni thangwi yakutawira mbalame zakuti Aizraeli akhakwanisa kuzipereka pa caka.